小一入學回顧之<培僑書院>

位於沙田大圍半山地方，校舍大，設備齊全，有泳池、兩個大球場、圖書館同CANTEEN，環境好舒服。呢間一條龍小學都幾受歡迎，今年都有成三千幾四千人報名，原因如下:

1. 一條龍中小學，2005年先開辦，只有11年，由於歷屆DSE嘅考生都未係「親生仔女」，比沙田傳統名校，中學DSE成績都仲係差DD，但隨住小一收生水準越黎越高，DSE成績一定會越黎越好
2. 以國際學校模式授課，唔會死板，唔著重抄寫，功課唔算多
3. 普教中，中文課程主要根據內地嘅篇章教
4. 英文科嘅課本全部係學校設計，以主題為教學單元
5. 學費好平，只係二千幾蚊一個月，每年嘅加幅唔大，輪質素同學校資源，培僑真係好抵讀
6. 學校每年會安排生活體驗俾學生，唔係去歐遊果D，係去農村學插秧、去探訪老人院，等小朋友多D認識唔同嘅世界同階層，呢樣都令我幾印象深刻

第一輪面試，學生首先會被安排到一個禮堂入面等，禮堂好涷，記住著多件衫。之後小朋友會分小組進行中文同英文嘅模擬課，入面會播放中英文卡通片，小朋友睇完答問題，之後老師會俾D字卡佢地重組句字，仲會用IPAD答問題，包括邏輯推理問題。全程大約一個半小時，時間都幾長。

第二輪面試，三個人一組入課室，主要考重組句字，用圖畫排列次序，再講故事出黎，另外仲有幾條數學題，主要考學術。

兩輪面試都只係見小朋友，結果通常會喺小一自行派位之後出，等家長們抽埋獎，有多個選擇，學校呢個安排好好。

小貼士分享:
1. 兩次面試都主要考學術，重造句字係大部分小朋友嘅弱項，喺屋企可以做下練習
2. 學校都著重德育，小朋友被安排等嘅時候，最好真係睇書耐心等，我估老師一邊都有留意佢地嘅表現