日常妝 | heme眼影盤+唇膏 試色&分享✍🏻 . 先講眼影，穩陣既大地色，右上嗰粒係帶橙既淺啡色，所以配色上唔會太單調。下面兩粒啡色睇落好似，但搽出黎係唔同的。顯色度同一般日韓眼影差唔多，要搽兩層先夠實色，但珠光感就勁好多。粉質唔算好細緻，下面兩格啡色既粉比上面兩格幼細同壓得實啲，4格都會飛粉同埋好易blend。持久度出奇地好，化足十個鐘都仲有8成，其實冇咩點甩係有小小撈埋左同小小積線(fyi我眼皮嗰陣係勁出油)。 . 眼妝都係最基本既左右漸變🤔 🔸眼皮前至中段搽左上既香檳米色 🔸眼皮中至後段搽右上既淺橙啡色，搽嗰陣可以向前blend小小，營造漸變效果 🔸眼尾上下部分搽左下既啡色 🔸想加強深邃感可以搽右下帶啲啲紅調既啡色係上眼尾。另外我想對眼睇落bling啲所以除左打亮眼頭之外，我係眼珠下面都搽左淺橙啡。 🔸用眼線筆畫返條柔和眼線同搽睫毛就搞掂！ . 小技巧分享： * 呢盒眼影比較重珠光感既關係，搽嗰陣唔好搽太高，大概搽到去雙眼皮打開眼既眼摺對上1mm就夠 * 如果想顯色啲，可以用眼影掃攞左粉再搵枝spray噴一下落枝掃度，會顯色好多同貼眼皮好多！但最好每搽完一次搵紙巾抹返乾枝掃先好再攞粉，掃兩下都乾架喇唔麻煩的 . 到唇膏😀外層係semi-matte finish內層係帶滋潤感有小小glossy finish🤔質地比較厚身，雖然唔叫潤但唔乾，返工都搽到，去左死皮搽會靚啲。持久度ok，飲野會甩，但因為內層唇膏有小小stain效果所以食完飯抹咀個咀都仲有小小色。佢既設計係一層色包一層，所以搽出黎既漸變效果比較subtle。我既手上試色圖係想俾大家睇雙色唇膏既contrast所以分開左外面同裏面黎swatch，唔係枝唇膏一搽就有咁明顯既雙色效果😂搽上咀嗰兩張先係成枝唇膏直接搽😂珊瑚薔微係幾顯白既桃粉色加紅色，櫻桃拿鐵係奶茶色加暗紅色。我鐘意櫻桃拿鐵溝住黎搽🤣第一張相就係mixed埋咁搽，不過影得偏紅左。實際睇隻色好特別，有啲似再紅啲既泰式奶茶😂我都未遇過呢種色😂 . heme係台灣既品牌，台灣既屈臣氏等地方都會搵到heme既產品，但暫時香港仲未有開架，所以有興趣既話就要去台灣試喇🤔 . Thanks @iloveheme ❤️ . #eyemakeup_herine #eyeshadow_herine #lips_herine #swatches_herine

東京&箱根旅遊 遊記/分享 之一💁🏻行程安排 . 上次去大阪剪左條片，今次就文字+圖啦😂今次去五日，其實得四日，因為最尾嗰日係直接到機場返香港。呢個post會分兩part - 行程同埋值得分享既好野食😽 . 原本冇諗住咁快再去日本，對上一次係5月大阪，但東京有個exhibition我好想去所以好趕咁book左機票酒店😂 . 呢次主要去左銀座、東京站、表參道、澀谷、上野、淺草、skytree同箱根。係呀我冇去到新宿呀，因為太攰同冇時間直接skip左🤦🏻‍♀️ . Day 1到酒店已經下午4點，淨係去左東京站附近行下食下野。 Day 2去睇exhibition，附近係表參道同澀谷，呢兩個地方超多野行，淨係留一日都好夠。呢度未到聖誕已經好有聖誕氣氛☺️. Day3就係skytree>雷門/淺草>上野公園>阿美橫丁。由skytree開始一路向西🤓咁安排一日都ok唔會攰。 Day4呢日去箱根，搭新幹線由東京車站到小田原只係35分鐘！當然車費會係最貴🤷🏻‍♀️但時間就是金錢😼去到箱根湯本，我好建議大家如果會住箱根既話係出閘前去左電梯隔離既counter俾小小錢寄行李到酒店，咁就可以兩手空空輕鬆遊，仲慳好多時間！行完箱根湯本就去埋大湧谷，然後就早啲返酒店食晚飯同浸溫泉(book左私人風呂好正🤤但好L凍😂) Day5食完早餐就直接搭車走。 . 如果大家想住箱根，建議揀間有巴士站係附近既酒店，最好就可以直到箱根湯本/小田原站。因為搭巴士到小田原絕對快過搭登山鐵道，又唔使轉車再等車✔️今次我住呢間叫仙石原品之木一之湯，交通都算方便，搭巴士由強羅到酒店大約十至十五分鐘，落車行兩分鐘就到，附近又有間7仔。二千鬆啲一晚就有間兩層有私人風呂同被爐既獨立屋😆仲要包兩餐超豐富傳統和式料理！雖然訂嗰陣覺得好貴，但想歎返晚既話係值得架😗 . 交通方面，一定要買地鐵pass! 72hrs 1500yen，一程最少都收你百幾yen，一日搭三程已經回本🤘🏻至於箱根就要買周遊券，除左抵好多之外，最重要係慳時間，就咁show俾票務員/司機睇就得，唔使再不斷排隊買飛咁麻煩。 . 最後想講下天氣同衣著，之前收到幾個dm想我分享下，希望幫到黎緊會去東京既你地啦🤔東京雖然氣溫低，但室內暖氣係可以令人熱到出晒汗😑(fyi我係超怕凍既人)我覺得8-13度既話同香港差唔多，著返平時冬天厚衫就得。日本女仔咁凍都只係著住薄絲面不改容真係好勁，我Day2著左薄絲凍到pk🤧(第一張相🤷🏻‍♀️)如果氣溫係1-7度，強烈建議著內絨毛底衫！冇佢我實凍死🤧下身我著左內搭絨褲/裙+內絨褲襪。如果去近郊就要加多件hoodie，吹起風上黎唔係講笑的🤧不過無論著多與少，最緊要係可以方便除，室內室外一冷一熱好易病。以上既內絨毛衣物係淘寶search「絨毛內衣」/「絨毛褲襪」就有，我都係揀最多人買嗰幾間，其實質素都係差唔多。 . 下一part會講好野食🤤stay tuned! . #travel_herine