《出走》 「做咩一個人喺度嘅？」Chester走到酒店陽台，把cocktail遞給Mavis，「成班姊妹捧住花球影緊相喎。」 ⠀⠀ 「今次有冇睇啱邊個呀？」Mavis接過酒杯，語帶嘲弄地問。相識多年，她很清楚Chester的風流，然而卻從來不覺得他下流。 ⠀⠀ 「個個戴晒口罩，個個睇落都靚，咁樣好危險。」Chester笑說，「你仲未答我問題。」 ⠀⠀ 「冇，想嚟唞啖氣啫。」Mavis收起了笑意。 ⠀⠀ 「唔係因為見到好朋友結婚，所以忽然恨嫁咁老土嘛？」 ⠀⠀ 「咁你去參加喪禮又會唔會好想死吖？」互相揶揄，是他們從中學年代開始的默契。 ⠀⠀ 「又真係好多人都話婚姻係愛情嘅墳墓。」Chester聳聳肩答道。 ⠀⠀ Mavis的確很難想像Chester會有結婚的一日。這麼多年來，身邊所有朋友都問過Mavis同一個問題──點解你冇同Chester一齊？每次她都支吾以對，但其實答案是出於害怕。Chester是世界上令她最沒有把握的人，而她，是個完美主義者，從小就習慣對一切事情都有計劃，例如最遲32歲要生BB，但之前要有一年時間二人世界，所以30歲要結婚；結婚之前又至少要拍兩年拖了解清楚對方，因此28歲就要遇到合適的人等等。 ⠀⠀ 不過她的人生計劃，在29歲這年隨著男朋友的出軌而偏離了軌跡，她覺得自己這刻欠缺的不是目的地，而是指南針。 ⠀⠀ 「重記唔記得以前我哋一齊睇嗰套《四個婚禮一個葬禮》？」Mavis和Chester之所以如此合拍，是因為兩人都愛看電影。 ⠀⠀ 「記得，我睇完重走去學Hugh Grant剪咗個頭，俾你笑咗成個禮拜。」 ⠀⠀ 「He was my North, my South, my East and West, My working week and my Sunday rest, My noon, my midnight, my talk, my song; I thought that love would last forever. I was wrong. ⠀⠀ 咁多年我都重記得Matthew喺喪禮度讀呢首Funeral Blues，搞到每次去人哋婚禮我都會諗起。」 ⠀⠀ 「咁唔老嚟？新娘子多得你唔少。」 ⠀⠀ 「佢真係好似嬲咗我呀。」Mavis苦笑。 ⠀⠀ 「Why？有你呢個萬能伴娘，Chloe多謝你都嚟唔切啦。」 ⠀⠀ 「你知我㗎啦，啲decoration擺邊、菜單食乜、幾點進場、幾時要落下個rundown，我全部都要跟足planning，但好衰唔衰啲staff樣樣嘢都有甩漏，搞到我好勞氣，Chloe頭先話我搞到成個場氣氛好繃緊。」Mavis委屈地說：「但我只係想佢可以有個完美嘅wedding啫……」 ⠀⠀ 「Mavis，唔係樣樣嘢都可以plan㗎，好多時就係因為有意外，所以先會有驚喜。」 ⠀⠀ 「例如呢？」 ⠀⠀ 「例如《黑殺令》咁吖，你記唔記得Leonardo有一場戲要發癲大力拍檯，點知佢激動得滯，俾裂咗嘅玻璃杯割損手係咁流血，本來劇本冇呢樣嘢，但佢繼續演落去，成手血反而令佢睇落更加似一個變態狂人，最後呢場戲就成為經典。」 ⠀⠀ 「咁又點吖，呢套戲佢最後咪又係攞唔到Oscar……」 ⠀⠀ 「你唔好下下都諗個結果先。咁唔講電影喇，譬如哥倫布都係因為蕩失路先至發現到新大陸，」Chester指著Mavis手上貼滿便利貼的rundown文件夾，「連memo紙都係因為個科學家原本想發明一種超強嘅黏合劑，不過失敗咗，反而整咗呢種易貼易撕嘅黏合劑出嚟，你呢啲control freak先有memo紙用咋！」 ⠀⠀ 「你喺英國咁耐就係學呢啲嘢呀？」Mavis沒好氣地說。 ⠀⠀ Chester笑說：「畀我拋下書包都得啩？」 ⠀⠀ 兩人身後的陽台門被打開，Chloe有點尷尬地說：「Chester，可唔可以借Mavis畀我一陣？」 ⠀⠀ Chester識趣地離開，又回到一眾女賓客身旁談笑風生。 ⠀⠀ 「Mavis，sorry呀，頭先我一時忟憎話咗你幾句，但我知道你真係幫咗我好多。」 ⠀⠀ 「傻啦，講呢啲。」Mavis伸手替Chloe整理有點鬆散的髮髻，「今日新娘大晒㗎嘛！」 ⠀⠀ 「其實呢，我同老公一早已經有共識，婚禮無論點樣計劃都會有甩漏，就好似我原本想要嘅dream wedding咁，最後都係因為疫情而好多嘢都要改要取消，最後只係搞到個cocktail party，但係我真係唔介意，因為最重要嘅，係同我結婚嗰個人。」 ⠀⠀ 「知喇知喇，唔好喺我呢啲單身狗面前放閃啦唔該。」 ⠀⠀ Chloe循著Mavis的視線，瞥了一眼在人群中高出半個頭的Chester，「你知唔知原本我寄帖畀Chester嗰時佢話嚟唔到？但係佢聽到你分咗手，個死仔就即刻book機票喺英國飛返嚟，唔通你以為佢喺酒店戇居居隔離十幾日真係為咗我個婚禮呀？」 ＊因IG字數限制，結局在留言＊ #出走 #蔡健雅