（五十一）機鋪 今日想講講我中學同學「國標」嘅經歷。 . 相信好多八十後都知，放左學落機鋪流連係常識黎。果時著住校服入機鋪，有一種反叛呀、大個仔呀、壞學生呀、夠guts呀嘅百般心情响裡面。而「放低一蚊跟機」呢個動作，更加係真．男子漢勇氣嘅考驗。 . 喂，挑人機喎，三唔識七，你又唔知佢乜水乜背景，輸左會唔會俾人奚落指住笑，贏左人地會唔會拖馬黎覆啅？男人放低一蚊果下，係必須要對自己有充分嘅了解同自信心，與及對結局嘅承擔。 . 你估，咁易做架？ . 我個同學，果陣好鍾意响油麻地d噏耷機鋪到打拳皇98，佢就係由挑機開始練習，日子有功，佢真係三蚊可以打足成晚，仲去過台灣參加過公開賽。 . 呢間機鋪近住廟街，其實品流好複雜，一入夜，就有好多金毛、公仔佬係度徘徊，有d黎等開工，有d黎收下o靚仔，好多都係隔離廟街睇場嘅，總之，就係唔惹得。國標揀呢度因為貪佢夠平，近屋企，同埋想自己一個暗暗練習，基本上佢都so called半個「飛仔」，所以又唔係好怕龍蛇混集。 . 佢只係集中於佢面前嘅大螢幕之上。 . 有晚打打下，佢話有個哥仔好急咁行埋黎佢身邊，問佢： 「見唔見到我個頭呀？」 國標都醒目，佢望都無望果個人，就答：「無喎。」國標補充，佢教路話，呢d地方人地問你乜嘢，儘量唔知呀唔識呀禮貌答左去算，千祈唔好同人咁多眼神接觸講太多，因為好多都係咁樣屈你串七七啤啤貢捉你打一身攞你錢嘅。 . 之後個哥仔講左聲：「唔該。」就行開左喇。 . 接住第二晚，國標又係打打下， 「見唔見到我個頭呀？」 . 「無呀唔好意思。」 . 「唔該。」咁樣。 . 第三晚，一樣。 . 今次國標都覺得奇，等阿哥仔行開左之後，佢望一望門口個方向想睇下佢係咩人，唔通佢剪左個新髮型好爆？係咁叫人望佢個頭，定還是係咩暗號黎？但可能佢行得太快喇，又唔見人喎。 . 第四晚，都係差唔多時間，佢又聽到果位哥仔企响佢隔離問佢：「見唔見到我個頭呀？」 今次國標岩岩同人對打緊，可能見有個呀叔坐响隔離，個心定少少，諗住大聲回返佢：「都話無囉！見你個頭咩。」，佢向右邊望一望，哨到個哥仔成件衫都係血，即刻都係唔敢岳高頭望佢…心諗：「嘩！砍友呀？」 佢窒窒窒咁答：「唔好意思…無...我唔知...」 「唔該。」 之後，個哥仔就行開左喇，隔離呀叔仲表左國標一句：「打就專心d啦。」 果晚收鋪，國標走果陣問落閘個呀伯：「頭先係咪有個人成身血入左黎？」 呀伯同佢講，無一個咁樣嘅人出現過喎。 . 如是者，又一晚，國標食完晚飯落黎機鋪，佢見到有人正正係機鋪門口路祭燒衣紙，果d人都著到黑衫黑褲黑皮鞋嘅疑似江湖中人，國標講句大吉利是又入左去打機。 . 問返唱錢呀伯咩料，佢話無事，例行拜祭下啫。 . 果晚，佢話佢專心拳王途中，佢feel到果個哥仔再次企過响佢後面一陣，不過就無再問佢問題。佢响大螢幕個倒影裡面，依稀望到呀哥仔耷低左個頭，垂到好低咁。 「怪人。」國標當時心諗。 . 好衰唔衰，有日佢睇到報紙，先知道原來自己去開果間機鋪，有一晚落閘後發生江湖打鬥事件，有個古惑仔比幾個刀手砍，條頸比人砍左十幾刀，砍到幾近甩左個頭。 . 呃… . 國標睇到呢度，寒一寒，好興幸自己一嬲都係專心打機，唔多事唔多嗲，佢一諗到如果當晚好奇望下果個哥仔…佢見到嘅畫面，可能會令佢畢生難忘，留下永遠恐懼嘅陰影。 . 路祭之後，果個哥仔亦都再無出現過囉。 . 到今日，有時見到國標，佢都仍然好鍾意落機鋪打返鋪機，佢最鍾意搵返拳皇98,99黎打，話始終都係鍾意大力噤部街機，打到啪啪聲連d一蚊都拍到飛起先夠過癮。不過，其實而家機鋪都係得返d阿伯釣魚打麻雀，都無乜人同佢對戰囉。 . 有時見佢好感慨咁話，後生一代，個個都係耷低頭對住部手機，一係就返屋企online見，仲邊有人落機鋪打住等，或者「放低一蚊跟機」呢支歌仔唱吖。 . 佢好懷念，果陣星期五晚，六晚，d人排住隊跟機圍觀嘅果段青春快樂時光。 . 機鋪，又真係打一鋪少一鋪架喇。 . Tag 有落機鋪嘅 frd子，拳皇迷，愛打機嘅佢，提提佢地，又有一間機鋪要執喇，同埋最緊要嘅係，落機鋪，唔好多嗲唔好串七七，咁就保平安喇。 #真人真事 #離奇 #鬼故 #鬼 #靈異 #不可思議 #高登 #離奇家遮 #恐怖 #香港 #文字 #心靈 #電影 #故事