【龔成問答信箱】（Q21161-Q21180）

Q21161：

你好，我今年29歲，上年買左樓，但發現買完樓供樓就就開始儲唔到錢。依家戶口剩番1萬，月薪33000，供樓17000。

想請問如果想要開始供股，我應該點擺放好？人到30覺得再甘落去都唔係辦法？希望可以比到意見，另外我都開始睇你既書，80後百萬富翁，多謝你

龔成老師：

其實你已置業，都是財富配置的一部分，只要你之後應該慢慢累積翻股票。

第一，你現時要留現金，因為你現金數目太少，同時你有物業，有負債，你一定要有一些備用現金在手的。因此唔好太急買股票。

第二，要提高收入，要錢滾錢，就要有本金，你現時無本金，如果想突破，就一定要提高你的收入，你29歲，是事業的黃金期，現時職位的提升，轉工，兼職，小生意等，總之想方法增加長遠收入。

第三，減少支出，如果每月現時無錢剩，為了有初期的本金，都要努力減少支出一段時間，令自己有本金。

第四，努力學投資及投資，你現時是財富累積的黃金期，要好好把握，到你有一定的現金數目後，就可以開始投資，月供股票都得，如果能承受風險，就供一些潛力股，如恆生科指ETF（3067），如果承受風險度只是一般，就投資一些平穩增長股。

------------------------------------------------

Q21162：

1.想問老師點睇460同3800呢2隻股，我分別持有呢2隻股票，但見佢細價股，唔上唔落甘，是否有質數可持有？

2.現有5萬可投資

A.以現在市況，應耐心靜候等大跌市

B.定1手手入股，我心水買3868/968/3319
但以我資金買既量不多

C.月供股票？每個月3000甘月供會比較好嗎
謝謝老師給予意見

龔成老師：

1）四環醫藥（0460）好翻D，相信無之前咁差。

不過這股，2015年、2016年，曾經出現了核數師有「保留意見」的情況，反映盤數有問題，小心這股。

我對投資這股有保留。

保利協鑫能源（3800）業務不穩，質素中等。不過不是無增長，是有危有機類。

佢主要為光伏行業製造多晶硅及硅片；銷售電力；開發、投資、管理及營運光伏項目。

市場炒緊佢前景，但當中存有不確定性，股價大上大落，佢的確可能會大升，但同樣可以大跌，無得估，這炒作不少，現時值博率未算好高。

如果真的想投資，小小注好了。

2）你要留翻$2-3萬作備用現金及等投資機會，可利用$2萬去投資，如果你無太強投資能力，月供是較好的方法，建議你月供$3000。你可以考慮2800或3067。

------------------------------------------------

Q21163：

龔sir你好，有幾個問題：

1.388/1810/2382 那1隻做月供股票值博率會大的

2.另外想問968同1177的合理價應是？
謝謝老師回覆

龔成老師：

1）最好建立一個組合，這3隻都有質素，都可投資，月供長線無問題。

如果要選1隻，小米（1810）會較有潛力。

2）信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

你預$5-$8合理區。

------------------------------------------------

Q21164：

龔Sir你好，請問3333 丶371、1818丶270邊隻好啲？

龔成老師：

都是有質素的，不過風險度不同。

粵海投資（0270）是較穩健的一隻，這股正面的，這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

至於中國恒大（3333），就是上述增長力較高，但同時風險都是最高，佢業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，但如果只是小注，勉強可以，但都要明白風險。

------------------------------------------------

Q21165：

龔成老師，本人最近才學習股票，新手一名，最新關注到老師，亦很欣賞老師大方同用心分享，不知可否請教老師問題

本人持倉如下：
0288萬洲 持6500股，7.245買入、
1810 ，小米，持800股，26.35買入、
6993，藍月亮，1500股，12.82買入、
9988，阿里巴巴 200股，228買入

萬洲同藍月亮都大跌，不知應否繼續持有，怕會繼續跌，想請教老師會點處理？

或老師有其他建議給我嗎，十分感謝

龔成老師：

記住一個重要的投資概念，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

其實你持有的股票，都有質素，只要你買入價部分較貴，相信你未有企業估值能力，建議你日後多用月供或分注模式投資，不要一次過買入。

萬洲國際（0288）質素唔算差的，但潛力就不算強，只是平穩增值的類別。

有時你見肉價短期上落，都會對佢股價有短期影響，不過，我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。

這企業過往的生意保持平穩，業務基本上是平穩的，只是因貿易等問題，令股價較為波動，成為這股的風險。

投資這股，可說是平穩增長，以及收下息咁，不要對股價太有期望。只要持貨不過多，可持有。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，除非你持貨太多，否則暫時可以守。

至於另外兩股，都是無問題的。

------------------------------------------------

Q21166：

我股票市場輸晒成副身家，買窩輪狂蝕，請問呢排買咩可以追返？

龔成老師：

財不入急門。

我20年前，都有投資衍生工具，玩左幾年，輸足幾年，之後長線投資，就開始不斷賺錢。

你之後買翻優質股，長線投資，慢慢累積翻財富，看似較慢，但卻正確。

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q21167：

謝謝老師，供了2年多月供股，賬面現時升了29%多，人生第一個20萬好開心，期待第一個百萬～
31個月時間

股號@平均股票/佔全部既比例（$供緊既股票）
0003@$14.5/9% ($1000 )
0027@$55/13.5% ($1500)
0823@$75/12% ($1000)
2388@$28.8/6% ($1000)
2800@$27/16%
2638@$7.5/4.5%
1177 @$7.2/10%
1211@$51/29%

Q1: 想增加潛力股的比例，但現時我供的潛力股已到略貴水平，怎辦辦？

Q2: 現時現金不多，5位數字，每月只能儲9千，有些股太貴已停月供，月供數量同金額應否增加？還是照樣每月供$4500?

