【物有所值！】小米Logo登場 歷時三年設計 價值200萬人民幣 尋日所舉辦嘅小米春季新品發布會，除咗推出新手機同埋宣布造電動車之外，最令人「驚嘆」莫過於新Logo設計。 小米CEO雷軍於會上表示，新十年換個新形象，專程搵咗日本著名設計師原研哉操刀，從「科技與生命關係」出發，融入「東方哲學思考」，設計出富有「數學之美」嘅新Logo。據傳呢個「圓角」新Logo設計費高達200萬人民幣，係咪物有所值，相信大家心裡有數。 設計師原研哉表示，科技越進化，就越接近生命形態，所以提出一種叫「Alive」嘅設計概念，將東方哲學思考融入小米品牌。認為新Logo應該係介乎於正方形同圓形之間，並透過數學公式「|x|^n + |y|^n = 1」驗證，得出多種非常美麗形狀，喺過程入面更充分感受到數學嘅魅力。 經過各種對比之後，決定選用最能夠體現「Alive」嘅「n=3」形狀，同時亦重新設計咗小米英文字母字體，呼應返新Logo輪廓。 （圖5） 不過有網民發現，小米官網換新Logo嘅方式竟然唔係更改圖片，而係喺原有Logo上加一行代碼「border-radius: 19px;」將佢變成圓角就算。唔知老闆雷軍知道後會唔會炒咗個位員工呢？話晒大拿拿使咗200萬，竟然一句代碼就搞掂。 翻查資料，原研哉為日本中生代國際級平面設計大師、日本設計中心的董事、武藏野美術大學基金會教授，無印良品（MUJI）藝術總監，曾為長野冬季奧運會設計節目紀念冊（圖6）。筆下著作《設計中的設計》同《白》更被翻譯成多語言出版發行，深受全世界讀者歡迎。 小米新Logo有無體現出「Alive」就見人見志，不過我一向覺得身為設計師「牙力」比「創作力」重要，有諗法之餘更要識得點Present，唔知原研哉係點樣氹掂雷軍收貨嘅呢？ #小米 #原研哉