【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16781-Q16800）

Q16781：

龔Sir 你好，上完股票班，真是獲益良多。好記得你上堂時講過，03年時有人帶住口罩買樓，之後個個賺晒錢，依家又個個帶住口罩都嚟上堂，希望可以幫到我地都賺到錢，聽到時真係感動，我第一層買嘅樓真是沙士時買，第一桶金都係咁樣搵番嚟。

講番股票，其實三月時如果唔係上左堂，真是冇乜信心入市，好彩有跟你上堂，而且睇埋你本新書50優質潛力股，所以三月時買左1830 同 2378, 而1211 同27 除左一直月供數量，都有再買正股。

4月開始月供組合轉左 1398 供$10000, 700 同 388 各$5000, 而你上一次提到的收息股，我3月時都有買 2638, 548, 778, 435 同 2800, 打算長線持有

1) 我想問現時手上股票好似太多隻，會唔會分得太散

總結一下，有12, 939, 27, 1211, 2638, 548, 778, 435, 1398, 700, 388, 1830, 2378, 2800
現時價值差不多$1.2M

2) 我想問依家係咪上堂時講過賣出時機，日日股市都成交千幾億，個個都炒股票，係咪應該現在放左部份股票獲利先？謝謝！

龔成老師：

你已行在正確的方向，只要保持進行就得。

1）的確有少少散，但未算嚴重，你唔好要增加股票的隻數，控制在這數目已可。

上述都是有質素的股票，本質無問題，當中都有不同類別，不同行業，不同的水桶123，已經是一個平衡的組合。

2）部分版塊的確有少少熱的情況，你可以睇翻第4堂的筆記，睇下中左幾多個「賣出時機」的要點。

暫時睇，部分版塊有少少中，但不是中好多，所以我地只要小心這些版塊已得。

你持有的股票，都是有質素的，會建議你長線，但如果有些升得好多，可以用「升一倍，賣一半」的策略，相信都是可以的。

------------------------------------------------

Q16782：

老師。想請教一下

假若我只得一物業（已供完）,可否轉按套現去投資？若可以的話再假定套現金額為$200萬，應該怎樣操作呢？
如按揭年期應該多久，預留還款安排，投資甚麼股票等等？煩請老師指引！

龔成老師：

你要考慮幾個因素，加按後，你就要供樓，最大的關鍵位在於「供得起」，你可以計算下，如果加按後，先月要還多少錢，你地是否供樓無問題，一定要好確定自己無問題先可以進行。例如分15年、20年還。

另外，加按即是問銀行借$200萬，當我地進行借貸投資，例如你上述所講的，我地要睇「息差」，如借的息為「2%」，之後將資金投資收息股，但到約「5%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