龔成老師：

太好了！

保持這個大方向就得，這是一個好穩健的累積財富方法，期待你得到$100萬後再同我分享！

1）現時的選股，都是有質素的，可長線持有，如果你年齡不大，你可以繼續月供潛力股，但就選一些相對無咁貴的，例如恆生科指（3067）。

至於你現時月供的4隻股，都有質素，可以繼續進行月供。

2）如果你現時現金的比例，少過財富佔比3成，就應該儲下現金先。如果有3成以上，就可以考慮增加月供。

------------------------------------------------

Q21168：

龔 sir 你好，我這個投資組合有$80萬貨：12、27、66、270、345、823、968、1810、2800

再加每月月供股票 3000盈富，2000 MTR, 能否在8年後滾存夠二百萬，比囝囝去留學用。謝謝

龔成老師：

現時你持有的股票，都是有質素的，假設每年增長10%（要將股息再投資），$80萬預期會增長到$170萬。

至於現時月供，每月$5000，每年$6萬，假設增長8%，8年後預期滾存到$63萬。

即是總數會超過$200萬，相信能完成你的目標。

你現時只要持有原有的股票，以及保持月供就得。

如果想進一步提高財富，就可同時留翻一定的現金，如果出現大跌市就可以提握到入市機會，回報率進一步提高。

------------------------------------------------

Q21169：

老師你好想問下你對86有咩睇法？

龔成老師：

新鴻基公司（0086）佢香港的金融服務機構之一，分行及辦事處遍布香港、中國內地、澳門及新加坡。經營業務包括以下：
　　　　
融資業務：例如消費金融（如提供消費中小企及其他金融信貸）以及專業融資、按揭貸款等。

另外業務是投資業務：如投資管理、策略投資、集團管理及支援。

過往都有一定的生意，不算差，但增長力就不強，算是平穩增長，至於盈利，都不差的，但就有少少波動。這股都有長線投資價值，現價合理，質素都有，但不是最高，始終獨特性不強，行業競爭大，因此唔建議太大注投資。

------------------------------------------------

Q21170：

早晨龔Sir
請問你點睇以下股票？

中國國航（753）
佐丹奴國際（709）
莎莎國際（178）
如想3選1，會選哪？謝謝

龔成老師：

其實質素都有點接近，都有質素，但卻不是最高質類別，因此不建說過度投資。

莎莎（0178）會略好，佢仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

之後的中國國航（0753）與佐丹奴國際（0709）差不多。

------------------------------------------------

Q21171：

成哥 想問下 啊里巴巴同中海油有無咩睇法
巴巴296入 坐佐成半年
中海油10.11入

龔成老師：

阿里（9988）你預要耐心守，但這股有質素的，只要你不是持貨過多，仍有得守。

因為佢將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

又以佢的螞蟻貸款業務來講，這部分是一些網上的小型貸款業務，增長快，但監管並不如銀行般緊，因此，中央會有更多的監管針對這部分，影響了賺錢能力。

整體上，阿里，長遠仍是有發展，賺錢能力雖然有少少減，但長遠會同政府同意一些監管方法，以及找到合理的賺錢模式，你預阿里現價約在合理區中上部，這股可長線。不過，中短期會波動。

你有貨可守，但未必要太急加注。

至於中國海洋石油（0883）雖然質素都算有，但不是最高質類別，佢對油價較為敏感。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。因此，如果你持貨較多，建議上翻D就減部分。

------------------------------------------------

Q21172：

龔sir，不好意思又打擾你，想請教一下，因為3067及2845澳門銀行沒得月供，如果我每用買一手呢個方法可行嗎？

風險是否高了，如果將來升到一手好貴，甘我就沒得用固定金額買，要提高左成本

龔成老師：

其實月供的目的，就是將買入價平均，減少一次過在高位買入的風險，只要你做到類似的效果，其實已可以進行。

3067、2845，你都可以長期投資，每個月買入一手，或每2個月買入2手，可以的。如果日後股價升好多，一手費用大，就每2個月買入一手。

你可以這樣，長期儲貨。

但要留意，這都是潛力類別，風險會比一般類別較大的，因此，你唔能夠組合100%都是這類股。

------------------------------------------------

Q21173：

老師，為什麼那麼看好必瘦站？潛力好似無科技股那麼高？

龔成老師：

必瘦站（1830）因為長遠有發展，同時本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港鵯業務模式複製到其他海外地區，我見佢加強了發展其他地方，因此發展不差。

潛力度雖然不及科技類，但穩健度比科技類高（另外，不要盲目追科技類，雖然我自己都睇好，但有時可以好貴，回報都有機會負數）。

你預$4是合理區頂，這股有長線投資價值。

------------------------------------------------

Q21174：

6055 3000股@16.9
0788 20000股@1.17
1347 2000股@56.55

今年22歲，由於年紀細風險承受能力較高，所以想買一些增長力較高的股票，鐵塔雖然利好消息好多但股價依然每日都織布機咁其實增長力系米已經吾高？如果我放鐵塔轉入3800增長力會高d嗎？

中煙有機會上25嗎？

華虹呢幾日都跌緊 但又吾想溝貨 現買入價可守嗎？里昂之前評級最高85元 但60幾蚊同21蚊都有機構評級 想請教老師其實所謂的大行評級是用咩方式評？點解同一隻股票可以差咁遠？

謝謝老師

龔成老師：

中煙國際香港（6055）係中國煙草總公司的全資附屬公司，承擔中國煙草總公司國際業務的管理及運營工作。

中國煙草總公司為中國唯一根據國家煙草專賣制度從事煙草專賣品生產、銷售及進出口業務的實體。

業務上，的確有獨特性，不過，上市時熱炒，市場預期高增長，之後見到增長力不及預期。整體都有發展的，算是合理價。要上$25不是短期事。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。你可以轉其他，但保利協鑫能源（3800）風險高，這刻的投資值博率未算好高。

