《小將處子力作助藍軍取得英超首勝 車路士對水晶宮賽後分析》
.
英超開鑼，車路士喺主場迎戰由新帥韋拉執教既水晶宮，亦係自上季中賽季停罷後首次再喺自己主場作賽時能夠有球迷入場，熟悉既氣氛都終於歸來，而藍軍亦不負所望相對較為輕鬆地大勝一場，取得今季英超首場勝仗。
.
由於超級盃奪冠後無幾日就要把上迎接哩場賽事，加上少部份球員包括薛耶治以及簡迪喺果場賽事中勇戰受傷，杜曹喺今場開鑼戰都作出左少量輪換，門將繼續由文迪把守最後一關，三人防線之中較令人意外既係小將查路巴依然獲得正選機會，伙拍基斯甸臣同魯迪加組成三中堅，而左右翼衛分別由馬高斯阿朗素以及艾斯派古達擔任，雙中場方面由佐真奴夾剛轉8號球衣既高華錫，至於前線就少有地將添姆雲拿移入中路，左右翼鋒就由蒙特同佩利錫擔當，同上季一樣依舊維持一個343陣式為主。
.
雖然陣式上睇落無乜變化，不過喺攻守兩端以及轉換過程中就有更細節化既調整，先講進攻，球員之間無論喺控球在腳還時無球在腳時，走位現身接應都至少有兩個或以上選擇提供到比持球既球員，亦同時少左上季兩名球員互相疊位或重複現身喺同一位置既情況出現，明顯喺合作同流暢度上有所提升，而喺防守上前後夾迫將空間收窄既表現更加理想，亦同時有其他球員負責跟進對手既接應點，更為有效地奪回控球權。
.
不過喺到達對手禁區前區域既問題依舊，面對對手嚴密防守之下都只能夠運用速度同球員個人能力嘗試突圍，今場波係季初依然精力充沛可以咁做，但當賽季一直進行時球員既速率就難免有所下降，到時就唔能夠再單靠自身個人去做搶分核心，亦都係杜曹希望盧卡古加盟既主因之一，提升前線運動戰能力以及負責更多身體對抗部份，從而為隊友爭取更多空間處理其他進攻項目。
.
至於查路巴既入球除左高質之外，亦令球迷回想起已轉投AC米蘭既湯姆利，個人認為喺杜曹心目中查路巴既位置會比起離隊既湯姆利更高，近兩場波都睇到前者除左喺身高上有明顯優勢之外，喺一啲防守處理既細節上亦都相當淡定，面對住一啲頑強前鋒對手都唔會輸蝕比你，再加上視野同長傳準繩度高，今場波都交出過唔止一次直接傳送到前面隊友製造埋門機會，正當以為蘇馬既對手會係傳得熱烘既觀迪時，原來真正隊友竟然係小將查路巴先岩。
.
黎緊將要面對住阿仙奴，希望杜曹唔會再比哩位同巿對手不殺之恩。
.
《岩睇既比個Like支持我地啊！》
作者 : BluexLion車迷手記
-------------------------------
同場加映《關於收購盧卡古 我想說的是...》
https://s.fanpiece.com/0WaFOek
.
#Chelsea #車路士 #英超 #水晶宮 #查路巴
https://s.fanpiece.com/7mDEsRb

【英超開鑼】
.
英超正式開鑼，首場賽事車路士將會喺主場迎戰水晶宮，亦係自上個賽季停罷過後再一次有球迷入場觀賞英超賽事...
.
而喺賽事之前，球隊官方正式公佈新賽季球員號碼，令人意外既係8號新主人並非蒙特，而係由高華錫接上，較有趣既地方係後者本身既17號球衣過往三代主人都曾經更改號碼，包括夏薩特、柏度以及依加既高華錫，除此之外亦有幾位球員獲得新號碼...
.
第三門將比堅拿利接上卡巴尼路既13號球衣，而上季季尾被安排上一隊集訓既小將安祖連就轉穿上27號，另一位後防小將上場於超級盃決賽打足百二分鐘表現獲好評既查路巴就接任14號球衣，接替已轉投AC米蘭既湯姆利留下既號碼，至於盧卡古尚未在號碼名單之上，相信留待艾巴咸轉會事宜結束之後會再作安排。

希望球隊今晚旗開得勝，新賽季開個好頭！
.
《岩睇既比個Like支持我地啊！》
作者 : BluexLion車迷手記
圖片來源 : www.rbc.ua
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #英超

【轉會消息】
.
盧卡古正式由國際米蘭轉投至車路士，相隔十年後再一次重投史丹福橋，球衣號碼暫時未有公佈，相信會留待艾巴咸既去留再作安排，亦同時相信哩單轉會經已係今個轉會窗既重點收購項目，餘下時間球會將主力集中於放售球員縮減陣容以及喺中堅人選上作出部署。
.
稍後時間將會承接上次篇文章，分析一下杜曹需要盧卡古既原因。
.
《岩睇既比個Like支持我地啊！》
作者 : BluexLion車迷手記
圖片來源 : RemoNews
-------------------------------
同場加映《令車迷們「瘋狂」的一個暑假 淺談藍軍大灑金錢的一個轉會窗 – 後場篇》
https://bit.ly/2T6r2YE
.
#Chelsea #車路士 #盧卡古 #國際米蘭 #杜曹