滙豐銀行嘅商業理財用戶一直都只可以用保安編碼器登入商業網上理財服務，對於好似我呢類成日唔記得帶嘢，又只係想登入check下數嘅大頭蝦來講，真係有啲唔係太方便。

不過近期佢哋嘅商業戶口流動應用程式「Business Express」就推出咗「流動保安編碼」嘅功能，今日就帶大家睇下！

要用到呢個功能，首先你要下載及啟動「HSBC Business Express」呢個手機應用程式。

當你按指示綑綁咗你登入網上商理財嘅用戶到手機之後，你就可以去「更多、「設定」、「我的裝置」、再揀「啟動流動保安編碼」、「立即啟動」、之後再按示用現有嘅保安編碼器驗證、

再設定一個用嚟啟動「流動保安編碼」嘅密碼就完成啟動嘅程序喇！如果你使用iOS平台，仲可以啟動埋 FaceID 或者 TouchID 生物認證登入！

好喇，試下用先。首先去到登入商業網上理財嘅網頁，之後按正常嘅程序輸入你嘅用戶名稱，之後就揀「HSBC Business Express app」、輸入網上理財密碼，

之後再確認用流動應用程式認證，按「Send Notification」、之後我手機就收到登入認證通知，按入去就睇到登入嘅詳細資料，我就用 FaceID 確認就可以成功登入，

以後只要有手機喺手，就可以登入同埋操作轉帳俾公司名下戶口同埋指定第三方口嘅功能喇！不過留意，同個人理財服務唔同，Business Express 並唔可以取代保安編碼器，有部份嘅功能仍然要用傳統嘅保安編碼器先用到

《Z世代達人》
麥卓華

最新嘅科技資料、潮流玩意，都有《Z世代達人》麥卓華到處搜羅送到你面前！

Wechat對於大部份人來講，都只係其中一個常用嘅即時通訊軟件，同埋諗起近年流行嘅微信支付。你又有冇諗過， WeChat都可以同你公司嘅商務網上理財拉上關係呢？滙豐銀行就推出咗透過微信平台綁定私人帳號嘅商務理財服務，點玩法？今日就同大家睇吓！

因為保安嘅理由，以往要登入商務理財戶口，除咗要一般嘅用戶名稱同埋密碼之外，仲要透過保安編碼器輸入隨機密碼，先至可以成功登入。有時你淨係想查吓公司戶口結餘或者有冇人轉帳俾你，下下要用到保安編碼器，其實都幾麻煩。

要使用呢個服務，你首先要喺微信嘅頁面搵到滙豐香港商業理財嘅官方帳號，或者你直接掃描滙豐提供嘅QR code都可以。搵到官方帳號之後，就要開始綁定戶口嘅程序，佢首先會提示你輸入網上理財戶口嘅用戶名稱，之後就要輸入你嘅私人密碼同埋保安編碼器嘅隨機密碼，跟住揀埋戶口入邊你想綁定嘅戶口，程序就完成㗎啦！
完成左綁定嘅程序，我哋就試吓用呢個服務呀！

你只要去到滙豐香港商業理財嘅對話頁面，下面就有唔同服務嘅選項。主打嘅就係銀行服務啦。等我試吓選擇戶口結餘先，我公司戶口嘅結餘，好似一般訊息咁，即刻顯示咗出嚟啦！比以往要用保安編碼器登入簡單得多。除咗查詢戶口結餘功能之外，亦可以睇到匯入款項同埋簽帳卡嘅結餘。當然啦，轉帳或者其他高風險嘅交易項目你都仲係要透過網上理財去處理架！

除咗頭先介紹過嘅銀行服務之外，頁面仲提供咗虛擬助理嘅查詢服務同埋分行地址等等嘅資料。以後就唔好再話WeChat淨係一個即時通訊軟件咁簡單喇！

《Z世代達人》
主持：麥卓華