華虹半導體（1347）有潛力，可長線。你唔好著重短期股價，要睇「企業」。

至於大行，你當參考下好了，不要太過相信。

------------------------------------------------

Q21175：

龔 Sir, 可否說汽車股都是經濟敏感股？想聽下你對吉利前景的睇法，當然與1211比較，還有一段距離，再說大家個市埸定位也不同

龔成老師：

對，汽車股對經濟算是敏感，所以你見比亞迪（1211）這類汽車股，過往股價大上大落，再加上佢發展新能源，業務變數更大，業務與股價上落就更大。

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

------------------------------------------------

Q21176：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約十八萬，其中九萬現金，九萬股票。

我在前幾個月偶然留意到你fb page,覺得你教導好好，就開始買埋你幾本書睇，都由幾個月，前開始跟你的方法買股票，但我不能月供，所以每次都小注分階段買入股票，現時持有的股票如下：

水桶1:
1177 中生製藥 1000x$7.6 9.6%
3718 北控城市 8000x$1.6 11.7%
3067 安碩恒生 100x$16.3 2.0%
1448 福壽園 2000x$7.815 16.4%
3319 雅生活 250x$30.5 7.9%
2057 中通快遞 50x$239.4 13.0%

水桶2
823 領展 100x$66.6 7.6%
2800盈富 500x$30.08 16.0%

水桶3
778 置富 2000x$6.72 16.0%

快速增值：平穩發展：收息資產=61:23:16

問題1:這樣分水桶1/2/3，正確嗎？

問題2:以我現時情況，股票組合都大致可以嗎？我想把股票組合目標設為快速增值：平穩發展：收息資展=5:4:1，適合嗎？

問題3:我現時以動用我一半的資金，我計劃大跌市才再買入股票，正確嗎？

問題4:在現有組合新經濟股只佔2%，我都想入多啲，但現在這類股又好危險，是否應等大跌市才入？

問題5:我一直都想加一些水桶2的股票，如果2800/66/823每跌10%加一手可以嗎？應該先加
新經濟股，還是加平穩發展股先較好？
謝謝指導！

龔成老師︰

1） 你現時只有34歲，水桶3可以不用太多，可以集中在水桶2類別，而水桶1你去到6成，其實已經是上限，如果你本身投資實力並不好強，要減翻部分。當然，如果你有實力及經驗，就無問題。

2） 以你年紀，都有一定增長需要，這個比重係可以。

同時，要留意翻個別企業，唔好佔組合15%以上，否則會有過度集中風險。

持股中，中通快遞（2057）有質素。不過，始終新上市數據未必好準，要慢慢先見真章。暫時不宜持有太多，故不要加注了。

3） 留一半現金，等大跌市才加注，係正確。

4） 現時的確不少新經濟股係略貴，除左阿里巴巴（9988）和安碩恒生科技（3067）算合理區頂，可分注，其餘最好等回調。

5） 你現時組合有少少偏向水桶1，而且新經濟股都略貴，故先入舊經濟股會較好。

但留意，單一行業唔好佔組合3成以上。你組合中，有不少地產股（港鐵0066 - 都算半隻），這方面你要注意。

以下都是一些在合理水平的舊經濟股，你可以參考下。

盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、粵海（0270）。

------------------------------------------------

Q21177：

老師，請教下你，

1. 如果要你在700、1810、9988揀一隻現價買入的股票，你會揀邊隻？

2. 同埋241、1833、6618你又會揀邊隻？
麻煩晒你

3. 上次因為你指教而買入必瘦站而賺咗啲，多謝你先，我覺得如果低過4.5仲可以再加倉，你覺得呢？

龔成老師︰

1） 小米（1810）、阿里（9988）、騰訊（0700）都係有質素的潛力股，但業務上有點不同。單以值博率計，現時只有阿里（9988）在合理區頂，其餘都偏貴，故較值得投資。

2） 京東健康（6618）、平安好醫生（1833）和阿里健康（0241）都係有質素和潛力，但問題係佢地是有危有機的類別，雖然業務增長好快，但這刻仍處於燒銀紙的狀態中。

估值上好困難，因為無實質的盈利數據作為基礎，市場只是估估下。質素和值博率計，平安好醫生（1833）會較為佔優。這些企業都可投資，但只宜小注。

3） 必瘦站（1830）現價偏貴，回多1,2成才算合理區頂位。若你有貨係手，等佢回多2,3成才加倉，會較理想。

------------------------------------------------

Q21178：

你好呀老師，本人對1475日清有點期望，每年盈利公佈也是賺錢、又有新產品又開發新市場、亦有大行消息曾經睇好、公司亦是國際知名非常穩健。

為什麼股價始終向下，是不是有些什麼我忽略了 ？
謝謝

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

正如你所講，佢本身有品牌優勢。加上業務穩定，盈利都不差。但比較大的問題，整體增長力唔算高，發展潛力不算強，此股算係平穩增值類別，有長線投資價值，但不要對潛力有太大期望。

這股下跌了一年，其中一個原因是疫情令這股之前處貴水平，因為佢短期會因疫情而銷量增加，但當市道正常，股價就會回歸理性，所以由貴跌回合理區域。

現價算是合理區頂部，可分注入貨，同時要控制注碼。

------------------------------------------------

Q21179：

想問下老師，你認為呢幾隻股票前景如何
2666，2688，2333，2359

龔成老師︰

環球醫療（2666）、新奧能源（2688）質素和前景都有，但優質度只屬中等。現價合理，分注投資都可以。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得。如果想正式入貨，最好回少少先考慮。

而藥明康德（2359）都有d質素。

佢主要從事藥物研發平台業務。係藥物開發過程，主要分為藥物發現、臨床前開發、臨床研究及商業化生產共四個階段。

睇翻佢的資料，佢的服務對應各個階段，可分為以下四個分部：（１）中國區實驗室服務（２）合約生產組織（３）美國區實驗室服務（４）臨床研究服務。

佢的客戶包括美國、中國、歐洲及全球其他地區的製藥公司及及生物技術公司。

業務其實不差的，過往的生意與盈利增長理想。

當中最大的風險，就是市場估值，現時的市盈率過百倍，就算有增長力，都計都貴，股價上落一定會好大。市場現時對佢前景有好大期望，但如果增長力比市場略減，股價都會調整。

只可以話這企業有增長，同時有風險。

------------------------------------------------

Q21180：

龔SIR, 本人澳門人, 隨住follow你page一年左右, 加上買你ge書睇,學識好多野, 多謝你ge無私分享先.有2個問題想問,

1. 其實如果我28歲, 本金只有30萬左右, 應該投資最多幾多間企業會較適合同穩當?

