【塔斯曼尼亞 Road Trip 美食河 】

塔斯曼尼亞，呢度面積約 6.8萬平方公里 ，大概等於 62 個香港咁大，旅遊人士都係以自駕遊為主，由北面嘅朗塞斯頓至南面首都荷伯特，有完善嘅公路貫穿㗎！所以咪話囉，去塔斯曼尼亞最緊要就係有架車，同埋有一個識揸車嘅旅伴！當一切都準備好嘅時候，你哋有無諗過另一個重要嘅問題：「長路漫漫是如何醫肚？」未諗過？拿，小編已經準備咗你 road trip 沿途可能會經過嘅四個醫肚勝地畀你 bookmark 喇～係咪好貼心呢？

1. Get Shucked Bruny Island Oysters
生蠔就一定係塔斯曼尼亞嘅必食啦！點解？因為呢度零污染嘅海水係最適合生蠔生長㗎！呢邊嘅蠔 size 適中，而且肉地肥大爽甜，真係會食到停唔到口！ Get Shucked Bruny Island Oysters 係一間沿海嘅生蠔小店，佢哋喺海上自設蠔場養殖太平洋生蠔（Pacific oyster），養至年半至兩年夠「靚仔」之後，就會拎上嚟運去鋪頭入面賣㗎喇！試下啦，真係好新鮮㗎！

圖片來源📷 : Get Shucked Bruny Island Oysters

2. Candy Abalone
唔講你可能永遠都唔會知道，塔斯曼尼亞係一個鮑魚王國！Candy Abalone 就係省內其中一個鮑魚供應商嚟喇，就算唔經呢邊嘅話，佢哋都有 counter 喺 Barilla Bay Oysters 嗰邊賣佢哋嘅鮑魚㗎，仲有 tour 可以 join 㖭！連 Dodo 姐都有幫襯過，你哋經過嘅話就唔好錯過喇！

圖片來源📷 : Candy Abalone

3. Freycinet Marine Farm
其實澳洲出名嘅唔只係生蠔，青口一樣唔錯㗎！唔信？入到去你就會見到人人都喺度食青口嘅景況㗎喇！呢度嘅店家自設超過 150公頃魚場養殖青口，每日送去鋪頭賣。唔只遊客啊，有好多當地人都會特登揸車過嚟買返屋企㗎！呢度啲海水咁乾淨，其實就咁整唔加調味都已經好好味㗎喇！食完嘅青口殼，會有獨立回收桶，當地人會整碎啲青口殼當肥料種田，你話幾環保呢！喺食完青口嘅一刻，你已經為保護地球出咗一分力㗎喇！

圖片來源📷 : Freycinet Marine Farm

4. Sorell Fruit Farm
沿住公路都有好多果園㗎，但係 Sorell Fruit Farm 呢間呢，就可以放題任食唔嬲！果園入面果香四溢，抖啖氣都覺得甜啲～拿，呢度每季都有唔同嘅 seasonal fruits 㗎！10月至3月中就會有各式各樣嘅莓類，士多啤梨超有莓味！ 12月至1月就有車厘子，勁甜又多汁！天氣再暖啲嘅時候就有其他生果例如蘋果、梨、杏、桃等等。 不論你邊一個季節嚟到，你都唔會失望㗎！

圖片來源📷 : Sorell Fruit Farm