【影視】免費睇《EVA》新劇場版頭三集加第四集開頭 期待已久，《新·福音戰士劇場版:||》終於會喺下星期上映——不過只限日本。如果係太平日子，相信有人會選擇直接飛過日本儘快睇，但依家呢個時勢大家就唯有慢慢等……又或者去khara個官網，搶先睇新版嘅頭「12分鐘零10秒加10 Frame」。 記憶力好嘅網民，大概會記得2019年時khara都曾經公開過《:||》嘅頭十分鐘當係預告，而今次公開嘅基本上都係一樣嘅內容，只係多咗分半鐘加10 Frame畫面。目前未知係因為最之後嘅畫面好重要，定係khara另有深意，所以先會選擇公開一個咁零丁嘅長度。反正如果大家想睇嘅話，就要喺日本時間3月8日午夜之後去khara個Youtube啦！(據報係上面條Link直接變咗做新預告)。 如果你好心急嘅話，都仲有另外嘅免費內容。日本Amazon Prime將會於日本時間3月5日 (即係今晚) 8點起，一連三日免費播出《新·福音戰士劇場版》頭三集，亦即係《序》、《破》、《Q》。等大家可以溫哂書先睇《:||》。 不過要特別留意嘅係，無論係khara Youtube會播嘅《:||》嘅頭12分鐘、定係日本Amazon Prime Youtube會播嘅《序》、《破》、《Q》三集，都係日本地區限定，所以身在香港嘅大家要睇呢，就要用啲可以改變大家「上網位置」嘅方法啦。 #EVA #新世紀福音戰士 #劇場版