【龔成問答信箱】（Q22321-Q22340）

Q22321：

龔Sir，一直猶豫到底買唔買名錶，因為本人做銀行嘅，牌頭對予工作黎講都有一定影響，但名錶都起碼6位數字上落，加上有限量

所以有一定價值，而且可以為我工作帶黎額外嘅收入，算唔算資產一項？

龔成老師︰

如果隻錶本身限量，你相信有升值潛力，其實都可以投資。但由於金額都唔平，你真係資金較充裕，才好考慮。

至於工作方面，一個人穿著，的確會影響客人第一印象，這點我明白。

但相信客人最終選擇你，你的穿戴影響可能只佔好少比重，主要係睇你有無實力，唔好放錯重點。

------------------------------------------------

Q22322：

老師，上緊進階班，想問香港寬頻（1310) 是一隻適合投資的收息股嗎？問題如下：

1.派息比率超過100%,將盈利以外的資金，派發給股東，長遠是否有影響？

2.見企業的資產淨值出現負數及負債比率都十分高，但經營活動現金流量保持正數，仍值得投資作為收息，我廿幾歲？

謝謝

龔成老師︰

1) 香港寬頻（1310）派息比率>40%，股息率>4%，而派息政策穏定，和有一定派息紀錄，因此佢已可定性為收息股。

你見佢好多時派息比率高於100%，甚至近年去到1000%，唔係佢拿左盈利以外的資金去派發，而純粹係"折舊"拖低左個盈利所致。

實際上，佢都只係派緊當年賺的錢，你再仔細睇翻，佢經營現金流，就會明白。

2) 佢流動資產，係少於流動負債，一般情況我地會視為短期還款，可能會有較大壓力，甚至會出問題。

但我地都要考慮埋，企業本身狀況。以一間全年收入近100億企業，現金流都算強勁，短期17億缺口，唔算係好大問題。

當然，佢負債偏高，係會扣少少分，但依然係一隻有投資價值的收息股。

但香港寬頻（1310）就係用來收下息，唔會有太大增長力，以你2X歲年紀，此類股票唔係太適合你。

------------------------------------------------

Q22323：

老師你好，我想請教一下，聯易融9959@19和攜程9961@280有貨，這兩股，屢創新低

應繼續嗎？

龔成老師︰

我地唔好用個股價，去判斷一隻股票的持有價值。我地應該睇翻佢本身質素，有質素就算中短期有波動，你照持有都無問題。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力，有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

攜程集團（9961）有質素。

佢係全球領先的一站式旅行平台，可提供一套完整的旅行產品、服務及差異化的旅行內容。

用戶可以通過平台進行任何類型的旅行預訂，從目的地內活動、週末短假及短途旅行，到跨境旅遊及商務旅遊。

產品及服務組合涵蓋經濟、高端、定制化及精品產品。集團經營一系列品牌，包括攜程(Ctrip)、去哪兒(Qunar)、Trip.com及天巡(Skyscanner)。

根據報告，以商品交易總額（或 GMV）口徑統計，佢係過去10年內一直為中國最大的在線旅行平台，近年更為全球最大的在線旅行平台。

財務數據方面，收入都有不差的增長，但盈利就比較波動，有時會出現虧損，反映企業仍處於投資期。

這企業有獨特性，長遠有投資價值，但估值難，未能確定這刻的平貴度。只可以話，潛力度是有的，但預期股價都會波動，因此投資要控制注碼。這股宜長線，等企業成長。

這2間企業，都有長線投資價值。若你持貨不多，可以守。但持貨較多的話，建議你沽出部份，去平衡風險。

------------------------------------------------

Q22324：

龔sir，我買咗呢一隻股票10000股，0.411，之後見到佢出咗呢d，我唔係幾明白點操作，請問依家我係應該繼續持有還是沽售？

如果繼續持有的話，是否需要再投入資金？

龔成老師︰

COOL LINK-NEW(8491)主要於新加坡從事食品供應業務，見佢多年虧損，無明顯投資價值。

佢會進行20合1，和合併後二供一。這都係一些典型財技股的做法。

我對這類股票較有保留，建議你沽出會較好。

------------------------------------------------

Q22325：

上嵐用來投資收租如何？

龔成老師︰

屯門上嵐位置上，尚算可以。

但我一直都唔係好建議讀者，買1手新盤，因為好多時都會有溢價，變相買貴左，影響回報。

而且，佢單位主要係26X-29X呎，唔算話好大。勉強算可以容下一個家庭，投資價值不算高。

------------------------------------------------

Q22326：

Sir，我份工作做咗10年，但強積金得28個，係咪太少？

請問有冇咩好建議呢？我18歲開始返工，今年28。

龔成老師︰

多與少，唔係最重點，因為每個人生活水平都唔同。最重要係你這筆資金，是否用得其所。

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。只要按你的年齡，長線配置就得。我自踏入社會工作後，一直都是100%恆指，無變過。

除了強積金，你要繼續保持你月供習慣，去努力增值和增力投資相關知識，相信長線你財富一定會有理想增長。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

------------------------------------------------

Q22327：

Hi 龔成老師，很久沒有聯絡了。我現在有個煩惱，因為在＄2.54買入了8083， 現在跌了50％， 自己之前看到業績每年增長不錯，可是高位入了。

看不懂它私有化，分拆科技上市的新聞對業績有什麼影響，8083的投入金額佔整體倉位大約5％，現在虧損一半，是否應該守下去呢? 定忍痛止損。

希望你能夠抽空回覆，謝謝

我另外也持有5％的2013， ＄17買的

现在持有40000股8083

龔成老師︰

簡單講，中國有贊（8083）首先佢會分派有贊科技，然後以主板模式上市，原有的就是以私有化模式，退市。

佢以每1股的8083，換取約0.05股新派的有贊科技，另外仲會加少少現金，約每股$0.13。

中國有贊（8083）業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高。你現時持股佔組合，唔算好多，可以守，但你要明白佢有一定風險。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但此股都係較大不確定性，但你持股唔算多，可以守住先，再觀察。

