【好有火🔥】2020年山火面積急升 真係意外咁簡單？

有無覺得舊年重陽山火好似特別勁？呢個唔係幻覺！前幾日明報頭條引述政府最新數字指，2020年受山火波及嘅郊野公園面積達900公頃，較前年高出3倍，即等同47個維園咁大【註一】。翻查過往報導中漁護署所供資料顯示，過去4年郊野公園內受山火波及嘅累計面積都只係866.9公頃【註二】，加埋都唔夠2020一年嘅900公頃，一年翻倍的「燒山」增長異常。

而自然因素似乎並非主因。山火嘅自然因素複雜，可以是高溫、低相對濕度、缺少雨水等等。若以雨量而言，2020年並非特別乾旱，天文台資料顯示，2020年總雨量（2,395毫米）與過去7年平均值（2,438毫米）相若，而重陽大火發生嘅10月，雨量亦有142毫米，環境因素不極端【註三】，所以2020年大規模山火背景因素並非特別風高物燥，而係外在嘅人為因素。

▍山火地點同殯葬區重疊

其中一個人為因素可能係同拜祭活動有關。舊年異常高嘅「燒山」面積，近4成（334公頃）集中係林村郊野公園【註四】。舊年重陽大火後，本研社製作咗《2020年10月新界燒山地圖》(LINK:https://bit.ly/321wMHM) 【註五】，發現山火嘅大概地點同「新界認可殯葬區」高度重疊，當中相當一部分亦位於林村郊野公園內。

值得注意嘅係，林村郊野公園並非最熱門嘅郊遊地點，但園內墳頭數字多，難以直接歸究多個火頭皆由遊人引起。明報報導亦引述消防處指，部分山火確實由香燭、冥鏹和蠟燭等引起，顯示「新界認可殯葬區」同郊野公園嘅用途明顯存在衝突。

▍政府解密檔案的啟示

除咗政策不健全、土地用途有衝突外，山火猖獗背後嘅原因亦明顯係執法不力。

呢個土地用途衝突，80年代嘅港英政府亦注意到。參考香港政府解密檔案【註六】，港英政府自1983年起加入「新界認可殯葬區」發牌條件，要求獲發牌嘅村民，*必須* 在合適容器燃燒冥鏹，不能在曠野燃燒冥鏹 (No open fire may be used for any purposes whatsoever at grave sites inside Country Parks)。即係話郊野公園殯葬區內一定要有化寶爐，而係化寶爐以外生火即屬違法。

雖然條例係咁寫，但每逢春秋二祭，新界山頭燎原烈火，足以顯示政策設計或執法上出現問題。根據漁護署年報（2015-16年度至2018-19年），平均每個年度竟然只有7.5宗嘅非法生火遭到漁護署檢控，每宗平均罰款約 $600【註七】，比起亂拋垃圾定額罰款$1500仲低，阻嚇性存疑。

▍山火真係「意外」? 所以無嘢可以做到？

咁係咪可以有更好嘅方法去杜絕呢啲所謂嘅「唔小心」同埋山火「意外」呢？解密檔案當中就提到，港英政府為解決旱季由拜祭活動引起嘅山火問題，係1980年索性係新年、清明同重陽節直接喺郊野公園嘅植林區全面禁止生火，包括大欖、城門同大埔滘【註八】，證明早係40年前，政府就有先例限制拜祭活動而減少山火出現嘅機會，政府對於山火猖獗並非乜都做唔到。

例如政府可以將全面禁止生火加入成為「新界認可殯葬區」嘅發牌條件，或將防火標準與公眾墳場睇齊，將化寶爐集中喺某地點，例如郊野公園入口處，而非任由火種深入郊野公園各處，令山火在郊野公園各處蔓延，呢啲都係合理嘅解決方法。

可惜現在政府將起火原因簡化為「意外」（意料之外?）而不積極處理。但政策長年出現漏洞，加上執法不力，山火其實係大眾都意料中結果。政府若然繼續消極，每年春秋二祭嘅山火只會燒得更猛烈，浪費數十年來保育嘅心血同燒埋屬於大眾嘅公眾財產。

#搞乜郊野
#安心出殯

【註一】山火去年燬47個維園 面積飈3倍 3年檢控15宗 朱凱廸批執法鬆：不涉人命不
了了之 http://bit.ly/3dmMnse

【註二】大欖郊野公園山火植樹區焚毀　修復需廿載　環團：如現山火又歸零
http://bit.ly/2NuveBQ

【註三】個別要素的每月數據 天文台月總雨量(毫米)
https://www.hko.gov.hk/tc/cis/monthlyElement.htm?ele=RF

