【龔成問答信箱】（Q15201-Q15220）

Q15201：

龔sir.睇左你幾本書..得著好多..諗通左好多..真系要多謝你..遺憾就系之前一路就吾岩時間去上你堂..！

想請教一下點樣可以容易啲判斷一隻股票既合理水平？

我跟住你教既方法..系過年前睇中左*1137*.. 4.3既時候入手..長遠點睇？

終於報左名上你堂..期待！

龔成老師：

要判斷一間企業的合理水平，就要為企業進行估值，但這不是一個容易的過程，因為就算在我的股票班，都要講約5小時，因此好難在這裡三言兩語講到。

簡單來說，就是為企業的業務價值與資產價值進行計算，有了合理的估值後，再比較現價，就可以知現價平貴。

至於香港電視（1137），這是有潛力的股票，業務增長快，行業有前景，不過，在財務數據上較弱，未有似樣的盈利，沒有估值的基破財務數據。因此，這企業估值會比較難，同時市場對佢的價值睇法不一，結果就是，股價會大幅波動。

如果你最初打算長線的話，就持有，股價波動會有心理壓力，但這是投資者要克服的。如果你本身有較多貨，可以在有一定升幅時賣出部分。

5月見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15202：

龔sir, 上年上完你股票班之後，一直儲錢等大跌市依個機會， 宜家想等到價格好吸引先分注入不同優質股， 想請教你的意見：

－ （9988） 阿里爸爸
－ （27）銀河娛樂
－ （388）港交所
－ （2388）中銀香港
－ （12） 恆基
－ （2318） 中國平安
－ （3）煤氣
－ （66）港鐵
－ （2800）盈富

上年我用左2成資金：買入煤氣，港鐵，盈富 & 中銀，所以今次大跌市主要想用8成資金買入：9988，27，388， 12 & 2318，當中9988，27 &388會重點會多d股數。

買多d 9988係因為覺得佢有大潛力增長， 有長線持有的價值；買27係因為覺得賭業股波幅大，可以待幾年後升得好高的時候就買出 （e.g. 2018試過上到$70 高峰）；而買388又係等熱炒時期賣出。而餘下股票就長線持有。

我選擇依個組合係因為當中擁有不同行業既股，而當中既股都係行業中最有實力／潛力的企業。請問以我24歲年紀， 以上組合會否過份進取？非常感謝！

龔成老師：

你的方向正確，之前大市一直唔算平，最多只是合理區，我地入市的力度不強，之前應該儲落一定的現金，現時大市開始有吸引力，雖然我地唔知中短期走勢，但在長期角度，是買入優質股長線持有的機會。

但由於大市十分波動，買入時要分注，慢慢運用，同時買入後仍要有現金剩，無人知會跌到幾多。

你的策略正確，選股無問題，你可以運用之前的現金，好好把握這次的機會，分注買入。上述都是優質股，適合你的，你已經可以開始進行，唔算進取。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15203：

龔成老師：你好，我是投資初哥，29歲，月入約四萬，每月可投資的金額約兩萬元，平常都有投資盈富、長建及中銀，有留意到很多人投資美股，或者一些美股ETF，如你都有提及的 3140。

我也有翻查資料看看，發現3140息低，股價不會大幅升跌，成交量低（為何香港人不太買ETF除了2800？），如買左之後會否難沽出？

除此之外，既然我平常已定期買開香港的股票（如上述提到的），那是否仍然需要買3140? 如建議投資，原因是甚麼？

想分散投資，等股票不需太集中係中國市場？ 感謝！

龔成老師：

領航標普五百（3140）的股息的確不高，但投資這基金，著重的是增長力。相信佢長遠仍有平穩增長力，因為佢就是追蹤最強類別的美股。

成交低的確有少少影響，這會令你買賣差價可能有時有點闊，不過，只要你長線投資，影響就會相對較少。

香港人太愛短炒，而ETF是不適合炒的，因此，這些基金不太受香港人歡迎。

你可以投資3140，作為分散風險的作用，因為可以令你的組合，更為全球化。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15204：

龔Sir，想問下，現時9成按揭去到最高800萬，如要買800萬的樓，首期要80萬，那麼雜費預40萬會足夠嗎？即total$120萬（不計裝修傢私）
謝謝喔！

龔成老師：

$800樓印花稅為3.75%，即是$30萬，經紀佣金一般為1%，即是$8萬，連用其他雜費，你預大約雜費要$40萬。

因此，你預$120萬是基本的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15205：

老師你好想問下你意見，本人岩岩畢業出黎做野冇耐，月入18k，想以增值為主
打算每月月供$5000係以下股票 :

823@1000 2800@1500 12@1000 2@1500
想知呢個組合會唔會太保守?定係將資金集中供某d股會比較好?

另外本人有約40k資金打算黎跌市時買入長遠較有實力既股票，有冇值得留意既股?
唔該老師!

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

就上述的選股來講，都是有質素，平穩增長型的股，基本上無問題。其實已經可以進行。

現金$4萬方面，暫時可持有現金，等機會，唔好心急，因為大市只是合理區，未算平宜區。你可以留意太古地產（1972）、希慎興業（0014）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15206：

阿Sir，有個關於月供0388港交所、0700騰訊嘅問題想請教：

觀察近日成交價，0388市價已經去到昂貴區（假設$190-$240合理區），0700市價亦距離合理/昂貴分隔線好近（假設$305-$385合理區）。

喺呢個環境下，需要減少月供金額、或者暫停月供呢兩隻股票嗎？

而且，留意到近期並冇對0388、0700利好嘅消息，顯得呢啲市價升高得唔合理，同時恆指升破28000亦都算高，所以我有諗有冇需要暫時賣出呢啲股票。

而家市況去到應該賣出持有股票嘅熱度嗎？
謝謝。

龔成老師：

港交所（0388）的確過了合理區，但現時只是略略貴的水平。在這水平，唔會大手入，但如果是優質股，以月供的模式進行，其實仍是可以的，除非你每月供的金額好多，就要減少少。

至於騰訊（0700）都有類似的情況。

不過，如果一隻股票有質素，有增長力，其實在月供的角度，就算持續都無問題，除非到了明顯貴的水平。

現時恆指，只是合理區中上部，未貴。市未熱。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15207：

老師，想問你清唔清楚現時支付業務的獲利模式係點？
像支付寶等。

龔成老師：

支付寶提供的支付，對消費者來說是免費的，除非通過信用卡等信用產品付款，如果在呢種種情況下，支付寶基於銀行向其收取的相關費用向商家收費。

另外，商家可以從第三方合作網站獲取站外流量，淘寶商家還可以購買高級店舖軟件幫助升級、裝飾和管理其網上店舖，成為往後的盈利。

簡單來說，就是利用一些延伸的模式去賺錢，通過同銀行及商家等分作，運用巨大的客戶基礎。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15208：

龔成老師,你好!想請教

現時按揭成數放寬, $800-1000萬的物業可造8成按揭，連首期,印花稅,裝修等的前置金額約$250萬, 我收入能過壓測可以上會的.

但每月供款達$30,000. 租住同樣單位$20,000 – 25,000 就可以了.

在現金流的角度, 租看來比較化算?