------------------------------------------------

Q22328：

老師，請教你，我現金有三成，其他股票。唔需要應急錢。港交所佔資產組合4%，但已嫌了75%，那應該放嗎？感謝解答

龔成老師︰

港交所(0388)有長線投資價值，而且佢組你組合好少，我建議長線持有較好。

但如果你係個好保守架投資者，你可以用"升一倍，沽一半"架策略，去先收入成本，都係可以。

------------------------------------------------

Q22329：

Hello 龔sir。有時情想了解一下，我現在手上有 03988 中國銀行，共18000股，均價為 3.0944 。

仲有現金為約5萬左右，請問現時部署，應該先每月持續購入？還是先截倉，尋找其他更有潛力的股票？

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

因此，我地先要睇翻，到底中行(3988)適唔適合你年紀。中行(3988)有質素，但只是收息股，如果你係中年至退休人士，這股都可以。若你係偏年青，由於佢增長力不高，就不太適宜持有太多。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

所以，你唔應該再加注在中行(3988)，反而要慢慢加入其他合適股票，去令個組合風險更分散。

以下是一些不同類型優質股，你可以因應自已年紀，去作出配置。

潛力股︰中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰指數基金、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

------------------------------------------------

Q22330：

龔老師，你好，我有睇開你嘅fb同埋有睇你寫嘅書，我今年24歲，收入大約～15000多啲，家用$5000，草$7000，目前持有以下股票︰

小米（$26，2200股）
中國移動（$53.125，4000股）
中芯國際（$28.15，5000股）
碧桂園（$8.66，10000股）
金蝶國際（$27.1 ，1000股）

仲有少量美股
Coinbase ($350 ,2股）
Futu ($188.5 ,20股）
TSM ($132.45, 2股）

我從上年4月開始投資，但都係一名新手，想請問我港股既投資組合有啲咩需要注意，因為我本身好睇好芯片股，覺得芯片既需求不斷增加，

近期見到港股差唔多每日都跌，波動較大，以及初時玩美股，咁岩都係買左高位 我依家仲等緊返家鄉。

另外想問如果報讀你既課程要幾多錢？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你不論持有那個市場的股票，持有與否，最重要都係睇企業質素。中短期波動係正常事，再優質股票，都有出現。只要好優質股，你一直持有就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你24歲計，應先做好財富增值。中國移動(0941)係收息股，增長力唔會明顯，不建議你持有太多。你最好沽部份，換至其他有增長力股票。

碧桂園(2007)，業務都算不差，但負債高，風險略高，雖然都可持有，但不宜持有太多。

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

除左以上3隻，想你特別留意之外。其他持股，都係有質素，你長線持有就可以。

另外，若你睇好芯片業發展，中芯國際（0981）和TSM都係合適選擇。質素上，TSM會較高。

而中芯國際（0981）業務有增長力，質素係有，但未到最高質素。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

現在你每月先用5成儲蓄，即$3500做月供。其餘先儲起，用一邊月供一邊儲蓄的策略。

由於「潛力股」係需要一定經驗和有一定波動性，你經驗較淺，可以先小注，大約佔組合3成左右。到你有一定經驗，你可以投資到約5成比重。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22331：

我是一個45歲女士有一個仔11歲。我早前買咗隻708 $69買一直好似撞鬼咁都唔放過直到$13放咗放咗

現有十萬現金想問老師買什麼股票可以有得增值

龔成老師︰

其實恒大汽車（0708）都唔算全無投資價值，只係風險偏高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

當佢一有較不利消息，好易就會好似現在咁，出現大跌。這類股票唔係不能投資，但只能好小注，去平衡佢個不確定性風險。

以你45歲，可以選擇一些「平穩增值股」+「潛力股」作投資目標，並以「平穩增值股」作為主力。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有10萬資金可以先投入一半，以分注形式入貨。餘下一半就等大市出現一定程度的下跌，才大力度掃貨，然後長線投資。

------------------------------------------------

Q22332：

龔成老師你好，最近睇咗你幾本書。本人33歲 ，已婚有兩個小朋友 同先生收入加埋有四萬。家庭開支都需要二萬五

之前同屋企人住，打算嚟緊下年自己租樓住，租金大約一萬蚊

而家手持280-300萬現金，睇過而家嘅樓價 如果喺新界區買入一個400至500尺嘅單位要600萬，如果供樓嘅話就會 $16000-$18000，如果咁樣供樓嘅話就會儲唔到錢

我希望你用呢300萬，4-5年後 希望達至500萬有冇可能？

買入600-700萬樓，想有500呎，到時俾首期 400萬再做按掲200幾萬，無咁吃力。預留100萬現金，for小朋友讀野或不時之需。

請問老師

1）由於樓價不斷上升 有機會係呢四至五年期間投資股票 未必追得切樓價既上升，定係應該而家及早買樓 ？

買個500萬以下單位算，但因為有兩個小朋友 ，如果俾晒首期，就無現金流。

2）希望回報大點，如組合以下股票會增較理想

9988
1810
1177
另外留80 萬買入電燈作收息

老師，應該買入邊啲增長較快？同時亦會月供2800，或一些潛力股

3） 如果到3-4年後，現金少過200 萬，都仍然希望買入一個細單位作收租。因為想買樓 所以股票想5年後取反出後 或留20%長線投資。

謝謝老師百忙抽空

龔成老師︰

1) 其實投資任何項目，都係會有不確定性，無人知5年後，優質股增幅會否跑嬴樓市。但從投資角度，現時租金回報率不高，優質股值博率會較好。

另外，我地投資會講求平衡性，如果你買樓後就資金盡用，不能投資其他資產(如優質股)。這樣你財富組合，就會太集中係物業類，唔係咁理想。

因此，你先用優質股去增值，5年後再去置業，相信會係較穏當的做法。

2) 這5年，你可以用一些有質素的增長股，去做增值。你所講的3隻股票，都係適合。但佢地都係潛力股，風險會較高。如果全數只投資這類股票，會令你組合的不確定性風險太大。

建議你用「平穏增長股」 + 「潛力股」作組合，去創造一個增值平台。港燈(2638)只係收息股，增長力唔高，唔建議你投資。

現在你每月先用5成儲蓄做月供。其餘先儲起，用一邊月供一邊儲蓄的策略。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那300萬現金(扣除等同半年開支的應急錢後)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

