【墨爾本裝備多】 . 一月份，阿靴就去咗澳洲Melbourne，除咗去個旅行散散心，當然亦去留意下喱度嘅足球文化。 . 去Melbourne之前當然要做下資料搜集，睇澳職其實真係幾方便，响香港透過Ticketek買飛，佢就會透過電話短訊將張電子票比你。咁啱阿靴去旅行嗰段時間，正正有場係Melbourne City嘅主場比賽，對嘅係第一年踢澳職嘅Western United，咁阿靴當然要買張波飛朝聖一下。 . 落飛機市內遊，又Join下Local Tour，第三日就前往AAMI球場，去睇呢場澳職比賽。阿靴就搭火車去，响Richmond站落，再行兩個字到就會到，沿途亦有唔少前往球場嘅球迷。AAMI球場可以坐到約三萬人，而唔少足球同欖球比賽都會响呢度進行，至於澳職，Melbourne就有兩隊波，分別係Melbourne City同Melbourne Victory，佢哋主場同樣都係AAMI球場。 . 話說阿靴去親外國睇波都會買返件主場球隊嘅波衫，今次亦唔例外，不過一望就發覺，件主場球衣同曼城非常接近，同樣用上淺藍色，又用同一贊助商，畢竟佢哋屬於同一財團，不過作為曼聯球迷，就當然唔會太想買，最尾揀左一揀，再睇多一睇，墨爾本城嘅練習波衫算不錯，又無咩曼城波衫嘅感覺，咁就入咗。 . 至於場波，今場比賽入座率唔算高，但係兩邊嘅打氣區都非常熱鬧，Melbourne City於上半場就以3:0領先住客隊。當大家以為大局已定時，Western United於75至80分鐘期間連入兩球12碼，同時Melbourne City中堅拎咗張紅牌，令到最尾10分鐘非常緊張，好彩Melbourne City最尾防守無咩失誤，保住勝局完場，唔係嘅話又會中左阿靴去旅行睇波，主場球隊不勝嘅魔咒。 . 除咗睇波，阿靴亦當然會去各大運動舖頭到望望波Boot。不過足球晌澳洲嚟講唔算盛行，所以鞋款嚟講唔算話非常多選擇，頂級版本亦相對較少。不過估唔到嘅係，日本品牌Asics晌Melbourne幾出名，無論跑鞋定波boot，都唔難响門市搵到。而以下幾間鋪頭，阿靴就覺得幾值得大家望望。 . 1.Rebel Sport (地址：290 Lonsdale Street, Melbourne, VIC, AU3000) @rebelsport Rebel Sport晌澳紐都非常大規模，佢係一間連鎖式嘅運動鋪，基本上咩運動裝備都會見到，至於足球嘅位置，各大牌子都會見到，而且款式算齊全同新，不過當然就比唔上之前去日本時見到嘅狀況，而且價錢就唔會特別平咁。估唔到嘅係，鋪頭𥚃面會搵到外國較少見嘅Premier 2.0 FG同埋平底Lunargato。除咗波Boot，Rebel Sport亦會搵到當地嘅國家隊及球會波衫。 . 2. SPT Football (地址：2/182 White Horse Road, Blackburn, VIC 3130) @sptfootball SPT Football係自己一直想去嘅舖頭，因為佢算係全Melbourne最大型嘅足球店舖，不過可惜嘅係，佢位置較遠離Melbourne市中心，而阿靴唔係自駕遊，加上旅程上唔係太順路，所以無去到呢間舖。SPT Football位於Blackburn區域，上佢IG同網站睇，基本上最新嘅大牌波Boot款同波衫都會有，價錢上就要睇款，較舊嘅款式價錢亦會有折扣。 . 3. The Running Edge (地址：73 Murray Street, Hobart, TAS 7000) @therunningedge 除咗Melbourne，阿靴今次旅程亦去咗對落嘅Tasmania。The Running Edge位於Tasmania嘅Hobart，佢其實係一間跑鞋鋪嚟，但估唔到嘅係竟然會揾到波boot嘅蹤跡，不過鞋款會較為舊，例如Copa選擇上就只得較舊嘅19.1，價錢同樣唔會特別平。不過阿靴仍然想介紹，原因係佢提供嘅服務。入到舖頭會有專人服務你，了解你嘅需要，仲有張專業嘅櫈同你度下腳型，務求幫你搵到最合適自己嘅鞋。而阿靴就響度入咗樣嘢，不過唔係波Boot，而係香港門市有啲難搵嘅全黑Hoka One One跑鞋。 . 今次旅程就用咗小部份時間了解澳洲嘅足球文化，不過感受最深嘅係响旅程中，認識到唔同國籍嘅朋友，講下大家國家發生嘅事，了解下大家嘅文化，講下個社會，喱種感覺的確係特別。