【無雷無劇透】鬼滅之刃劇場版不專業路人粉影評 . 先講總結，鬼滅呢套電影版我比100分，唔係我誇張，而係我諗咗一程車都諗唔到有咩位要扣佢分。（利申，行入戲院前非鬼滅鐵粉，但行出戲院後被深深感動了） . 震撼了我的點有幾個： 1.畫面好有張力：鬼滅動畫畫面的華麗，我相信係好多人一開始被驚豔到的原因。但今次劇場版的畫面我覺得唔係用華麗來形容，係更高的層次，係畫面的張力好強！佢唔係最靚，但個種【富有懷舊手繪畫風】與【擺明狂燒經費的3d特技】的交錯融合，真係幾令人眼前一亮。 . 首先本人對近年日本動畫的畫面華麗程度已經到達審美疲勞的地步（例如之前上個套紫羅蘭永恆花園）真係只能有靚、好靚同好L靚的comment。但今次鬼滅之刃係好唔同。佢放棄用精緻到無可挑剔的電腦繪圖，反其道而行係使用咗【類似8、90年代漫畫鋼筆畫法】，運線粗幼非常有那個時代感，但佢又做得唔違和㗎喎！仲食到正鬼滅背景設定為大正時代的懷舊感！然後，背景和動作戲就用上好多令人炫目的3D特技，間無限列車啲肉係咁爆、係咁飛，真係好大片感，睇到我wewewawa。呢種新舊交錯的畫法我真係要點1千個贊👍，簡直覺得係萌、腐屬性大行其道下的一股清泉。 . 2.劇情節奏控制得好好：呢點係唔劇透的情況下係有啲難以表達，我只能講：我有幾個位係睇到握緊拳頭 + 多次成個人坐前咗，差啲想企係身😂（利申，唔知幾多n年無試過咁） 由一開始炭治郎等小鬼坐上無限列車開始，基本上觀眾個心同佢一樣係無停止過慌張，搞到我都好似落咗場同炭治郎佢地幾個一齊喊住斬鬼咁😂雖然我知入得戲院睇既都係有睇原著，基本上大家都係知無限列車的真身係乜、炎柱的結局…但絕對無阻大家的情緒比電影版一次又一次咁牽動，呢點我再要點多一千個贊👍 宜家好睇的正劇真係買少見少，唔係賣萌就係賣腐，鬼滅的爆紅屬實可以理解，需知道上一次有正劇爆紅已經係講緊…進巨。 . 3.情感渲染力強得好可怕： 呢點我相信係鬼滅原著的強項，內心戲係細緻既，連敵人臨死前的心理活動都仔細描寫埋，呢點係幾正，尤其作者對“唔甘心”的感情描寫係最出彩，我相信係令好多人有共鳴，會諗起自己以前受挫折後痛恨自己係廢柴的唔甘心。 . 今次劇情上做得最好係對炎柱的描寫，炭治郎等小鬼反而成為配角，用來襯托炎柱呢個角色。個人覺得劇場版炎柱的描寫比漫畫更完滿，我都真係比佢的“大佬氣場”感染到，內心都好想叫佢一聲“大佬！請受我一拜”（跪） 去到炎柱的結局個段，已經聽到好多紙巾聲，我都眼濕濕，最誇張係完場個位開燈工作人員，佢用擺明嗚咽緊的聲叫大家離場🤧🤧呢個真係十分誇張（極懷疑佢都係鬼滅粉） . 4. LiSa，呢個已經讚無可讚，御用歌姫又比多次驚喜我地，第一次聽炎時已有預感搭埋電影畫面會好正，結果都真係咁正，好L正，我諗我有排系統循環🤪 . 我唔知無睇開動漫的人會唔會好似我一樣覺得咁好睇，但有睇開動漫的話我真係狂推，唔好比鬼滅原著結局爛尾影響先…信我，入場睇，你會搵得翻好多年前自己比少年漫感動到的感覺🥰 . #鬼滅之刃劇場版 #忽然做咗鬼滅打手 #因為真係值得我吹奏

