[gfmurmur9626] 想回應返 #gfmurmur9606， 我完全明白你感受！ 小妹26歲，一直都鐘意男，第一段同初戀一齊左5年，但最後因為大家對結婚有唔同想法而分開，去到大學同左一個女TB（簡稱m)一齊，惡夢就黎啦⋯ 我同m一齊左無耐就畢業，一齊時在班上我都算多人追，唔知係咪因為咁佢最鐘意用心理戰打擊我自信心，例如成日同我講班上既人背後話我性格唔好。 平時出街m會話我著衫好核突，又同我講啲同學叫佢教下我點著衫，因為我鐘意買葵廣啲無牌子衫，佢好鐘意買名牌，令到我好無自信：佢亦都成日會講，我唔係班上最靚果個，性格最好最靚果個係另一個女仔。 有時m會上我屋企瞓，有啲生活用品就黎用完我會加水或慳住用，佢就會話我cheap，話佢比錢買過，叫我唔好加水，但我只係唔想浪費⋯有時我鐘意邊在家砌野邊聽歌哼歌，佢就會話我唱歌好難聽，好似鬼叫，又話都係聽返佢果啲歌⋯ 而畢左業後m唔比我同任何同學有聯絡，因為佢話啲女同學「成日發姣」，出黎聚舊成日都會講男仔，邊個靚仔邊個大隻，所以唔比我出街，亦因為咁我同同學無哂聯絡。 大家各自有工作，m成日同我講做野果度好多女仔問佢拎電話同埋話佢型，令到我覺得佢好似好多選擇我又唔係最好，所以無哂自信⋯ 最唔開心係，同佢搞野果陣，佢做完會同我講，「你同之前果個成日搞野，我覺得你好嘔心」，令到我好無奈又唔開心，覺得自己唔夠純，令佢嫌棄我，但又改變唔到過去。 仲有好多好多，一有少少野佢就會發哂脾氣，見到我online whatsapp但又無覆佢（其實我做野好忙要覆老闆，覆完又繼續工作，真係無時間覆佢），m就會發脾氣，因為咁鬧左好多次交。就算我靜靜係屋企砌砌圖，佢都可以突然發脾氣話要走，下下有任何事唔順佢意都會以分手威脅，又或者出出下街一走了之，要我求返佢返黎；亦曾經因為我請求佢批准同同事出街（有男有女），佢話比，但又係ig post story講「唔好再做傻仔」「習慣就好」，令到全部我地既同學都覺得我地成日鬧交。 M又試過同我講知道左我同左另一個男仔一齊左，我聽到一頭霧水，問佢邊個講，佢話識我同事，我有同事講左比佢聽，我問左好耐都唔知佢講咩，最後先知原來佢扮識我同事黎測試我反應；有次瞓教佢偷睇我密碼開我whatsapp睇同同事既公事對話，跟住質問我點解會pm一個男仔（講緊公事做file既對話），又喊又要我ig刪哂啲男同事⋯ 到最後一齊左4個月我忍唔到落去同m分左手，佢就日日凌晨兩點打黎話係街飲酒，話「生存唔到落去」，我同佢講可以做返朋友，到我同左下一個一齊，佢用個2字頭電話打黎發現有男聲，跟住就block哂我所有野，仲同啲同學唱我係出軌，又不斷約返啲同學出黎敍舊，將我地啲野唱通街，講到我錯哂咁⋯我果刻真係百口莫辯，因為已經無聯絡加上咁樣，我更加唔敢搵返啲同學出黎澄清⋯以後我都驚左同女仔拍拖，之後都有tb追過我但我都耍手擰頭⋯ 到而家慢慢有啲有分析力既同學都有同我聯絡返，我先知佢地無講過我是非，好多野都係佢作出黎。最近我嫁左比個好老公，日日捧我捧到上天，就算我肥左好多（幸福肥啦🙈）佢都成日同我講我唔肥，每日都會讚我好靚好賢淑，我亦都好珍惜佢，係佢令到我發現原來拍拖唔需要咁卑微，原來可以咁幸福比人捧係手掌心、當寶貝。 所以真心的，如果有個踩低你去建立自己自信既另一半，係時候清醒！你絕對值得更好，亦都有能力搵過更好，而唔係日日都咁唔開心覺得自己係地底泥，呢啲都係佢做出黎既假象去留住你！你絕對值得比另一半錫！ ———𝐂𝐨𝐮𝐩𝐥𝐞.𝐦𝐮𝐫𝐦𝐮𝐫——— ♡投稿請按 @couple.murmur IG主頁鏈結! #hongkong #couple #lovestory #hkig #香港 #情侶 #香港情侶