普通科門診見嘅病人乜都有，有專科轉介覆診、有背脊骨痛。最深刻記得一個做漁農署嘅姨姨打草打到比黃蜂針，隻手臂腫到變左三隻。當然，佔大部份嘅依然係三高嘅公公婆婆黎攞藥。

話說，Dr Who 呢排要係政府普通科門診睇症，而我地醫學生身為腫瘤，當然要阻礙睇症進度，不斷搵病人傾計。

Dr Who：「陳XX，請入黎十號房。」

一對老夫婦行左入黎。伯伯塊面四四方方，皮膚白滑，坐低就笑騎騎咗望住我，成隻公仔咁款。

Dr Who：「伯伯，今次返黎除左覆診有無其他唔舒服呀？」

伯伯依然笑騎騎望住我。婆婆就係呢個時候笑騎騎咁拍左伯伯一下，然後插嘴。

婆婆：「佢唔係幾聽到架，我答啦。係呀，黎攞藥咋！」
Dr Who：「咁有無準時食藥呀？」

婆婆烏埋伯伯耳仔邊問：「醫生仔問你有無食漏藥呀！」
伯伯依舊笑騎騎咁望住我：「無無......嘻嘻！」

Dr Who：「運動呢？有無落街行下呀？」
婆婆又笑笑口望住我，輕輕掐左伯伯一下就話：「佢個懶鬼點會呀！」
轉身又同伯伯咬耳仔：「問你做唔做運動呀。」
笑嘻嘻伯伯又笑嘻嘻咁講：「無呀...無呀！」
婆婆扮打左伯伯一下，然後順勢捉實左伯伯隻手：「佢耳聾又唔肯戴助聽器，我地要成日咁咬耳仔架。」

我為免被曬傷曬盲，戴好太陽眼鏡、搽好太陽油之後繼續問症。

Dr Who：「咁食嘢方面呢？有無戒下口呀？」
婆婆越扮嬲，對眼笑到瞇得越埋：「戒口佢邊肯呀！」
Dr Who：「係咪自己煮？咁記住少鹽少油少糖呀！」
婆婆開始笑到四萬咁口，對眼不知所蹤：「呢啲粗重功夫梗係我做架啦！」

傾完之後，我叫佢地坐返出去等睇醫生。

婆婆扶住伯伯起身，好似拖小朋友咁淨係捉實伯伯嘅一隻手指，慢慢行返出去，臨出門口，兩個卡通人物仲擰轉身，笑嘻嘻咁講左聲「拜拜」。

今日普通科門診教嘅一課：「執子之手，與子偕老」。

#DrWhoHK

🔻🔺🔻🔺🔻🔺🔻
IG: DrWho.HK (instagram.com/DrWho.HK)
FB: DrWho.HK (facebook.com/DrWho.HK)
🔻🔺🔻🔺🔻🔺🔻

同學：「哇，Dr Who，你做咩喊呀？」
Dr Who：「都話沙入眼囉！」