今日好高興嚟到 OPPO，試下呢部概念機 OPPO X 2021，望落去好似冇咩特別，等我變個魔術俾大家睇下，只要我用手指，喺機身旁邊輕輕掃一掃，畫面係會放大。

呢部 OPPO X 2021 採用高通嘅 Snapdragon 865+ 處理器，配備 8GB Ram + 128GB 嘅內置儲存空間，或 12GB Ram + 256GB 內置儲存空間兩個版本。佢嘅 OLED 柔性螢幕採用咗捲軸式設計，有別於主流嘅摺疊式設計，佢嘅特點在於螢幕上會較少摺痕，甚至睇唔到咁滯。只要喺機身右側嘅電源制向上掃一掃，6.7 吋嘅 16 : 10 螢幕，就會喺 3 至 4 秒內變成 7.4 吋嘅 4 : 3 螢幕，而向下掃就會變返原型。顯示緊嘅內容亦會隨著螢幕放大同縮細而自行調節，無論瀏覽網頁或睇片嘅時候都可以隨時調教，對於整個觀看體驗影響唔大，的確唔錯。

唔好以為螢幕做到捲軸，淨係對睇片有幫助，其實我們日常如果要處理文件的時候，功效可以更加大，有時候螢幕太細嚟睇活頁簿，你會見到成日都要捲嚟捲去，而家睇下，成個 Excel 出哂嚟，方便到極。

OPPO X 2021 嘅螢幕可以咁順暢咁放大縮細，背後就正正係歸功於 Warp Track 嘅技術，原理就好似坦克車嘅履帶一樣，透過內置喺機入面嘅雙摩打同滑輪運作，等屏幕可以順暢變形。官方表示，屏幕透過呢個技術可以承受超過 10 萬次嘅開合，十分耐用。

呢部電話嘅主鏡頭由一個 4800 萬像素廣角鏡頭，同兩個 TOF 3D 鏡頭組成，影相嘅時候，屏幕大細都會影響到相片效果，好似喺無開展螢幕下，直向內容會多啲，而當放大螢幕之後，橫向內容就會比較多，用家可以根據自己嘅喜好同需要選擇。

OPPO X 2021 雖然未有消息會量產，但係佢嘅嶄新設計應該會為手機市場帶嚟新嘅衝擊，大家可以拭目以待。