若之後我把這$250萬作5成首期用來買港島細價樓($450萬)收租, 租金約$10,000. 租金收入是大過供款的, 現在按揭利率2.5%. 租金回報4.8% (10,000 X 12 / 2,500,000). 淨回報2.3% (4.8 – 2.5%). 這樣的話我地唔洗將$250萬鎖死作”消費”, 而令資金成為”資產”帶來租金收入. 我們就會有2個物業收租, 自己就租大三房單位自住.

想請教:

1)以上操作是否可行? 有什麼事項和風險要注意嗎?

2)比較以上操作, 8成按揭買800-1000萬的物業來自住方案有什麼可取之處嗎?

謝謝!

龔成老師：

理論上，你擁有兩個細單位再租一個大單位，比起你單買一個大單位自住為好，但好的程度並不算好多。

先講點解好，細單位的租金回報率較高，例如4%，而大單住租金回報率較低，如3%，你以收4%去支付3%，加上現時按揭的利率不高，你的確有利的。

不過，在現實的情況，你要比好多費用，例如放租稅務，雜費等，同時現時細單位的租金回報率，大多不足3.5%，因此，你實際賺到的數目，並不多。而你要處理的雜項管理，會增加左，因此，數目上有少少著數，但並不多。

如果你填寫「個人資產負債表」（你可睇《財務自由行》），你就更清楚。雖然你地有兩個細單位，資產多左，但同時由於租住大單位，負債多左，因此，整體上無你想象般咁有利。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15209：

老師，其實本人打算8-10年後退休。之前只係埋頭在工作上，收入算好，是管理層，但不太懂投資。之前有買吓股票，但不算成功。有幸在FB接觸到龔sir。

覺得時間無多，要好好利用餘下幾年舖排一下投資計劃，整理手上有嘅資金/產。

日日有follow你FB同睇你嘅書，獲益良多！好欣賞你對你嘅工作咁有passion! 排除萬難，一定要achieve到定下嘅目標！

如果我早十年睇到你FB就更好！不過希望依家都唔遲！你要加油呀！幫多啲後生仔早早開始計劃佢哋嘅將來。我好認同你之前講過，為何香港教育沒有教大家投資理財的概念和重要性？這是十分重要的一科！

龔成老師：

對，香港的學校，完全無教學生重要的事，只教學生如何做好打工仔！

好多更加切身的知識都唔教，呢D反而是更重要的知識，理財就是其中之一。所以，見到唔少香港人唔識真正的買樓方法，唔懂得投資。

我出書都係希望可以幫到更多人，認識真正的理財知識。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15210：

Hi, 本人想15年後財務自由, 本身打算投資100萬(分4年350K, 150K,250K,250K), 未有買股票經驗,有上堂, 目標每月有3萬現金,大約7.2M 5里

心目中有股票 : 地鐵(005), 中銀(2388),大快活(0052). 想問用15年時間儲存到7.2M是否可行?可行的話

每年有10 - 15複利應該點樣選擇股票? 每年點樣評估是否合乎目標? 中間是否要加註金額?祝生活愉快.

龔成老師：

先講你現金的部分，如果你未有投資經驗，建議只動用部分，例如$30萬，餘下的暫時持有現金，唔好心急動用。加上現時大市只處合理區，你可以一邊投資，同時留下一定的現金，作等機會之用。

至於每月的$3萬，你可以做月供股票，上述的都可以，仇最好加上盈富（2800），以及考慮多一兩隻平穩增值股，如金沙（1928）、長建（1038）、中銀（2388）、港鐵（0066）、恆基（0012）、港交所（0388）。建立一個更全面的組合，唔好太過集中。

如果你每月投資$3萬，假設回報為10%（要將股息再投資），預期你可以滾存到$1140萬。因此，你的目標是「如何尋找每年有10%回報的股票」，上述的股票，都是企業有質素，有平穩增長力的，你向這方面去選就得。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15211：

龔成老師你好！請問一下由上年香港發生的社會運動到最近政府對武漢肺炎的處理手法，相信或多或少會影響香港和外國投資者對香港政府的管治能力和香港經濟前景的信心，所以我想問老師怎樣看香港股票的核心質素和未來營商環境？

另外我想問下關於投資策略的問題。本人現時20歲，持有的股票都是香港股票，分別是中國生物製藥和福壽園，我明白價值投資的重要性，所以打算作長線投資。

但是由於本人認為香港股票質素可能已經略減和已經持有不少香港股票，所以想同時投資美國股票，我想問在比例上分別大約佔多少會比較適合？

謝謝你

龔成老師：

的確，香港會因這些事件，令我地的優勢減弱，但未至於核心性，信心會慢慢因時間回復的，所以又不用太過擔心。

中生製（1177）及褔壽園（1448）都是有質素的股票，你可以持有，這兩股都是潛力股。不過，你唔能力太集中在潛力股，應該建立一個更平衡的組合。

另外，香港股票仍有質素的，我地一定要從長遠的角度分析，唔需要太比中短期的不利情況影響到。

不過，你建立一個更環球的配置，是可以的，因為有平衡風險的作用。你可以美國、香港、中國，各3分1，已經是一個平衡的組合。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15212：

龔 sir 好啊～我是你的股票班舊生，聽完書一直想投資金沙或者銀娛。

但最近澳門關閉賭場，市場亦都會有一段時間既低沈，咁而家仲入唔入市好呢？

如果入，應該大概咩價位呢？我係一手手買既，亦唔打算買太多，所以想搵個好既價位先買。謝謝～

龔成老師：

澳門關閉賭場、肺炎情況，當然會對佢地有影響，但只是中短期，因此，我地最多只需要在估值上有調整，例如先計算子正常時間的企業價值，然後減去佢中短期損失的部分。

上述兩間企業的優質度，並不因而改變，因此，我地只要考慮平貴因素，就能分析到是否投資。這兩股現時處合理區，有長線投資價值，但如果你唔打算入太多，只打算入一注資金，就最好等回落8%以上才考慮。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15213：

龔sir 你好，我35歲月入扣完mpf 27k，剛購入居屋每月供13k。另有60萬現金，以及hsbc/中人壽股票共8萬。

想問我可點運用60萬現金增長資產分擔供樓壓力。因現在市況令收入有可能變得不穩定。感謝！

龔成老師：

你已有物業，在財富分配上，應該增持翻多D股票資產，令組合更為平衡。

35歲，仍是財富增長的年齡，你可以集中投資平穩增長股。但如你本身比較保守，想較偏重於現金流，則可以投資「平穩增長股+收息股」。

你這刻可以動用$30萬，分注投資優質股，餘下則暫時持有現金，等機會投資。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15214：

龔成你好 請問岩岩開始學月供股投資，應該先買你邊一本書好呢?謝謝

龔成老師：

對初階投資者來說，月供是很好的做法，記得要長期進行，唔好被中短期的股價上落影響到。

你可以睇《80後百萬富翁》《股票勝經》。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15215：

你好龔成，我有問題想問你意見，我負債20萬，仲有8個月就還哂，每個月扣哂所有開支，只有8,000可以投資，而且我今年想買樓，係咪唔好做月供股票？

龔成老師：

對，你唔應該月供股票。

因為我地投資股票，原理就是買入企業，等企業成長，8個月只是一個短期操作，企業不夠時間成長，只能睇到時的市況而影響你有無賺蝕，這一定會為你帶來風險的。

所以，你應該集中儲現金，如果本身有需要賣出股票套現，就要在這幾個月，在合適時機賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15216：