【註四】雞公嶺5年13宗山火 去年燒毀334公頃等於三分一青衣島 https://bit.ly/3bcFEyj

【註五】【治山火 用重典】http://bit.ly/2N50ebT

【註六】香港歷史檔案 HKRS882-1-34 Disposal of NT Dead

【註七】
漁農自然護理署年報 2014至2015 http://bit.ly/3aqBvr5
漁農自然護理署年報 2015至2016 http://bit.ly/3dq1YqL
漁農自然護理署年報 2016至2017 http://bit.ly/3dgioC6
漁農自然護理署年報 2017至2018 http://bit.ly/2N6UJti
漁農自然護理署年報 2018至2019 http://bit.ly/2NAZVFm

【註八】
1980年3月1日 星島日報 《植林區內山火頻仍 掃墓今次焚燒祭品 新界司向鄉局徵詢意見」》

— 本土研究社 —

▍研究到底　參與小額月捐支持
https://liber-research.com/support-us/
▍自訂金額支持香港土地研究
https://www.paypal.com/cgi-bin/webscr?cmd=_s-xclick&hosted_button_id=NFVSMP9T6GDSJ
👣Follow Us: https://linktr.ee/liberresearch

#香港檔案追蹤

【要上網睇香港歷史檔案有幾難？150年殖民歷史得101份文件！】

香港嘅檔案管理有幾落後？最明顯嘅除咗冇檔案法之外，好多檔案服務都差強人意，比如香港政府檔案處嘅網上藏品。

今時今日將檔案數碼化上載到網上係大勢所趨，令公眾更容易接觸到檔案，作參考和研習之用。根據政府檔案處回覆立法會議員莫乃光嘅提問（註一），我地嘅香港檔案處都「不落人後」，150萬藏品當中已經數碼化咗8萬5千多項歷史檔案，但有幾多上網睇到呢？睇翻香港政府檔案處網站嘅網上精選館藏文獻「紀錄香港」（註二），從1841年代到1990年代近150年嘅殖民歲月，原來只得101份文件——即係平均每年只有0.68份。

呢d香港檔案處嘅網上檔案唔單止數量少，而且冇得搜索，僅有嘅101份檔案都唔係完整嘅檔案，只係零散嘅文件，甚至只係封面加一兩頁內文。公眾至多只能感受下當時事件的氣氛，難以做到較完整嘅閱讀和整理。當中，1980年代更冇一份直接涉及中英香港前途談判內部討論嘅檔案文件，只有尤德爵士就職典禮致詞、1983年身分證設計、港幣聯繫匯率聲明等已公開資料。

咁英國國家檔案館網上檔案情況如何？現時，英國國家檔案館有網上嘅檔案庫，搜索「香港」共有3219份數碼化檔案（註三）。呢d數碼檔案係完整嘅檔案，大部分都要付3英鎊不等下載，部份檔案可於檔案解封的首月免費供人下載，若原檔案是菲林檔更可無限期免費下載，方便公眾存取和閱讀完整檔案。

對比香港檔案處同英國國家檔案館嘅網上檔案，我地睇到兩種處理網上檔案嘅思維：前者從「展覽」嘅角度處理數碼檔案，公眾只能閱覽檔案的一小部分「試味」，感受事件嘅氣氛；後者則是用「研究」的角度管理網上檔案，公眾可下載完整檔案作研究用途，整理事件嘅來龍去脈。

檔案唔單止係屬於過去嘅「展覽」，更係研究「過去」同理解「當下」嘅素材。請問香港檔案處幾時先更加開放網上檔案，真正做到「研究」用途呢？

＃狙擊檔案館

註一：http://bit.ly/2KzY3K3
註二：https://www.grs.gov.hk/ws/rhk/tc/index.html
註三：http://discovery.nationalarchives.gov.uk/results/r…
____________
█ 解密過去🔓重掌未來 █
💰捐款支持：https://www.paypal.com/cgi-bin/webscr…
📖研究成果：https://medium.com/@decodinghkshistory
🗂計劃詳情：https://researchforfuture.hk
📧聯絡 #香港前途研究計劃： m.me/decodinghkhistory