「這個城市生產的玩具比世界上其他地方都要多，但為何我們都對這些遺產卻視而不見？」 - 田邁修博士（Matthew Turner）（《香港玩具圖鑑》序言） 在玩具大世界之中，「香港製造」能在戰後五十年代招徠外國商家，甚至招覽國際品牌到港設廠，並在七十年代初晉身世界玩具的出口製造中心，本身就是一個奇蹟。當日的地緣政治，勞動人口密集，生產成本低廉等，都是香港工業起飛的原因，而玩具更隨著塑膠物料的普及而興盛起來。 回顧這些昔日大行其道的玩具時，會發現，本地玩具製造商觸覺敏銳，反應快，創意未必無限但毅力肯定無比，才是成就這個傳奇的關鍵。六十至八十年代是香港玩具的黃金盛世，1972年時更超日本、西德和美國等，成為世界玩具出口中心。當時政府曾開闢多個工業區，為玩具廠商提供更多空間擴大規模， 又在工展會進行銷售。 熱衷香港漫畫和玩具的楊維邦，在2017年時和另一位玩具收藏家莊慶輝合力撰寫了《香港玩具圖鑑》一書。厚厚的一本，由戰前開始，分門別類去記錄歷代曾在香港流行的玩具：公仔紙、鐵皮玩具、塑膠玩具、洋娃娃、交通工具、手槍、棋類、面具；在士多辦館出售的雪條棍、汽水蓋、刀劍仔、煮飯仔、膠兵仔⋯⋯還有傳統的九子連環、編織玩具、波子，以至各種節慶玩具。這些港產玩具雖然未必能和美國日本兩個玩具大國的質量相提並論，卻反照出這個城市的歷史發展、大眾市民的生活痕迹和集體回憶。 到了八十年代，工廠北移，香港作為玩具生產地的角色轉變，改為行銷、設計和規劃為主；。而隨著日本任天堂在1983年推出紅白機，之後又有Gameboy、Playstation電視遊戲機、掌上電子寵物機「他媽哥池」等，玩具也進入了電子世代；至於實體玩具，在千禧後也邁進另一個新階段，當中各類珍藏版可動人偶Figures ，加上由Michal Lau等帶動的原創設計玩具，令香港玩具變成Kidult的藝術和珍藏。 夏季號《 就係香港》重溯了香港玩具工業自二十世紀初至今的一路變化，訂閱詳情 #linkinbio 《就係香港》也可以在HKTV Mall網購！ https://www.hktvmall.com/hktv/zh/main/%E5%B0%B1%E4%BF%82%E9%A6%99%E6%B8%AF/s/H6143001 （玩具藏品由楊維邦、Keepkeepcompany及John Wu提供） #2021就係香港夏季號 #香港製造 #玩具 #MadeinHongKong #玩具攝影

【有冇人相信真係可以上太空捉夢夢…】 . .以前我放假最大娛樂，就係攞住部牛龜咁大嘅GameBoy去樓下玩具舖門口，同一班同樣拎住Gameboy嘅小朋友玩《寵物小精靈》。 除咗根本無88隻遊戲嘅88合一之外，玩得最耐就係《寵物小精靈》，當年我好鍾意噴火龍，覺得噴火龍係男人嘅浪漫（而家都好鍾意，但老了，接受唔到Mega進化）所以我儲錢買咗正版嘅紅版，認為正版嘅噴火龍先係最正宗，好景商場樓下廿五蚊盒嘅老翻噴火龍，噴出黎嘅只係虛火。 有一日，有個四眼肥仔以一副傲視萬物嘅姿態黎到商場，周圍撩人對戰，當兩部機連線，佢個對手就突然好驚訝咁大叫咗出黎！ 係夢夢啊！」 當年好多人都爆晒機，大家都擁有一隻超夢夢，但係夢夢真係第一次見。四眼肥仔就係咁成為咗商場入面嘅風雲人物，大家都問佢點樣捉到，其實我都聽過唔少夢夢傳聞，但親眼睇到都係第一次。 我必須承認，我又係衰嘅，成日笑佢係「四眼肥」，結果佢只係畀我望夢夢一眼，但唔話我知點先捉到。