［其實唔難］TLDR – 佢係三哥個仔嘛！此post已完啦。家庭觀眾唔好學呀，死人的。

（明報原文：譚仔三哥之子攻台變定居 「香港只是生存 台灣才是生活」）（https://bit.ly/2CMAICw）

1. 好，冇法，循例一堆利申先，你知而家啲人幾咁多是非。首先，譚仔又好，三哥又好，我都係近乎唔食嘅。咁多年夾埋，兩間食過唔超過十次。咁以我呢啲餐餐出街食嘅嚟講，好少架啦，仲要我樓下就有間。咁呢唔夠十次中，仲有一兩次係試食（了解其他人嘅口味嘛），或者同朋友同事食。真係我自己主動走去食嘅，一兩次吧。邊位見過我食譚仔或三哥嘅，可以指證。

2. 篇文云云，寫得不錯的，明報啲報導當然不錯。個記者我唔識但有睇開，相當不錯的。

3. 至於三哥個仔云云，我當然唔識，但望落講嘢都正正常常。

4. 咁，仲要討論乜？就係要講，家庭觀眾，切密模彷咯。我係講啲哲學啲嘅嘢。

5. 個point 好簡單，佢係三哥個仔，你唔係嘛！咁其實此post 已完。

6. 我當然信三哥個仔冇講大話啦，萬二蚊夠洗仲有錢儲仲買到樓仲娶埋台妹（嚴格嚟講，其實三哥個仔冇講萬二蚊同佢買樓有直接關係嘅）。

7. 喂，真係唔難喎！Mark Zuckerberg一蚊美金年薪（真的）都仲有好多錢剩仲買到樓仲娶埋陳慧嫻！李澤楷在PCC dup拎四皮嘢（梗係一年啦）一樣買得起樓仲買埋畀女朋友！冇呃你喎。

8. 請別誤會，我唔係仇富（＊），更加唔係話三哥個仔離地。而係再高層次啲，你不如諗下，你睇埋咁多「經驗分享」，其實係咪真係有用？唔止講投資金融，任何嘢都係。「經驗分享」唔係冇用，但，總要加啲鹽， grain of salt

9. 好簡單，早排讀者話，我好似呢排又成日講自己係學霸。大佬，真係劇情需要。冇錯，我話你知我考CFA之前係睇波睇通頂的，我初中考試日日打麻雀，照樣成績好。但，唔好叫府上資質平平嘅貴子弟學咯。

10. 真的，例如早排講我朋友見工篇文（https://fbook.cc/3BFr），有另一勁人朋友（真朋友）唔多同意，以佢自己為例，就唔會漁翁撒網，一出必殺云云—我勁人朋友梗係冇呃我。但你唔係佢嘛大佬！你去考中學啲教席，咪就係game of chance．所以我勁人朋友真係冇呃你，但亦唔等於我講錯。你唔係佢嘛！

11. 同樣地，另一勁勁人（唔代表勁過或唔勁過勁人朋友，只係稱呼一個）朋友，早排講開，覺得好多人搵藉口，賴冇錢輸在起跑線，亦係以佢本人為例，細個一樣點點點但又係點—我同佢唔算極熟，但我對佢人格全無質疑，佢肯定冇講大話，而家亦都係堅勁。但，首先，就幾十年前嘅事啦，世界唔同咗。二來，大佬，佢本身堅係勁勁勁人嘛。

12. 即係同一個道理，有冇聽過約女仔，根本唔難？請睇以下呢段

13. 「喜歡一個女孩，就要勇敢約她出去，即使她剛開始時有點矜持，在你的堅持下也會同意，我用這個方法，可說是百試百靈」—吳彥祖。（＊＊）

14. 邊有呃你呢！

15. 舊文寫過，回一回帶，講多次呢個鸚鵡同豬嘅故事　：　飛機上，一隻鸚鵡對空姐說：「給大爺來杯水。」豬也學鸚鵡，對空姐說：「給大爺來杯水。」空姐大怒，將鸚鵡和豬都扔下了飛機。這時，鸚鵡對豬說：「你傻的嗎？大爺會飛呀！」

16. 回多次帶，火腿蛋嘅故事：　農場隻雞同隻豬，諗住幫主人廢祝生日。咁隻雞話，我地不如整個火腿蛋啦。隻豬話：你當我真係咁豬？你就貢獻個副產品排粒卵，我要終身殘廢呀！

17. 教訓？講到好明啦。固然，好多人係學習嘅動機，同能力都係冇。但，就算有都好，其實更重要嘅係，自知之明。你唔係人地咁質地咁背景，去學人地，死得仲快。不過其實亦係矛盾的，因為太過縮埋在自己襟福鬆，又係一事冇成。

18. 所以都係，only the paranoid survive．邊有方程式畀你跟。

19. 又，三哥個仔話，「在台灣居住約10年，仍不習慣當地的飲食如火鍋、鹵肉飯」。想講，其實呢啲已經相當外地人friendly了。「不如試下食檳榔」。不過口味嘅嘢，好難講嘅，正如我食足一年都唔係好容忍到英國啲嘢食。唔知一個二個想過到去食乜。（＊＊＊）

20. 呀仲有，到底萬二蚊在台北夠唔夠用？有機會開啲新文講。但呢啲討論例牌會失晒焦。夠唔夠？唔好咁極端講22K，咁你話台北嘛，台北怕且多數人都唔止22K，但，萬二蚊人工，近五皮嘢台幣。咁講返，台灣嘅人工中位數，都只係四皮嘢台幣左右。即係你至少好過一半台灣人，咁你話「生唔生存到」？

21. 當然，你見三哥個仔話，在香港都只係「生存」。生存呢啲嘢，都真係好主觀。

22. 所以簡單答，如果唔係三哥個仔，在台灣拎萬二蚊港紙人工，當然生存到。在台北都得。大把人都冇呢個人工。但，就肯定唔使諗住一年去幾次日本呀用埃瘋呀訂Financial Times呀咁咯。

（＊）真的，埃汾幾時都敬仰有錢人，真心。我嘅願望就係做一個普通有錢人，然後同你地一齊去仇視啲超級有錢人。

（＊＊）相信只係段子，吳彥祖應該冇咁講過，但你問佢溝女心得，我估佢都係講咁上下嘅嘢。「最緊要有誠意」

（＊＊＊）其實埃汾在英國時都好多時自己煮—冇錯，就連自己煮嘅都忍受唔到。唔係慳錢，主要係懶。由我間房行去campus有飯食嘅地方，應該都廿分鐘吧。仲要係日頭先有。

————————————
多謝你睇到呢度，而家到你救我全家了。新搞作。同Homeblogger新合作，以往得文字，而家玩短片。第一炮當然係你最關心嘅，下半年個市點睇。港股，美股，樓市。暫時斷次買。80蚊，講足半個鐘。你請我食一次飯一定唔止，我好大食的，食你七八舊水都得。

入面有埋圖，有埋恒指標普目標價，教埋資產配置，有埋6隻心水股。有港股有美股有大有細。

請去呢度睇：https://bit.ly/37S4iC5
課程編號：CC002
客服whatsapp: 63832145