10-11/2017 電影睇睇睇 . 銀翼殺手2049 Blade Runner 2049 身邊話呢套野垃圾ge朋友唔少，但如果你睇過82年果套舊版，你就會覺得呢套係極品黎。其實呢套係廿幾年前果套ge續集，雖然開頭新男主角好似唔係好關事，但查案愈查愈發現同上集接軌。今集其實都係講人性blahblahblah，動作場面激少，節奏好慢好多停頓位，但其實上集都係咁慢ga la，咁先俾到時間你消化嘛，同埋有好多位真係要靜落黎先睇到佢拍得有幾靚。唯一唔太滿意係臨尾冇乜點交待大財團老闆點，其實佢果邊應該仲有更多野可以講，但畢竟套戲都已經成百六分鐘冇得再長，有D可惜。套戲有一點我係非常鐘意：其實你不是故事的主人公，你只是別人故事的其中一部份。正因為咁先會深刻。 . 美女變怪獸 Colossal 其實可以變狂笑片又或者愛情片但睇落比想像中清新，陣小品味睇得幾舒服，個結尾可以話我大快人又估你唔到會咁玩囉😂 . 人造天劫 Geostorm 由頭到尾係咁炸個地球要幾誇張有幾誇張，睇災難之餘又講查下到底邊個搞事所以基本上零悶場，不過好睇還好睇，但硬係少咗啲嘢，可能係人性刻劃又可能係深刻場面，令套戲談唔上經典，爆谷片一套就是 . 獵殺星期一 What Happened to Monday 呢套真係期待已久，題材勁正，雖然都幾多反駁位但爽度夠就好，睇落比想像血腥赤裸，冇諗過死咁多人，又覺得其實可以再死多啲，女主角真係無敵，一人分飾七角唔只流於表面，除咗化妝之外，連表情習慣講嘢語調甚至連小動作成個氣場都可以唔同，好痴線😮 . 七刻時空 Before I Fall 無限重置呢條橋響動漫界已經爛到爆，不過都想睇下電影會點玩，雖然主要係拍俾時下啲青少年妹妹睇，但都拍得有少少悶，不過到講佢由放棄態度再同屋企人修補關係果個位都幾感動，一路睇都幾有好感係直到臨尾果幕...我直頭想大叫WTF!? 雖然咁樣都要good ending其實係有少少老土，但而家個結局似係個作者寫寫下突然三秒內決定唔寫啦由佢啦咁囉🙄 . 雷神奇俠三：諸神黃昏 Thor: Ragnarok 轉風格跟返系列中最受歡迎嘅銀河守護隊，色彩繽紛唔再灰浸浸兼由頭笑到尾，幾時都話幽默嘅男人最有魅力，今集好笑到好似撞邪嘅雷神堅係charming，不過電親所有人嘅短髮look我反而無感囉😌 . 盧根急轉彎 Logan Lucky 套戲好慢熱，開頭都真係幾悶，但去到中段開始入戲又幾好睇，同埋個結尾都幾精彩，冇諗過會扭到橋，另外其實成套戲都有陣復古味，雖然唔中我鐘意果種，但都幾有心思幾過癮😏 . 正義聯盟 Justice League 娛樂性係有，但其實由佢話上畫我已經講定佢一定唔會好睇得去邊，結果所有缺點都俾我講中，有半數英雄本身冇獨立電影基本唔會話好代入到，又要花時間介紹佢地，不過有一點就真係估唔到，就係超人屈機屈到其實班廢柴聯盟唔出場都得，聯咩盟啫？改名做超人與愉快的夥伴們算啦🙄 . 我想吃掉你的胰臟 君の膵臓をたべたい 本身有睇過漫畫都知個故仔大概係點樣去，所以最後個爆點冇喊到，但隔離果個就喊得好犀利囉哈哈，原著小說係點我就唔知啦，但電影同漫畫有啲唔同嘅係佢多咗啲後日談嘅位，例如男主做咗老師之後嘅事同女主朋友嘅結局等，令到本身睇過其他板本嘅都會覺得有得著同好完滿，唯一一點好不滿嘅係男主個名一開始就爆出嚟，明明隨住劇情發展男主嘅代號會產生變化嚟講佢嘅成長，呢個位係作品裏最正嘅地方嚟😌 . 📷 iPhone X ➡️ Slide the Slides #馬高影音雜誌