【龔成問答信箱】（Q22041-Q22060）

Q22041：

Hello 龔sir 我係你股票班初班既舊生 最近睇緊12號恒基既年報 有d問題想問下

請問本年度盈利後面點解仲有一個本年度收益總額？唔係好睇得明 除稅及重新分類後之本年度其他全面收益淨額 即係點？

仲有佢既基礎盈利14899係點計出黎呢？我嘗試將公佈盈利10192 加 "投資物業及發展中投資物業之公允價值（減少） / 增加" 2413 都計唔到 14899

聯營同合營公司既盈利需要剔除嗎？

最後就係buffolio顯示既恒基 PE係用基礎盈利定公佈盈利計算呢？我需唔需要加減其他數字去計算正確既PE?

唔好意思 有好多問題

龔成老師︰

這頁"綜合損益及其他全面收益表"，係分析估值時，我都唔會特別去參考。因為佢主要係一些非營運性變動，無太大參考價值。

至於基礎盈利，主要係扣除左"物業公平值變動"，所造成之影響。

你可以參考翻2020年年報P.226，你用"本公司股東應佔盈利"，再加翻所以公平值數字(因為當年公平值，都是負數。若當年公平值係正數，你就要倒轉，扣除翻佢。)，就會計到14899個答案。

水牛網顯示，會係用用"本公司股東應佔盈利"作計算(即包含公平值之影響)。

------------------------------------------------

Q22042：

龔成老師你好！好想同你分享個好消息！我同丈夫成功買到第2層樓啦！難得睇中啱心水地區尺數既低水單位，所以決定賣哂所有股票同埋加按少少層樓俾首期

首先 我好想多謝老師你強調儲資產呢個概念，雖然我啲股票唔係大賺，不過起碼不經不覺已經儲到一筆可以靈活套現既資產，全靠呢筆錢 今次先有機會入市。

不過宜家手上已經冇哂股票 現金亦唔多，要供2層樓亦都令少左現金流去儲股票

再加上黎緊首要目標係可以儲到筆錢裝修新屋，想請問老師我應該如何分配長線同短線既投資方向？

現階段應該全部保留現金用黎裝修？還是繼續以月供方式儲貨？

謝謝老師建議

龔成老師︰

先恭喜你，又成為業主。

我地財富組合除左要有增長力和質素外，平衡性都好重要。你現時資產明顯係偏重於物業類，長線你應集中加回一些優質股，以免過於集中個別資產類別，而產生風險。

因此，你新資金建議優先投入股市，去令成個組合更平衡。

至於先裝修，定投資，你要從生活所需和財富增值，2者之間去取個平衡。

但我建議，點都要每月做番少少月供，唔好完全係零。因為你現時係零股票，而大市又只係合理水平，這個狀態唔理想。

另外，由於你要供2層樓，令每月可投資金額減少。你最好盡快將另一層樓放租，去提升自已可投資現金流，咁會較好。

當然，你現時現金太少，都要留一定的現金先。

------------------------------------------------

Q22043：

老師你好，我又有問題想問。看完"80後千萬富翁"後，有一個疑惑

假設我辭職後，以全職股票投資者創富，之後希望分散投資，買入一間物業，問題就來了：

1.沒有工作，全職股票投資者，可申請按揭嗎？

2.同時，過到壓力測試？

3.成立空殼公司，買入物業是否更好？

龔成老師︰

1) + 2)你可以利用「資產方式」申請按揭，而非一般有收入人士，所用的「壓力測試方式」。

或者你可以加入擔保人，都有機會可以提升你成功申請按揭機會。

但坦白講，無收入要做按揭，一般都會較難。

所以最好在你有穩定收入時，處理好物業這部分，之後先辭工。

3) 成立空殼公司買入物業，係可以節省不少稅項。但空殼公司本身，都有不少營運和買賣成本，例如要會計師每年核數、買賣時需要律師評估資產等。

加上公司買物業要支付「買家印花稅」15%，因此否則未必值得咁做。

------------------------------------------------

Q22044：

1:假設，本金10萬，每月再投入1萬。如果比自己目標係每年升15%,咁應該點計，因為以年計

1月資金可用12個月，但12月資金只用1個月。咁我應該用22萬乘15%,定應該點計好?

