🙏

https://www.facebook.com/1501617863401487/posts/2288077648088834/

告別金島仙
Kò-pia̍t Kim-tó sian

埔里愛蘭舊名烏牛欄，就是平埔族巴宰的烏牛欄社。
Po͘-lí Ài-lân kū-miâ Auran, tō sī Pêⁿ-po͘-cho̍k Pazeh ê Auran siā.

1947年二二八事件，台灣各地攏有反抗的活動，中華民國調動21師進行「清鄉」
1947 nî hoat-seng 228 sū-kiān, Tâi-oân kok-tē lóng ū hoán-khòng ê oa̍h-tōng, Tiong-hôa-bîn-kok tiàu-tōng 21 su chìn-hêng "清鄉"

出世佇犁頭店（台中南屯）的黃金島本名黃圳島，捌做過日本帝國的海軍，佇海南島的戰區經過戰爭。
Chhut-sì tī Lê-thâu-tiàm（Tâi-tiong Lâm-tûn） ê N̂g Kim-tó pún-miâ N̂g Chùn-tó, pat chò-kòe Ji̍t-pún tè-kok ê hái-kun, tī Hái-lâm-tó ê chiàn-khu keng-kòe chiàn-cheng.

二戰結束予人關入集中營，尾仔脫逃轉來台灣
Jī-chiàn kiat-sok liáu-āu hō͘ lâng koan-ji̍p chi̍p-tiong-iâⁿ, bóe-á thoat-tô tńg-lâi Tâi-oân.


一個困苦的年代總算結束
Chi̍t-ê khùn-khó͘ ê nî-tāi chóng-sǹg kiat-sok

煞又閣面對一場無法度閃避的戰爭
soah iū-koh bīn-tùi chi̍t-tiûⁿ bô-hoat-tō͘ siám-phiah ê chiàn-cheng

半年後，二二八事件爆發，中部民眾組織二七部隊反抗，黃金島𤆬人加入，而且擔起警備隊隊長的職務
Pòaⁿ-nî āu, 228 sū-kiān po̍k-hoat, tiong-pō͘ bîn-chiòng cho͘-chit Jī-chhit pō͘-tūi hoán-khòng, N̂g Kim-tó chhōa lâng ka-ji̍p, jî-chhiáⁿ taⁿ-khí kéng-pī-tūi tūi-tiúⁿ ê chit-bū.

面對困苦的戰局，二七部隊決定引敵軍進入埔里，避免人口較濟的台中受著災禍
Bīn-tùi khùn-khó͘ ê chiàn-kio̍k, Jī-chhit pō͘-tūi koat-tēng ín te̍k-kun chìn-ji̍p po͘-lí, phiah-bián jîn-kháu khah chē ê Tâi-tiong siū-tio̍h chai-ē.

進入埔里的二七部隊成功拖磨21師的攻擊，散佈謠言造成敵軍混亂來增加守備的時間。
Chìn-ji̍p Po͘-lí ê Jī-chhit pō͘-tūi sêng-kong thoa-bôa 21 su ê kong-kek, sàn-pò͘ iâu-giân chō-sêng te̍k-kun hūn-loān lâi cheng-ka siú-pī ê sî-kan.

初期，二七部隊完成這兩項目標。
Chho͘-kî Jī-chhit pō͘-tūi oân-sêng chit nn̄g hāng bo̍k-piau.

毋過人佮武器欠缺的問題嚴重，落尾這場由第一線指揮官黃金島指揮的烏牛欄戰役，40位學生猶原無法度對抗補給充足的700個中華民國正規軍
M̄-ko lâng kap bú-khì khiàm-khoat ê būn-tê giâm-tiōng, lo̍h-bóe chit-tiûⁿ iû tē-it-sòaⁿ chí-hui-koaⁿ Ng Kim-tó chí-hui ê Auran chiàn-ia̍h, 40 ūi ha̍k-seng iû-goân bô-hoat-tō͘ tùi-khòng pó͘-kip chhiong-chiok ê 700 ê Tiong-hôa-bîn-kok chiàⁿ-kui-kun.

這場戰爭，寫出精彩的台灣人勇敢抗爭反殖民的歷史
Chit-tiûⁿ chiàn-cheng, siá chhut cheng-chhái ê Tâi-oân-lâng ióng-kám khòng-cheng hoán si̍t-bîn ê le̍k-sú.

落監24冬的前輩黃金島佇後來的民主過程繼續發揮影響力
Lo̍h-kaⁿ 24 tang ê chiân-pòe Ng Kim-tó tī āu-lâi ê bîn-chú kòe-têng kè-siok hoat-hui éng-hióng-la̍t

成立大屯區民主聯誼會，嘛投入二二八事件真相調查，
sêng-li̍p Tōa-tûn-khu bîn-chú liân-gī-hōe, mā tâu-ji̍p 228 sū-kiān chin-siòng tiau-cha,

為戰死的台籍日本兵爭取權益，為台灣轉型正義拍根基，
ūi chiàn-sí ê Tâi-chip Ji̍t-pún peng cheng-chhu koân-ek, ūi Tâi-oân choán-hêng chèng-gī phah kun-ki.

嘛影響咱這代台灣人必須完成的獨立建國運動。
mā éng-hióng lán chit-tāi Tâi-oân-lâng pit-su oân-sêng ê To̍k-li̍p-kiàn-kok ūn-tōng.