龔成老師你好！我是你的小粉絲，小弟在讀過80後百萬富翁後十分欣賞你的致富頭腦和知識

小弟今年29歲，我的目標是2021-2022年買入第二層物業收租，奈何上年有財演話維他奶的合理價為$48，故用了部分錢在$41買了兩手維他奶，雖然它是一間穩定增長的好公司，但半年間已由$41下跌至$30水平。

以FY18-19為例子，因為純利的增速不及預期，導致維他奶的合理估值下跌，加上實際盈利下跌，致使股價於公怖業績當日大跌並開始了漫長的跌浪。

以我所知FY19-20年度，人民幣下跌並國內經濟轉差，國內對香港人乃至香港的產品仇視，應該會影響維他奶在2020年6月公怖的盈利。問題如下：

1)維他奶雖然是自由現金流按年增長，但DCF模型包含很多不同的假設，請問龔成老師是否建議我們使用DCF作估值呢？

2)如果20年6月業績公怖，股價再次重覆上年的模式，請問我應否在業績公怖和股價大跌(這是假設，我不想這個發生)重新用公怖的EPS重新計算合理價

如果仍是高估便於第二天沽出手上的所有維他奶，並於將來股價在新的合理價以下有一定安全邊際才買回？

3)你認為維他奶現價合理嗎？合理價大約在那裏？

4)你認為當東莞的新廠房正式投產，產能提升1倍，以維他奶在國內供不應求的情況下，股價有機會升4倍至破$100以上的水平嗎？

問題比較長，希望收到龔成老師的回覆，祝老師桃李滿門，能讀到老師寫的書實在是香港讀者之福！

龔成老師：

1）如果你有睇幾年前出的《50優質潛力股》，你會見到我當時分析的維他奶（0345）當時的合理價是$20以下，而當刻的股價只是$15。

這企業有質素，但增長力減左，$25以上仍是略貴。

我在估值時，會同時用幾種估值方法，無一種方法是完美的，有較多方法作配合，分析會更為立體。

2）你唔到分析「股價重覆上年的模式」，這是「預測股價」，是錯誤的投資方法。

反而，我地只會因應現時的平貴度，作投資策略的調整。

3）這刻$25以下會較合理，最多$28。

不過，如果企業的質素增加，以及增長力理想，企業價值會有所調高的。

4）比較難，產能增加當然利好企業。但企業的產品銷售情況，才是核心，如果市場的增長動力不強，就無作用。

這股有質素的，但要耐心D先守到，現時好睇佢之後的市場發展如何，這將決定了這股的增長力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15217：

老師 你好
我想問下 如果公司出左花紅一萬

我想全部用黎買股票
我應該投資落邊隻股票比較好
因為本金有限

龔成老師：

如果你想有基本的增長力，可以考慮盈富（2800）（本金約$15000），另外，亦可考慮，領航標普五百（3140），這都是最穩健，能平衡風險的投資。

如果你想收息，可考慮置富（0778）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15218：

老師，本人現持有渣打多年，一直在月供股票的名單中，平均價約100元左近，但一直未見起色，你對他前景有什麼看法，有需要換馬嗎

龔成老師：

渣打在多隻銀行股中，算是質素比較弱的一隻，你可以睇睇佢的財務報表。近5年中，有2年出現虧損，另外有2年的盈利不太好。

企業質素只是一般，持有的價值不算高，但又未到劣質。這類股，不應佔組合的比例太高，你預佢之後的股價，都只是平穩，最多有少少增值，要上翻去$100不易。

如果持有較多貨，可以考慮賣出部分，餘下再守。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15219：

你好 請問你點睇九毛九(09922)? 而家入貨定趁再低d先入？

龔成老師：

九毛九（9922）這類半新股，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，雖然中短期因肺炎會轉弱，但長期仍不差。不過整體上，現價仍少少貴，雖然這股都有長線投資的價值，有貨就持有，無貨，就唔太建議大注投資。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15220：

老師，請問會否計畫再來澳門開班？會否在澳門開授進階班？

龔成老師：

預計今年會在第三季，開基礎班，至於進階班，相信要遲多1、2年，先會在澳門開。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q14821-Q14840）

Q14821：

龔Sir 你好 想請教 我成日聽到出面好多聲音話香港已玩完 已經冇咩投資價值 叫人唔好再買港股 你點睇

龔成老師：

香港中短期一定會弱，貿戰、社運、肺炎，都是對香港有相當的影響，現時一次過出現，對香港影響好大，但這些影響並不是「核心減去香港的優勢」，只是經濟層面，在週期中令香港弱。

