《一日做八個鐘，480分鐘，28800 秒》
　
大學做過一份暑期工，customer service representative，解答強積金問題，返工時間係九至六，但公司要求員工返八點五十分，九點準時接電話。做過call center 嘅朋友就知道，通常呢啲公司都有一個system，record 到你一日八個鐘，幾多時間聽緊電話，幾多時間無電話等運到。
　
而我做個間公司好變態，電腦唔郁，去咗廁所，個 system 就會show 到你「離線」。個 system 有個 pie chart ，顯示你每日到底幾多分鐘「離線」，個 pie chart 係用來警剔你要長期「黐線」。
　
入職個陣，呀姐講「大家都自律啦，去廁所 pantry 個啲當然有需要你就去啦」 ，但有時呀姐見你個 pie chart「黐線」率唔過90%，佢就會猜度你可能蛇王，問你係唔係腸胃唔舒服，勸你保重身體，好明顯佢唔係真心架，佢只係想你尷尬，唔好意思，再改過自新。而你知道，一將大家嘅 pie chart 擺埋一齊，比較就會俾人發現你成日屙屎屙好耐，於是你屙屎都拿拿臨。個種去廁所最好計時，睇住個「黐線」率做人嘅壓力，先係最「黐線」。
　
※※※※※※
今時今日，我雖然唔係做 operation，呀姐依然希望你九點開始，到放工為止，秒秒都做緊野，真係唔好停...
　
每樣野都要你計 man day，填 excel，寫有咩 procedure，計完一輪，永遠都覺得我計算錯誤，「無理由要咁耐嘅」。咁其實你開個價，幾時要我咪幾時交囉。計得來，我都做完啦。
　
唔只計 man day，做完又要你 log 返每個 project 每個 item 做咗幾耐。根本我就好似看更咁，個電腦分開九宮格，同時做緊幾樣野，點斷件 item 計時？
　
然後一個星期又填一次 weekly report ，寫返呢個星期做過乜鬼野。你係呀姐，野係你派俾我做，又要我寫返我做過咩？填完，呀姐又覺得「今個星期的你可以超越上星期的你」，下星期可以做得更多野，其實呀姐明唔明一日係 fix 死咗得 24 小時，而我係唔能夠 fast forward 架。
　
其實你屋企個賓妹都唔會每一秒都做緊野啦...
呀姐舉頭見到你低頭覆 whatsapp，就會突登死摷爛摷多樣無謂野俾你做，務求令你每日 28800 秒都 fully occupied。唔係每秒都做緊野，你就係懶散。「唔好咁嘈啦，專心啲啦」。同隔離吹吓水，呀姐又出來屌你唔專心，其實我好 multitasking，吹水唔會令我分心，係令我更醒神。
　
我覺得，有時邊做無謂野，邊做野，先做得快，你俾我聽住歌做report，我真係做得快啲，正如我聽住歌行路，時速真係快過著步走鞋。
　
但啲老野，唔會明...
「你哋如果自律，我點會成日 check 住你哋呀？」，呢句真係同啲女盤啲仔一樣，「你唔係身有屎點解唔俾我check 住你呀」... okok，你贏