【#冷衫 縮水？6個Tips有得救】 ------------------------------- Follow @likemagazinehk | 每日送上優質生活Tips ------------------------------- 等到12月，氣溫終於跌到十幾度，收埋喺衣櫃底嘅冷衫可以拎番出嚟著囉！雖然冷衫保暖力強，但清洗就比較麻煩，稍一不小心，就會縮水、變形、起毛粒。就算件冷衫幾靚都好，走晒樣就唔想著，就要扔到垃圾筒。唔想造廢，清洗冷衫時有乜要注意呢？萬一件心愛冷衫縮咗水，又可以點補救呢？ 冷衫唔一定乾洗 其實無論洗乜衫都好，清洗前第一件事係睇下洗滌標籤。上面寫有關於件衫嘅資訊，包括：質地和清洗方法、用幾多度水溫、可唔可以扭乾等。即使同樣係冷衫，但質地可以有好多種，有天然，亦有人造纖維，清洗方法都唔同。例如羊毛，常見都有3大類：Merino、Lambswool和Cashmere。3種都係嚟自羊身上，不過因取自不同羊種、部分為纖維粗幼唔同，因而觸感、保暖度及價格都唔同。基本上，羊毛質地冷衫嘅標籤都話唔可以手洗，建議乾洗。乾洗唔係叫你一定拎去洗衣舖搵人代勞。自己屋企乾洗，即係用蒸氣機或熨斗蒸件冷衫，用蒸氣消毒殺菌，順手除味。 暖水浸泡 若果冷衫太污糟，有污積，單用蒸氣無法清乾淨，其實羊毛衫都可以手洗，只不過洗滌時要非常小心。由於羊毛要特別護理，建議使用羊毛專用清潔液，以暖水浸泡方式清洗。清洗時咪太用力又搓又捽，輕輕按壓冷衫，重覆多幾下，你會見到盤水顏色愈來愈黑，污物及汗脂等已經隨水走出來。如果袖口、領口有漬，可以用毛刷輕輕洗刷。 用毛巾吸水 跟著去水一步非常重要，做錯件冷衫就玩完。先取大毛巾，然後快手將濕嘅冷衫平放上去，然後把毛巾連冷衫捲起來，借用毛巾會吸走冷衫上嘅水。捲起嘅毛巾可以稍稍扭一下，盡量將冷衫裡嘅水擠出嚟。 晾曬記住要平放 當冷衫唔再滴水，就可以拎去曬。曬冷衫又係重要步驟，做錯咗件冷衫又要報廢。仍然濕嘅冷衫要平放，垂直掛嘅話，會因為太重而愈拉愈長。建議可以買曬衫掛網，將冷衫平放喺上面，上下通風，加快吹乾。另外，可以用2至3個衣架，將冷衫以平放方式横晾喺衣架上，減少冷衫因濕水下墜嘅情況。 機洗都得 手洗之外，其實冷衫都可以用洗衣機洗，但有幾點要注意。首先，洗衣機模式必要調至柔洗。第二，洗衣液唔使用具特強潔淨、漂白功能，一般中性或加倍護理配方都可以。第三，用暖水，冷水或熱水會令羊毛纖維縮埋，洗完件衫觸感好硬。第四，冷衫要竹洗衣袋，減少起毛粒。洗完按之前所講嘅方法曬乾，千祈咪懶用乾衣，否則冷衫又係揦埋一嚿要報銷。 蒸氣熨斗救縮水冷衫 萬一唔小心，冷衫縮咗水，點算好呢？補救方法好簡單，就係用蒸氣熨斗，一邊用蒸氣，一邊用手輕輕拉番鬆啲纖維。呢個過程必要有耐性，要慢慢嚟，大快拉過籠，件冷衫就變得鬆泡泡走晒形。網上有比更懶嘅人用嘅方法，就係將冷衫套入枕頭，然後放入蒸鍋內蒸15分鐘。其實原理相近，但香港人邊個屋企有咁大個蒸鍋呢？如果你有，都可以一試嘅。 全文：http://bit.ly/2LtuzwN