【你我之間的小秘密︱#凱撒大帝所用的凱撒密碼】
「in 55!W !」你以為這個就是密碼？不如給你另一個密碼來解碼，看看你又可不可以破解到？「L PLVV X」
-
其實意思就是一樣的，都是I Miss U的意思，剛才的解碼方法叫做凱撒密碼，這套解密方法是由於羅馬共和時期愷撒大帝所用而命名，是一種替換加密的技術，會在正常字母中按照一個固定數目向後替換成密碼文字。
-
原文字母表：ABCDEFGHIJKLMNOPQRSTUVWXYZ
密碼字母表：DEFGHIJKLMNOPQRSTUVWXYZABC
-
由於在當時凱撒大部分敵人都是目不識丁，所以即使密碼文字被發現，都難以被解構，所以在當時用來打仗傳令十分有效，不過隨著時代進步，這種密碼已經變得十分容易被破解，無法再保障通訊安全，所以亦被其他方式取代。
-
用來普通聊天就沒有問題的，但機密的對話就不好啦，不知大家在過去的生活中，又有沒有建構過一套屬於自己和某某的密碼學呢？
------------------------
<想每日閱讀冷知識？將專頁設為搶先看吧！>
◆ 每日分享知識、每月推出課程
◆ 網站：https://www.beginneros.com/
◆ Youtube：https://goo.gl/OEJrGt
◆ Instagram：@beginneros

《一覺瞓醒，發現所有人都講緊另一種語言（5）》

第一集：https://is.gd/egRc36
第二集：https://is.gd/GlMzyS
第三集：https://is.gd/BigufS
第四集：https://is.gd/vYQ426


阿豪喺電腦前撳咗幾個掣，將圖案Print出嚟之後，再將一塊塊不規則嘅圖形分別剪出嚟，埋頭左拼右湊。


喺狹窄殘舊嘅唐樓單位，加上又焗又潮濕嘅天氣，令三個人都漸漸急躁起嚟。


「搞掂！」阿豪成頭都係汗，但完成嘅一刻，佢有一種電競選手贏得冠軍嘅錯覺。


Johnny同Hailey即刻隊個頭埋去睇，見到阿豪將嗰堆雜亂無章嘅圖案同符號重組之後，變成一個漩渦形嘅圖紋，而喺漩渦中間，隱隱埋藏住一堆英文亂碼：


VXUYLYRU
MRLQ XV
DW FHQWUDO
OLEUDUB DW
PLGQLJKW


「即係點呀，你有冇砌錯架？」Johnny皺起眉頭問。


「我玩過一個推理解謎Game有類似嘅符號重組關卡，唔會有錯啩⋯⋯啲亂碼應該係密碼嚟，不過解碼方法未諗到⋯⋯」阿豪心虛咁話。


「係咪倉頡碼？即係對應返Keyboard嘅英文就出到中文字？」Johnny問。


「倉頡輸入法最多得五個碼，你睇第一串字已經有八個碼。」阿豪少有地答得咁有信心。


「咁會唔會係重組句子咁，將啲字母Rearrange過變成有意思嘅英文單字？」Hailey問。


佢哋三個頭貼頭望住堆亂碼，豆大嘅汗珠由額頭沿住輪廓流落下巴。


「我知喇！」Hailey忽然搶咗張紙，「係凱撒密碼！」


「咩呀？」Johnny問。


「有冇睇過愛倫坡？」


Johnny同阿豪都一頭無緒。


「《達文西密碼》知道喇啩？」Hailey一路低頭寫字一路講。


「《國產零零柒》個聞西就聽過。」Johnny答。


「我要搵到語言異變嘅原因，如果唔係呢啲咁偉大嘅作品就會消失⋯⋯Anyway，凱撒密碼係一種替換式密碼，曾經用嚟加密軍事情報，以防止喺傳遞情報時被敵軍得知軍情。凱撒大帝通常係將要加密嘅字母用後三個位嘅字母去替代，例如A就變成D，B就變成E，即係咁⋯⋯」


Hailey喺紙上寫出呢一連串相應嘅字母推移：


ABCDEFGHIJKLMNOPQRSTUVWXYZ
DEFGHIJKLMNOPQRSTUVWXYZABC


「咁即係話⋯⋯」Hailey喺密碼紙嘅空白部分逐個字母推敲，「S…u…r…v…i…v…o…r， J…o…i…n， U…s…」


當佢放低筆時，紙上寫住：
Survivor. Join us at Central Library at midnight.