2. 對於估值上有進步, 大致接受到, 但投資值博率除左思考企業內外因素外, 係米可以計出黎? 係要點計先合理?

龔成老師︰

1） 以你現時30萬計，組合中可以6-8隻股票左右。到你資金再增多時候，可以加多2-3隻，大致維持在10隻左右就可以。

你現時28歲，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

大市現處於合理水平，那30萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

2） 要計企業的價值，從而評估個值博率。過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

之後，再比對現時股價，去判斷出現時投資的話，值博率高唔高。

如果真係要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13741-Q13760）

Q13741：

龔 sir想請教下。 你話 債本位 我唔太明個 concept？？？可唔可以咩細講下？

龔成老師︰

「金本位」即每張美金承諾能兌現到固定的黃金，簡單來說，就是美元利用黃金作支持。

現行的「債本位」，則是以「美債」作支持，而這些美債發行時所承諾的，則是將來的稅收，美元制度中所抵押的是美國政府將來的稅務收入，這就是現行的「債本位」的貨幣制度。

你持有的現金，你可以視為一張類似的「政府借據」，這不是財富，只是一張借據，你可以簡單這樣理解。

1971年，美國正式放棄金本位制，行「債本位」，美金變成了美元，由於美債能以無限量去發行，這意味著貨幣的供應由有限變成無限，貨幣亦由有價值變成無價值。

政府功能基本上是重新分配社會資源，在無私的政府，佢會收到資源（如稅收），全數不多不少咁重新分配到所需社群，這是沒問題。

但當政府入不敷支，就會利用發行貨幣去達到目標，而且這新發部份主要係分配比自已人（如企業，地主等的主人們）。這時候在同等量的社會財富下，貨幣增加了，貨幣就自然會出現貶值，而資產（以金錢報價）價值就會相對提升。

由於發行貨幣再唔需要相對黃金作支持，變成可以無限供應。在過去歷史中，凡無限供應及能夠人為創造的貨幣，最終的下場都只有一個––就是大幅的貶值與最終的崩潰。

我主要想帶出重點係，我地工作賺取的「現金」，並不可以視為資產，因為理論上佢供應量係無限，長遠會令你購買力受損。所以，我地要努將這些資金轉化成"真正資產"（如物業、優質股等），才是真正財富增值之道。

你睇《財務自由行》會更具體。

------------------------------------------------

Q13742：

老師，我26歲，唔知自己擅長d咩，無咩優勝之處。無積蓄又負債，無理想。對目前不安但無方向，今日仲俾客話我英文差。麻煩到d同事，俾人埋怨。年紀漸大，真係好傍偟。成日好怕麻煩人，但就成日麻煩到人。

龔成老師：

你26歲，係你最大的優勢，你要好好在這年齡想清楚，做應該做的事，如果你到了56歲，就真的無野可以做到，但你這刻仍有最大的資產「時間」，不過就要睇你會唔會好好運用。

往往最大的突破，都是一些我地最怕的事情，所以你要好好想清楚，找到正確方向就要行動。

你想唔想56歲時，後悔自己30年來，乜都無做過？答案就是你而家年輕時決定！

------------------------------------------------

Q13743：

你好呀龔成老師，有個問題想問。

成日見你話對有錢人黎講真正的財富係資產{例如股票}唔係現金，因為現金會貶值，但始終我地日常洗費都真係用現金..所以有d唔明白。

我知我呢個仲係窮人心態，可否糾正下我！

同埋請問有冇邊本投資入門書推介比乜都唔識既人？謝謝！

龔成老師：

你一定要明白，現金並無「實質價值」，這只是政府創造出來的紙張，理論上可以無限發行，這只是「政府借據」。

當中沒有「儲存價值」，沒有「實質財富價值」，但就有「交易價值」。

所以，我地持有現金，作用就是交易，以及等待投資，你唔能夠視為真財富。

如果你用長期概念就會明，30年前，如果你持有現金，一直到現在，你的現金價值大幅貶值，但如果你買入真財富，無論是優質股，還是物業，在這30年都大幅升幅，除了佢自身價值有所提升外，最主要原因是「現金貶值」，令物業的現金報價上升左。

由於現金只會長期不斷貶值，在理論上，你收到每月的人工，應該盡快轉成真財富。

你可以睇《財務自由行》，正正答到你上述的問題，你睇完後，會明白現實世界，真正的財富規則。

------------------------------------------------

Q13744：

我在睇《年報勝經》時成兄提到345維他奶大約在2015年在內地設廠房.但比亞迪電子 在網上才揾到 在中山.安陽2個地方在建廠房，但年報並無提及呢？

285比亞迪電子並無公報在建設廠房

龔成老師︰

我地睇年報進行估值時，主要留意佢盈利能力、行業前景、財務數據等因素。廠房這些細節位，年報未必會仔細提及。有時我地分析一間企業未必需要睇到太多好像廠房這些細節位，除非佢影響到一些好核心架因素。

我地分析時候，可以從新建廠房情況了解到企業發展速度，一些公司策略方向，對將來發展有無足夠預備等。好似維他奶(345)保持升級現有設備和準備新內地廠房，避免因現時廠房出現飽和，而拖慢了在內地發展的速度，這是一個要知道的利好因素。