有好多香港的獨有優勢仍在，例如低稅、金融人材、法規等。

因此，香港唔會玩完，但就會面對一段時間的弱。

當然，香港及中國最高經濟增長的年代已過，就算肺炎等不利因素過去，香港慢慢好轉，也不是高增長，只是平穩型。

至於港股，當中仍有好多有質素的股票，睇下識唔識得選股。

------------------------------------------------

Q14822：

你好，龔成大師，小弟最近有置業意向，但心大心細，首期可以買到一個迷你新屋或大少少甚至三房的舊屋，應如何選擇？

龔成老師：

如果你本身無物業，而長遠又有置業的需要，你就可以行這一步。

香港樓正在回落，雖然我唔知幾時見底，但我相信今次樓市唔會跌太多，只要香港經濟穩定下來（不用特別好），香港樓已會慢慢向上，因為始終長期供應不足。

選擇方面，新樓不太建議，因為往往會支付較大的溢價，如果舊樓樓齡唔算太舊，都可考慮。

------------------------------------------------

Q14823：

老師，我想請問如何去分析股票價格遠超當中的企業價值？

龔成老師：

首先，你要懂得計算企業的價值，一般來說，企業價值由「資產價值」與「業務價值」組成，你要用一些企業的估值方法，去自行計算出這個價值是多少。

企業估值是一個較深的課題，但卻是重要的課題，在我的股票基礎班，都要講約5小時，因此，好難在這裡三言兩語講到。

當計算好企業估值後，就可以比較現時股價，如果股價比估值高好多，就是股價遠超價值，是賣出的時候。

------------------------------------------------

Q14824：

龔成老師:看了你推薦選股勝經,50倍升股,很有得着！

引用巴非特的投資法,很值得好好地學,年報勝經缺货,迟D再買,這次想你幫下我家姐

家姐買了十几年股票,一直虧蝕左几十万,我没有認識你之前也虧蝕左十几万,感到很心痛,她喜歡炒上落,平保94元買入,93元蝕價賣出去高追價67,3入瑞聲科技

我担心她這樣投資風險高,麻煩你被意見,另外阳光房托,信義光能現價可以買嗎?万分感謝

我己推薦她報讀你的股票班

龔成老師：

如果佢唔改變佢的投資模式，無人可以幫到佢。

我只可以話，炒炒賣賣這種方法，長遠計，一定是蝕錢！點解我知？因為我過往做了10年銀行、證券行，見證了大量散戶的投資成績，佢這類人，我見好多，絕大部分都是蝕錢的。

另外，全球最賺錢的人，巴菲特，佢的方法就是「長線持有優質股」，佢反對人短炒的，因此，不要再短炒了！

平安（2318）、瑞聲科技（2018）都是有質素的，但你家姐要改變短炒模式。瑞聲持有無問題，有得守。

我會強烈建議佢月供股票，以累積股票，只入不出的概念進行，盈富（2800）及其他優質股都可以。陽光（0435）無問題，信義玻璃（0868）注碼不能太多。

------------------------------------------------

Q14825：

龔老師你好，早排睇完《股票勝經》，知道要先揾優質股，再揾佢ge價值係邊，等待價位到合理或便宜時分注買入再長線投資。

但我想問點解唔等到佢便宜時先買入，而係合理時都會買入？

書中講到股市會有周期，咁佢必然會跌到便宜區，咁唔係應該等佢便宜時先買入，係佢價位岩之前儲一筆錢。

同埋我仲未把握到選股能力以及估值能力，如何將企業價值和股價作對比，我可以從邊到去學習呢？打算再看老師的選股勝經希望學習更多知識。

龔成老師：

我地會以企業估值的模式，計算企業的資產價值及業務價值，從而得出企業價值，然後得出平宜/合理/昂貴，這3個區域。

首先，集中投資優質股，這是大前題，下一步，就要考慮怎樣買入。

如果能在平宜區買入，當然最好，不過，無人知佢股價會唔會跌到去這裡。雖然股市有週期，但無人能準確地預測週期的具體情況，同時，無人能保證該股一定能到達平宜區。

有不少優質股，去到合理區的中下部，已經有大量價值投資者買入。

因此，我會建議如果股票優質，合理區都可買入，不過，力度不會最強，要一邊買入，一邊留現金，買入時最好分注。如果到了平宜區，就大手買入。

至於估值方面，你可以睇《年報勝經》都有講少少，而巴菲特相關的書，都有讀。

企業估值是一個較深的課題，但卻是重要的課題，在我的股票基礎班，都要講約5小時，因此，好難在這裡三言兩語講到。

------------------------------------------------

Q14826：

呀sir 636嘉理物流 準備整一個全自動化物流倉，好似幾有前景香港暫時冇其他公司做呢樣野，你點睇？

龔成老師：

嘉里物流（0636）本質不差的，科技不斷進步，相信佢這是一個能有效提高效率的投資。

我相信是正面的，不過，香港物流最高增長的年代已經過去，之後只會平穩。因此，我相信佢整體不差，但未必能視為高增長類型。現價合理。

------------------------------------------------

Q14827：

老師，有幾個問題想請教，有勞！

1:有個買樓問題想問，假設我買6百萬既樓，分25年供，每月要比多3千蚊利息，即係供完總共要比90萬利息，其實值唔值?

2:如果我需要拎300萬做首期既情況下，我股票果邊係咪最小都應該要有300萬先岩，咁先做到股樓一齊行

3:想問下，之前維他奶比沽空機構狙擊，其實果d指控咁樣講得出黎，其實就係真事黎?

通常間公司會唔會追究咁樣比人指控?，因為見上次澳優又係咁，結果股價直插，呢d算唔算係入貨時機?

4:想問個難既問題，小弟現在同屋企人住緊公屋，咁日後如果有錢，想買樓，正常我地應該以租供樓，但上網睇過，如果買左樓既人，就唔可以再住公屋，咁既情況應該點做先好，唔住得公屋就放唔到租

