我越獄了（下） . 點知，就彈出付費版面，取消廣告要畀錢，唔平得過官方Apps。 . 免費模式下，我只可以選擇廣告時段係日定夜，我唯有揀夜晚先播廣告。 . 自此之後，每晚我都被逼睇「顛覆視野攝影公司」嘅廣告，有時係Banner，有時係一啲新嘅攝影作品，喺我嘅視角膜度播。 . 有一次，佢哋影咗一條蛇，我就突然見到一條栩栩如生嘅蛇，360度咁圍繞我，真係好恐怖。 . ， 好彩「健康安全衛士」無廣告，默默咁掃描。 . 幾日後，終於顯示掃描完成。 . 「檢測到你體內有755個威脅及多餘內容。」 . 「乙型肝炎病毒對身體有害，是否要刪除？」我好開心咁撳「確定」，嘩，醫藥費都慳番。 . 之後出現咗一堆病菌同病毒名，我當然刪晒。 . ， 「偵測到你的智慧齒為多餘內容，是否要刪除？」慳番剝智慧齒嘅錢。 . 「偵測到你的盲腸為多餘內容，是否要刪除？」雖然我目前無盲腸炎，但盲腸都無用，刪埋都一勞永逸。 . 我撳「確定」撳到手到軟埋，見到「健康安全衛士」咁靠得住，而且仲有七百個內容，我乾脆撳「一鍵刪除」。 . ， 刪完之後，四隻智慧齒消失，但突然間，我個肚開始痛。 . 我開番個Apps嚟睇，原來有行細字寫住：「刪除威脅及多餘內容時，可能會觸動部份神經，引起短時間的疼痛，屬正常現象。」 . 哦，即係痛一陣就無事。 . 但我都係唔放心，就搵番記錄出嚟，睇吓刪咗啲咩。 . ， 一切正常，直到我睇到呢句：「偵測到你的腎臟有50%為多餘內容，已經刪除。」 . 咩話？我知道人有兩個腎，唔係100%都使用中，所以先可以捐一個畀人。 . 但咁唔代表，我想刪除一個腎嘛，點知會唔會有咩副作用？ . 我寧願賣腎，都好過無聲無息咁無咗。 . ， 我怒氣沖沖咁去診所，質問到底發生咩事。 . 護士檢查後話：「的確刪咗你一個腎，呢個算係『健康安全衛士』嘅Bug，我哋會記錄低。」 . 我即刻問：「咁我個腎呢？點樣先可以復原？」 . 「對唔住，呢個Apps暫時無復原功能，但我哋會記錄低你嘅意見。」 護士又講：「越獄前，你簽嘅免責簽明，有寫明我哋嘅Apps仲處於測試階段，我哋只可以幫你刪Apps，唔負責處理Bug。」 . ， 我的確簽咗免責聲明，但我白白無咗個腎喎，都唔知第日有咩副作用，點可以就咁算數？ . 我喺診所度哭鬧，死都唔肯走，我估佢哋始終係地下診所，唔想鬧大件事嘅。 . 無幾耐，有個醫生行出嚟，話幫我處理呢個問題。 . ， 「唯一嘅辦法，係幫你嘅身體開放『終極越獄』權限，你獲得身體所有控制權，心想事成，甚至唔駛安裝Apps。」醫生咁樣講。 . 我問：「即係我諗一諗，個腎會生番出嚟？」 . 醫生點頭：「唔止生番個腎，你想改變身體其他嘢，都係諗一諗就得。」 . 「『終極越獄』有咩Bug或者副作用？」我唔係好放心。 . 醫生沉吟咗一陣：「雖然仲處於測試階段，但有『終極越獄』權限， 比如你諗錯嘢少咗隻手，下一秒你再諗過，就生番隻手出嚟，意念夠強，副作用唔成問題。」 . ， 我睇清楚合約，的確係醫生所講咁樣，就同意搞「終極越獄」。 . 手術時間好長，完成手術後，我即刻諗「我要生番一個腎出嚟」。 . 然後，我腦海中瞬間彈出無數條訊息。 . 大腦：「收到要求生成腎臟，是否要聯繫腹腔神經叢、主動脈腎節、第一腰部內臟神經、主動脈神經叢？」 . 輸尿管叢：「請作出連接指令。」 . 呼吸系統：「血氧飽和度稍低，是否要加速呼吸肌？」 . ， 突然間有咁多訊息，我頭都痛埋。 . 痛覺中樞：「感到疼痛，請儘快處理。」 . 大腦皮質：「收到神經疼痛指令，是否控制聲帶呼痛？」 . 仲有無數條訊息，有啲要撳「確定」或「取消」， 有啲要輸入指令，好多訊息我都唔明，而且不斷彈出新訊息，我都處理唔切。 . ， 原來人體內有咁多複雜嘅指令，如果我處理唔切，會唔會血液運行唔到，或者大腦缺氧而死？ . 我好慌張，唔再諗「腎臟重生」，我只剩低一個念頭：我要生存落去。 . 我要生存！ . 生存！ . ， 諗吓諗吓，彈出嘅訊息真係愈嚟愈少，我鬆一口氣。 . 呢個時候，我發現有啲唔妥，好似成個世界都漸漸改變緊。 . 我聽到護士驚叫：「醫生，佢發生咩事？」 . 醫生答：「噢，睇嚟佢處理唔晒『終極越獄』後嘅權限。」 . 護士又問：「佢睇落好唔妥喎，佢會唔會死？」 . ， 「睇依加嘅情況，佢漸漸退化緊，刪除處理唔到嘅功能，可能會退化成只為生存嘅單細胞生物。」 . 「人可以變做單細胞生物？」 . 「正常嚟講唔得，不過，佢獲得身體嘅『終極越獄』權限，可以控制每一條血管每一條神經，就係另一回事......」 . 之後嘅說話，我唔再聽到，可能係聽覺功能已經被刪除。 . ， 我點解會搞成咁？點解要咁急嘗試，未被官方認可嘅越獄？ . 因為等到越獄被認可後，就會愈嚟愈貴，就好似官方Apps咁，我安裝唔起。 . 所以，當我知道呢間地下診所嘅存在，我以為自己係被選中嘅幸運兒，發現咗啲一般人唔知嘅捷徑，可以迅速走向人生巔峰。 . ， 行大路，我輸在起跑線，唔夠其他人跑得快，我開始搵捷徑。 . 但原來，人生中，有好多睇落係捷徑嘅路，都係陷阱。 . 如果真係捷徑，邊輪得到我行。 . －完－ . #小說 #短篇 #故事 #tomatochan #陳美濤 #我越獄了

我越獄了（上） . 2070年，我已經喺呢個城市，工作咗兩年。 . 兩年前，我由鄉下嚟到五光十色嘅城市，心中充滿對未來嘅期待。 . 但係，做咗兩年嘢，我愈嚟愈灰心。 . 城市嘅人，好似每一個都比我更聰明、更敏捷，無論係升職定追女仔，我都係競爭中嘅Loser。 . ， 呢一晚，同事阿愁同我一齊飲酒。 . 阿愁，顧名思義，佢成日都好唔開心，唔開心嘅原因同我差唔多，佢條件唔好，覺得自己樣樣嘢都比唔上其他人。 . 同病相憐，我哋就做咗好朋友，共患難......無富貴。 . 但係，今晚阿愁好開心，眉目間都係掩不住嘅笑意。 . ， 我隨口問：「做咩咁開心？追到女仔啊？」 . 「唔係，不過遲早有。」 阿愁神秘兮兮咁講：「我一次過安裝咗幾個Apps啊。」 . 十年前，市面上推出為人體安裝Apps嘅服務，同手機裝Apps差唔多，只不過唔係去Apps Store，而係去醫院安裝。 . Apps嘅內容五花八門，記憶、才藝、減肥、美容咩都有，但價格貴得離譜。 . 安裝「熟讀唐詩三百首」呢種冷門Apps，已經要我兩年嘅人工。 . 其他熱門Apps，例如「提高脂肪代謝」、「減少皮膚出油」、「提升記憶效能」，就更加係我負擔唔起嘅天價。 . ， 所以，結果係，富二代幾乎安裝晒所有Apps，贏在起跑線； 一般人家儲吓錢，或者可以幫仔女安裝幾個需要嘅Apps。 . 從此，懸殊嘅唔止係貧富，仲有智商、學識、相貌，甚至皮膚出油嘅程度。 . 我呢種無背景、無儲蓄嘅鄉下仔，無得安裝Apps，永遠都會輸。 . ， 不過，阿愁都好窮，點解佢突然有錢到，可以安裝幾個Apps？ . 哪怕佢安裝嘅Apps，都係「唐詩三百首」、「腳趾增長五毫米」呢種冷門Apps，都唔係佢負擔得到嘅價錢。 . ， 阿愁猶豫咗一陣：「你係我最好嘅朋友，呢個祕密，我剩係話畀你知。我前排去咗一個地下診所，將自己越獄咗。」 . 「越獄？」我唔係好明。 . 阿愁答：「即係Jailbreak，或者講Root，同手機差唔多，解除原廠限制，獲得身體嘅所有權限。」 . 「所以？」我都搞過手機越獄，但人體越獄真係無聽過。 . ， 阿愁解釋：「我哋只可以安裝政府通過嘅官方Apps，又貴又提升得少；越獄後，就可以安裝非官方嘅Apps......」 . 原來，阿愁去嘅地下診所，唔止提供免費越獄， 因為喺測試期中，所以提供好多私人公司研發、安裝價極低嘅Apps。 . 我問阿愁：「咁你裝咗咩Apps？」 . 「第一個係，我依加識講世界各地嘅粗口啦。」 阿愁得意洋洋：「幾咁有型。」 . ， 遇到呢種千載萬逢嘅機會，阿愁居然用嚟安裝啲無謂Apps。 . 好彩，呢個機會俾我發現咗，我絕對唔會浪費！ . 我一定會揀最有用嘅Apps，令我升職加薪，變得靚仔迷人，短期內走上人生巔峰。 . 我問阿愁拎咗診所嘅地址，好快就去咗診所。 . ， 手術後，我就越獄成功。 . 護士畀咗張Form我，係診所目前可以提供嘅Apps價目表。 . 雖然比官方Apps平好多，但可以提升工作能力嘅Apps，價格依然令我有啲心痛，未至於畀唔起， . 但呢間診所來歷不明，萬一個Apps用咗一陣就出問題，我咪好蝕底？ . 於是，我揭去「免費試用」嗰一頁，揀咗兩個Apps。 . ， 一個係「顛覆視野360度視角」，由「顛覆視野攝影公司」贊助，從此睇嘢就可以360度，等於有後眼，相信反應都會更敏捷。 . 另一個係「健康安全衛士」，係一個身體殺毒軟件，自動檢查身體健康，作出提示， 仲可以選擇刪除有害嘅嘢，至少都慳番身體檢查費用。 . ， 安裝後，我嘅視角達到一個新嘅高度，根本唔駛轉身，就可以睇到後面嘅嘢，感覺好新穎！ . 至於「健康安全衛士」就顯示「掃描中」，需要時間去掃描我嘅身體狀況。 . 我好滿意咁返咗屋企，一夜好眠。 . ， 第二朝起身去廁所，我突然眼前一黑......唔係，係眼前一白，差啲跌咗落廁所。 . 仔細一睇，係一條廣告Banner：「顛覆視野攝影公司，給你顛覆視野的攝影。」 . 咦，咪就係贊助「360度視角」嗰間公司？佢居然喺我隻眼度落廣告？ . 雖然話贊助商有廣告好正常，但廣告突然出現，遮晒所有視野，仲要360度咁飛嚟飛去，好影響生活㗎嘛。 . 我調出「設定」版面，選擇「無廣告」。 . 點知，就彈出付費版面，取消廣告要畀錢，唔平得過官方Apps。 . 待續... . #短故 #短篇 #小說 #陳美濤 #廣東話 #粵語 #tomatochan #我越獄了

立即Follow @businessfocus.io 【免死金牌】360公司年會特獎加入「免裁券」！獲獎者可抵銷一次裁員⠀ .⠀ 360公司兼董事長兼CEO周鴻禕日前發佈朋友圈透露，今年360公司年會抽獎環節將加入「非常特別」的抽獎獎品，就是「免裁券」。顧名思義，獲得「免裁券」就如獲得一次性的免死金牌，能夠抵銷一次裁員。⠀ .⠀ 根據周鴻禕發佈的圖，「免裁券」將成為360公司年會的特等獎獎品。圖上明確標示該券的有效期限和使用方式。抽中者如在2020年1月1日至12月31日期間不幸被裁員，就可使用「免裁券」讓自己逃過一劫，有效期限為一年。「免裁券」僅限本人使用，抽中者不得進行暗網交易。⠀ .⠀ 「免裁券」讓外界懷疑360公司今年或將進行裁員計畫。但消息傳出後，360公司回應稱，公司方面並沒有裁員計畫，「免裁券」只是為了鼓勵大家創新，不要害怕犯錯。⠀ .⠀ 360公司（全稱：三六零安全科技股份有限公司）成立於2005年9月，為中國最有名的網絡安全軟件之一。旗下產品包括360安全衛士、360殺毒、360安全瀏覽器、360搜索等業務。⠀ .⠀ Text by BusinessFocus Editorial⠀ .⠀ #BF職場熱話⠀ .⠀ #money #investment #business #finance #life #startup #startups #management #company