而比亞迪電子(285)，其技術合作發展、競爭對手、全球手機發展和出貨量等因素，反而遠比廠房資料重要。所以，我地要睇番唔同行業，去找出適合的資料去幫助自已估值。

------------------------------------------------

Q13745：

龔成老師您好，請問728（中國電信）值得持有嗎？最近其股價跌至歷史低位
謝謝老師解答

龔成老師︰

中國電信（0728）主要從事提供綜合性固定通信業務、移動通信業務等基礎電信業務，以及互聯網接入服務業務、信息服務業務等增值電信業務。

本質不算差，但增長力不強，你睇翻佢過往幾年的生意情況，幾乎無增長，同時，股本回報率處低水平，反映企業的賺錢能力不強。

此刻價格在合理區，未算平宜。如果你持股佔組合不多，可以持有。

------------------------------------------------

Q13746：

阿Sir 請問1883中信電訊這股可以嗎？見派息都幾好，唔該曬阿Sir

龔成老師︰

中信國際電訊（1883）係澳門唯一提供全面電信服務商，佢業務穩定，過往股價的波動亦不大。

佢近年的生意都保持穩定，盈利亦是一樣，相信市場結構令佢處於一個穩定賺錢的狀態。

這股可以作長線投資，現時股息逾6%，有長線投資價值。

------------------------------------------------

Q13747：

你好，大師。因為小弟第一次買股票同呢幾日留意到你嘅專業...但係因為我爬嘅文都係老手級.

但係我想問下因為第一次接觸股票想問下新手應該買一手供定係月供股？

同埋想問下新手供，係咪都要長期入錢課金咁？而一手供就擺舊錢入去滾到啲息岩嘅就沽？
同埋新手買月供嘅買邊隻好？一手嘅話又買邊隻好
月薪大概萬2左右

會抽走2000幾多啲供保險加啲儲蓄計劃等。

小弟今年26歲
希望大師會解決，唔該你

同埋見到話年齡較細建議買增值股
盈富係咪首選？係嘅話一手股建唔建議

龔成老師︰

由於你係新手，未有定平貴能力，所以我建議你用月供形式，去減少買貴貨的風險。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。現在你每月儲到的錢，可以一半去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰

盈富(2800)、金沙（1928）、恆基（0012）、中銀（2388）、港鐵（0066）、煤氣(0003)、港交所(388)、長建(1038)、粵海(0270)、領展(823)、深高速（0548）或潛力股︰比亞迪(1211)，中生(1177)或福壽園(1448)等。

由於你現時未必對這些股票太了解，你可以全數供盈富就可以了，它是包括50間質素不錯上市公司股票的組合，有助你平衡風險。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。然後長線投資。

我建議你同時間多睇投資相關書本、新聞和報一些投資課程。本人【投資倍升股課程】適合初學者的，因為整個課程的設計都是針對初中階投資者的。到你讀完整個課程後，你已能自己選股、投資、評估平貴，在投資上已掌握了一定的知識，對你長遠投資會有益處。

------------------------------------------------

Q13748：

龔老師你好:

1. 首先，你最近寫的年報勝經一書寫得十分好，對我們末學過會計的十分有用，更加豐富之前課堂所學，要比like

2. 之前上堂對地產股或REITS估值不太明白，好似REITS, 如領展， 因投資公允值或物業重估而影響盈利，但這盈利只是會計上計算，是真收入。

而且咁的會計計算會影響PE, PB, 比較困難對這類公司估值。有沒有其他方法可以估得準確？

3. 這樣的物業重估對會計盈利影響，但又沒有實質盈利，其實對公司或股東有甚麼好處？只是股價有支持？

龔成老師︰

1) 多謝你的讚賞，本書能夠幫到你就好了! 緊記要多讀年報，多練習才會應用得更好。

2) 地產股或REITS在估值時，由於純利中包含了物業重估，很多時這數字十分大，故令盈利數字甚為波動，亦無法反映該年的賺錢情況。所以，我地計算地產股純利時，要先扣除公允值變動的影響，你就會發現其實際PE可能並不低。

在評估REITS時，可以簡單點。由於房託規定要將可分派的90%收入作派息，你可以直接用股息率去評估佢平貴。但你要留意番佢本身所持的是什麼物業，好似領展（0823），陽光（0435）都是商場、寫字樓等較平穏收入物業，5%股息率以算合理。

但好似富豪產業信託（1881）佢持有主要為酒店物業，對經濟環境會較敏感，在8%股息以上才適合長線投資。

3) 其實對股東收益無任何好處，佢主要係會計準則上要求咁做。令投資者可以了解這些資產市場質素的變動，例如佢持有的物業價值不停下跌，就算佢唔賣出，你也可以從物業重估變動中，見倒佢持有資產價值變差了。

------------------------------------------------

Q13749：

龔成老師，想再請教一下有關財富配置的問題
我的現況：已婚，月入約90,000（月儲4萬）， 現在32歲

目標：達成基本財務自由狀態（在45歲前把財富增值至能收取每月3萬的被動收入組合，當中包括租金，股息，當然達成這個目標越早越好）

在上完您的課後，現持有水涌一＋水涌二的股票組合，當中包括：

比亞迪股份，比亞迪電子，銀娛，福壽園，中生製藥，金沙，港交所，煤氣，大快活，六福，另外有月供盈富基金（每月供10000）
所有股票合共現值約370,000
另外有現金20萬作備用
和家人買了一物業自住但不能轉按或加按

因為現時的房屋政策改咗800萬以下樓可以做9成按，令我好想買多一個物業
我想請教一下，以我目前情況：

1. 我應該在現時減少持股，想辦法入樓市，盡快投資第二間物業收租，以加快財富增值嗎？因為我的工作十分穩定，但自覺仍未善用自己的借貸力去加快增值，但這樣做好似all in入樓市，當樓市下跌我會損失好大