3) 我假設投資回報有10%（連股息再投資），你每月投資$5000 + 280萬現金，5年後大約會增值至490萬，故這樣安排相信很大機會達至你的財務目標。

但若果到時金額，跟你目標物業，都尚有一定距離。你可以先買入一個細單位，再用餘下股票增值，之後才細屋換大屋。

但緊記，買樓同時要留有一定優質股，去保持增值，以維持財富組合平衡性，這才算得上係理想。

最後要提醒翻，如果你的投資股票能力不強，成續不好，投資知識不高，你有可能現時買樓，好過你將資金投資股票。

因為上述的策略，建基於你能將股票增值，而增長是大過物業增長的。但如果你過往投資經常虧損，投資股票只會得不償失，那麼，將資金直接投資物業，可能更好。

------------------------------------------------

Q22333：

老師，我是去年入股市開始投資的，現在處於虧損，我怕自己的情緒會影響判斷，所以很希望老師能夠幫助解答我的問題，讓我可以逼自己理性決定。

1.成實外教育。前期教育新規出台，現時股價已下跌一半，不知道是不是該股的基本面已經改變，還應該繼續保留該股嗎？

2.聯易融。因為騰訊的加持，上市的時候其實就有抽，後面下跌的時候毫不猶豫就買了，知直到今天停牌，讓我開始反省自己思維的簡單。想請教老師如何看待這隻?

另外也想問問老師對新股的態度是如何的?會選擇抽新股嗎還是寧願等有些數據做過分析後再買?

謝謝！祝生活愉快

龔成老師︰

1) 成實外教育（1565）主要透過結構性合約，於中國從事民辦教育服務。佢係四川經營十多所學校，提供學前教育至十二年級及高等教育服務。

佢的學校除提供必修英語課程外，也為具興趣的學生提供第二外語班，包括德語、法語及日語等。

睇翻過往的財務數據，其實不差的，業務基本上穩定，盈利都不算差，不過增長力就唔算強。

但近年中央對教育板塊，推出不少政策，都係不利於民辦教育發展。雖然暫時影響未算好大，但不確定性風險增加唔少。

若你持貨佔組合比重不多，可以守。但若佔較多，建議沽出部份，去平衡風險。

2) 有大企業加持，可以係加分位，但絕對唔可以因為這個單一因素，但決定這企業是否值得投資。

聯易融科技（9959）屬有潛力有風險類別。

佢係一家中國供應鏈金融科技解決方案提供商，佢旗下的雲原生解決方案可優化供應鏈交易的支付週期，實現供應鏈金融全工作流程的數字化。

幫金融機構客戶提供供應鏈金融科技解決方案，提升整個供應鏈金融生態系統中的透明度和連通性。

根據數據，佢處理的供應鏈金融交易金額達人民幣近2000億元，係中國供應鏈金融科技解決方案提供商中排名第一，市場份額約2成。

佢已經連接左供應鏈金融生態系統中幾百間核心企業、金融機構、超過十萬間中小企業。

佢的主要收入模式為基於交易量收取科技解決方案的服務費用。佢的客戶主要包括核心企業及金融機構。服務的大部分核心企業於房地產、能源、建築、醫藥、製造等行業運營，亦為銀行、券商、信託公司理公司等各類金融機構提供服務。

過往生意快速增長，不過現時仍虧損中。

長遠發展力係有，不過估值好難，只可以話，小注投資，長線持有都可，耐心等更大的收成，但預佢中短期可以好波動。

至於停牌，係屬於短暫性質，純粹係有重要內幕消息要公布。

其實我一直都唔係好建議抽新股，因為好多時新股定價都係較貴。而且，提供的數據參考性都較弱，好難做個較準估值。

好多時佢真正表現，要過1,2年先可以睇到，故有一定風險。

當然，唔係話新股全部唔好抽。但由於有一定不確定性，同埋多數唔平。因此，較理想做法係最多先小注，再觀察。

------------------------------------------------

Q22334：

阿sir 嗰陣時你每月存1萬咁你月供股幾多錢？

龔成老師：

我無做月供股票的，月供股票是適合初階者，如果有企業估值的能力，就不一定要月供。

我當時的策略，是每月儲$1萬，然後儲到一定數量後，以及當該股處便宜價，或合理區較下部，就會出手。

------------------------------------------------

Q22335：

老師，我依家儲多啲本 想問一個白癡問題 「分注」嘅定義 係每月自訂月供amount 定 一手一手滿滿入貨？

龔成老師：

分注有好多方法的，原理即是分開去買入，我地投資，先要定計劃，例如你某隻股，你想佔股票組合比例多少，如$10萬。

分注就是將$10萬，分開多次去入，例如每次$2萬，分5次。或以月供，每月$3000進行，長期進行，直至到你適合的比例。

------------------------------------------------

Q22336：

中國移動呢隻點？如果而家呢個價買唔買得過？

龔成老師︰

中移動（0941）不是無質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

你可視佢為收息股，增長力不算強，這股有長線投資價值。現價合理。

若你係中年至退休人士，或者你投資取態好保守，這股係可以考慮。相反，你係偏年青的話，由於佢增長力不高，作為投資目標，就唔係咁適合。

------------------------------------------------

Q22337：

龔成老師:本人現持有以下股票，因有些已經跌了很多，也不太肯定這些企業現時是否還有發展的空間，希望龔Sir可以幫我分析一下究竟我應該止蝕，繼續持有還是再增持，謝謝。

136恆騰網絡8000股 平均買入價12.42
520呷哺呷哺1000股 買入價21.86
2158醫渡科技100股 買入價26.3

由我認識股票開始就一直follow龔成老師你，我其實很認同龔Sir你講的買股票應該係睇企業的質素，睇佢長遠發展潛力。但自從我罹癌之後，

因沒有工作收入，只有每月有三千幾政府補貼，所以希望由股票短炒賺一兩千補貼生活開支，但就一時衝動就買左以上股票，希望龔Sir可以賜教，

我呢種情況其實係咪唔應該買股票，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，你比時間企業去成長，而唔係短期炒賣，去賺差價。