這刻大市波動，香港經濟長遠仍有變數，雖然近期不少時間股市都在合理區中下部或更低的位，但當借貸投資，要求的回報率就更高，要明顯地平，才會進行。

即是說，這些借貸投資不是不能用，而是要過幾關才能用，要較有把握才會用。你要考慮自己的承受風險度先決定。

------------------------------------------------

Q16783：

龔sir,，我分別係$154同$28持有恒生銀行同中銀香港，主要見佢地係本地銀行股中基本面最好，原意為收息

但忽略了去看環球風險，利率不斷下降，亦有傳美國可能推負利率，現價實在跌得太勁，將來負利率同盈利下跌可能持續多年

股價會進一步反應，請問應否出場止損？
謝謝

龔成老師：

這兩股本身都有質素的，只要你不是持有過多，持有是無問題的。另外，太集中同一行業都不是好事。

銀行業賺錢能力比過往減弱，往後只是收息型股票，增長力不強，因此要分析翻是否適合你的投資目標。不過，這兩股算是本地銀行股中，較優質的兩股，仍有持有的價值。

------------------------------------------------

Q16784：

你好 我唐突 但我想問你一個問題 我想你畀少少意見我咁我本身做保險嘅咁都做咗好幾年咁其實一直收入都唔錯 但近幾年嘅身體都唔係太好

之後又社會運動啦而家係疫情啦咁 生意都一直下滑咁而家我都將近大半年冇收入喇

咁而家我個財產淨返最後一萬蚊咁我諗住落五千蚊去投資股票希望可以暫時維持到現時的生活 你覺得我咁嘅諗法

唔應該去做 或者應該要去點做 更加好呢 因為除咗半年冇收入過期間

我都不斷去嘗試搵兼職喇part time啦真係可能個市道比較差咁一份工都冇回覆過我

咁而家已經係 喺度我最後嘅資產呀 咁我應唔應該攞其中一半去投資 去維持我嘅生活呢

龔成老師：

以你目前的情況，應該持有現金。

投資是有風險的，你不能確定投資能帶給你一定有生活費，你這動作其實風險不少，在你這段無收入的時期，持有現金是最重要的。

你可以試下找多些不同的工種類別，不要只限制於過往常找的某些類別，你成功機會會較高。

------------------------------------------------

Q16785：

龔成老師你好，剛睇左你本50值博倍升股，覺得信義光能都幾值得投資，但現價比起你出書時已升了不少，請問現價仍合理嗎？謝謝老師

龔成老師：

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價在合理區中上部，分注投資可以，但這刻並不是大注投資的時候。這股股價上落都大，要注意金額。

------------------------------------------------

Q16786：

龔sir,你好 現時22歲 我想問下 瑞聲科技(2018) 36.1 時入手

你會建議繼續持有或是放售。

龔成老師：

瑞聲科技（2018）質素不差的，可以長線持有，你買入是合理價，持有無問題。

這股長遠仍有發展，但就不是高增長類型。近期市況波動，佢股價上落都會較大。除非你持貨好多，否則持有是無問題的。

------------------------------------------------

Q16787：

龔老師你好, 我想請教下月供股票投資組合的問題.
我和老婆一起月入大概6萬幾,現在每個月用$22000供緊4個股票, 分別是

中華煤氣(0003) $7000/月;匯豐(0005) $5000/月; 比亞迪(1211) $4000/月; 盈富(2800) $6000/月.
你覺得這個組合有問題嗎??

同時,我比較擔心係滙豐,本身揀滙豐是想收息. 但佢黎緊一年都吾派息,而且股價都跌左好多. 我應該轉另一個收息股定係趁佢宜家價低繼續供等佢買多D??

另外,其他月供股票都不是收息性質,我應該點樣去決定幾時賣出??

希望你得閑既時候可以解答下我, 謝謝.

龔成老師：

上述所月供的，基本上都無問題，可以繼續，如果想優化組合，建議加大盈富（2800）金額，減少少煤氣（0003）。

至於匯豐（0005），這股只是收息，增長力有限，如果你打算投資這股的目的是長期收息，其實仍有持有的價值，佢只是中短期唔派息，長遠仍會派的。

不過，這股就未必值得佔組合的比例太多，所以建議你減少少金額。

至於其他股，你可以先保持長期月供，當佢到了貴的水平，又或你的人生階段改變，想收息多過增值，到時就會賣出部分或全部，轉其他股。

------------------------------------------------

Q16788：

想請教如果我月供股票，每月$6000，2800(盈富)$2000，823(領展)$1500，11(恆生)$1500，金沙(1928)$1000，ok嗎？謝謝

龔成老師：

可以，上述都是有質素的股票，可以進行。如果想優化組合，可以加大盈富（2800）的金額。

另外，大市波動，你可以一邊投資一邊留現金，即是每月除月供外，都要儲到一些現金。

而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16789：

你好老師，我睇左你問答已經有一段時間，較早前睇到你出個post過「賺錢速度，要快過父母老去速度」，好感觸，希望問你拎小小建議。

本人25歲，月入$34000，收入穩定，早陣子沒有儲畜概念，現時月儲$15000、家用$5000，積蓄有約$170000，早前買入1手 2800 @21.96、2手[email protected]、1手0005。

因為我唔敢花太大部分現金投資，請問你建議我應如何增長手上現金？

我計劃一、兩年內與家人合資置業。其實置業應該無太問題，但我想增值手上現金，能建議我月供及非月供的方法嗎？ 感謝

龔成老師：

如果你打算在2年內買樓，投資方面就不能太進取，因為我地投資股票，原理就是買入企業等企業成長，1、2年時間不足以企業增值，無人知你買樓時的市況如何，因此，你應該持有現金較多，股票不會多。