至於足球層面上，今次旅程只係望咗好少部份，畢竟Melbourne同Tasmania只係澳洲嘅一小部份，阿靴亦非常期待遲下去埋其他城市，認真探索下佢哋嘅特色。 . ——————————————— Follow me🔹 @hkfootballreview ——————————————— 📌 Hashtag #屎波裝備多 分享你嘅靚boot~ ——————————————— #屎波裝備多 #melbourne #melbournecity #aleague #墨爾本城 #波boot #波砵 #足球鞋 #footballboots #soccercleats #足球 #香港足球 #ballboot #hkfootball

【恩尼斯達波Boot：ASICS ULTREZZA AI】 . 恩尼斯達於2018年由巴塞隆那加盟神户勝利船，於同年尾日本運動品牌ASICS於年尾簽下恩尼斯達，成為品牌嘅代言人。恩尼斯達响日職聯賽仍然展現其高水準嘅能力，出色嘅控球，準繩嘅傳送，靈活嘅走位，的確係唔少球員嘅學習對象👍。最近，ASICS就更加為恩尼斯達推出佢既專屬球鞋：ULTREZZA AI。ULTREZZA係由西班牙文「ULTIMO」同「DESTREZA」組成，解作「極限」同「技巧」，代表住恩尼斯達嘅出眾技術，至於AI嘅意思就更加不難明白，正正係恩尼斯達英文名嘅簡稱😉。 . ASICS嘅波Boot一向設計同用料均非常有誠意，而ULTREZZA AI喱對波Boot亦不例外，波Boot係由ASICS嘅人體工學研究所對恩尼斯達嘅比賽風格及慣性作深入分析，以及認真收集恩尼斯達嘅意見而製成😯。恩尼斯達响得到呢對波Boot嘅時候就講到，一對好嘅波Boot，著上嘅球感就如身體一部分，波boot同雙腳融為一體，亦會感覺舒服，而ULTREZZA AI正正可以提供到呢種質素😌。 . 恩尼斯達就大讚新Boot，阿靴當然要拎對實物翻嚟，同大家認真講講喱對新波Boot嘅用料同特性，實測就暫時未能做到，不過就睇睇遲啲有無機會喇😇。 . 阿靴一拎起ULTREZZA AI就覺得佢有一定嘅重量，畢竟波Boot係由袋鼠皮同合成皮製成。先講鞋頭位置，ULTREZZA AI用上天然袋鼠皮，特別嘅係袋鼠皮唔係軟熟嘅類別，摸落會較硬，原因係袋鼠皮經過特別處理，配以傳統車線，目的係減低袋鼠皮因過度移動而變形嘅狀況👏🏻。至於鞋嘅中間位置，ULTREZZA AI用上網狀織物質料配以薄膜，摸落質感會較薄同輕巧，而兩側ASICS標值係有少許啜身，相信可以輕微提升觸球球感👍。 . 另外一個細心嘅位置係ULTREZZA AI鞋踭位置係相對鞋頭高5mm，ASICS就表示設計係可以令身體形成自然前傾嘅姿勢，提升到球員於球場上嘅靈活度✨，同時波Boot鞋踭位置亦用上緩震海綿Fuze Gel，為釘Boot帶來緩震功能。至於鞋釘上，ULTREZZA AI鞋前掌用上較短身嘅圓釘，配以呈X字狀嘅鞋底設計，目的令波Boot於轉向時變得更靈活，鞋後踭就用上較長嘅菱形釘，帶來一定嘅穩定度🙂。 . ASICS ULTREZZA AI亦有其他細心嘅位置，包括鞋籠位置用上麂皮，令波Boot更能鎖緊腳腕😉，以及鞋舌上有四個鞋帶窿，令鞋舌唔會輕易移位，鞋舌上亦有透氣設計。 . 阿靴亦當然將ULTREZZA AI試上腳，ULTREZZA AI會係一對中腳型嘅波Boot，著落感覺會係相當包腳。一如以往ASICS嘅波Boot，腳內側位置會微微傾起，分擔到腳內側足弓所承受嘅壓力，亦令穿著感變得舒服😇。鞋籠麂皮質感亦非常明顯，綁上鞋帶，波Boot的確可以將腳腕穩穩鎖實。至於袋鼠皮面上，阿靴就覺得佢的確相對其他袋鼠皮鞋硬，不過舒適度就不減，反而阿靴就想知道ULTREZZA AI踢落個球感會係點樣🤔。 . 至於Size上，ULTREZZA AI並無偏大或偏細，阿靴平時波Boot就著US8，ULTREZZA AI著翻US8就啱啱好🤙🏻。 . 不得不提嘅最後一點係，ASICS波Boot一直响香港較難搵到🤦🏽‍♂️，但今次，香港ASICS竟然首次將足球鞋上架，大家只要前往太古城ASICS專門店就會搵到。 . 👟: @asics_hk . ——————————————— Follow me🔹 @hkfootballreview ——————————————— 📌 Hashtag #屎波裝備多 分享你嘅靚boot~ ——————————————— #屎波裝備多 #ASICShk #ASICSfootball #ultrezza #ultrezzaai #iniesta #恩尼斯達 #波boot #波砵 #足球鞋 #footballboots #soccercleats #足球 #香港足球 #ballboot #hkfootball #靴實測_asics