你唔好預投資增值，可以解決你短期財務問題。你現時持有投票，都有長線投資價值，但佢地風險和波動性都較高，不宜持有太多。

以你現時情況，應優先留有一定較多現金，去支援你日常生活和醫療開支。

若佢地佔你資產比重較高，你可以沽出部份去套現一些現金，以備不時之需。若只係佔好少部份，你照持有都可以，但預係長線持有，才會有較理想回報。

恆騰網絡（0136）及醫渡科技（2158）都是較高風險的股，反映你在選股出問題，如果持貨多，宜減。

至於呷哺呷哺（0520），其實有質素的，但之前貴，現時才合理翻D，這股都有得守的。

------------------------------------------------

Q22338：

老師你好，我受到你既影響就已經成功買樓，不過因為工作關係就冇得租出去，咁其實層樓係咪都仲係支出而不是財富增值？

同埋依家要賣大部分股票去裝修，唔知吉利 (@16入) 同比亞迪 係咪都應該依家賣？有啲其實低過買入價 (e.g 領展，港鐵) 係咪都賣咗先？

(諗緊埋咗蝕緊嘅先定係吉利或者比亞迪呢啲潛力嘅先）

補充返，我27歲，買咗樓後計哂所有支出(including fund investment) 有~3000 淨。。。所以要build 返現有股票portfolio 要啲時間

吉利同比亞迪都各只有一手

龔成老師︰

雖然你買樓後，要供樓，好似只係得支出，無收入。但我地做財富增值，唔好用現金角度去諗一陣事，要用資產角度去做出發點。

你每月供樓還款，當中一部份係還本金，其實就係幫你累積緊資產。

只要你個物業係有質素，長遠有升值潛力，就算無租金收入(即係現金流)，都一樣符合財富增值的目的。

當然，你物業有利息支出，這都是一個負現金流狀態，如果可以的話，將物業出租始終是最好的做法。

至於沽邊隻股票先，你可以睇先睇質素，再睇平貴，去作決定。若這些股票都係優質，你就睇下邊隻現價較貴，現價值博率較低，就可以優先沽出。

現時比亞迪(1211)和吉利(0175)，相對領展(0823)、港鐵(0066)這類舊經濟股為貴，值博率會較低，可以優先沽出。

在買完樓之後，財富組合會偏向左物業類個邊。因此，你將來再有新資金，要優先投入優質股類，令財富組合回復平衡。

------------------------------------------------

Q22339：

1373可以月供嗎？

有條件做下一隻1830？

注碼可以15%？

龔成老師︰

國際家居零售（1373）係一間於香港、新加坡、馬來西亞西部、中國內地及澳門均擁有業務的家品零售連鎖商，提供超過2萬款家品。

集團的店舖及特許店以「日本城」等品牌經營。

過往財務數據不差，生意盈利保持增長，有長線投資的價值。現價合理區中上部，仍是可投資的。

但佢業務和產品性質，跟完美醫療（1830）不同，較難出現同樣突破性增長。

而且，你睇翻這住多年，佢派息比率都偏高，可見管理層發展野心都唔大，你預此股長線係平穏增長型。此股都有質素，佔組合10%左右會較理想。

------------------------------------------------

Q22340：

Sir，如果目標是五年後有平穩的增長力，每月買入三至四手3067，持續進行五年，是否可行？

龔成老師︰

安碩恒生科技(3067)雖然係一籃子優質科技股，有別於投資單一企業，會較具分散風險能力。

但由於佢始終只係集中在科技股，難免會造成行業過度集中的風險。

我一般會建議讀者，個別企業和行業，不要佔組合15%和30%以上，銀行業更加不要高於組合20%，以避免出現過度集中性風險問題。

而且，3067本身都有一定波動性，如果你目標係平穏增長，盈富(2800)會係較合適選股。

由於你都係偏年青，未到30歲。你可以考慮用5成盈富(2800) + 5成安碩恒生科技(3067)作為組合，這個配置的增長潛力和風險度，相信會較適合你年紀。

另外，想提多你一件事。現時大市只在合理區，資金唔好盡用。最好留有部份，等大跌市出現時，可以用來掃平貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20921-Q20940）

Q20921：

Hello 龔sir，請問寶威控股(0024)依個股本重組係乜野意思？對買左依隻股票既人有乜野影響？謝謝！

龔成老師︰

這是一些會計上調整，數字會抵銷過往累積的虧損。但這不是實際業務賺到的錢，只是會計數字，係考慮公司賺錢能力時，係不會作考慮。

寶威控股(0024)從事鋼鐵貿易及鋰業務。

這企業規模好細，過去多年虧損，睇唔到有投資價值。而且核數師多年都係給予財務數據「保留意見」、「不表示意見」，明顯佢一直以來盤數都有問題。

特別是佢在停牌前，核數師意見已經有幾年表示「保留意見」，反映盤數有問題！

這類股票，當然唔值得投資。

此股由2019年8月一直停牌至今，初步睇佢情況都幾麻煩，有機會除牌、甚至清盤。暫時投資者無野可以做。如果佢有機會復牌，最好盡快沽出。

否則，若佢真的除牌或清盤，投資者最後只能自行聯絡該公司，看看如何處理其手上股票。

------------------------------------------------

Q20922：

我好想好想 長坐1177 10年 上100蚊。 但 石藥 同 中生，成日聽到 帶量採購 呢個負面東西。 想請教你， 帶量採購是否不用擔心？？

龔成老師：

當我地分析時，最重要睇企業的長遠價值，而不是只睇這刻的情況，首先，要上$100不是易事，佢的生意要有好大的增長先有機會做到，因此現價已經唔算平，所以股價上去$100，已不是炒作問題，而是一定要有實質的企業價值提高。

至於帶量採購，都會對佢有負面影響，之前的相關政策已對佢的藥價受壓，影響了賺錢能力。

但我地作為投資者，分析企業應該更全面及能分析「延伸發展」，不能單睇表面分析。

中生製藥（1177）本身有一定質素，佢在行業都有一定的優勢，而帶量採購令行業整體的賺錢能力受影響，這反而會對一些規模較細及質素較弱的企業有較大影響，而過一段時間，市場就會適應新的規模，令到較有優勢的企業較易賺到錢。

因此，長遠中生仍是能賺錢的企業，加上人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

------------------------------------------------

Q20923：

誠哥!!而家新經濟股同恒指跌咗唔少，係咪可以開始分注入啲3067同2800?