2. 還是我現在應該不要心急買樓，先保持每月增加持股和儲錢？但我又擔心錯失了現時的機會

3. 另外想問一下，我的持股組合相信和我的年齡相符，對嗎？老師您有没有其他改善的建議？

龔成老師︰

1） 政府的放寬按揭政策，會利好短期樓價，因為會令潛在的需求釋放，但如果想入市，我唔建議太心急，因部分業主出現叫價過高的情況，樓市短期可能會升，但不建議心急投資。

再加上以投資角度，現時投資股票比物業值博率高，所以你唔洗急住去買投資性物業。

2） 你現時應該保持月供習慣，由於你每月可動用資金現在只有小部份投入月供，建議你可以加大供款至$20000。而且已你年紀是增值時期，可以加入些潛力股︰比亞迪（1211），中生（1177）或福壽園（1448），比例約佔你月供資金1/4。

至於每月儲到的2萬蚊就等機會，當大市出現一定程度的下跌，就可以動用現金去投資，在平宜價加大力度掃貨。然後長線投資。

3） 我地投資會運用「先增值，後現金流」作方法，初期應投資較多增值類資產，較後期則應投資較多保守類項目。以你年紀，可以"平穏增長股"+"潛力股"，所以組合中股票無問題。

如果你要45歲達至每月3萬的被動收入，以股息率5%計，要720萬。你現時每月儲4萬，供10年，以過去恆指年回報10%計，已有約750萬。所以，相信用以上策略達標機會唔細。

------------------------------------------------

Q13750：

龔sir,想問下你點睇和記電訊215，本質黎講佢應該唔差，算寡頭壟斷，仲收購埋csl。

但佢d財務數據就非常飄忽，尤其是2017年，明明營業額下降，但盈利就大幅上升，而且roe一直偏低，盈利亦持續下降

而佢最近又投得5g頻譜，可唔可以預期佢地公司會再有增長？

龔成老師︰

和記電訊（215）在2017年營業額下跌，但盈利反而上升的原因，是由於出售附屬公司之一次性溢利56.14億港元所致。

早前旗下3香港以近2億元的投得30兆赫的3.3吉赫5G頻譜，令現有5G頻譜增至70兆赫。

頻譜的作用是保持電訊質素及會間接影響市佔率，所以對佢有利，但相較其他競爭者唔見得有明顯優勢。

預期此股維持平穩型，增長力只會一般。

------------------------------------------------

Q13751：

想問阿里巴巴在港上市事宜：

1）常聽你說新股不值抽，但這次會否是個例外？因為阿里已有多年業績可供參考，加上以市價九五折上，會否有一定值搏率？

2）原本持有美股阿里巴巴的小股東/散戶會怎樣？他們手上的美股會轉變為港股？阿里巴巴以折讓價來港上市時，是否代表這些投資者會蒙受帳面損失（因為市價折讓了）？謝謝

龔成老師︰

1）佢今次上市，以第二市場身份上市，因此本身已經是一間上市公司，只是這次在香港上市，所以，業績上的參考價值，的確會較多。

至於所謂的95%，其實不是大數目，影響唔多，而我地應該以企業的長期價值計算，如果企業明顯平或明顯貴，95%根本影響不大。

2）佢地仍然會持有原有的股票，只是總股數增加左。

其實就算香港的上市公司，佢本身都會以折讓價配股（即以比市價較平的價格，發行新的股票，比某些特定的人士，不過每年數目有限）。

因此，阿里巴巴，原有股東仍然會持有美股，這點不影響，但總股數就會增加，以低過市價發行，會對原股東有小小影響，但只是95折，影響唔算大，同時當企業發行新股，就會集得資金，企業的現金（即是資產項）會增加，所以企業價值不會因此而大受影響。

不過題外話，阿里巴巴其實過往曾經在港上市，之後退市（當然，當時的業務規模、所包的資產，與現時想上市的阿里巴巴有所不同），但這股，並不是一間「與民同樂」的公司。

因為佢過往的做法，見到佢有最佳的時機，做對「公司」最有利的事業，但對「小東股」卻一般，就過往佢以一個好平的價，收翻小股東的股並退市，將公司私有化，小股車持有5年一起空，你就明白佢對小股東點。

------------------------------------------------

Q13752：

龔sir你好，想問問你的專業見解，本人做sales近呢一兩年都有5萬左右的每月收入，但長遠唔知，我大陸有層樓值230萬，但仲供緊每月4000。

但租左俾人算係唔駛供，香港租連消費要2萬左右開資，現金有60萬，諗緊儲多20萬把大陸供緊的尾數還清，咁我就可以淨收租每月收入4000人仔，你覺得咁樣好嗎？

還是這60萬現金可以做其他投資，我買股好差，成日輸，有無好建議？謝謝！

龔成老師︰

你的資金是先還款去淨收租，定去作其他投資，我地要考慮番2個選項回報有什麼不同。

大陸樓，你除左要諗佢當中的租金回報，也要了解佢升值潛力是否理想，如果只屬一般，長遠計就不如賣出，轉投其他更高增長力的項目。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你可以用你現有資金的一半，投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）。

至於餘下的一半現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

其實你買股成日輸，好大機會因為你投資知識不足。建議你多睇投資相關書本、新聞、年報和報一些課程。本人【投資倍升股課程】適合初學者的，因為整個課程的設計都是針對初中階投資者的。

到你讀完整個課程後，你已能自己選股、投資、評估平貴，在投資上已掌握了一定的知識，相信會增加你未來投資的勝算。

------------------------------------------------

Q13753：

老師你好，有睇你嘅新書，知你推介華虹半導體，請問你覺得中芯國際前景如何？如果同華虹比較，邊個值博率更高？

同埋中芯估值大概點樣？

龔成老師︰

2者比較，華虹半導體（1347）潛力會高d。

華虹半導體（1347），佢而家係部分範疇擁有技術，但並不是整個產業鏈中最重要的技術部分，所以不能定為很高質素的企業。

不過，中國政府一定會加強開發半導體技術，所以，有潛在的增長力。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。但現時估值又唔算特別平，吸引力一般，小注可以。