2：老師，想請問下，假設如果雙方同意，我冇任何牌照既情況下，可以幫人做投資嗎

3:老師想請問下，假設現在有1百萬資金，用了5年時間儲錢加投資得來，有買樓需求，可選擇用來買樓首期或繼續用股票滾下去，

但如果買左首期後就變左股票果邊滾落去既速度慢左，面對咁既情況應該點做好

4：老師，想問如果抽到居屋，又比左首期買左之後，可唔可以出租？

龔成老師︰

1) 唔好諗到太複雜，我地唔係要一個好精準架數字，因為投資中間會有好多變數，未必一切如你估算一樣。

但係你要知一個大概數字，係有意思，可以作參考架數字。

以你情況，可以簡單點，當你當年每月資金，係年尾一次過投入。咁樣計算，簡單之餘，出來結果都會相對保守。

第1年回報︰22萬 x (1 + 15%)
第2年回報︰(第一年回報 + 12萬) x (1 + 15%)....如此類推

2) 如果是《證券及期貨條例》規管範圍，基本上就要有牌照。如果你只係幫下屋企人手，當然另計。其實，當中好講有無「利益」在其中。

3) 如果你係有實際需要，去置業的話，你係可以動用這筆資金。其實物業都係一個資產，都算係一種投資。

但最好，係你置業之餘，都有一定資金，用投資優質股，令成個組合唔好偏左係物業個邊，咁就最理想。

4) 根據正常程序，係要補左地價，先至可以成間居屋放租。

而且，投資物業放租，在香港現時法例下，是不能以高成數按揭進行的，金管局定明，如果要投資物業收租，最高的按數不能高於5成，高於5成者，只能自住。

當然，這是政府的規定，但坊間的做法，往往是另一回事。但你要明白佢地的做法是犯法的，因此一定有風險，做與唔做，自行決定。

坊間不少投資者，就算高成數揭揭都會照放租，其實你照去地產經紀同你講你想這樣，佢地就明，會照同你做，當然，細節位不便在這裡講太多，有機會你上堂見到面，我分享坊間的做法。

記住，所有事情都會有風險的，這是一個值博率的問題，我只可以話，坊間不少人都會照做。

------------------------------------------------

Q22045：

龔sir，你好!多謝你一直耐心回覆讀者的提問。我都其中一個支持你的讀者，你的著作特別是年報勝經，寫得很好。我亦因此開始學習睇年報。

最近我投資左百度(9888)，現價大約210蚊左右。投資原因主要是看好雲業務同智能駕駛的前景。我相信這兩個範疇能配合中國未來的大方向。

配合本身網上廣告業務收益穩定，有利百度發展新增長點。

百度最大的擔心是競爭者多，在今日「全民製車」的時期，百度的賣點只是研發時間比同業長，比同業更早開始投入研究。講到這裡，就引伸出另一個憂慮，就是巨大的無人駕駛投資能否變現。

我明白股價反映公司價值，同時亦反映了市場的對於公司的期望值。但在這裡，我唔識判斷「市場期望值」這件事。

不知我的看法是否正確，百度目前的市盈率大約9倍左右，應該是屬於健康水平。 未知老師的看法如何? 現價應否再加注?謝謝!

龔成老師︰

多謝你的支持!

