隨著3D列印技術成熟、普及，未來或許人人都可以在家裡自己“列印”自己獨一無二的愛車了！
————————————————
SUPERMOTO8 LINE群啟動募集中!!!
https://line.me/R/ti/p/%40fkq0732s

科技進步神速，現在連機車都可以透過3D列印達成了！

《一覺瞓醒，發現所有人都講緊另一種語言（3）》

第一集：https://is.gd/egRc36
第二集：https://is.gd/GlMzyS

阿豪躡手躡腳，戰戰兢兢咁從防盜眼望出去，見到門外企咗一個著住寬頻公司制服，頭髮同個身都濕晒嘅年輕人。


「放心喎，我有證架！」年輕人好似知道阿豪隔住道門望緊佢咁，將胸前嘅職員證遞高，「我叫Johnny呀，今日係想介紹返個超抵Plan，你畀三分鐘我，聽完我介紹你都仲會講一句『唔正』嘅，我即走，再送多兩張超市$50現金券畀你當賠禮！你睇我打完風落咁大雨都嚟就知我有誠意啦？」


阿豪擰轉面望向Hailey，意思係問佢點算。


Hailey考慮咗一陣，起身由防盜眼望出去，見到對方真係一副王宗堯Sell寬頻咁嘅誠懇樣，所以佢壓低聲線同阿豪講：「我喺醫院都見到有講我哋語言嘅人，證明唔止得我哋兩個冇事，我諗⋯⋯不如放佢入嚟？如果佢好似而家咁傻下傻下，周圍去Sell寬頻，盞落得醫院嗰個男人嘅下場。」


阿豪本來都揸唔定主意，但聽到Hailey最後嗰幾句，都唯有同意放佢入嚟。


一打開門，Johnny已經堆起笑容話：「嗱，呢個Plan真係有今生冇來世⋯⋯」


Hailey一手拉咗佢入屋然後關門，Johnny畀佢呢個突如其來嘅舉動嚇親，佢退後咗幾步，用雙手擋住佢哋問：「唔係老笠嘛？」


「你而家冷靜啲聽我講。」Hailey話：「出面所有人都講緊一種我哋聽唔明嘅語言，如果畀人知道我哋嘅存在，會有一班著住保護衣嘅人嚟帶走我哋，但我唔知佢哋會對我哋做啲咩，我知道一時間係好難接受⋯⋯」


Johnny上下打量Hailey，又望下阿豪，幾秒之後，佢打斷Hailey話：「黐線！」然後想奪門而出。


阿豪下意識擋住道門，Johnny同佢講：「你唔係信佢呀？佢喺青山出嚟架！」


「唔係呀，嗰件係⋯⋯係醫院病人服，佢今朝先喺醫院醒返⋯⋯」阿豪一緊張就會有少少口吃。


「嗰件係精神病院嘅衫，我有親戚住過院，我唔會認錯！」


阿豪正想解釋嘅時候，Hailey竟然雙手掩面，不停搖頭，「我已經好返架喇，我真係好返㗎喇！但醫生同姑娘唔信我，無論我點講佢哋都唔信我⋯⋯」佢踎喺地下喊起上嚟，一路緊緊攬住嘅布袋一邊肩帶滑落，露出裡面嘅《漂流教室》漫畫同卡繆嘅《鼠疫》。


「兩個都Short架！」Johnny推開阿豪，打開門離開。


阿豪望住語無倫次嘅Hailey，搞唔清楚究竟黐線嘅到底係邊個。


Johnny行到去走廊，手提電話突然響起，佢從褲袋拎出電話，見到來電顯示係一堆亂碼，不過亂碼下係媽咪張相，所以佢接聽咗：「喂？」


「文仔？係咪文仔？」媽咪嘅聲音好焦急。


「我返緊工呀，有咩事呀快啲講啦？」電話有一啲奇怪嘅雜聲，硬要形容的話，就係好似有人用指甲刮黑板嘅聲音，夾雜住訊號被干擾嘅回音，Johnny停低腳步側起頭聽。


「你阿爸Vr&"yhge&:&&!tjj我就嚟dhbj@&hre我頂唔順⋯⋯」


「你講咩呀？阿爸做咩呀？」


「快啲futhbfyjj'kln死hdg89r%*O呀！」


一聲刺耳嘅尖叫聲從話筒另一邊傳嚟，電話就忽然斷咗線，Johnny打咗幾次返去都冇再接通過。


佢同父母只係住喺隔籬街，而呢度係唐二樓，所以Johnny即刻跑落樓梯，向街口方向跑去。


當佢轉過街角，去到屋企樓下時，聽到嘭一聲巨響，一個黑影喺佢前面掠過，當佢定神一睇，發現石屎地上嗰個血流披面，手腳因猛烈撞擊而以詭異角度扭曲嘅人，就係佢阿爸。


Johnny呆立當場，仲未嚟得切反應，再有一聲巨響，喺佢前兩米嘅地方，又有一個人跳咗落嚟。


嘭嘭嘭——嘭——嘭嘭——


一聲接一聲，Johnny企喺馬路中間，見住一個又一個人影從前後左右嘅大樓跳落嚟，佢雙腳好似畀燒熱嘅刑具釘實喺地下一樣動彈不得，雨水滴滴嗒嗒咁打落石屎地上，流成血河，沿住路面一個個凹坑，經過Johnny嘅腳邊，向水位高漲澎湃嘅雨水渠流去。


－－－－－待續－－－－－

我哋60 Shares繼續。


微型小說集《為你犯的一百種錯誤》書店有得賣～
想睇我隻貓可以Follow IG：annoyingchan