------------------------------------------------

Q13754：

成哥，近排我留意緊本地零售股及酒店股，因為近排香港事件都跌左唔少，但我分析過核心商業模式冇受大影響，除非事件永遠持續，但可能性好細。

係當中我睇中左 178, 1212, 590, 1881, 1373, 成哥覺得邊隻值博率最高，同埋想請教下 590每年既經營活動現金流大上大落，好唔穩定，想知係咩原因？

謝謝你費時回答我問題

龔成老師︰

香港零售業進入寒冬期，加上香港社會不穏，令好多股票回了不少。六福集團（0590）、莎莎（0178）及利褔（1212），都是有質素的股票，但股價中短期都會較弱，而且可能會好波動，但只要我地長線投資，根本就唔需要理會。

3隻股股都有投資值博率，但就要以較有耐性的模式去投資，分注投資，長線持有，這刻已可以開始進行。同時，你唔好將所有資金，都全部集中在零售類別。

至於富豪產業信託（1881）是有質素的房託，是不錯的收息股。但佢比其他房託，會波動少少，因為佢持有主要為酒店物業，對經濟環境會較敏感，在8%股息以上才投資較好。

而六福（0590）點解經營現金流咁波動，主要受存貨變動所影響，不用擔心，這情況是正常的。

------------------------------------------------

Q13755：

龔成老師你好!

今年我30歲，
月入大約3萬
每月大約可存2萬
零股票投資經驗。
可以如何財富增值？

資產
•50萬現金在銀行

•2017在內地中山有物業$100万、首付60.貸款40萬，月供2200.現時在出租2000

•2014在中銀有份$10萬元人民幣定期存款，為期12年，到時保證利息連本金可有15萬內

•2017取消份已供5年,年供$24000基金保險

•現有年供$1萬多元醫療保險,有朋友提議買多份年供2萬幾（供15年），年年派錢够cover退休後份醫療保險

謝謝龔城老師指教！

龔成老師︰

首先保險是需要的，至於買多少，則視乎個人需要，我則建議買「最基本」的就需，因為只要做好基本的防守，餘下我地就應集中力量去用其他工具進攻。

我投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增長力為主。現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以投資在平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）、粵海（0270）、深高速（0548）或潛力股︰比亞迪（1211），中生（1177）或福壽園（1448）等。

至於餘下的資金，就等機會，當大市出現一定程度的下跌，就可以動用現金去投資，在平宜價加大力度掃貨。然後長線投資。

定期可以維持而狀，但定期這類產品回報不高，對你這些應以增值為主的年輕人，就唔咁適合，唔好再增多了。

最後大陸樓方面，你可以計下當中的租金回報，以及升值潛力是否理想，如果只屬一般，那就不如賣出，轉投其他更高增長力的項目。

------------------------------------------------

Q13756：

成老師，想請問一下你對1680澳門勵駿，呢隻賭股點睇，我老婆價位9蚊幾到而家....，係隻咸魚股？之後係米冇機會再翻身嫁拉，同埋咩原因會跌成咁既....

龔成老師︰

澳門勵駿（1680） 業務包括（i）根據服務協議於位於勵宮娛樂場、巴比倫娛樂場及置地娛樂場向澳博提供博彩服務；（ii）經營老撾人民民主共和國（「老撾」）Savan Legend渡假村酒店及娛樂綜合項目內娛樂場；及（iii）經營其物業內的酒店、娛樂及休閒設施。

此股市值唔高，加上連年虧損。雖然你見到佢2018年有盈利出現，但只是出售新澳門置地所致，這種一次性收益唔會經常出現。

整體而言，此股無投資價值，沽出會較好。如果你睇好澳門賭業，可以買入金沙（1928）或銀娛（0027），前者平穏增長+股息，後者有較大增長潛力。

------------------------------------------------

Q13757：

龔sir 我發現0066的每股盈利預測竟然大幅少於近年的每股盈利, 是否分析員沒有把物業重估計算在內?

如果用分析員的盈利預測作計算, 估值會變得相當低。但我用過去PB和PE & EPS計算, 估值是3x-4x相對合理一點。!

龔成老師︰

你所計算估值$3x-4x很合理，港鐵（0066）合理區大約會在這位置，但由於佢質素高，所以你見佢很少會落到$3x。

至於分析員和大行報告等，有時都有參考作用，但只是「參考」，不能盡信。我過往曾見過有所謂的報告，話某股唔得，要賣出，但最後發現，原來佢自己低位入貨中。

所以，我地會睇大行報告的「資料」，但意見部分，就不用太著意。同時，可以睇多間大行或者分析員報告，得到的綜合分析，但不要單集中在某一間。

分析報告，已考慮了物業因素，而進行估值的，即是佢都會預期每年之後的物業重估，但佢都明白這個只是一個會計數。

------------------------------------------------

Q13758：

老師，你好！我買股票勝經，八十後百萬富翁，穩建收息股。都是剛開始投資了幾個月，每月供一千盈富基金，錯過了黃金十年，由於資金和收入有限，所以能放太多資金去投資。

以你所說長線投資，是否最好供五年？但以每月一千，五年后大概可儲到多少？又或者供多一者收息股？

另外，我有兩個小朋友，一個七歲，一個三歲，想同他們儲錢，如果月供，但資金有限，都會有供完的一天，還是替他們買一手？

但買一手，買那類型好？等他們有需要才放？但一手，儲$會吾會相比月供差好多？麻煩老師

龔成老師︰

其實直接買1手，定月供，好視乎你投資經驗。如果你未能掌握平貴，我會建議你用月供方式，去減低因價格波動，而導致買貴貨的風險。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

