. [韓 X 泰] GMM Grammy 有份持有嘅 GMMTV 憑歷年多套BL劇累積嘅成績，再由 #BrightWin 主演嘅《2gether只因我們天生一對》兩季劇集幫公司進一步攻佔亞洲各地巿場，燃點大家嘅BL魂，做成一陣泰BL風潮。 早排 GMMTV 同日本 朝日電視台 簽訂合作，奠定泰BL劇進軍日本嘅基礎，《2gether》嘅劇場版亦即將喺6月4日登陸日本。而喺琴日5月24日，GMM Grammy喺官網公布新投資方向，進軍韓國巿場。 GMM Grammy 將會同韓流三大公司之一嘅 YG Entertainment 合組公司「YGMM」，由 GMM Grammy 持股51%、 YG Entertainment 持股49%。GMM Grammy 除咗持有電視台、藝人公司之外，仲擁有音樂製作公司同埋歌手。今次同YG合組公司，講明會搞音樂會、舞台劇。兩間龍頭公司點樣互引優勢？YG嘅BLACKPINK泰籍成員Lisa 會唔會成為合作嘅首選？ 日本方面，喺《2gether》劇場版公映之前，有個由 朝日電視台 主辦、GMMTV 策劃嘅巡迴展覽，宣傳 GMMTV 嘅4大CP（雖然Singto已經喺5月1日同GMM和平解咗約）。4月16日至5月23日嘅第一場巡迴展覽，已經喺 朝日電視台 總部所在地六本木完滿結束。之後展覽會巡迴到博多、仙台、大阪、名古屋，直至10月17日完結。 咁…幾時照顧吓香港嘅觀眾呀… #YGMM #GMMTV #YGentertainment #泰BL #2gether #2getherTheMovie #韓流 #BLACKPINK #朝日電視台 #tvAsahi

. [GMMTV][2021年劇集巡禮] 泰國電視台GMMTV今晚舉行咗2021年劇集巡禮，以「The New Decade Begins」作為口號，一口氣介紹18套劇集。 - 4大BLCP得一pair繼續拍檔？- 介紹嘅咁多套劇裡面，GMMTV賺錢能力最強嘅4大BLCP：Krist-Singto、Off-Gun、New-Tay、Bright-Win當中，只有Off-Gun喺《Not Me》繼續演一pair。 New仲要冇喺今晚介紹嘅劇度出現過，只係喺個show最後4大CP出場唱歌先見到佢……希望有啲劇未有片花所以冇介紹啦…… - Krist、Lee、Nanon、Joss佔最多劇 - 今晚介紹嘅劇入面，佔最多角色嘅演員，有GMMTV視如己出嘅Krist（唔出奇）。Lee有3套喺手，其中一套BL劇《Baker Boys》配Singto，改篇自漫畫講甜品店同兒童失蹤。 剛剛播完大結局嘅《The Gifted：Graduation 特長生》主角Nanon都有兩套喺手，其中一套《Bad Buddy Series》係BL，搭Ohm，睇落似現代校園版本羅密歐與茱麗葉，但冇咁激唔駛攞命。 Joss都有三套喺手，其中一套有Tay，叫《THE PLAYER》，係佢哋繼《3 will be Free》之後再次合作。推理拆解殺人案件劇，應該冇感情關係。 - 流星花園trailer幾靚 - 壓軸出場嘅毫無懸念，就係未拍就畀一班Bright-Win粉絲因為拆CP而話唔想睇嘅《流星花園》。今日播嘅trailer，睇到片段拍得比其他劇靚啲，啲燈打得多變化啲。早前GMMTV宣布因為財務狀況，會暫停GMM25台新聞製作，將會播放由母公司旗下另一電視台ONE31製作嘅新聞。我仲擔心會唔會影響《流星花園》嘅製作，依家睇落似乎冇問題。 GMMTV揀咗個近乎全亞洲都識嘅劇目，搵Bright-Win去重拍，一心喺跨國巿場再行多步，真係許勝不許敗。 - Non搭Off兩男主角演BG劇 - 另一個值得留意嘅係喺10月已經宣布咗會拍嘅劇集《46 Days》，由《出貓特攻隊》男主角Non參演，題材有關於網紅。BG劇，同劇另一男主角係Off。 Non係GMM旗下Nadao公司嘅藝人，即係有Sunny坐鎮，最近勁高分嘅BL劇《I Told Sunset About You》嘅製作公司。之前都會有Nadao嘅藝人去GMMTV參演，今次Non唔知會拍成點？ - New-Tay勢弱？- 喺大合照時間，企喺CEO P'Tha 兩邊嘅，分別係Krist-Singto同Bright-Win。外一組嘅係Off-Gun同Lee&Joss，再外一組先到New-Tay。Nanon同Ohm就企咗喺P'Tha嘅正前面一排。我鍾意睇New-Tay呀😭 #GMMTV #GMM25

