【良心企業】Figure因地震整爛？ 製造商eStream：免費幫你整 早排日本福島發生7.3級地震，好彩無人因此而喪命，但係對Figures同模型迷嚟講就損失慘重啦。有唔少日本網友喺Twiiter上post自己嘅「災難現場」，有啲更誇張到成個模型櫃被震冧。 其中一間位於東京嘅製造商eStream，就決定免費幫客人整返好兩款Figures，《Re:從零開始的異世界生活》愛蜜莉雅 / 雷姆 水晶禮服Ver。覺得人地好孤寒只有兩款可以免費修復？唔好咁啦，有得整已經好好，況且人地公司喺上年先成立。 見到隻Figure嘅結晶環繞效果，都估計到只要一跌就斷硬，考慮到本身隻Figures售價33,700日元（約$2500港幣），跌爛咗都咪話唔心痛肉赤。 當被問到點解係免費修復而唔係直接換新，eStream就認為每個客人同Figure都有獨有嘅感情同回憶，當見到有客人表示自己嘅Figure受損而表示震驚同傷心嗰陣，我哋不停反問自己有咩可以做，所以最後提出免費維修服務。無論佢係真心話定係為減低成本，但咁識講嘢公關已經100分，其他大廠又可唔可以考慮提供免費維修服務。 資料來源：J-Cast News #Figure #eStream