盈富（2800）是平穏增長型，而且佢是包括50間質素不錯上市公司股票的組合，很適合選股能力唔高，但需要有增長力的人士。

為自己增值或幫小朋友儲錢，你都可以透過月供盈富去進行，5年只係一個最低供款年期，你一直長供都可以，而且會更理想。

至於幾時放，除了當你有實際需要、股市過熱、股票本質變壞這些因素外，我都唔建議你放。只要有質素，長期持有才是最有效增值的方法。

你現時月供$1000，以恆指年回報約10%計，5年後大約會有$73000，而10年和20年則有分別19萬和69萬。你見佢會倍增落去，這就是"乘"的威力，所以我說能維持月供和持有優質股越長越好。

------------------------------------------------

Q13759：

你好 我想問下 海豐國際（1308.hk） 現價是否合理價？可否買入？

1.佢既業務單一
2.年年賺錢都好穩定
3.因為主力做東南亞生意，似乎貿易戰對佢影響不大但好似受人民幣價格影響？！

你認為是否優質股？

龔成老師︰

海豐國際（1308）業務主要可以分為兩大業務分部：集裝箱航運物流分部和乾散貨航運及其他分部。集裝箱航運物流分部主要涵蓋提供集裝箱運輸、貨運代理、船舶代理、堆場及倉儲等綜合物流服務。

乾散貨航運及其他分部主要涵蓋提供乾散貨船舶租賃、土地租賃及空運代理服務。

當中"集裝箱航運及延伸物流收入"佔集團收入9成，以2018年12月31日計，按運力計在全球集裝箱航運企業中排名第18，業務亞洲區內貿易市場。

預期亞洲區貿易會是發展最快的地區，集團生意會因此而受惠。睇佢過去數年盈利都有穏定增長，此股有質素，但又未到最高個批，算有長線投資價值。

------------------------------------------------

Q13760：

你好成哥，本人啱啱讀過你本80後嘅書，黎緊應該會買埋年報勝經同12月嘅50優質潛力股。

本人啱啱出黎做野，小牛試刀，買左0285 （500股），$13.36買入，雖然現在都有上升趨勢（不太確定係咪穩陣上升），升到15，但係如果佢之後keep住升，我係咪應該再入多一兩手？

此外，除左0285，我都有月供港鐵同港交所各1500蚊。我以上嘅approach係咪都算正確

龔成老師︰

其實我地係投資一隻股票時，除左睇佢是否優質，也要留意買入價唔好過高，否則會影響長遠回報。

比亞迪電子（0285）質素不差的，有潛力，暫時見佢的最新情況是正面但估值我自己就差不多，無太大變，因為我之前都是用長期角度去估。

佢股價好波動，你最好分注，控制注碼。你現貨入價合理，再上就開始有點貴。

如果你年青或中年，你買和月供的股票都可以，都優質和有增長力。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【南方東英特約 : A股解密 - 20201017 -- 樂視一禮崩樂壞】

主持：Eugene 羅尚沛、Suki

首播時間：22：00

https://www.youtube.com/watch?v=PkgtB6MJruE
-------------------------------------------------------------------
重要聲明

本資料僅供參考用途。本資料並不構成買賣任何投資產品的招攬或承諾。南方東英資產管理有限公司（「南方東英」）在製作本資料時，相信獲得數據源是準確，完整及合適。但南方東英沒有為本資料所載信息的準確性或完整性作出保證。南方東英不會負上收件人使用本資料時所引致的法律負任。本資料可能含有「前瞻性」資訊而不純綷是歷史性的。這些資訊可能包括預測、預報、收益或回報估計及可能的投資組合構成。本資料並不構成對未來事件的預估、研究或投資建議、也不應被視為購買、出售任何證券或採用任何投資策略的建議。本資料所表達之意見僅反映南方東英於編制材料當日的判斷，並可隨時因隨後情況變化而更改，恕不另行通知。

風險提示投資涉及風險。過往的業績數據並不預示未來的業績表現。基金的價格可升亦可跌。投資者在進行投資前應索取及閱讀有關基金的發售章程（包括風險因素）。投資者不應僅依賴本資料作出投資決定。投資者應根據個人財務狀況，確定任何投資，證券或策略是否合適閣下，如有需要，應諮詢專業意見。

成為 RF 鐵粉團的一分子！只需港幣 $40 一個月，即享獨家影片及專屬貼圖優惠！
https://www.youtube.com/channel/UCETuQf4lzTrfevoHdSGo8Ew/join

www.RagaFinance.com

RagaFinance Facebook:

https://www.facebook.com/ragafin/

《Calvin直播室》眾籌計劃 ?

http://patreon.com/calvinchoy

◎◎◎訂閱 ◎◎◎

▶
Ragazine : https://www.youtube.com/channel/UC5DWcqCjBne2-wRnrjxkuHQ?sub_confirmation=1

▶
Raga Finance: https://www.youtube.com/channel/UCETuQf4lzTrfevoHdSGo8Ew?sub_confirmation=1

#RagaFinance
------------------------------------------------------------------------------------------------------------------------------------------
免責聲明：《Raga Finance》竭力提供準確資訊，惟不保證絕對無誤，資訊如有錯漏而令閣下蒙受損失（不論公司是否與侵權行為、訂立契約或其他方面有關），本公司概不負責。

同時，《Raga Finance》所提供之投資分析技巧與建議，只可作為參考之用，並不構成要約、招攬、邀請、誘使、任何不論種類或形式之申述或訂立任何建議及推薦，讀者務請運用個人獨立思考能力自行作出投資決定，如因相關建議招致損失，概與《Raga Finance》主持、嘉賓、編輯及記者無關。

同時，《Raga Finance》所有節目或資訊，相關內容屬作者個人意見，並不代表《Raga Finance》立場。

Raga Finance

網址: www.ragafinance.com