亦因為一隻夢夢，四眼肥仔指住我講一句：「細聲啲，我唔想畀佢聽到～」於是我就慘被成個商場嘅小朋友排斥，人有我無…我只係一個小學雞，身心都承受唔到呢個被人排斥嘅壓力！但我都唔係省油嘅燈，亦燃起咗我心底裡捉夢夢嘅一團火！ 我四周圍問人，返學校問同學，或者趁四眼肥仔唔喺度問商場其他小朋友。 喂！我平時自問都待你不薄，之前送過粒「必捉」精靈球你無理由唔記得㗎，話我知點捉吖～」 聽講儲齊晒１５０隻精靈，返去大木博士度，佢就會帶你上太空捉夢夢。」 真係？！個四眼肥竟然捉齊１５０隻？！」 吖仲有，隻比卡超一定要升到100lv！」 喂我無比卡超喎…」 我玩黃版，送隻畀你啦～100Lv㗎。」 多謝你啊哨牙仔，果然你係對我最好！」 唔洗客氣，因為我已經有夢夢…」哨牙仔一句，我當堂好似被雷劈咁。 你、你…點解你會有…」 唔…咪就係…好似我教你咁捉囉。」 我接收咗隻哨牙比卡超之後，就即刻衝返屋企幫大木博士實現佢嘅畢生心願，我一直都誤會咗佢老人家，以為除咗一開始畀我揀完小精靈之外就係一個一無事處嘅廢老，估唔到你咁偉大會帶我上太空捉夢夢！大木博士我愛你！ 我花咗兩個星期時間儲齊咗150隻精靈，帶住隻100Lv哨牙比卡超，走去搵大木博士，點知… 乜事都無發生… 150隻啊！見唔見到我個精靈圖鑑，就差隻夢夢咋死老坑！」我對住部Gameboy大叫，佢都唔理我… …… … 講大話會甩大牙，你信唔信我打爆你隻哨牙啊？」我返去商場捉住哨牙仔。 你梗係唔得啦，仲要儲99粒月石去博物館拎太空船燃料先，再搵大木博士，佢就會帶你去上太空船…」另外一條友講到似層層咁，但聽落又幾有道理，太空船係需要燃料，上月球需要用月石亦好合理。 唉，見你咁慘我畀幾十粒月石你啦～因為我已經有夢夢…」 連你都有？！」我望一望條友部Gameboy，真係有！佢無呃我… 於是，我又死儲爛儲，終於儲夠99粒月石，諗住去博物館換燃料，但我連條毛都換唔到返黎… 點解會咁？到底我做漏咗乜嘢？我唔忿氣，我決定去另一個商場問人。不過我得返黎嘅答案，有啲人話未見過，有啲人就唔信我，終於都畀我搵到個真係有夢夢嘅人，佢話：「其實用最貴嘅魚竿，去捉超夢夢嘅洞入面就可以釣到夢夢…」 無錯！上乜鬼太空呢！夢夢一定係釣返黎！ 如是者我釣咗成個星期…郁兩郁就逃跑嘅鯉魚王就好多，但夢夢就一次都未見過。而我每去一次商場，就多幾個人有夢夢，幾乎樓下商場所有人都有一隻夢夢… 望住大家都有夢夢但我就捉極都無，我唔知當時自己係咩表情，但如果將我個樣化成象型文字，呢個字一定係粗口黎！ 就係呢個時候，四眼肥仔走埋黎同我講：「其實，隻夢夢係我用bug整出黎…仲複製咗好多隻，畀隻你啦～」 四眼肥～～」我含住淚同四眼肥相擁，佢摸一摸我個頭，我感覺就好似抱住一隻卡比獸咁，好溫暖。 雖然我畀呢個傳聞呃咗成個月，到最後亦無要到隻夢夢，因為我玩嘅係正版！我唔會畀任何雜質影響到我純正嘅血統。而呢件事亦漸漸忘卻咗… 直至上幾個月，我撞見返四眼肥仔，佢依然係四眼同好肥。同佢食飯時講起呢件事，如果無得上太空，咁到底隻夢夢係點黎？我返屋企上網查，好多人都話係日本一次活動贏咗嘅獎品，所以就連日本都好少人擁有夢夢…另外又有人話係當年套動畫《超夢夢反擊戰》憑住票尾就可以換到隻夢夢。 估唔到呢個都市傳聞，咁多年之後都仲周圍流傳緊唔同講法…只係個說法變得比較「現實」，到底邊個先係真相呢？我諗要搵個日本人先問到… 呢個故事教訓我哋，就算對方係好肥同埋戴眼鏡，都唔好叫人「四眼肥」…