【整個FAQ等你哋易啲揾答案】 1. Merch - 第一彈幾時派貨？（Tee, Tote Bag & Tape） 根據目前負責Merch嘅MK哥所講，Tee已經印製途中，將喺日內就會送貨過嚟我哋度進行包裝，其實Tee係好快就可以準備就緒。問題出自另外兩批貨，雖然Tape已經喺台灣寄緊過嚟香港，但根據廠家過往經驗，台灣嘅貨嚟到香港基本上肯定會扣陣關先，所以呢個就真係答大家唔到香港海關幾時會放行，呢個你可能要問返政府。另外就係Tote Bag嘅情況，黑N袋同白Cult袋其實就無乜大問題，但係藍袋夾咗兩三次都重係來回緊樣板，因此要係真正定咗樣板先可以生產，而亦都因為遠在印度嘅關係，基本上一來一回都唔容易，結果可能Tote Bag就會成為最遲出貨嘅產品。 總之如有任何不便，希望大家見諒。不過亦都可以同大家試一次Anything but MIC實際上係好唔容易，大家記得要珍惜香港製造之餘，重要支持返各位堅持做香港製造嘅有心人。 - 第二彈幾時出？（Windbreaker, Water Bottle & Notebook） 第二彈嘅設計會喺我哋出哂第一彈Merch之後先會Show俾大家睇，然後先會接受預訂，所以唔使急住，我哋先處理好第一彈嘅問題先。 *有關Merch嘅任何問題都歡迎大家Email去[email protected]，MK哥應該會盡快回覆你哋。 2. The Kongner 目前進度： - 會員情況 目前有大約260位朋友加入咗The Kongner成為咗Kongners嘅會員朋友，希望陸續亦都會有朋友對呢個計劃有興趣而加入呢個計劃。 - 請人情況 我哋目標係諗住請三個人，目前呢三個位已經有定落咗嘅人選，三位其實都係KONGNER弟兄嚟。我哋唔保證日後重會唔會再請多啲幫手，不過正如我之前咁講，我哋請人都係優先考慮請弟兄先，所以到時如果有機會要再擴充業務嘅話，我哋會再向大家埋手。 - 會員大會情況 其實The Kongner目標係想定期有會員大會去令到大家可以Keep Contact之餘，重可以建立一個更加實質同落地嘅溝通渠道。不過礙於目前疫情嘅問題，基本上現場嘅多人活動就無乜可能，所以我哋嚴正考量使用呢排你哋成日講嘅App Clubhouse嚟暫時代替呢個實體活動，因此希望大家如果對The Kongner有興趣嘅話，可以Follow返我同MK哥嘅Clubhouse Account同埋我哋嘅Club—The Kongner。 - The Kongner 運作情況 Interview將會係第一個我哋會開展嘅工作，Case Study同Documentary 都係想主打嘅系列，不過喺目前人力同資源限制嘅情況之下可能都需要慢慢嚟。最後就係Podcast，應該都唔會咁快推出住。 3. 我啲片 - 無限期停更系列：美帝的籃球 就如我之前咁講，喺無任何贊助同業配嘅情況之下，其實我目前係好難刻意抽時間出嚟睇波，咁所以基本上係唔可能做到呢個節目嫁喇，因此如果大家寄望《美帝》會有新一集嘅話，一係就係The Kongner做到起哂飛唔使我牽掛令到我有時間睇返波就可以做，一係就有大佬俾到合乎成本效益嘅資源我做，就係咁簡單。如果唔係嘅話，《美帝的籃球》將會進入無限期暫停更新嘅情況。 - 有生之年系列：西人文學 《西》進入咗「有生之年系列」狀態，其實好想做，但排期輪籌有排都未輪到嘅狀態。 - 一年一更/兩更系頂：垃圾驚批鬥座；做乜嘢懶人包 Game評當然要遇到我想講嘅遊戲先有得講，而實際上我亦都無辦法抽到時間出嚟有Game就玩得到，因此我大膽估計年更兩集應該都係呢個節目嘅極限，除非有業配。而懶人包目前都好似進入咗半年更嘅情況，因為實在有太多唔同嘅片輪緊籌，咁就只能慢慢嚟喇。 - 主打系列：𠝹櫈電影學會；我們與社會運動的距離；當我們在談論歷史時我們在談論什麼 《𠝹櫈》目前停更咗嘅原因係因為疫情原因久未入場睇戲，而又因為掛住做歷史片搞到我無乜時間寫呢類嘅稿，因此我希望未來會重新提升返呢個節目嘅產量，所以希望大家期待下。 《社會運動》呢個系列應該都會幾常更新，主要係因為「有目的地」做片。 《歷史》目前嘅Priority都係先埋咗台灣史同韓國史尾先，其餘地方嘅歷史就再從長計議喇。 4. 其他 - 米迦未來嘅工作 因為我嚟緊應該要抽多咗時間去管理The Kongner嘅運作同埋產出，因此喺咁嘅情況之下，我喺Happy Kongner嘅產量應該會減少。咁所以坦白啲講，其實大家想我可以抽多啲時間出嚟做大家想睇嘅嘢嘅話，除咗支持The Kongner令我哋可以請更多人分擔我嘅工作令到我有時間做其他嘢，又或者拉到業配俾我出片，我諗都無其他方法嫁喇，希望大家明白啦。 - 目前片嘅輪籌情況 首先接住落嚟會係兩條「有目的性」嘅片會出咗先，然後應該就係推遲咗好耐嘅Cyberpunk2077片，之後就應該係先解決埋台灣史之後，就會解決埋韓國史嘅問題，我諗我都希望喺今年入面可以解決哂目前呢一堆片先，咁當然一如既往，有俾錢就有得打尖，因此有業配嘅片就當然係會優先出嫁喇。 最後，如果大家有啲乜嘢問題係我喺上面無提過嘅，都可以喺下面留言問返，我都會一一回覆大家嘅，就咁。