龔成老師：

1）最重要是睇「按揭利率」，假設你本身一筆錢，你可以選擇還錢，或投資，如果還錢，就可以慳到當中的利息，如果投資，就可以得到回報。

只要按揭利率不高，而又有一定的回報，那麼，資金就唔應該還錢，而應該投資。你應該從這方向都想資金成本與回報這個問題。

2）我地當然希望做到股樓平衡，但不一定要做到5050的，你可以參考《財務自由行》建議的比例，每個年齡層不同的。

另外，這只是一個方向，就算中短期做唔到，都唔太緊要，只要長遠向這方向進行就得。

3）有時真，有時假。

這些沽空機構的目的，就是預先沽空了這些股票，當佢地發表睇淡的報告，股價向下，佢地就可以獲利。這些報告有時有理據，有時卻是強行講該公司的不是，因此，要小心分析。

4）有樓的人，不能住公屋的，這是條例上規定。當年，我自己都因為資產與物業，而很早已在公屋「除名」。

當然，坊間有人會除名後仍住在公屋，你可以上網找多些相關資料。

------------------------------------------------

Q14828：

20歲仔 今年生埋日21歲 我依家先起步會唔會太遲 我唔想一事無成

投資0知識無從入手 無咩積蓄
好想可以跟你學野

龔成老師：

你絕對唔遲，你已經比好多人行先！

記住，你21歲係黃金年齡，是財富增值的黃金時期，要好好把握，盡你一切一切的力量去儲蓄、投資、學投資知識。

我當年在這年齡，正瘋狂睇書增加知識，盡我一切的方法去儲錢，提高本金，你要好好把握，如果你而家努力，已經比好多人行快左，加油！

首先，多增加理財知識，睇書，上堂。

另外，你這年齡可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

建議你做月供股票，每月$5000。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14829：

本人30歲，打算用3成積蓄作投資，大概80k，投資知識尚淺。

1）本人持有1手hsbc (63.85)及1手阿里(206), 最近呢兩隻都下跌, 可再買1手溝淡嗎？

2）而家個股市都算是其中一個跌市機會，值得趁低吸納嗎？可吸納哪些股會快點見回報呢？咩價位？

3）睇左你好多回答，都係叫人月供股票，多過直接睇好邊隻去買，咩原因呢？月供股票有甚麼需要特別注意呢？

4）最後想問你的課堂是否不可claim可持續進修基金？如報了堂但發現5月無法上堂，可將已付費用留待下次開班使用嗎？

謝謝
補充第一條問題，那何時才決定可沽？

補充第3條問題，月供股票比月供基金回報更理想嗎？

龔成老師：

1）以你的年齡來說，應該著重增值，匯豐（0005）只是收息，增長有限，因此唔應該投資太多。

至於阿里（9988），這是潛力股，雖然現價少少貴，但小注持有無問題，你可以持有。

記住，增持與否不是睇你的買入價、賺蝕、拉低平均價。是睇翻企業質素，以及佔你組合比例是否適合。

如果你現時這兩股已佔了一定的比例，就應該尋找其他股票。

當企業不適合你或無質素，可賣。

另外，貴處於貴的時候，可考慮賣出。

2）投資一定要長線，唔好太著重中短期情況。你可以留意一些反肺炎影響，中短期較弱的股票，只要長線投資，反而是最有值博率的一類。

3）因為月供可以平均買入價，這可以有效減低風險。一般散升都會自行捉低位去入市，可惜，結果是相反的。

只果你有基本的選股能力，思報一般都會比基金好。

4）抱歉，【投資倍升股課程】，並未列入政府的進修基金範圍。

其實，我都有同政府傾過，但政府要求佢將課程內容大改，要改到好學術性，先合符要求。

經過研究後，覺得若大改課程變學術性，實能度將會大大減少。學員只能學到一些理論而唔實用的野。

我認為，學員學到最多野，最能實戰應用，這才是最重要。因此，決定保留原有課程。

如果你付費後，因特別原因而這次無法上堂，都可安排你下次上翻，但就要真的有明確原因。

------------------------------------------------

Q14830：

想問，單日出現某隻股票的大升幅e.g. 升幅去到8-10%，通常係咪一定要係大戶先做到？同埋有咩原因？

龔成老師：

未必的，當中有好多原因。

如果佢本身市值細，只要小小資金已經可以上到一成，不過，要跌一成同樣好易。

如果市值大，就要有較多實質的資金先上到一成。好多時要有較具體的利好因素，先有機會做到，而不是單靠一些小道消息都能做到。

------------------------------------------------

Q14831：

龔成老師 你好呀 我見到你推出進階班 好開心 因為代表有機會再見你！

但想問係咪今年會再開 因為好抱歉 我上次上完你堂就開始投資 暫時帳面值都係正數 仲要唔少嘅正數 好多謝你！

所以我冇足夠嘅流動資金報你嘅進階班 同我仲係學生 可能要儲返幾個月先報到你嘅進階班 所以想知你今年會唔會再開

我知道你的進階班一定好有價值 但目前真係冇足夠流動資金！我會再比心機返parttime

但呢段時間 我都有繼續努力 一星期睇一本書同分析一間企業

龔成老師：

你一直都好努力，我相信你長遠可以累積到一定的財富！

放心，我進階班會再開，暫時目標是一年開兩次。

你的投資有一定的成績，實在太好！你要繼續努力，保持知識進步，財富穩步增值，遲D見！

------------------------------------------------

Q14832：

龔成，我上年持貨到現在iGG,又10.88元開始買貨，買到8元，都有買，平均價9.5幾。你話過買入價自係心理質素

因為iGG有倍升過2至3倍，有一定潛力，本人買股票風險程度跌到一半都不怕，因為iGG上年跌到4.7，我現有1萬股他

我相信管理層講過上年遊戲收入第三季跌在，係因為王國紀元，城堡遊戲，要更新武器，人，所以管理層秋水，用來更生遊戲內容，所以市場上話他業績大跌，還有管理層絶對無吹水

我見到遊戲主打，真係有更生在武器，重有我見今年好多新遊戲出在，不過要看市場上歡迎到，本身iGG海外有一定程度收入客、其實iGG都捨得用資本去出新遊戲

所以他有一定程度潛力，但係股價有波動性比較，不過我相信他今年第一季同上年第四季業績，應該有好轉，現價市盈率應該合理價，你好似講過iGG市盈率上年係4點幾到5點幾市率不貴，謝謝你講解龔成

因為你講過game,有長有短壽命期，如果未來他有新game、好有歡迎到，可能又開始爆升，

我短線看他10幾隻game，好多4分或5分滿星game係App store體，我對他信心強在，謝謝你先

龔成老師：

IGG（0799）本質不差的，但業務波動，我知佢的遊戲不少都受歡迎。

你以生活選股法的模式進行，是正確的方向，這方向可以分析到好多基金經理都睇唔到的地方。你要以一個長期的角度去分析，遊戲貢獻的週期，能否持續有新遊戲。

不過說到尾，業務不確定性較大，你要注意翻注碼。

如果你確認企業質素、前景都不差，就不用理中短期股價，長線持有就得。

------------------------------------------------

Q14833：

想五年內儲五十萬，我每個月儲八千，請問有咩投資推介
謝

龔成老師：

最簡單就是投資優質、穩健、企業長期增值的類別。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以做月供股票，每月$5000。

考慮盈富（2800）$2000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q14834：

龔成老師！我今年已經開始月供股票，每月月供18k，當中10k是盈富，8k是港鐵，然而隔月是月供10k盈富同8k銀娛，如此類推。想請問以上配置有問題嗎？

另外現有大約50 萬現金，中短期未必會用到，目前只放在銀行，可以如何安排？

因你說可投資平穩增值股，那麼該如何投放在股票市場？最後想知道澳門股票班幾時會再開呀！？謝謝老師：）

龔成老師：

澳門月供手續費較貴，你以隔月供股的模式進行，可以。

上述所供的，都是有質素的股票，金額分配亦無問題，你可以保持長期進行。

至於$50萬，要睇你資金的流動性，因為我地投資一定要長期先。你可以將其中的$25萬，投資一些平穩增長股，風險不高，又有增值的能力，盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）都可以。

你可以用分注投資的模式，例如每隔2、3個月投入一次，這就可以。

至於澳門股票班，預期在第三季。

------------------------------------------------

Q14835：

老師, 我已經開始睇緊你ge書, 亦開始左月供3個月. 現時同太太供月供 4萬. 亦好多時都有留意你的post.見到你講.

如果恆指進入 24000 就可以大手買入. 但調轉一諗. 如果恆指去到心中預期高位 (我唔識好多, 但留意多年走勢, 恆指 32000 33000好似好高), 應不應該要減少月供, 減少買入呢?

定唔應該有去估個市幾時係高哩一個心態. 而繼續買入一個恆常金額ge 股票呢? 因為可能當我減少月供時, 個市又會繼續升.

每月 月供金額應該要因應市況調整嗎?

在過往一星期大市都上升，我想策劃下個月繼續月供 4萬。

但很多的股票已經快超出合理區範圍，如果我繼續不改變策略，月供之前的股票，起不是會買了比價值貴的股票，在股市上揚時，月供股票 應該有甚麼策略？ 還是，真的不理高低 繼續購買有增值的股票？還是減供？還是照買4 萬，但供一些還在合理區的股票？

龔成老師：

月供股票是一個長期的策略，我會建議保持進行。

我地將大市與個股分平/合理/貴，目的就是幫助我地的投資策略，以決定入市的力度。

如果在合理區（例如現時），最好有貨有現金，一邊分注入（例如月供），同時留現金等機會。

如果在平宜區，可以大手掃，動用之前的現金。

如果在貴的水平，會停入，甚至賣出。

我地要用平貴去分析，唔唔單單用指數與金額。

當去到貴的水平，要睇下你本身多唔多貨，一般一手手的模式，都會停止，至於月供，可能會減金額，但都要睇到時貴到點，以及你的情況。

當然，要分析平貴並不易，所以對大多數人來說，長期進行月供是最好的做法。

------------------------------------------------

Q14836：

龔成老師好！本人今年剛畢業出黎做野，收入14k，勾除學貸、家用、日常使費，每月月供$4500，儲蓄$3000.

