身為一個全職肥婆，我敢講，肥喺呢個世界嘅標準就係唔靚、就係唔健康、就係原罪
原罪到話自信就是美就會被千夫所指、被人話自閪閪人

我好認同自己，唔係認同自己身上面嗰堆被世人厭棄嘅多9餘脂肪好靚
而係認同自己就算俾人指指點點，我都係用一副「關你撚事」嘅態度去面對🖕

#廣告回響：人妻先生批評Dove廣告　女主角「豆豉眼」出文回應

Dove 最近推出全新嘅「停批評　欣賞美」廣告，一方面透過口號，呼籲嘴賤之人停止亂幫女性改花名，學習欣賞對方嘅美；另一方面，則透過廣告中模特兒撕去標籤嘅動作，叫女生們展現自信美。廣告宗旨，同 Dove 自2004年起推出嘅Real Beauty Campaign並無二致 ，都係叫女性反思何謂真正嘅美，學會欣賞自己嘅內在美、自信美。

而喺前日，倫敦人妻先生手記就出文，批評 Dove 呢輯最新廣告「最大的問題是，明明唔『美』，點解要夾硬話『美』？」，又說「美和醜真係有一定標準」，「靚就係靚，唔靚就係唔靚，有自信係會加分，但唔代表一定會絕地反彈。無得因爲大愛左膠而夾硬明明唔靚都話對方靚」（截錄），「承認自己不足、承認自己唔靚，才是正確的方向」云云…

人妻先生篇文，獲得不少網友讚好、贊同，但同時亦引起不少反彈。有網友就認為，人妻先生整篇文章都搞錯一件事：廣告中講嘅係「美」(Beauty)，而人妻先生批評嘅，卻係對方靚唔靚 (Pretty)。而廣告中被冠以「豆豉眼」花名嘅女主角本人 -- 舞台劇演員郭翠怡，更出長文回應：

「Hello我係『豆豉眼』。

我無好不滿人妻先生，一直都覺得每個人都可以有自己睇法，佢唔一定要覺得我靚嘅，我鍾意我自己咪得囉。但作為一個女仔，又唔係咩明星，直接第一下真係唔識take同面對啲咁嘅言論，所以唔會唔開心，但又唔會覺得正呀好開心呀咁囉，咁好自然寧願眼不見為乾淨，咁啫。

但瞓醒一覺，我覺得自己需要表達一下自己嘅睇法。

作為被評論嘅對象，我首先的反應係『下？我做嘢啫』同時都感受到作為公眾人物/模特兒嘅無奈。例如呢次campaign，Dove同廣告公司想點樣去表達呢個idea，我地從來都無得選擇。而我接呢個工作時所收到嘅information係呢個campaign嘅出發點同最基本嘅概念-『欣賞自己獨特嘅美麗』。

當整容成為大潮流，個個都追求同眼同鼻同咀形，我更覺佢呢個廣告別具意義。而且作為一個咁大嘅品牌，願意花咁多budget去宣傳呢個idea，搵兩個完全無人識嘅女仔幫佢地express呢個概念。喺香港，有邊間公司會冒呢個風險？

由於我好欣賞佢地嘅諗法，所以都好開心可以接到呢個工作。

但好坦白講，我個人認為個execution的確可以再好啲。仲記得當佢地貼啲標籤喺我身上嘅時候，我感覺係『但從來都無人話我豆豉眼架喎』『講女性美，有好多唔同嘅方法，點解要用咁直白嘅方法然後標籤咗我先呢？』

簡單嚟講，唔夠型囉。

但我唔係廣告界專業人仕，對於marketing嘅嘢我一知半解，我無意加把嘴去批評別人嘅創意。

不過當個print出咗街之後有諗，其實一般人喺地鐵站見到呢個廣告嘅時間唔多過三秒，而且一個地鐵站有幾十個廣告，要搵方法打入行人嘅眼簾唔容易，可能真係需要快同直接。而而家能夠引起討論，某程度上嚟講係成功嘅。

而講返自己，我真係好有性格㗎，我鍾意我自己而且我覺得自己很『美』。但如果你要用現今嘅審美標準我可能真係唔『靚』而且非常普通。不過，我有嘅係自信。我係一個追求緊自己理想嘅獨立女性，同擁有一雙欣賞自己身體嘅『豆豉眼』。我相信，咁樣就係『美』。

我三十有三，係一個舞台劇工作者，習慣咗接受掌聲之餘，亦懂得面對批評嘅聲音。但我替身邊被形容為『pizza面』嘅女孩子感到心酸，一個有番些少體型嘅女仔喺香港呢個社會上生存真係唔容易，而且工作時認識先知佢只係一個二十出頭嘅學生，真人非常可愛親切，但佢跟呢個娛樂圈子完全無任何關係，然後貿貿然行出嚟用自己嘅外形作為焦點拍一個咁樣嘅廣告要好大勇氣，到最後要佢面對咁樣嘅評論，我覺得對佢好唔公道。

我唔在乎人妻先生說話講得有無論據，我只在乎說話出發點係『善良』與否。

現今網絡發達人人都可以作家，但請大家多多反思自己所講嘅說話係咪貪口爽滿足一時之快。我自己都係創作人，我知道文字嘅威力，所以更要謹慎運用自己支筆。要寫一兩篇有娛樂性嘅文章有幾難？但厲害的往往具有洞察力而不失同理心。共勉。」

睇到人妻先生講，「美和醜真係有一定標準」，就令小編諗起澳洲大碼女模La'Tecia Thomas。呢位女模經常都會將執相前、後嘅對比圖放上ig，更經常提醒大眾要「做自己，無需勉強迎合他人」。到底要去跟隨所謂「美嘅一定標準」，定係順從自己一套，活得自在、有自信，從來其實都只係個人選擇啫，係咪？

人妻先生原文：http://bit.ly/2MdOrCE
「豆豉眼」原文：http://bit.ly/2y16KI5
「豆豉眼」文字獲 Kwok Chui Yi Koktree 本人同意轉載。
圖源： Dove facebook