盈富（2800）與煤氣（0003）都是有質素的，可持有。匯豐（0005）只是收息股，未必適合25歲這個增值時期。

你之後可以投資股票，但注碼不會多，投資一些穩陣類股，平穩增長就得，但一定要留有現金。例如你可分注投資盈富（2800）。

------------------------------------------------

Q16790：

龔成老師你好，我想提升我的投資知識，所以想買龔老的書。

但是，不知道從何入手，我只是在買保險時，買入了儲蓄基金，但不算太了理過中投資要點，亦想學習利到銀行的儲蓄來賺取更多金錢的方法。

有請老師可指導我先閱讀哪一本書來學習投資比較適合？謝謝

龔成老師：

我地理財，應該要「攻守兼備」，你做好防守（備用現金、適當的保險），餘下資金就要進攻。

你之後要學投資技巧，令財富有更好的長遠增值，我相信《80後百萬富翁》《股票勝經》都是適合你的。

------------------------------------------------

Q16791：

龔sir 妳好
匯豐可否繼續持有以降低平均買入價？
因為之前在47高位購入現在想溝淡是否正確？

龔成老師：

「拉低平均買入價」是錯誤的概念，你最重要睇翻，你想這股你組合比例多少，是否適合。

另外，單一股票太集中都不是好事。

匯豐（0005）只是收息股，增長力有限，你要睇翻你的投資目標，是否適合買這股。

------------------------------------------------

Q16792：

丫sir問一問，如果係你，你會揀邊幾隻優質股投資，作為你嘅投資組合

好想參考吓你嘅意見，雖然我已經投資左。

長江，六福，領展，太古，盈富，恆基，港鐵，金沙，港交所，比亞迪，小米，必瘦站。

龔成老師：

盈富（2800）、港交所（0388）、港鐵（0066）、金沙（1928）、比亞迪（1211）。這是較優先考慮的。

至於其餘的幾隻，其實都是優質，都好值得投資。

全部都可以作長線持有。

------------------------------------------------

Q16793：

龔老師你好，最近買咗你本 50 隻優質潛力股，對我選股非常有用，希望等到便宜時機買入。小弟有兩個小小問題請教老師的：

１． 唔知老師點解響本書冇寫你分析每隻股嘅便宜區，合理區，和昂貴區價錢呢？ 像比亞迪 $35 樓下，金沙 $30 樓下是便宜，我在你 facebook 留言看到你提過的但書上就沒有好 specific 講, 我相信老師一定有你原因．

２． 我想年底入市買樓，好嗎？

３． 我賣晒手頭上股票買樓筆資金只有 ８０ 萬左右 , 月入 ５－６萬，想買 ６００萬樓下的樓做 ９ 成按揭， 老師覺得會否太高風險呢？ 我應吾應該用晒啲錢買樓呢？

謝謝你抽寶貴時間解答小弟的問題！ 好希望你本新書講物業買樓可以順利出版，可以快點睇到．

龔成老師：

1）因為企業價值，是會因為一些外在大環境，以及當中的業務情況，而改變的，所以在書中寫平貴，就可能會過一段時間而不適用。

你預比亞迪（1211）$40以下開始平。金沙（1928）預$27以下就開始平。

2）我相信香港的經濟會轉弱，中短期樓市會向下，你預年底買樓是好時機。不過，由於需求大，樓價並不預期會大跌，當經濟穩定，更會向上，所以要好好把握機會。

3）做9成按都可以，但你要計好，每月供款方面無問題，「供得起」是最重要的。

另外，你要計翻按保的成本，自己認為是否合理。

------------------------------------------------

Q16794：

龔sir你好。多謝你嘅建議，我而家已經考到牌照可以從事保險業啦。

不過有個問題：其實以現時嘅經濟環境，我會想當副業咁投放時間去做；等經濟好番啲再考慮全職去做。唔知龔sir你會點睇？

龔成老師：

先恭喜你！

這行業不是每個人都能夠留低，但如果你成功立足到，前途可以好勁。我比較建議你全力投入，但如果你中短期想副業，都可以。

因為好多人只當副業，最後都失敗收場，如果無決心全職全力，比較難成功。

------------------------------------------------

Q16795：

老師 最近開始睇美股 請問邊幾隻優質估係可以長期持有 又點計算股票係平定貴?