另外，想問其實2800或3067呢類etf需唔需要做止蝕呢?
謝謝你!

龔成老師︰

近期雖然跌唔少，但依然有部份新經濟股係輕微過熱。

現價計，盈富（2800）在合理區，而安碩恒生科技（3067）則在合理區較頂位置，都可分注入貨。

至於沽貨，我不會有明確的止蝕價。

我賣出基於下列幾個原因：由於我買入的是優質股，若買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略

但當時的市況未到極度狂熱，所以我亦只是沽出了一部分的貨。

此外，股價要是嚴重高估，例如市況狂熱，又或自身的原因令股價爆升，都有可能沽出。

------------------------------------------------

Q20924：

龔sir你好，不好意思，又有問題想請教你

1. 1183澳能建設：之前不斷升幅，現在卻跌得一蹋糊塗，但又未見有人大手沽出，
想請教一下到底是什麼因素影響？如果現在低價買入，買唔買得過？

2. 0853微創醫療：之前有詢問過這隻股票的方向，現在見到佢一樣不停下跌

原持有53蚊3000股，若想低價買入多少少，希望虧少D，請問這個方法還可行嗎？謝謝你的回覆

龔成老師︰

1） 其實一隻股票中短期下跌，唔一定關佢本身質素事，可以係其他原因。

澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但近期股價其實有點超前反映。這刻投資值博率未算高，如果你睇好，最多都係小注好了。

2） 唔好因為想拉低個平均價，而盲目加注，咁係好錯。

微創醫療（0853）市盈率去到近180倍，好明顯係唔平。佢增長係快，但市場估值包含左不少「前景」因素，令變數好大。

再加上佢負債不輕，再加注風險唔少。如果你現貨佔組合比重不多，可不理股價，長線去持有佢就可以。

------------------------------------------------

Q20925：

你好，龔SIR!，我開始買股票冇耐，呢排市場比較差
令我有D不知所措，唔知應唔應該重新整理下持倉股票

我25歲, 目前持有組合如下:
03800 1000@$3.18
03067 300@$18.81
01810 600@$22.15
01799 400@$21.90
01448 2000@$7.85
00400 1000@$4.56
00175 [email protected]

想請教配置上有冇重組需要? 謝謝龔SIR

龔成老師︰

唔好比市場氣氛影響判斷，我地持有一隻股票與否，關鍵位是企業質素、前景，不要被中短期架波動影響自己。

你持股大致上都可以，但要留意以下3隻。

保利協鑫能源（3800）質素只是一般。佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落。此股不宜佔組合太多，小小注好了。

新特能源（1799）佢盈利好波動，近年更有減弱架情況。

佢本身負債都唔輕，此股投資價值一般。由於你只係小注，可以守住先，再觀察佢未來發展。

科通芯城（0400）主要在內地從事銷售集成電路、電子元器件，以及相關融資服務。

佢業務係有，但見佢生意一直下滑，賺錢能力越來越差。此股投資價值一般，長線計換至其他優質股較好。

另外，餘下股雖然相對好少少，但你持股中有都係波動性較高架股票。唔係話唔投資得，但會令組合風險偏高，故不宜持有太多。

未來，你可以集中翻D係平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

------------------------------------------------

Q20926：

你好龔老師，最近見到跌市，見到很多平貨，很興奮呢，已經好有衝動想入貨。

雖然有看到你説恒指到22000-24000才是便宜區。

1/ 請問1211是否$120以下才是便宜區？

2/ 請問700和388的便宜區是多少？

3/ 請問京東和阿里巴巴那隻較優質？

4/ 我發現自己好濫，好多股票都想買（當然資金有限唔容許）, 例如騰訊，港交所，阿里巴巴，京東，金沙，銀娛等，都想有。而我持有的股票（有10隻以上）

但每隻都係得1手至幾手，變咗老師説的賺一倍放一半的方法，我未必能應用到。

我是否應該糾正我這個想呢？如是，應該可以怎樣做？
先謝謝老師回覆。

龔成老師︰

近期大市出現回調，但整體只算在合理區，而且有部份新經濟股，依然輕微過熱。

1） 比亞迪（1211）$120只係合理區，未到平宜。

2） 騰訊（0700）和港交所（0388）現價依然略貴，回到1成倒才算合理區。若要平宜，要回3、4成。

3） 阿里巴巴（9988）和京東（9618）2隻都係有質素，前者會較平穏，後者會較高潛力。

4） 組合維持10隻左右，會較理想。

其實優質股最好長線持有，"賺一倍放一半"純粹係比不懂定平貴，或較保守投資者用架策略。

你所講架股票都有質素，適合年青至中年人士。若你資金不多，可以考慮盈富（2800）、安碩恒生科技（3067）這類ETF。

或者等集中翻，只投資個別行業中最優質個隻，去減少股票數量。

------------------------------------------------

Q20927：

Hi成哥！投資新手想問月供盈富基金（$500）同安碩恒生科技（$500）可以嗎？

點睇美股？邊隻有增長空間？
謝謝你！

龔成老師︰

可以，這個組合有一定增長性，適合年輕到中年人士。

但長線計，你最好加大佢地供款額，否則月供成本會太高，拖低長線回報。

我自已無研究開美股，比唔倒建議你。如果你不太懂選擇美股，可以投資相關ETF。好似Vanguard標普500指數ETF〈VOO〉，是追蹤標普500指數的ETF，有投資價值。

------------------------------------------------

Q20928：

阿sir, 點解1475,個市升佢又跌, 個市跌佢又跌...
本質唔差架個企業, why 呢? thx

龔成老師︰

首先，個別股票走勢，唔一定會同大市一致。

而且，唔好太集中係中短期股價波動。佢下跌原因不一定是本身質素出問題，可以其他原因。只要長線質素無變，中短期波動我地唔需要理會，長線持有就可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差，但比較大的問題，是增長慢，發展潛力不算強，所以只能視為平穩增值類別，不要對潛力有太大期望，長線持有係可以。

------------------------------------------------

Q20929：

老師，多謝你上次既回覆！我參考完加上平時睇你fb，最近建立左個組合，想請教下你意見！

A)背景
28歲，月入3萬多，每月可儲$12000, 可動用資金尚餘大約40萬。

B)現持有
平穩增值:
00003香港中華煤氣 [email protected]
00270粵海投資 [email protected]