. [泰BL劇][I Told Sunset About You] 由BrightWin主演嘅《Still 2gether》喺fans meeting之後可以話告一段落，有粉絲拍到BrightWin已經開工拍泰版《流星花園》喇。而接住《Still 2gether》播放，集合GMMTV三大CP嘅《I'm Tee, Me too》亦已經播晒8集。全套純粹畀fans見吓鍾意嘅演員都可以嘅，但劇本同演繹係冇乜特別。 喺《I'm Tee, Me too》播到咁上下嘅時候，另一間同GMM有關係嘅製作公司 Nadao Bangkok @nadaobangkok 推出咗首部BL劇集《I Told Sunset About You》，由喺之前另一套BG劇《My Ambulance》嘅副線BL CP Putthipong Assaratanakul（Billkin @bbillkin ）同 Krit Amnuaydechkorn（PP @pp.kritt ）主演，講兩個男孩子喺初戀當中認清自己所愛，總共5集。 喺正式播之前，睇條trailer已經覺得拍到好靚好似電影trailer咁，但你知trailer好多時都未必反映到個作品嘅水平。但呢套劇依家播到第3集，真係冇令人失望。 令我嘩一聲嘅，喺佢哋拍old town嘅夜晚外景，居然成條街咁打燈，地下亦都為咗燈光靚啲而灑咗水（應該係人工灑水除非幾場戲連埋mv都等落雨先拍）。燈光、拍攝機位、演員走位都有心設計，好利害。 [Trailer] https://www.youtube.com/watch?v=KIylNdQuR-w -以下劇透- 不過最令我驚喜係Billkin嘅演繹，活潑、搞笑、愁悶都做得好。喺第1集，Oh-Aew （PP飾）考唔到優先入大學測試之後，Tae（Billkin飾）喺廟聽Oh-Aew講嗰段說話時嘅反應，接住去海灘同Oh-Aew講對唔住嘅兩段戲，都演得好。劇組對於兩位演員亦明顯好信任，有好多位空白位畀佢哋發揮，難得佢哋兩位又演到。兩個都係21歲仔咋，利害。 劇本描寫兩個主角嘅關係由多件小事出發，夾埋好豐富。我最鍾意Tae對Oh-Aew陣椰子味嘅轉變，由討厭到依戀。睇到第3集，Oh-Aew近乎主動出擊但係Tae迴避，再諗返第1集Tae喺interview時冇主動叫Oh-Aew……睇嚟都係個sad ending…… 話時話，第3集尾拍得好激烈吓。泰國嗰邊放喺投資者LINE TV播而唔喺電視播，或者因為咁尺度可以大啲。都好嘅，唔使就住就住，兩個人喺房嗰段可以見到Tae對Oh-Aew有感覺，但衝破唔到自己心理關口，係正嘅。 [Vimeo On Demand] http://vimeo.com/itoldsunsetaboutyou 劇集 EP1 12USD、EP2-5 @5.99USD 製作紀錄 EP1 3USD、EP3-8 @1.99USD [Billkin 演唱 OST - Lost in Translation] https://www.youtube.com/watch?v=zse5I74ctf4 [PP 演唱 OST - 如何（主題曲中文版）] https://www.youtube.com/watch?v=PeEDAmd5BiE [Billkin 演唱 主題曲 - กีดกัน (Skyline) ] https://www.youtube.com/watch?v=hJeEOzEZstU #Nadao #NadaoBangkok #IToldSunsetAboutYou #แปลรักฉันด้วยใจเธอ #bkpp #Billkin #พุฒิพงศ์อัสสรัตนกุล #PP #กฤษฏ์อำนวยเดชกร #以你的心詮釋我的愛 #一心一譯 #Tae係茶 #佢係來自潮州嘅華裔家庭 #OhAew係布吉傳統甜品類似愛玉 #故事發生喺布吉嘅舊城區係當年潮汕人來泰定居地方 #連改名都玩埋問你怕未 #好睇過2gether #雖然BrightWin靚仔啲 #可以嗎 #說到做到