龔成老師：

APPLE、GOOGLE都是有質素的，而Tesla是有潛力的，你都可以考慮。

至於平貴，由於美股與港股都是成熟市場，我地用翻價值投資法，以長期的企業價值作分析。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q16796：

你好，龔老師，

本人36歲單身，其實都follow了你兩三年了，覺得你提倡既建議往往都好健康，本人性格情緒化，買股票成日做衝動決定，所以想今次來信好好詢問。

好似近來，個市非常兩極化，啲錢衝哂入醫療物管，有時無貨或唔似身邊人咁狂追missed，真係心理覺得好唔平衡。

本人月入大概六萬多，由2017開始買股票，有供但又有出出入入，其實到而家有蝕了廿萬。股票現有五十幾萬，無樓租樓中。無現金咁滯。

有一個二十萬的短中綫倉，經歷18年20年狂插後，已經得返十萬蚊。

長綫倉月供1211，2388，823，1299，每隻5000已有一年，另有5，1951，1052(佔倉三份一)，美股Mastercard

1) 前年供了年幾的5號，平均價60蚊，佢由八十號跌落嚟已一路減，現在得返一手，但蝕左咁多，應該走埋還是轉貨？

2) 我手上持貨仲有乜問題？我供的也是舊經濟股多，現在好難升，好多隻都坐緊，身邊朋友個個轉哂物管醫藥，已賺返哂20年暴插嗰d，我渣啲藍籌真係有些擔心自己收尾嗰幾年。

3) 自己還有供危疾保，儲錢交稅，家用等等，供兩萬蚊其實岩岩夠錢而已，都無乜現金。mpf同樣蝕緊(增長基金)，老師覺得整體理財我可以點改善？朋友話，應該要平均買外匯，金etc，係我應該考慮的嗎？

非常感謝你的時間！

龔成老師：

1）匯豐（0005）賺錢能力有減弱，但不是零投資價值，如果你只持有少少，持有無所謂的。但中短期無息，但長遠都會有翻息的，可視為財富組合中，收息股的部分。

2）其實最重要是建立一個「財富組合」，你過往的策略，部分是買買賣賣，這會容易產生虧損，其實最重要是建立一個「長期組合」，你月供部分，其實可以保持。

近期股價下跌，你唔需要理會中短期，著重長期就得。你持股方面，無太大問題。

你可以大部分是較優質的舊經濟股，加上部分新經濟，增長力較強的股，建立「組合」。你要投資部分新經濟股，但不能過多，要建立攻守兼備的組合。

3）外匯，要睇時機，一般的投資價值未必好高。至於高，你都可以買少少。

你要加強選股的能力，同時留部分現金，作把握時機時投資，這樣才能加快你財富的增長。建議你多增加投資知識，在選股、企業估值、投資時機上落功夫，對你長遠財富有好大影響。

