就嚟2019年，DSE都就嚟，究竟中六嘅同學仔應該點樣調整温習英文各卷嘅策略呢？ - 一. 分數比例 首先要了解各卷嘅分數比例，從而知道邊一啲卷係特別重要同埋需要投資更多嘅時間同埋心力落去。 Paper 1 20% Paper 2 25% (A-10%, B-15%) Paper 3 30% Paper 4 10% // 二. 成本效益 因為我哋唔可以淨係睇佢佔分重與否，都要考慮投放落去某一個分卷嘅時間同埋成績進步成唔成正比，但呢點係好睇個人嘅情況，所以你哋要理性地分析投放時間係咪值得，就唔係單單見到Paper 3又或者Paper 2佔分特別重所以你就要投放最多時間落去。 舉個例啊，有個同學可能Paper 2 Content做得好好，但佢Grammar/Vocabulary特別弱，可能以往英文根基打得唔好，可能佢今日每日pick up返少少grammar items係okay嘅。但如果佢再後啲先去諗呢一個問題，佢就應該要明白Grammar或者Vocabulary都唔係一啲一日就可以pick up返嘅範疇，咁會唔會投放時間去其他分卷更加划算啦？調返轉去睇，一個Language已經唔錯，但思維冇咁好嘅同學可能投放時間喺Paper 2，專注練brainstorming同不停睇人啲佳作又可能好快有好大進步。 總括嚟講，就係要了解分卷比重同埋分析自身嘅優劣勢，調整你投放喺唔同分卷嘅時間同埋心機。 // 三. 不同分卷重點同操練方法 ⭐️Paper 1 幾樣野㗎啫，操DSE卷, 睇marking scheme了解考評局期望，揾出一套答題技巧，再做下一份。進入大直路要明白DSE英文同真係鍾意英文嘅嗰啲英文係兩碼子嘅事，當重點係考試同答題嘅本身時，唔好期望自己可以學識Text入邊每一隻字, 因為你之後唔會再遇返同一篇文章，但題型同考評局期望嘅答案永遠都係嗰啲嘢，所以得返幾個月，重點一定係在於答題技巧。 ❌ 邊啲人唔好再操Paper 1？ 已經操晒所有DSE卷而成績都唔錯嘅就盡量唔使再做其他出版社嘅題目，因為有啲出版社其實出得唔係太好，佢哋嘅題型，以致答案都同考評局嘅唔同，有時做太多反而會做壞手勢。如果真係要做嘅，一係就搵一本好啲嘅，一係遇到唔肯定嘅答案你同信任嘅大人🤪討論下邊一個答案先啱。 - ⭐️Paper 2 暫時來講都仲可以花時間作多啲文，因為再過多兩個月你就會好專注喺其他學科嘅操卷而唔會再有其他時間放喺作文度。作文分CLO, O係最易處理，用吓signpost, connectives, conjunctions, 識分段都唔會有咩事。其次係C, 大大我平時最鍾意講思維，追吓post啦。自己嘅練習就係不停Brainstorming, 就算冇時間作晒成篇文都好，攞每一題題目用10至15分鐘時間做Brainstorming，同埋睇多啲佳作參考吓人哋嘅ideas。最後係L, Vocabulary最難搞，唔好曬太多時間背啲冇咩機會用得着嘅字，學多幾句Sentence Structure都可以嘅，但千祈唔好搞到太複雜(尤其英文唔係突別好嘅時候)，以免因小失大。 ❌ Language最重要？搞到有咁grand得咁grand? 雖然三部份佔分係一樣，而且三部份分數都係掛鉤(即係冇得話C低分但俾L好高分)，但我個人覺得冇C, 你L同O幾勁都好，都好難高分。唔好L用太多時間、搞太多花臣，跟住ignore咗C，C先係成篇文章嘅根基。(有啲人揾我改文，grammar冇咩錯，字用得靚但睇完冇內容嘅，完全俾唔到高分。) - ⭐️Paper 3 操卷，睇marking scheme，諗唔掂睇tape script, 諗考評局期望，再操。Listening方面，操曬DSE, 可以考慮操CE同AL, CE方面將聲帶調快先做，AL唔使介意成績，着重手速同note-taking仔細程度嘅練習。 ❌溫Vocab有用嘛？ Listening考兩樣野，一係就係你識嘅字，一係就係你要拼嘅音。拼音有得練嘅，英文字母都係得26隻姐，雖然音嘅組合就會多啲，但都叫有限嘅。字呢，無限嘅，唔識嘅就大把，日溫夜溫都未必考試嘅時候出返。 咁其實可以將兩樣嘢夾埋一齊去溫嘅，舉個例，你同另一個朋友每日互抽10個都叫正常、有機會DSE遇到生字俾對方默(用online dictionary發聲啦吓)，咁大家一日學20隻字，又學下拼音咁囉。😂 - ⭐️Paper 4 就係要肯講，四個人用DSE模式練又得，兩個人不計時互相傾時事又得(我同學生補習係呢種)，一個人自己攞啲嘢up吓, 例如IR題目又或者對日常生活嘅嘢嘅睇法都得。 非常彈性嘅一份分卷，亦都係時間追唔緊迫嘅，可以考晒所有嘅科目之後先再慢慢練啦。👍🏼 // 大大的話： 其實唔知有幾多今年嘅考生有follow我哋，進入2019年，大直路啦，講加油呢啲都係心照嘢啦，幫大家理性分析件事先係我嘅工作。作為一個英文老師，見到學生花好多嘅時間係英文上面固然開心啦，但記住去到大直路嘅時候，成本效益同作戰策略就係非常重要嘅課題。係時候諗清楚邊一科對於你入學係最有優勢，投放最多資源係嗰啲科度。假如你覺得英文唔係最值得投資嘅學科其實都無所謂㗎！ 每個人都係得24個小時，千祈唔好諗住自己有好多嘅時間可以投放喺所有嘅學科度，適當嘅時候都係要做抉擇嘅！