「我諗對方好可能係喺阿豪Delete個Voice Message之前聽到個錄音，所以先Send呢個訊息畀你。」Hailey話。


「但係我哋點知佢係咩人？如果佢哋唔係自己人咁點算呀？」阿豪問。


「佢哋用一個咁隱晦嘅方式，似乎同我哋一樣都好小心翼翼去隱藏自己嘅身份。」Hailey補充，「而且，加密法有好多種，雖然凱撒密碼可以話係當中最簡單嘅一種，但偏移量都可以有好多個選擇，例如凱撒大帝嘅養子奧古斯就採用變形嘅凱撒密碼，偏移量係一，Cassis偏移量係負五，英國Forum最常用嘅ROT13 偏移量係十三個位等等。喺眾多選項入面，佢揀咗最傳統，亦都係最多人知道嘅Caesar cipher⋯⋯」


「我其實唔係好明你講乜，不過我哋坐喺度等運到都唔係辦法，反正大家都唔知大家嘅身份，只要我哋唔開口，從外表上睇冇人知道我哋同其他人嘅分別，我哋可以搵地方柄埋，觀察下唔好現身住。」Johnny提議。


為免招人側目，Hailey換走一身病人服，著上阿豪嘅舊衫。稍為梳洗過後，三個人往中央圖書館出發。


一路上途人唔算多，Hailey留意到清一色係年輕人，雖然話近銅鑼灣呢邊係潮流中心，但正常總唔會一個上咗年紀嘅人都冇。不過喺眼下呢個情況，又有咩正常唔正常可言？Hailey決定唔再去諗，將阿豪畀佢嘅鴨嘴帽拉得更低。


去到中央圖書館門前嘅平台位置，佢哋坐喺樓梯上，Johnny點咗支煙，盡量表現輕鬆，好似平時幾個後生仔吹水消磨時間一樣，實質係暗暗咁觀察經過嘅每一個人。


「你哋見唔見到嗰個噴水池？」Hailey指一指身後，「本來噴水池中間有一個石製嘅地球裝飾，上面寫住The World is my Book，而家已經唔見咗，唔知入面啲書變成點，人類智慧嘅總和，可能從此就覆滅。」


「我淨係知道呢度死過四個人。」Johnny吸一大口煙，將尼古丁用力抽入肺部， 「幾年間，總共有四個男人喺圖書館入面攀過欄杆跳咗落大堂，而且分別喺東、南、西、北四個方位，有人話係詛咒，亦有人話係儀式⋯⋯」佢諗起今日下午見到嘅景象，卡喺喉嚨嘅說話冇再講落去，佢吸咗最後一啖煙，然後喺石壆上用力按熄煙頭，留下一個焦黑嘅烙印。


三個人亦都冇再講嘢，隨住接近午夜，路經嘅行人更加稀少，佢哋身後仿希臘柱式建築嘅中央圖書館喺昏黃街燈下，照得一個個仿文藝復興窗扉鬼影幢幢，任何風吹草動都令佢哋神經繃緊，無法放鬆。


時針指向一時，經過一整日嘅奔波同驚嚇，佢哋已經疲倦得漸失戒心，眼皮不自覺慢慢垂下，呢個時候，街燈喺地上照出一個長長嘅人影，以緩慢嘅步速，無聲無息地向佢哋靠近。


「殊⋯⋯」Hailey耳邊傳嚟說話者吐出嘅暖氣，佢感覺到腰間有一把冰涼嘅尖利硬物，佢舉高雙手，慢慢轉身，首先映入眼簾嘅，係一個漩渦圖案。

－－－－－待續－－－－－

多謝大家忍受我緩慢嘅出文速度。

100 Shares 會一次過出埋結局！