潛力:
1448福壽園 [email protected]
1686新意網 [email protected]
3067安碩恆生科技 [email protected]
9988阿里巴巴 [email protected]
3319雅生活服務 [email protected]

收息:
0778置富 [email protected]
0435陽光房地產 [email protected]

亂買買錯：
02131云想科技 1000@11

C)計劃
月供(準備下星期開始):
$4000 2800盈富
$4000 3067 安碩恆生科技

每月另儲

1. 想問下夠唔夠平均？洗唔洗加多d平穩增值類？房地產類會唔會太多？

2. 我本身對1928金莎 2318平安都有興趣，但金莎未買就突然升左6蚊，呢兩隻係咪適合放入我既組合？

記得你講過每人最好只持有5-10隻股票，如果要加入應該捨棄邊隻呢？同想請教合理價係幾多？

3. 云想科技 係當初乜都唔識時玩下亂買既，前一段時間老師有提醒過有風險，小注可先持有。其實前排已想快手放左佢，但因為工作忙完全冇時間睇，錯過左時機。見佢由買入既$11跌到宜家$7.65，都真係好掙扎下

唔知及早止蝕定等待長遠發展好。

龔成老師：

1）以你的年齡，平衡度無問題。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

因此，你持有的煤氣（0003）及粵海（0270），你不用加注，持有就得，始終佢地偏向收息。增長力不強。

至於你的月供計劃，可以進行。

2）我相信以你的年齡，銀娛（0027）會較適合你（因為佢增長力比金沙強），現價合理區中上部，你可考慮月供。

至於平安（2318）適合你的，現價合理。

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

3）雲想科技（2131）不是劣質，佢業務都有發展，不過就較波動，不適合持有太多。

佢係中國的短視頻營銷解決方案供應商，以及集中於泛娛樂的線上內容服務供應商。

如果按短視頻廣告所產生的總賬單計算，們為中國第三大線上營銷解決方案供應商，市場份額為3.4%。佢亦有透過其花邊網站及其移動端統稱「花邊平台」運營一個泛娛樂內容平台，向互聯網用戶展示引人注目的泛娛樂文章及照片。

睇翻佢營運模式，佢主要通過向廣告主及廣告代理提供線上營銷解決方案，包括用戶流量獲取、廣告素材製作及廣告效果優化；及花邊平台向廣告聯盟及廣告主提供的廣告位產生收入。

佢與多家網路平台維持良好的關係，包括中國六大短視頻平台，例如抖音、快手、西瓜視頻、抖音火山版及騰訊微視，以及其他領先的內容分發平台，包括小紅書及趣頭條。

佢客戶主要包括廣告主及廣告代理，以及第三累計方廣告聯盟及廣告主。

過往的生意與盈利增長快速發展正面，長遠相信有發展，不過估值都唔平。

另外，這股業務變化較大，佢可能發展得好勁，但如果出現一些行業的不利情況，佢可能變到好差。因此本身風險較高。

佢是有風險，有潛力的類別，這類股不是不可投資，但要明白股價波動，同時小注投資好了。

------------------------------------------------

Q20930：

龔成老師你好﹐我已經29，有一位兩歲小朋友。

我們開始了投資股票，現時手上有
9988 @250.6 X 100
1928 @33.8 X 400
1810 @ 31.5 X 400
2158 @ 65.1 X 200
0305 @ 2.75 X 10000
1448 @ 7.89 X 1000
2382 @180.9 X 100

你經常建議的長線投資策略，至少要5年或以上。如果希望3-5年能升值至100萬，有機會嗎??

老師可有建議，由於我有太多想法，但總是礙於能力和金錢上，除了投資股票外

上年還開始了網店（想作小孩和寵物方向的買賣），但總是提出很多疑問

令自己卻步（例如貨物不比別人優秀、沒有方向感從那裡進貨、希望有自己的手作出品，但方向又是濛糊），但時間就不等人，驚覺浪費很多時間在想方向，但始終都找不到答案。

平時見老師給大家意見很正面和有意思，希望可以得到一些啟發。

龔成老師︰

創業方面，如果你無頭緒，可以參考一些較成功架網店。了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

同埋，最好唔好做得太雜，要專注在某一範疇，等人容易記得你。

其實，創業的最大關鍵，就是「做」。

你只要去做就得，市場好多時都是試出來，當你不斷試不斷改進，就會有機會成功，唔好想太多，要做就做！

小孩和寵物方向，都有市場，你定位清楚D就得，最初不斷試，找到市場就集中發展。

至於持股方面，你主要係潛力股，佢地雖然有增長潛力，但同時波動風險都唔細，故不宜持有太多。

未來，你可以集中翻D係平穏增長股，令組合更平衡。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

另外，醫渡科技（2158）整體係有質素，但由於佢未有盈利，個估值都係市場估估下。如果發展不似預期，有機會出現較大調整。此股唔係唔可以投資，但緊記暫時不可大注。

五菱汽車（0305）質素算中等，業務都不算差，潛力度有的，但同時都有風險，故同樣不宜太大注。

以恆指過去年平均回報10%計（連股息再投資），要做到5年100萬，除了以上持股外，你最少每月投資$12000（直接買股或月供），才有較大機會做到。

------------------------------------------------

Q20931：

本人現況是三人家庭，我同先生係80後，家庭收入約5萬頭，計劃生多一個小朋友。

14年尾購入實呎約350呎藍田居屋（已補地價），想賣出換約500-600呎單位，如賣出，
手持大約200萬。

由於我是公務員，想先賣出現單位，排公務員隊抽居屋，成本低啲，較乎合預算。

計劃賣出後，先租待抽到再買，但有機會等數年。

請問上述操作會否冒險？

賣樓後現金買優質增長股是否較好（投資初哥，正努力睇書學習）謝謝！

龔成老師︰

若你賣出現有住所，就等同沽空樓市。雖然透過這個計劃買自住居屋，成本較低，係好事。但我地唔會知在你排到綠表資格前，樓市係升定跌。

苦果升得好利害，比你用優質股增值仲要快，你換樓成本反而會增加。而且，中間架租屋成本，都係一個變數你要考慮。

另外，我唔排公務員隊抽居屋的機會率高低，如果小過一半，就唔值得博。如果高過一半，你就要考慮我上述所講的風險，自己是否承受。

一般情況，較理想方法係應該保留現有物業。同時間，新資金就投入優質股做增值，令到時換樓會有更多本錢係手。

但我明白公務員申請綠表資格，係必需無物業在手。如果你要決定落實此計劃，建議你用200萬增值時，投入較多係地產類別股份，令資產跟樓市較為同步，去減少樓市變動造成架風險。