而家月供緊港鐵$1000，長江基建$1000， 中國生物製藥$500，比亞迪$500，中國平安$500，香港電訊$1000.請問這個投資組合有無需要改動既地方。

我既目標係10年內做到財務自主，財富穩定成長。至於每月儲蓄的$3000會用作投資美股。請問我現時的投資組合能做到我的目標嗎？
謝謝～

龔成老師：

上述月供的股票，都是有質素的，基本上可以長期進行，至於金額及儲現金的數，都適合。

不過，你是年輕人，投資可以進取少少，而香波電訊（6823）只是收息股，未必這刻適合你。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，你可以考慮將香港電訊轉為盈富（2800）或其他優質股。

------------------------------------------------

Q14837：

成sir你好,

本人28歲, 早幾年剛畢業既時候, 未有投資概念, 見銀行有多種儲蓄意外/手術/危疾保(供十年保十五年, 十五年後取回103%供款額), 一心諗住當儲蓄用途又可以分散風險, 所以每月都會合供大約$1500:

手術保, 月供$750
危疾保, 月供$450
意外保, 月供$350

後來意識到以上保單的受保期都只係十五年, 所以再買左其他有儲蓄成份的終身危疾及意外保, 所以基本上之前買落果3份銀行保純粹作儲蓄用途

不過讀過成sir作品後, 知道投資產品都係只係會不斷蠶食購買力, 而且如果單純只作儲蓄用途, 以上三份保單根本未能做到, 所以諗緊係咪應該斷保, 放棄所以以供的五萬, 直接將喱每月$1500作股票投資？

我相對想放棄危疾保+意外保兩份, 因為供款時期較短, 現總供了兩萬左右, 無禁浪費

至於手術保, 供款較多而且供左接近四年, 之前亦拎過佢$8000既索償, 所以比較想保留

題外話, 本身已經有供人壽及複息滾存退休儲蓄另加MDF, 防守方面已經穩固, 將會進取投資股票以資產增值

龔成老師：

我地理財，要做到攻守兼備，因此，上述產品作為防守的部分，都有當中的價值。

做好防守部分，餘下資金當然要做好，但做好防守都重要，而你上述每月合共供$1500，並不算多。不過，你話本身已有其他保險，因此，留與唔留，好睇你這幾份的實際需要，因為金額唔算多，就算留都無問題。

如果想清楚無用，先考慮唔供，轉投資股票。

------------------------------------------------

Q14838：

想知道，如果想學習 睇年報，除了報你的課外，如果睇你的著作，係唔係應該睇 年報勝經？

因剛看完，股票勝經，的確係入面獲良多，對基本的智識多了，謝謝老師的教學。

龔成老師：

對，《年報勝經》是針對年報的，你的得著會最大。另外，你可以自行試下到港交所坡露易，下載一份年報，自己試下睇。

------------------------------------------------

Q14839：

你好成哥，想問下roe的問題

其實roe多少與公司搵幾多錢有冇關係？還是係由公司決定分配？

龔成老師：

股本回報率（roe）的公式就是：盈利÷股東權益，所以，一定會同盈利有關的，盈利是關鍵因素。

每年的盈利，由生意、成本等因素決定，當然會有一些會計因素。而企業決定分配的，是派息比率，這會對之後的股東權益有影響。

------------------------------------------------

Q14840：

龔成sir..之前一路有留意788但一路都吾夠膽買.即至高位2.3左右買完後-就一路跌..早陣子跌到1.65就大手買入溝貨...之後見你都有介紹佢.先安心D...請問如果我比D耐性.會有可能上返2.3的高位嗎？？謝謝你

另外.現在供股15000元分別為
5000元3号
5000元2800
3000元66
2000元1211

這個組合有改善需要嗎？
如想供D.1177可以減少以上邊隻既金額呢？謝謝

龔成老師：

中國鐵塔（0788）有質素的，之前有少少炒概念，所以之前估值有少少貴。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理區中上部。

由於這股有發展力，可長線。不過，就唔建議大太注持有，你要平衡翻。

至於月供部分，都是有質素的股票，金額分配亦適合，只要長期進行就得，無問題。如果想供中生製（1177），可以你可以供$2000，煤氣（0003）減$2000就得，這樣已有平衡效果。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13721-Q13740）

Q13721：

Hi龔成老師我見到你之前既post「25歲月入$7萬」好有共鳴，好想同你分享。

我本人今年22歲，dse都冇考就投身美容業，19歲創業，半年前請教你既時候仲係月入7萬多，今日月入10萬多少少。原先想計劃4年後上車但好幸運我係上個月上左車啦！

我有個仲讀緊大學既朋友經常睇我唔起，我自己都知我唔夠自信，睇完你條片真心好多謝你！我覺得令我再多翻啲信心！

龔成老師：

你22歲就有這成績，非常好！

一個人的成功，同佢讀幾多書無關的，你見好多有錢人，都係讀書讀到一半就去創業，因為佢明白，對佢來講，讀書對發展事業的作用有限。

你已行在正確的方向，保持進行就得。

我地要成功，並唔係來自別人的評價，而是我地本身成功，不明白你的人，你不用理會，永遠都係果句，做好自己就得。

其實，我絕大部分的無聊留言批評，從來都唔會理的，永遠唔好比弱者影響你的步伐！集中做好自己就得！

你一定要建立自信，要相信自己，你可以變得更強，以你現時的情況，前途可以好勁，但你要進一步推進自己，進一步相信自己能夠完成好多誇張的目標。

有時，創業者、成功者，多少少瘋狂，是可以的，因為我都是。

------------------------------------------------

Q13722：

老師，我現在月供20000：
66，6千
12 ，6千
2800,6千
3號，4千

還有1萬股788、1萬股386、2千1972。

本人28歲兩小朋友
想找增值股，但股市比之前升左

龔成老師：

你上述所供的，都是有質素的股票，基本上都可以長期進行。但由於煤氣（0003）恆基（0012）為同系，合共金額唔應該太多。

所以，你減0012供$4000較合適，而盈富可以供$8000。

至於現時你持有的股，可以長線持有，無問題。

現時大市處合理區，可以一邊投資一邊留現金，而餘下現金的運用，就是等大跌市時出手。所以，你如果這刻現金較多，就分注慢慢入，唔好大介意小量價位的上升，只要分注平衡就得。

如果現金不算好多，就持有現金先，不用太心急。我地所有野，都是為建立一個長期的投資組合。

------------------------------------------------

Q13723：

龔成老師，你好呀！我最近，終於開始投資股票了。

本人37歲，女，未有家庭負擔，每月收入43k，每月可儲蓄22k 至24k⋯⋯ 其餘20k為俾家用丶租屋、同埋日常開支。

自從最近4年，有好好記帳，去分析自己的開支，就比起10年前的自己，更了解自己大洗之原因。

10之前一直不懂理財，而且不斷去讀書，學畫畫讀Master⋯⋯ 花費很大，差不多是最近2015年1月，才開始理財。

現可以保持住每月個人洗費為$6000內。（但每年會去下旅行2次左右，亦都會花大概5000至一萬元。）

現金有定期存款$52萬 ，$15萬股票，$16萬（2020年11月，可以取回）的人壽保險，$5萬人民幣。

現時本人開始買了少少股票，包括：

由九月起，月供股票 $1.5 萬
2800 / 10000元
0700 / 2000元
0012 / 3000元

在8月、10月有跌市時候，買了：
匯豐0005 / 800x @$56.2
電訊盈科 2800/ 1000x @$26.5
恆基地產0012 / 1000x @$36.2

以上的現金及組合，你覺得如何？

問題：
1/ 我仍希望可以10年內財務自由，做自己喜歡的創作事業，可以嗎？

2/ 又或可以在60歲退休後，每月入有四萬蚊至六萬蚊 passive income ？

3/ 想問現在持有嘅52萬元現金，可有什麼可以最佳的部署呢？

4/ 我應該：繼續keep 返月供，盈富基金10,000$，定係可以，轉型供更多類型的股票？

5/我計過，今年內，或應該可以儲夠100萬元，我想再定下更好的目標。

問題是：當有第一個100萬元的時候，我應否把該資產，變成其他房地產，或者車位投資，是可行的嗎？暫時未有買樓自住的需要（只是很想學習買細價物業，用來投資用）

話說回來，今年八月開始，我才留意到你的介紹股票理財，非常同意我們應該買優質股票，而且應該好好把金錢銀行貨幣，轉為有價值的資產，因為本人一直無任何資產，只是儲現金人士，一直不敢買股票（又因為朋友一般只是每天炒炒股朋友，他們每天忙著all in , all out 想每天賺取股票差價利潤），也令我以前一直感到反感，以為股票是一個賭博遊戲！

