#在日落前交換日記
1229
原則終結者 Oscar

2018年不要再做的事列表呀？的確，由定目標去做一開始，就已經知其實你係唔會做架啦，所以我都決定，要定嘅唔係目標，係規則，由2018年起開始推行：

1. 你以後約我幾多點，我都會要求遲一個鐘到，我唔想等人，更加唔想人地要等我先開始，所以你地未開始之前我係絕對唔會到。
2. 以後話問題只話「知」，「唔知」，同埋「我點會知」，將解決問題嘅責任交番俾問題發起人，唔好浪費自己太多細胞。
3. 所有嘢都係身外物，可以放棄就放棄，但唔好俾阿媽發現，因為佢會執番入嚟。
4. DUMP膠咗條假車匙佢！
5. 留喺公司嘅時間要盡量縮短，「有多嘢做」同「做到好多嘢」，係兩回事，我要製造輕輕鬆鬆就「做到好多嘢」嘅假象俾人睇。
6. 時間唔好花喺交通，花喺溝通，搭的士啦。
7. 拒絕一切約學哩樣學嗰樣嘅活動，想學就會學，約咩人啫。
8. 生活興趣要識平衡，買太多FIGURE，偶然都要買番啲模型。
9. 長大啦，BB戰士就送晒俾啲小朋友。
10. 時間有限，工作無限，有人想見，推晒所有工作活動去見佢啦。

以上規則，小弟2017年尾已經謹守緊，相信嚟緊2018都唔會有咩大轉變。一切如常進行，都唔差吖。

會長 檸

世界唔似你預期，就梗架啦，不過你總可以做一個你預期嘅自己：）係呀，我投哩首💚