------------------------------------------------

Q20932：

老師，你好，本人現在將近30歲，已婚，二人月入約8萬
2年幾前購入一個單位自住月供約萬8
扣除其他必要開支兩人約可儲蓄2萬5至3萬

現在港股持倉約50萬

其中約一半為較高潛力股票（1177，1211，1810，9618，9988）

其他則為比較穩定嘅藍籌股
另外約有90萬做緊定期有5％利息

想請教一下老師幾個問題：

1. 每月可以儲起個筆錢會否建議全數投資落股票？

2. 因為定期已經有穩定利息，會否建議再增加潛力股之持倉百分比？有否推薦購入那隻股票？

3. 如果將來計劃生育儲蓄計劃應如何作出改變？

4. 比亞迪曾經於260落過車，後來因自覺落錯車於24x重新上車，雖然覺得此舉似乎做錯，但現在是否應選擇繼續持有？而在來年應否再增注？

5. 如果預計未來人工不會大增而又需要繼續供樓情況下，40歲能否達至財務自由？

6. 如果未來想再買樓投資有無推薦？
感謝老師

龔成老師︰

1） 現時大算未平，只係合理區。每月儲蓄一半月供，一半儲起等機會，咁會較好。

2） 定期有5%，要睇你是外幣、港幣、還是有特別限制或條件，如果港幣有5%這是有吸引力的，部分資金存於這裡可以。但相較恆指及其他優質股，平均年增長8-10%都係少，對需要財富增值年齡的你，唔係咁合適，因此都唔會太多。

長線計，你應將定期資金，慢慢投入有增長力架優質股，咁會較有效率。

3） 你可以照月供先，到你生育時候，才按實際情況，調整月供投入金額。

4） 記住唔好估走勢，你以為佢見頂，想先沽貨，平D再入番。但最終佢機會係一直升，令你進退失據。

比亞迪（1211）有很高質素，現貨可持有。至於入貨，現價明顯偏貴，最好等到$120左右，才出手，起碼都$150。

5） 財務自由，每個人定義都好唔同。有人想退休後，年年去幾次旅行。有人想平淡咁過生活，所以這個好睇你個人。

簡單咁講，以恆指過去年平均回報10%計（連股息再投資），你每月投資$25000 + 現有投資和資金（共140萬），10年後大約會增值至800萬。

若你將這筆資金，投入收息資產，以5%計，每月可為你產出3.3萬現金流，去支持從工作退下來架日常生活開銷。

6） 除左鄰近商區地段，好似中環、東九。你都可以留意一些潛力較高地區，好似堅尼地城、大圍、黃竹坑等。

------------------------------------------------

Q20933：

想請教老師我持有909明雲源.47入，重注，因今個月中是6個月禁售期解禁，股價會否下調很大，我是否要在禁售期前趕快沽出？
感謝老師

龔成老師︰

要緊記一個重點，我地投資係長線，所以著眼點一定係睇佢企業本質和行業前景這類因素。

禁售期，跟佢本質無關，我地唔應將佢放係考慮之列。而且禁售期過後，只代表相關股東可以將之前配股時購入之股票出售（但唔代表佢一定要出售）。

但如股東真係出售，可能對股價造成短期波動。但我們投資著眼點應該是企業質素，故此解禁其實對公司無任何實質影響。

明源雲（0909）主要透過合約安排在中國為房地產產業提供軟件解決方案。

此股上市不久，沒有太多有用數據可以參考。因為好多上市公司都要2年才會見真章，故此刻估值唔易。

初步用佢2019年盈利2.16億計，市值郤去到740億，絕對唔平。只能說，投資係可以，但絕不能大注。

以你現時情況，你必需慢慢沽出部份持股，去降低風險。

------------------------------------------------

Q20934：

成哥你好！本人48歲！由於爛玩爛賭！月光一族！沒有儲蓄！但現在已清醒！

想的起心肝儲錢遲嗎！？本人月入4萬！扣除衣食住行開支，可儲15000！

想問一下以我年紀現在以15000應該選擇月供那幾款股票好呢！？謝謝！

龔成老師︰

有心唔怕遲，只要你現在開始認真去做理財和財富增值，依然可以做到一定效果。

係投資增值策略上會用「先增值，後現金流」方法，初期投資較有潛力股票，去做財富增值。

記住，我地投資不是賭錢，是「儲優質股」，成為我地財富組合其中一部分。

到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時人生階段計，依然有一定增值空間，但同時間策略要保守少少。你先用每月5成儲到的錢做月供，其餘先儲起，用一邊月供一邊儲蓄的策略。

選股上，以年紀你可以集中投資在平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、長建（1038）、粵海（0270）、領展（0823）。

如果你對這些股票，唔係咁認識。你可以集中盈富基金（2800）先，佢係包括55間質素不錯上市公司股票的組合，係一個唔錯架選擇。到你有一定能力，才買其他我建議的股票。

而儲下的另一半現金就等機會，當大市出現較大回調，就加大力度掃貨，然後作長線投資。

------------------------------------------------

Q20935：

老師好，想問下我現有的股票，分配得夠唔夠平均嗎？謝謝老師

月供方面, 仍然進行中：

2800（供3000）；2388（供1000）；788（供1000) ; 2382(供1000）；1810 （供1000）

另有股票如下：
3988 （31000股）；2238（2000股）；
2388 （1000股）；9988（100股）；6 （1000股）；788 （8000股）；2018（500股）；3067（400股）；1398（5000股）；1810（1000股）