這三個月來，很享受每天看你的分享和書籍，讓我獲益良多大開眼界⋯⋯

再次謝謝你，好好休息，感謝老師！

龔成老師：

1）如果你能每月保持儲$22000，並將部分用作投資，不斷累積財富，我相信10-15年後財務自由不難的，只要你合理投資，並在這段時間保持知識增加就得。

2）如果你每月保持投資$20000，保持23年，回報率假設為10%，你到時會滾存到1900萬財富，再將這筆資金，轉為收息股，目標是6%股息，你每月會收到$95000。

3）以你的情況及現時市況，你應該先平穩增值股：例如盈富（2800）、恆基（0012）、銀娛（0027）、港交所（0388）。暫時你可以動用$20萬分注去入。

4）你保持月供盈富是最好的。記住，這是長期策略，唔好轉來轉去。

5）你到時可以將部分資產，轉為房地產類別。

其實我地進行的財富累積，是一個配置過程，股樓平衡都是一個常用的策略，太集中在股票都會有風險，所以都要適當的平衡。但就要睇到時的價格平貴。

------------------------------------------------

Q13724：

龔成老師你好，照你之前所建議，我已經開始投資股票及月供股，我有另一問題想請教，我現有額外資產30萬，想投資股票收息。

心目中有中銀及恆生2隻銀行股票作為收息股，想問以上2隻股票可以嗎？或龔成老師，你有沒有其他建議?
謝謝你

龔成老師：

中銀香港（2388）及恆生（0011）都是可投資的股票，但特性並不相同。

以股息的穩定性，及股價穩定來說，恆生會較好。而中銀則比較波動，不過，增長力就會高少少。所以好睇你本身投資目標，如果想純收息，就恆生。

但要留意，唔建議$30萬只投資一隻收息股，你最好建立一個組合例如有3隻。

------------------------------------------------

Q13725：

最近都看你的fb及50隻股票書系列 , 我剛起步買股票 27歲 ，一年大概存到15-20萬 因為沒什麼資產，因未來收入會一步步上升 打算這兩三年既投資較為進取。

所以我打算月供$3000恆地 $2000未決定 在考慮港鐵？ 煤氣？但盈富和比亞迪及銀娛見老師你都經常推薦 ，主要是什麼原因呢？

還是我只供恆地 其他就一手手買？我現在準備現價入小量709/1515/1881/

未來數月如果1212下跌到$6及
必瘦站目標$2.5入，
中國水務 目標5.5 入

請問我選股部署方面及目標價有沒有什麼問題？ 謝謝你耐心回答

還是1212 應等30/11 佢下年租賃問題先定下來才買？

龔成老師：

你上述所講的，都是有質素的股票，都是可以投資，或長期月供的。

如果你一年能儲到$15-$20萬，建議你這部分，投資一些最穩健，長期平穩增長的股票，至於其他股票，則配置上會較少。

你可以每月月供$8000：盈富（2800）$4000、恆基（0012）$2000、港鐵（0066）$2000。

同一時間，你就保持每月儲現金，然後分析上述的股，那一隻到了平宜區，就投資那一隻，這是最好的策略，可以用一手手的模式去投資。

------------------------------------------------

Q13726：

老師，我想請問全新手可以報老師的股票班嗎？還是需要先閱讀老師的投資書打左底先？

龔成老師：

我的股票班適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

------------------------------------------------

Q13727：

老師，我工作又疲累又急趕，暫冇心力体力参加你的股票班，但我又想學。

另外，月供盈富基金，要去銀行或用網上可以申請，hsbc

龔成老師：

總之，提升知識對我地長遠一定最重要，我每1、2個月都會有股票班，你可以安排較好的時間去上。但就唔好永遠拖延。

如果永遠唔學知識，就永遠無法跳出框框，只會令你情況可能更差，所以盡早學知識都是香要的。

至於月供，每間銀行不同的，有些銀行有比你在網上選擇月供，只要你本身有股票戶口就得。匯豐好似有。

------------------------------------------------

Q13728：

Hi 龔老師，現在同太太商量後，50萬中的30萬先作投資，另外20萬作為流動資金

我同太太都是保守型，30萬想入以下組合，麻煩看看有什麼意見，感謝

2800 入5000股
003 入4000股
002 入1000股

另外1475 日清
4.0 同 6.8有小量貨，現在7.15
你認為可以增持嗎？

龔成老師：

「50萬中的30萬先作投資」，可以的，你上述都是穩健，有質素的股票，可投資，上述的分配亦無問題。

只要你用分注模式去投資，就可以。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於日清食品（1475），這股票有質素，但現價不平，你最好等回少少先加注。

------------------------------------------------

Q13729：

老師我有一個問題想問
而家月供股票 共$7000

2800 $3500
66 $ 2000
2388 $ 1500

現時 比亞迪1211 開始去到便宜價 ，如果將盈富基金變為$2000，比亞迪$1500，其他不變，可行嗎？

龔成老師：

可以。

比亞迪（1211）現價已有少少平，雖然風險度比之前略為提高左，但投資價值仍在，只是我地在金額方面，唔能夠太過進取。

所以，你將部分資金，投資比亞迪是可以，只要金額不過量就無問題。同時要長期月供。

------------------------------------------------

Q13730：

老師你好,想請教一下你現在對海底撈這股票的看法,雖然現在上到高位

但知道它的市盈率過百倍,那其實主要代表了甚麼?是否應該趁現在高位出售?還是仍有增值空間?謝謝

龔成老師：

海底撈（6862）是優質股，有品牌、網絡、增長力，財務數據不差，本身有投資的價值，可長線，但現價的確有少少貴。

這類潛力股，我地在進行估值時，唔能夠單用過往的市盈率。好多時會考慮預測市盈率，或預估過幾年的盈利作推算。

如果用預測市盈率分析，現時大約為70倍，由於佢有一定的增長力，因此我地做分析時，要多分析將來的情況。我相信佢有增長空間，但這刻的投資值博率就不高，如有貨可持有，無貨就等回少少先買。

------------------------------------------------

Q13731：

睇返1257 佢既生意同盈利都有唔錯增長 點解股票就一直跌？而家係咪股值低估左？佢同257邊個增長力好啲

龔成老師：

光大綠色（1257）本質不差的，是潛力股，不過股價就較為波動，投資注碼不能太大。加上佢負債增多左，所以市場考慮佢的風險，將估值調低，令股價受壓。

先講下佢的業務，佢專注於生物質綜合利用、危廢處置、光伏發電及風電業務。而生物質能源及危廢處置，在中國都是較新興的行業，近年的增長快速，相信往後仍有一定的增長能力，行業前景正面。