【頂級日牌平底波Boot比較】 . 香港嘅硬地場係最容易接觸嘅足球場，亦令七人足球成為咗香港嘅獨有足球文化，加上近年來五人足球嘅興起，選擇一對啱自己嘅平底波Boot亦變得非常重要😉。論舒適度同保護性，阿靴認為日牌嘅波Boot到會係一個唔錯嘅選擇，而今日，阿靴就同大家比較吓兩對日牌嘅頂級平底波Boot：Mizuno Monarcida Sala Pro同Asics Destaque 6K！正所謂屎波裝備多，今次阿靴更加拎咗兩對彩色版本嚟同大家講講😎～ . Mizuno Monarcida Sala Pro，鞋頭用上袋鼠皮，鞋身位置就係合成皮嚟，緩震層面就用上U4ic緩震😯。至於Asics Destaque 6K，佢同樣鞋頭位置用上袋鼠皮，鞋身用上耐磨嘅Rhynoskin及網製質料，鞋底亦有Gel緩震科技😌。兩對波Boot用料非常接近嘅日牌波Boot，究竟佢哋又會有啲咩分別？ . 包腳層面上，個人認為Monarcida Sala Pro會略勝一籌，Monarcida比Destaque 6K多一對鞋帶窿，此外鞋口同鞋舌內位置會有類近蜂巢形狀嘅紋理，鞋踭同鞋身兩側的包腳感會較為突出👍。至於Destaque 6K，鞋口位置設計同Monarcida Sala Pro接近，均會有貼近腳型嘅海綿質料，增強Lockdown，但係就無Monarcida鞋口同鞋舌嘅蜂巢形狀紋理設計😇。 . 鞋型上，Monarcida Sala Pro會較為扁身，鞋頭鞋身明顯比Destaque 6K扁🤨，話說之前有波友就同阿靴講過話想搵啲扁身嘅波Boot，因為斬波會順啲咁話，不過又老實咁講，呀靴認為呢個係適應嘅問題，著慣咗厚身嘅都會斬到唔錯嘅波💪。 . 緩震層面上，阿靴就認為Destaque 6K會更優勝，除咗GEL科技出眾外，Destaque嘅緩震系統會响成個鞋底☝️，至於Monarcida Sala Pro，佢U4ic緩震只會响鞋嘅中和後方，鞋嘅前掌就會係普通生膠底咁。不過亦都係咁樣嘅唔同，Monarcida Sala Pro因為前掌更貼地，加上整體重量較Destaque 6K輕巧，亦令大家踢波更更具靈活感🕺🏻。不過正所謂針無兩頭利，阿靴因為成日踢完波腳踭會痛，就點都揀對緩震好啲嘅波Boot喇～ . 至於落場踢波嘅發揮上，阿靴認為佢哋嘅數值相當接近，始終佢哋嘅用料非常接近🙈。軟熟嘅袋鼠皮俾到大家舒適嘅踢波體驗，佢哋响傳控層面嘅發揮理想，射波層面就因為袋鼠皮有一定厚度，需要時間開鞋同適應。緩震層面會Destaque 6K較優勝，但靈活層面就會係Monarcida Sala Pro😌。總括嚟講，呀靴也只可以講聲，打和！！！！ . 至於Size上，Monarcia Sala Pro同Destaque 6K同樣無偏大偏細，亦都適合中至闊腳嘅波友，而阿靴認為著落感覺Destaque 6K會再闊多少少咁😌。不過認真要講一點，日牌波Boot嘅設計非常體貼，例如Destaque 6K會有透氣鞋底，而Monarcida Sala Pro嘅鞋內係用上蜂巢紋理，有時都不得不佩服日牌波Boot嘅用心同認真👍。 ——————————————— Follow me🔹 @hkfootballreview ——————————————— 📌 Hashtag #屎波裝備多 分享你嘅靚boot~ ——————————————— #屎波裝備多 #monarcidasala #destaque6k #monarcida #destaque #asicshk #mizunohk #asicsfootball #mizunofootball #波boot #波砵 #足球鞋 #足球 #香港足球 #ballboot #soccercleats #footballboots #hkfootball #futsal #futsalshoes #五人足球 #七人足球 #靴實測_mizuno #靴實測_asics