* 《翠絲》中的自私之辯（含劇透） — 執意去做自己想做嘅事， 呢種行為究竟係咪自私呢？ — 你係自私，因為你嘅一己之慾，辜負咗社會對你嘅期望，辜負咗你嘅爸爸媽媽，辜負咗你嘅家庭，辜負咗一直以嚟願意陪喺你身邊嘅人。 — 《翠絲》以跨性別人士為主題，透視出唔同性小眾嘅故事，但套戲真正想講嘅底蘊，其實係自私呢一個命題。 — 《翠絲》嘅主角佟大雄，需要喺自私與否嘅漩渦入面掙扎。戲入面嘅佢，想做女人想做到不得了。一直以嚟佢都喺度妥協緊，喺自己眼鏡店嘅閣樓入面換女人底褲、戴女人BRA，用嚟滿足自己一世人想成為女性嘅慾望。 — 或者唔叫做慾望，飾演佟大雄嘅姜皓文根本就覺得自己係個女人，而自己只係喺度COSPLAY緊雄性。一句「我唔係GAY架！」大家可能覺得會怪怪地唔明白，明明佟大雄鍾意佢嘅好朋友阿正，佢係鍾意男人，點解佢話自己唔係GAY呢？因為大雄以女性嘅身份認同去愛，呢段關係係一場不折不扣嘅異性戀。 — 點解要扮男人，而唔做個真正嘅女人呢？好多嘢講就容易，但現實嘅制肘往往令人寸步難行。佟大雄嘅爸爸早死，自己喺好細個嘅時候已經要撐起成頭家，記得「華仁三劍俠」登高臨遠嘅一場戲，演少年佟大雄嘅顧定軒話自己唔會讀大學，要讀都留錢比自己個妹去讀。然後就係同妻子安宜嘅盲婚啞嫁，作為長子一定要傳宗接代，想做女人，發夢都未有咁早。 — 所以我哋會發現，其實少年版嘅佟大雄，係比成年版嘅佢嬌媚好多，當然呢樣嘢都會同年齡有關，但更大嘅原因在於佟大雄呢個角色對自己不斷持續嘅壓抑，佢喺外邊係一個老闆，係一個爸爸，係屋企嘅大仔，佢必須要似一個「男人」，先可以維護自己嘅「尊嚴」。 — 袁富華同姜皓文嘅角色，係一個人嘅一體兩面，兩個人喺心入面都肯定自己係個女人，之不過袁富華早已千帆過盡，喺好多時候都會以女性嘅姿態去示人，亦因為咁而受到唔少嘅歧視。佟大雄同打鈴哥重遇嘅戲份，睇到後者舉目無親，兩袖清風，佢面對嘅壓力，其實比姜皓文細唔少。 — 又有人話，袁富華嘅演出比黑仔實在好太多，打鈴哥一舉手一投足都盡顯女性嘅韻味，連隻無名指都做緊戲，但反觀黑仔就算戴假髮著高爭鞋，都完全唔似女人。 — 但係，又有邊個人同你講過，一定係外表行為似女人嘅「男人」，先可以覺得自己內裡係個女人？ — 當我哋以為自己已經有足夠嘅胸襟去接納跨性別人士，或者性小眾嘅時候，其實好多時我哋都唔係真心接納同包容，我哋只係將條界線稍微搬遠咗少少。例如我哋會開始接受啲堅靚嘅「變性人」，我哋會BUY啲堅靚仔嘅TB。但唔好唔記得，呢個世界無魅力嘅人，其實佔緊世界嘅大多數，但佢哋又有無權利去做自己？ — 長期壓抑自己要做剛強男人嘅姜皓文，當佢決定要做真正嘅女人之後，語言動靜都仲係好似男人，咁又點？所謂性別氣質，男剛強女柔弱，其實好大程度上係社教化（Socialization）嘅影響，由細個開始我哋就被教育洗腦，話比我哋聽男仔要MAN，女仔要小鳥依人。但如果劇情講到轉過頭黑仔已經勁有女人味，我反而先會覺得係超乎現實。 — 又所以，你可以話黑仔喺《翠絲》嘅演技唔夠討好，或者做得差，但最好唔好用「唔夠女人」嚟做立論嘅基礎。因為當人哋都已經選擇咗做自己唔理大家眼光嘅時候，唔通仲要努力去合乎大家心目中對於「跨性別」人士嘅期望？ — 你可以覺得翠絲唔靚，但我希望每個人都能夠真心尊重翠絲。我知道如果黑仔扮到勁似女人嘅話，實有好多人讚架，演技超班乜乜乜咁，我深信佢係做到（更何況佢做女人嘅戲份篇幅根本唔多），但揀得黑仔，揀得咁樣去演，呢個絕對係事前嘅計算。 — 滿足咗社會強加於我嘅期望之後， 咁邊個去完成我嘅心願？ — 如果你覺得旁人嘅目光仲緊要過主角自己嘅感受，咁「做自己」的確係自私嘅行為。但你唔比其他人「做自己」，其實只係另外嘅一種「自私」。喺戲入面，翠絲滿足咗社會對自己嘅期望，包括事業有成，包括成家立室，包括一切一切，然後佢終於選擇咗去滿足自己嘅心願，翠絲嘅人生並唔完美，但佢已經做到最好。 — 當「做自己」同「唔做自己」都係自私嘅時候，人又可以有咩出路？係愛。因為愛，所以無條件包容，無條件付出。愛唔係講緊自私嘅佔有，而係無私嘅犧牲，竭盡所能，讓你所愛嘅人可以喺天空中展翅飛翔。 — 翠絲 Tracey 天下一電影 One Cool Film 塵阿力映畫 畫作：塵阿力映畫 （請大家多多支持塵阿力嘅專頁，我將會不定期同插畫家ALEX合作，今次呢幅《翠絲》，真係畫得好靚！！！！！！！）