由於當中有一定的入行門檻，在資金、規模、技術都要有一定的要求，因此對光大綠色有利。而這企業亦處於不斷投資的狀態，處於一個發展階段，相信長遠的潛力仍在。

由於這行業較新，同時有一定的風險，因此市場對這企業的估值亦不敢太進取。

這企業適合長線或超長線投資，若果你投資，應耐心等更大的收成，而長遠發展的潛力仍在。現時在合理區中下部。

至於中國光大國際（0257），本質不差，但潛力不及1257。

------------------------------------------------

Q13732：

你好，成哥，想問問我月供或分注入盈富之外，第二隻股如405或1928或其他邊隻值得買入啊？

另外709佐丹奴現價買入作收息，長遠買得過嗎？見有13厘。感謝

龔成老師：

你可以投資金沙（1928），只要盈富（2800）的佔比較多就可以了。金沙是有質素的股票，長遠能平穩增長，同時派息理想，有投資價值。

佐丹奴國際（0709）本質不差，生意算是不過不失，但無增長，同埋早排因香港零售市道而發盈警。

佢派息比率高。這類股適合投資作收息股，但就不要對股價有太大的期望。

------------------------------------------------

Q13733：

龔老師你好
目前個人情況：

我與老公皆43歲月入共14萬，有兩層樓，市值共一千萬，月供共四萬。（1層還有100萬樓按，另一層有200萬未還，共300萬，但50歲退休時可供完其中一間，另一間則餘100萬）

現金150萬，留作兒子兩年後留學之用
兩層樓，一自住另一間母住

打算五十歲退休，取得750萬退休金。

遇到什麼問題：

我們打算退休後到清邁定居，但現在需要350萬買樓，不過現金不足，是否可以先加按其中一層樓，套現買樓，然後待取得退休金後一次過清還所有樓按（約450萬）？

需要什麼建議：

我們想退休後繼續每月有被動收入三萬。
是否適宜把餘下的300萬退休金及兩層樓賣掉的一千萬購買長線高息股？

還是應保留其中一層樓收租？
還望指教

龔成老師：

如果你真的想算清邁定居，而你有實際的買樓需要，你的確可以這刻加按現時的物業，然後買當地物業。

雖然這會增加了你的負債及單一資產（集中在物業）的風險，但你地的年齡仍不算大，仍是可承受風險的年齡，因此都不以進行，只要之後唔好再增加負債，盡力少少加大儲蓄，同時投資股票，建立更平衡的財富組合。

至於是否退休時，利用退休金還清按揭，這個可以到時再分析。因為我就算有一筆現金在手，如果這筆資金投資的回報率，大過按揭利率，我地會偏向慢慢還款，先將錢作投資。

至於退休是否賣出物業。唔需要這刻想，到時先再作打算都得，因為要睇各資產到時的回報率，現金流情況。

我會建議你先在當地住1、2年，香港的物業先放租，如果之後確真的認唔再需要香港物業，到時先考慮賣，唔好心急賣物業。

------------------------------------------------

Q13734：

Hello, 龔sir, 我想問我有現金17萬在保險公司, 現以3.25%年利率滾存, 應否拿出來投資股票呢?

龔成老師：

3.25%以一個穩健的產品來說，算是不過不失的回報，而這刻的股市，暫時未見特別平宜，因此，這刻唔好心急動用。

我會先建議你加強儲蓄，利用現有的現金作投資，而保險套取現金，就可以視為，當股市下跌，進入平宜區時，才會動用的資金。

------------------------------------------------

Q13735：

老師你好。我今年28歲，月入24000，每月可以存12000元。

想開始月供 盈富3000元、銀河2000、比亞迪（1211）2000，這樣的分配可以嗎？

還有，除了公司年報，我應該從哪些方面去了解行情同公司發展？謝謝！

龔成老師：

上述的股票，都是有質素的，分配無問題，你可以進行長期月供。如果你日後有更多的收入，你可以先加大盈富（2800）的金額，然後再加入其他股票。

除年報外，你可以到公司的網站去找資料，有時同業的其他企業，都有一些行業資訊提供。其實年報的管理層與主席，有關前景的部分，往往能提供好多有用資訊。

------------------------------------------------

Q13736：

請問0041入得過嗎？

龔成老師：

鷹君（0041）業務本質不差的，佢主要從事酒店業務、物業投資、建築材料銷售、經營共享工作空間、證券投資、提供物業管理等。佢業務本質不差，有長線投資的價值。

近期股價回左好多，現時已到了合理區中下部分的水平，分注投資可以。

------------------------------------------------

Q13737：

龔老師，我在小米上市時，以16元買入3手，再在22元買入兩手，但只在9元徘徊，到底我應放、加碼還是長線投資？謝謝意見。

龔成老師：

小米集團（1810）並不是無質素的，佢業務及產品發展都不差，有潛力的。

但佢這刻仍處於未有理想盈利的狀態，市場仍然未能對佢完全估值，所以佢的股價仍會波動，而中短期仍未得。但要留意，這類股，有危有機，因此不能持貨太多。

首先，你要耐心少少，因為不會咁快進入收成期。如果你本身持貨不多，可長線的話，但就唔建議你加注。

------------------------------------------------

Q13738：

你好龔成老師，想請問你覺得買公屋作自住樓的決定如何？公屋雖然較難轉售，但相對呎價及其他成本比較低。

你會建議儲蓄更多買私樓還是覺得購買作自住樓係可行？謝謝

龔成老師：

公屋的投資價值不高，只有自住價值，不過，如果你能買公屋去解決住的問題，都是一個方法。

因為買公屋的好處，是每月現金流的支出比買私樓較少，你可以餘下更多的資金，作投資，等財富有增長。

因此，要睇你的實際需要，如果你打算買入長住，都是一個方法。

------------------------------------------------

Q13739：

龔成老師你好，拜訪過你嘅書籍同Facebook 有一段時間，實在獲益匪淺

我今年27歲，月入16.5k，現金約有100k，依家手持股票有：
5 @67.5 800
[email protected] 10000
[email protected] 8000
1876@27 500

想問以上組合比例係咪啱？有冇需要換馬？我自己覺得1876，1521有潛力上升，你認為如何？謝謝解答

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你現時的$10萬，大部分都可以持有現金，等機會，見個市回D可以入少少貨。

至於現時的持貨，匯豐（0005）只是收息股，未必最適合你。

中國龍工（3339）質素不過不失，可以持有。
方達控股（1521）業務雖然有發展，但始終上市年期不長，分析較難，因此不能太大注。
百威亞太（1876）有質素，可持有。

------------------------------------------------

Q13740：

老師您好，有一個問題請教。您經常說買比亞迪作潛力股，我做了個簡單分析，請賜教。

假設今日$38.5買(1211)500股= 約2萬、股息每年約0.61%，複利息投資20年，股價升到$100，20年後本利和約$53450。

比較(3988)
同樣地投資約2萬(即時今日$3.3買6000股) ，股息每年約6%，複利息投資20年，20年後股價不變，20年後本利和約$60512。

這是否投資3988會更優勝?

龔成老師：

你上述的計算正確，但我地假設比亞迪（1211）為潛力股，即是當中的增長力一定不止這個數。

因為你上述的增長，只是假設比亞迪是一般增長類別的股票，如果講長期增長，比亞迪可以增長更強的。當然，潛力企業有危有機，無人知最終的增長。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。