［我呢排真係覺得好悶悶悶悶悶］ 好悶。我呢排好悶。我呢排真係覺得好悶。 悶到我要連續打三句出來表達嗰種悶。 甚麼是悶？人人感受和理解不同。 有人堅持，單拖去做任何事的結果都只是——悶（例如單拖睇戲或單拖行街），於是出現了一個弔詭情況：因為悶而去睇戲行街，但又因為過程中只能單拖進行，搞到好悶，於是成件事變成：我悶，我單拖睇戲行街解悶，結果好悶……明明想解悶，點知搞到仲悶。 但我的悶，不是這一種。識我的人都知，我從不介意單拖去做塵世間好多事宜，你係都要我同另一個人一齊去做，我反而周身唔聚財。 我那一種悶，是由每朝起身擘大眼就湧現——我有預感，嚟緊的一天，將會同昨天無異。 Hey，萬事萬物不是每天都在變嗎？ But，問題是變來變去，給你帶來的感覺還是一樣。 投了票（顧全了大局），前景一樣灰暗；射落海（改變了海洋生態），前景也是一樣灰暗；KOL寫的說的還是一樣地懶係獨到有見地（嚴格來說是廢，而當中有唔少所寫的其實是劣質廣告）；影評人還是一樣好權威地對大部分戲看不過眼（與其咁慘，何不篤盲自己對眼？）；成智無論著超人衫定西裝褸，我還是一樣冇勇氣選擇佢嗰份理性；國興無論做乜講乜，給我的感覺根本沒有任何不一樣。 而估唔到近排最令我感到新奇刺激的，就只是一個冇見一排的月巴人，變成了筋肉人。實在成何體統。 這世界似乎再沒有任何嘢能為我帶來新奇刺激和好玩。 不像曾幾何時，開電視，會睇到有人如實地演了一齣好劇；入戲院，會睇見有人盡心盡力拍了齣好戲；開收音機，會聽到DJ為你介紹一些真正好聽的新歌（而不是係咁講嘢）；躝街時路經報攤，會望到一些你不得不停步細看的雜誌封面，又或叫你忍唔住立即俾錢的漫畫…… 以致我對生活充滿期盼，期盼快啲瞓醒，新一日快啲來臨，而不像今時今日，只能睇乜鬼流行經典50年望番轉頭，又或好似玩FB和IG嗰啲乜鬼動態，動態只容許在塵世逗留24小時，因為連你都知道呢啲動態沒有傳世的價值，冇眼屎乾淨盲。 我悶，是因為我在這世界、以及構成這世界的大部分元素裡，再找不到意義和價值（而只得無意義的KOL和他們的負價值言論觀點）。 無意義和負價值的散播，像南生圍的火頭，絕對人為，純粹破壞。 （原文刊於am730） #月巴事