［盤谷銀行減持陳智思亞洲金融，搞乜？］我都唔係好明。但應該唔係表面諗咁簡單。

明報　link： （https://bit.ly/2P7ThEm）

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

1. 先講事實。就係亞洲金融（662）被股東之一嘅盤谷銀行（香港有分行架！）減持。相當罕見。7月17號，上兩個星期五，減持5000萬股，每股3.54元。大約由10%減持到9.48%，減持咗0.46%左右。

2. 另外利申，我寫過幾次呢隻嘢。當然此一時佊一時，成個環境都唔同晒。但，好多人都唔知有間咁嘅公司，到底做乜。以前佢地有做銀行，而家冇。主要就係亞洲保險，做GI，非人壽。你見股價同淨資產折讓相當大下，但資產負債表上，唔係啲廢拉柴存貨（思捷啲衫之類），唔係廠嘅爛鬼機（賣出去唔值錢），而係金融資產，照計唔會同「真實價值」好大偏離。所以一路都係估私有化。留意呢段都重要，雖則唔係戲肉。

3. 嚟啦喎，咁呢排陳智思做乜見報，大家知啦。少不免扯上佢話被取消戶口壇嘢。咁最表面嘅諗法，就梗係「一呼百應」，盤谷銀行都同亞洲金融割席。大件事啦。

4. Except one thing：盤谷銀行根本咪就係陳智思嗰家人嘅祖業。陳智思係泰國華僑，佢在香港出世，佢老豆陳有慶在潮陽出世，佢阿爺陳弼臣在曼谷出世。咁點會係盤谷銀行同佢割席？呢樣都唔知嘅，就唔使再討論。

5. 再用其他方向諗：盤谷銀行等錢洗？唔似。亞洲金融一隻豆潤咁細嘅公司，今次減持先套到1億半，咪玩。

6. 又或者，法規上，唔想再渣住呢間香港公司？可能對會計處理不利？可能泰國政府壓力？或者盤谷銀行其他股東唔想扯上呢間公司？

7. 唔係冇可能。盤谷銀行想減持有可能。但點解在街度沽？十分奇怪

8. 你見N年前咩高盛減持工行，美銀減持建行，一樣全部在場外做。搵人接貨。批舊股上板。因為咁大lot 貨，唔通掛上去係咁沽咩。沽到幾時先完？

9. 呢度帶出另一重點：亞洲金融呢隻嘢，係冇乜成交嘅。多嗰時可能兩三百萬（＄），少嗰時？全日冇成交都唔奇。你5000萬股（1億半＄）沽落去，沽到幾時？

10. 於是再又帶出個問題：點解咁樣沽落去，股價都冇大插？留意係7月17號沽，嗰日股價好似仲要升。

11. 咁呢度，就要睇trade log 啦。你知道嗎？一隻股票每一單成交，都可以搵返出嚟。幾點（時分秒），幾錢，做幾多，全部有。求其普通股票報價都有，網上免費版都應該有，懶搵。

12. 尤幸呢隻亞洲金融，成交係唔多嘅。即使係7月17號，好似都只係廿幾單成交。就有一單，5百萬股，一鑊過，9:38:11，3.54成交咗。就係呢一單。

13. 咁你又問，咁都插唔散個股價？可以望下，有寫明，呢單係Y盤。咩係Y盤？可以睇（https://bit.ly/30WIqm6）。我其實都唔係好熟，冇錯我做過刁拿聲，但我唔係刁股票。Y盤同X盤（有啲人聽過嘅交叉盤），都係特別嘢。同一間經紀行做。Y盤就自動，X盤非自動。

14. 即係乜？你平時去沽三手港交所，你會唔會知沽咗畀邊個？唔會的。可唔可以你指定賣畀我？一般唔得，因為自動對盤。但今次亞洲金融玩法，其實係一早講定，到時到侯，有人會射個500萬股嘅盤，另外又會有人接。好似交贖金咁。咁當然，係完全合法，亦冇乜奇怪。

15. 講得簡單啲，其實都係傾好，唔係在市場係咁沽。買家？唔知乜水。

16. 然後再教大家睇樣嘢，睇CCASS holding，俗稱嘅　花紙，睇下亞洲金融
17. 啲貨在邊（https://bit.ly/336qUhO）。

18. 你去睇big changes　（https://bit.ly/2DcZlbZ）．會見到盤谷銀行。留意，6月20號，亞洲金融啲貨，9.9%，先忽然出現在盤谷銀行。咁係咪盤谷銀行嗰時先買？梗係唔係啦，買咗九世啦。

19. 咁發生咩事？關鍵你要明白，你啲貨在邊，係唔影響你總持股。我拎住1%港交所，我鍾意放邊間券商都得。只不過盤谷銀行so happen 係金融機構。啲貨忽然在佢自己度出現返。咁貨從何來？邊度搬嚟？有人多咗梗係有人少咗？答案係，外太空飛嚟的。冇一間行有少咗9.9%。盤谷銀行嘅貨，之前係non CCASS，外太空。但不等於不存在。即係你可以拎張股票收去床下底咁之嘛。

20. 然後又點？然後就係7月17號嘅「減持」。5000萬股。去咗邊？似乎係去咗UOB 大華繼顯。大華繼顯嘅貨多咗，但之後就亦都少返，消失在人海中。但邊個接？都係唔知。大華繼顯係券商啫，背後係邊個客，實在唔知。

21. 講咗一大輪，結論係乜？結論係，我都唔係好知。但可能個方向，都係去返政治嗰方面

22. 返返最根本嘅問題，亞洲金融大股東，係陳智思老豆。渣59%咁滯。但啲貨在邊？好多在JP Morgan（46.8%，除咗佢外邊有人有咁多？），仲有啲在花旗。咁你可以又諗返銀行戶口嗰單嘢。會唔會係花旗JP唔多想做佢生意，叫佢搬貨？或者掉轉，陳生覺得啲貨在嗰度唔多安全？兩者都有可能。可能而家只係轉倉嘅序幕。

23. 結論：我始終唔相信　盤谷銀行「需要」同亞洲金融割開，根本係陳家左手右手。況且，要減持可以一次過搵人買。應該係轉倉安排（但點解轉倉安排會上咗板就我都未明）

24. 又，其實最初我有個諗法，就係根本盤谷銀行想質低個價，然後可以陳生私有化662。但諗下，亦唔使咁大壇嘢。況且，係想質低就在場內係咁沽啦。雖然我相信，最後都係行上呢條路

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145