龔成老師：

上述持股，都有質素的，基本上可以持有。

至於平衡度足夠的，在同一行業裡，見你銀行股有點多，你要注意翻，同一行業最多佔組合比例30%已是上限

另外，你都要留意組合與年齡是否配置，我見你組合「收息股」「平穩增長股」「潛力股」都有。如果你是年輕人，收息股就不宜太多。如果年長，潛力股就不宜太多。

整體上，組合無大問題。

你最好在月供同時，留有基本的現金，當面對跌市時就有資金買平貨。

------------------------------------------------

Q20936：

龔sir，想再請教一下，現時我32歲，月入4萬5，定期有160萬，收息基金76萬（每月息再投資，現金的話等於4000左右），股票就係

恒大汽車$57.75@500
信達生物$91.225@1000
美團$411.2@200
保利協鑫$2.86@5000
恆大物業$15.86@500
海底撈$73.1@1000
中銀$3.4554@13000
恒生銀行$182.1@200

如果我想5年內買800萬左右樓，請問應該點做可以增值得好d？以上股票組合我需要調整嗎？

同埋我d定期一直定落去還是羅岀黎再投資好？
麻煩你。

龔成老師：

如果你打算5年買樓，其實可以善用這幾年去進行財富增值，投資股票可以，到接近買樓的一年，就開始適度套現，準備資金。

你可以投資平穩增長股，小注潛力股，利用這5年時間去增值。

現時持股，恒大汽車（0708）信達生物（1801）保利協鑫（3800）恆大物業（3333）都是較高風險的股票，你小注持有好了。

至於恆生（0011），只是收息股，又唔太適合你。

另外3隻問題不大。

至於現時的現金，你應該更有效利用。至於收息基金，其實未必適合你，因為你的年齡，以及投資目標，其實應該「增值」。

你如果要5年滾存$800萬並買樓，其實有2個方法。

第一，現時投資細價樓，同時並行投資股票，到5年後轉為大價樓。

第二，全部利用股票增值。

我建議你睇《5年買樓4部曲》，你睇完後會更具體知點做。

------------------------------------------------

Q20937：

你好！還有問題想問吓，本人還持有一些股票，可以幫忙看看，應該繼續持有定溝貨定買出！謝謝

2389，72000股，成本價1.103
8153，80000股，成本價0.225
8158，10000股，成本價11.475
139，210000股，成本價0.026
以上都係放了6年以上

還有最近入了以下幾隻
285，5000股，成本價49
1810，5000股，成本價24.2
968，10000股，成本價15.6
981，5000股，成本價25

我都知以我以上股票都不是平行組合，希望呀sir可以多多幫忙，能夠做一個分析！

之後有機會過黎澳門開班，再跟呀sir學嘢！
謝謝

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

北控醫療健康（2389）業務有向下情況，建議減持。

法諾集團（8153）中國再生醫學（8158）中達集團控股0139）質素都不佳，建議賣出。

至於最近買入的股票，有質素，可長線，但全部都是近期較熱炒的類別，你這樣會出現集中風險。建議你加入其他優質股，平衡翻組合，例如盈富（2800）、港鐵（0066）、領展（0823）。

------------------------------------------------

Q20938：

龔sir, 請問我幫小朋友儲起左利是錢約5千多元，想幫他投資3067，睇中3067原因是佢每手唔貴，而小朋友咁細個承受風險高啲，由細開始儲，需然無息收，但儲番7~8年都應該有唔錯效果....

還是應該同小朋友投資435陽光房地產有啲息收可以?

睇完你之前的post(賣樓好定加按好)及大富翁, 更加令我想將層樓套現約30萬再設定收息組合，待樓價跌再買多層，但我case係未供完樓

仲有120萬先供完，會唔會唔適合用以上方法呢？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你可以不斷投資3067幫小朋友儲錢，長期進行，但要留意，如果組合100%集中3067始終有風險，因為這是潛力型基金，建議久唔久，加入一手盈富（2800）你組合會更加平衡。

因此，2800+3067是較適合你配置，至於比例，就要睇你的風險承受能力及投資目標。

加按套現投資，的確可以提高創富速度，因為現時按息低，只要爭取到比利息回報更高的回報率，就值得做。不過，加按原理是增加負債，我會建議有「明顯機會」才做，而不是為做而做。而這刻未見有明顯的投資機會。

------------------------------------------------

Q20939：

龔成sir，我打算月供股票如下
如果月供$7000

778，1448，823，1810，1177，3033/3067，2800，1928 我應該怎樣分配呢？

1810 本身已經有1200股，$29.5

龔成老師：

上述都是有質素的股票，至於點配置，好睇你年齡及風險承受程度。

如果是年輕至中年，可考慮2800+3067作為核心。然後再加上其他股去月供。

想潛力度高D，就供1177、1810。

如果想平穩增長，就考慮1928、0823。

如果本身年長，就考慮月供收息股。

另外，現時大市波動，要一邊月供一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20940：

老師，想問下關於買樓方面

我有首期 供樓都供得起 不過現時香港租金回報率唔高 供樓仲要供30年 就算出租

租金都要用返黎供樓 難有正現金流 買樓都係賺長期既樓價升幅 雖然話長期樓價必然上升 但係會升幾多都真係預計唔到 見到有人會寧願買REITS 你會點睇買樓vs REITS 呢？

REITS既好處係門檻低 又唔洗處理租務問題 又可以隨住樓價升而上升 每年又有息收

其實多唔多人會用槓桿買REITS 取代買樓呢？

最後想問按揭方面 因為依家係受薪人士所以依家做按揭應該唔大問題 但係如果之後幾年變成自僱人士 或者想停一段時間唔做野休息下

會唔會影響到我係受薪時候做既按揭呢？
謝謝！

龔成老師：

香港樓，自住的價值有的，始終香港樓有一定的自住需求。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

但如果講投資，這刻就唔算好高，租金回報率去到3%。不過，部分投資者買樓投資原因，是因為按息低，現時按息約2%，租金回報率仍高過按息，產生息差利好因素。

但從整體的投資價值，這刻香港樓的確唔算高，如果我有一筆資金打算投資買樓vs REITS ，我會選REITS，回報率較好。

如果你現時有固定收入，買樓按揭當然會較簡單，當銀行這已批了，你之後的收入情況，已經唔關事，只要你準時供樓就得。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。