------------------------------------------------

Q16797：

您好 龔成老師 請問如何看香港前景 感覺好像回不去了 如果以擁有三個供滿物業因三人家庭退休目標條件 是否已足夠呢

龔成老師：

香港前景的確存有變數，但我自己並不是睇得太差，在「經濟」的層面，香港仍是有獨特的位置，長遠仍是在國際上有存在價值。

如果有3物業，我相信足夠的。

因為物業有租金，除非租金大跌，否則物業的價值不變，能為你地帶來理想的現金流。香港的居住問題，是一個長期的問題，因此住的需求仍大，物業仍是理想的資產項。

------------------------------------------------

Q16798：

我2019年年尾買咗而家呢曾樓，現在好想同另外一個朋友夾份買一層大概500零萬嘅樓收租

15%嘅稅就兩份分，不過仲係心大心細...但係又好驚現金貶值

龔成老師：

第一，同人夾錢買樓，我一向有保留，因為買樓是長線投資，大家在當中的關係與意見，可能會有不同，你要明白這點。

第二，15%稅是很高的成本，就算兩人分，以本金計算的%，始終都是15%，（例如$400萬樓，每人$200萬，對你的$200萬來說，稅的成本是$30萬，15%）。

因此，應該想想其他方法。

------------------------------------------------

Q16799：

老師，有幾個問題想問：

1. 想問一下下列企業有足夠值博率買入嗎？

552 中國通信
1617 南方通信
2000 晨訊科技

2. 下列受惠5G產業既企業現價值得投資嗎？

522 ASM Pacific
354 中國軟件
6869 長飛光纖

3. 除左以上企業，係5G產業上老師會唔會有其他推薦既企業？

4. 想問老師中長線比較下，868 信義玻璃同埋968 信義光能邊個潛力會比較大

5. 如果想投資能源業，老師會推介968 信義光能定係1600 天倫燃氣？

6. 另外，之前做既定期攞返，初步諗法有兩個：一係就加大月供金額，由6000加到18000，直到剩返定期本金既20% 作為備用現金；一係就動用一半資金，買入1972 太古地產，285 比亞廸電子同埋5G產業企業，剩返一半現金留到大跌市再入貨。請問老師對依兩個方案有咩諗法，定係兩個方案都唔好？

7. 一個技術上既問題，我知道派息既企業係除淨日既時候股價會下跌，假設派$1息，除淨日股價就會自動下跌$1。

咁對本身已經持貨既人，過左除淨日股價就一定會下跌$1，變相咪即係用緊投資者既回報派息派返比佢？咁係投資者角度咪即係派完息都係無賺多到？

再一次感謝老師耐心既回答，坊間好多財演，所以每當我諗到問題既時候只係敢問你同埋相信你既回答，謝謝老師

龔成老師：

1）中國通信服務（0552）可以。

南方通信（1617）、晨訊科技（2000），未得。

2）都是直接間接受惠的。

3）小米（1810）長遠會受惠的。

4）信義光能（0968）的潛力會較高，因為業務是較高增長的類別。

5）兩隻都可以。信義光能會較穩健。

6）如果你本身5G方面的持股不多，就可加這部分。但其實可將資金並行分配都得，部分加大月供金額。

7）如果你現時持有一間公司，當中甚麼都無，只持有$100萬現金，這公司就是值$100萬。如果公司派息，派出$10萬，股東收息$10萬，這公司現時只有$90萬現金，所以只值$90萬。這由始至終都是一個左手與右手數的問題。

------------------------------------------------

Q16800：

龔sir，你好。本人今年32歲，之前一直沒有儲蓄習慣。

一年前開始每月作年金供款（$2,000)及購買危疾住院意外保（約$1,700），現扣除租金、學生貸款、家用、日常開支，每月約儲$4,000（當中$1,500月供盈富基金，$2,500作流動資金）。目前銀行儲蓄只有$15,000。

有以下問題想請教：

1）因剛起步儲蓄，現時的分配可以嗎？如日後有更多可用資金，是否該用作股票投資多於放在年金上？

2）學生貸款年期尚有兩年半（2022年12月）才還清 （每月還款額約$2,700)

因應政府措施，貸款還款期可自動延期兩年，即2022年7月才需再還款，最後還款期為2024年12月。亦可選擇按原來還款期還款。

我可將每月該還款全數資金投資盈富基金（即由現時月供$1,500變為$4,200），兩年後把部分股票賣出還款，這是否較好？風險算高嗎？

3）另外之前有購入一份意外儲蓄保，2027年9月到期後，可取回$4萬左右。如現時取消只可取回一半金額
我應該取回$2萬作投資，還是該等？如果投資，7年時間會賺多過一倍麼？

4）如果想4年內儲到100萬，是可行的嗎？該如何計劃？
謝謝！

龔成老師：

1）由於你現金不多，因此暫時應持有現金，但就可以保持做月供股票。如果日後有更多資金，應該加大股票的投資，因為我地進行人生財富累積，應該以「先增值，後現金流」作策略，年輕時應該著重增值。

2）要視乎你自己的情況，這是早兩年與遲兩年還錢，以及早兩年買股票與遲兩年買股票的問題，由於好難確定那個兩年投資股票有較大回報，因此，就要考慮你自己的風險承受程度。

另外要留意，如果你之後打算買樓，當你仍有負債要還時，就會影響左你的借貸能力，這點要留意。

3）這類產品在理財中，不是無價值的。如果只是分配小部分在這類項目，可以的。

4）你要加大每月的儲蓄，無本金就無錢投資，錢搵錢的力量就不會發生，所以，你這刻最重要的，就是本金，要努力儲蓄，以及想方法增加收入。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。