浪漫月巴睇90s（66） ［薄裝一本港漫有甚麼好看的？］ 如果廿幾年前你咁問我，我肯定答你：超，你識乜X呀～ 1.鄭問的離世令我諗起，90年代那個狂睇香港漫畫的自己。 2.好細個，我就染上睇漫畫的癮，當時只能睇日本漫畫，港漫是嚴禁觀看的，因為港漫給人（即家長和老師）的印象就是：打打殺殺。 3.兩本港漫的其中一期書令我迷上癮——A.《龍虎門》王小虎動用一秒七腳「霹靂狂龍」踢死火雲邪神的那一期（那一期書名是「勝利者」）；B.《中華英雄》華英雄同無敵在自由神像決戰後，無敵一腳伸咗英雄落海再切腹的那一期。呢兩期港漫，我都是在搭89B返位於牛下的小學時，在巴士上執到的。假如愛有天意，呢啲咪就係天意。 4.由偷偷哋買港漫到終於名正言順帶港漫返屋企的過程不贅了，總之，到了80年代末90年代初，我已是個每星期同時追緊十幾本港漫的忙碌初中生。 5.那可能是港漫一個最難能可貴的年代。不像80年代由玉郎一統天下，當時的港漫，是分裂的戰國時代，各人都出盡十二成功力（即使好多人本身未必有十二成功力）去拚。最強嗰本，自然是《天下畫集》。對（當年的）我來說，《天下》由封面到內頁每一格，都是畫功的完美示範，都是有志加入漫畫行業人士（如我）的最佳榜樣，事實是我真的不時臨摹，上堂時更善用課本空白位練畫。每一本課本，都盡是我努力的痕跡。 6.論故事，較鍾意《刀劍笑》。即使角色面相間中出現崩壞情況，但故事實在好睇，不採取一般武打港漫那種描寫單一小伙子怎樣逐步變強的慣常套路，一開波，就將一個大江湖攤喺你面前，讓你清楚各方勢力，而且採用中篇單元講故事……撇除日後的恩恩怨怨，「自由人」一開波時的確異軍突起，標誌著一個港漫新時代來臨，尤其題材，好多冇人敢試的他們都敢試（後來在港漫攝入大量日本女子裸露彩頁也是由他們作為先鋒大膽嘗試）。好記得劉定堅在《漫畫讀物》一個訪問中咁講：漫畫是會Fly的行業！不像今時今日的頹唐，曾幾何時的港漫是令你有憧憬兼且隨時令你發達的行業。 7.但當年的我仲單純，矢志加入漫畫行並非為了發達，而只為畫出靚的公仔——靚到好似邱福龍筆下的公仔。當年《鐵將縱橫》橫空而出嗰份震撼，就像赤殺王的「霹靂雷霆震霪霧」，勁到唔知形容——問題是除了頭兩三期的出版時間尚算捉到路，之後的，亂晒籠；到後來他加入龍乘風公司，先替兩期《公仔書》畫了Predator短篇，再推出《東方不敗》，之後自組公司以精裝形式推出了五期《龍神》——每一次都勁到核爆，但每一次都爛尾。最後他加入玉皇朝，為每一本掛上黃玉郎大名的作品監工、粉飾。 8.90年代漫畫人，不能不提肥良。我後知後覺，直至他接手《黑豹列傳》才認識他，喜歡他那份對強者的執著處理，但真正展示功架的，當然是《海虎》，當中實在太多強勁的人物（基頭四！）和情節，只有肥良，才再次俾到我那一種久違的霹靂狂龍式震撼。「海洋」大部分書我都有捧場，但之後震撼漸少，更多的是搲頭和嘆息。 9.以前看港漫，我看到的是不斷的震撼，後來卻只睇到搲頭和嘆息——咁大班人身水身汗畫班友終日打生打死，原來只為了說一個毫不精彩（甚至接近低能）的故事。今天讀者的離棄，是因為讀者進步咗？還是漫書人冇（要求自己）進步過？我不是要求文以載道，一定要對現世有指涉，但故事，真係要用腦去諗，而這又關乎作者本人透過成長而累積的閱歷和識見。 10.港漫無疑令某啲人發到Fly起，但更多的人，只是在背後徒然付出精力、青春和熱情。這一刻若你再問我「薄裝一本港漫有甚麼好看的？」，我可能只會答：99%都不好看，好無聊。 （原文刊於am730） #浪漫月巴睇90s