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

雲和無人駕駛，都會係有業務當中較有潛力部份。百度的無人駕駛技術，其實唔錯。雖然越早研發，唔代表一定可以越早市場化。

但百度在無人駕駛技術，無論研發和運作，都累積左一定經驗，有助提升佢成功市場化機率。若無人駕駛技術成功市場化，相信會成為集團盈利的新增長點。

由於無人駕駛市場未算成熟，就算有較多競爭者進場，都未必會造成較大影響。加上集團有一定技術，係競爭上相信會有優勢。

這些部份發展雖有潛力，但都存在很多不確定性，我地好難完全掌握將來發展狀況。因此，係估值時，對這些不確定性較高的分部，要保守少少。

百度現時收入，主要來自在線營銷服務。這部份，集團有一定優勢，預期長線發展正面。

百度在規模和質素上係有，但你預佢中短期會較波動，不宜持有太多。若你資金好充裕，要價加小注係可以，否則等較大回調才加注，會比較好。

------------------------------------------------

Q22046：

龔sir你好，我對於股票買賣只是初哥，之前都是有少少人云亦云既心態作買賣。而我丈夫曾經上過你既堂，從他口中得知你的FB page，最近經常睇你既page增加投資概念。想問下你嘅意見。

本人37歲，已婚未有仔女。月入$58K，丈夫月入$20K多少少，收入算穩定，已購入一層自住物業，仲有17年需要供樓。

之前一路只保守地作儲蓄，大約有流動資金$100萬，扣除供樓，生活費同雜費，每月可儲蓄$24K，想可以好好分配同計劃點樣做好投資理財，為將來有小朋友及退休生活作計劃。

之前買入一些收息股票為主。如下：

0005 匯豐 70.5x1200股+46.2x2000股
1398 工商銀行 6.41x 15000股
2800 盈富基金 28.72 x2000股

1. 睇了你的FB page 後想嚐試月供股票，考慮緊每月用一萬蚊月供0002，2318，6823。這些組合適合嗎？

2. 現在持有既股票組合適合繼續長期持有？定放售？

3. 如果買潛力股，你會建議買邊隻？

期待老師的回覆，非常謝謝！

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你37歲，應以增值為主。平安(2318)係可以，但其餘2隻只係收息股，增長力較弱，唔係太適合。我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$12000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

現時大市只是合理區，你現有100萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但我建議，在你實行以上計劃前，先儲起半年開支(若你預將會有小朋友，都要預留埋這部份開支)，作為應急之用，咁會較穏當。

2) 你持股雖然都有質素，但匯控(0005)和工行(1398)都係收息股，你年紀不宜持有太多。建議沽出部份，慢慢換至上述股票，會較好。

3) 我上述潛力股，都適合你，但你投資經驗較淺，要控制個比重，唔好佔多過組合3成。

另外，大部份潛力股現價都略貴。現時只有安碩恒生科技(3067)、ＧＸ中國電車基金（2845）、比亞迪(1211)、阿里（9988）、中生製藥（1177）、福壽園(1448)勉強算在合理區頂部，可分注入貨，其餘想買就要等一等。

------------------------------------------------

Q22047：

龔成老師，你好，最近睇左幾本理財書，當中都有一個對沖概念，但睇返sir的書，或fb的對答，好似都好少呢方面既資訊，是否同你理念唔一樣？

另外我本人都買左d科技股，例如阿里巴巴和小米，都諗住有排都唔放，但又唔想繼續供落去，想供d其他行業的（你話同一產業不是多過30%)，

睇左眼科藥物公司兆科眼科，或者是德視佳，一個造藥一個行醫，你會點睇？

龔成老師︰

我主要係建議透過創建一個合適、平衡、有質素的財富組合，去做到在合理風險下，爭取最大回報。

跟一般對沖，去平衡風險有所不同。而且對沖唔易玩，唔適合一般投資者去操作。

兆科眼科（6622）係一間眼科製藥公司，致力於療法的研究、開發及商業化。通過自主開發或許可引進已建立起包含25種候選藥物的全面眼科藥物管線，涵蓋影響眼前節及眼後節的多數主要眼科適應症。

集團初步將策略重心放在中國五大眼科適應症上，包括乾眼症(DED)、濕性老年黃斑部病變(wAMD)、糖尿病黃斑水腫 (DME)、近視及青光眼。

佢已建立起由13種創新藥及12種仿製藥（按國家藥監局的《藥品註冊管理辦法》分類）組成的眼科藥物管線。創新藥管線包括8種候選藥物，若獲批准則有潛力成為中國市場領先產品。

仿製藥管線包括6種潛在中國首仿藥。集團擁有8項已頒發的中國專利及一項已頒發的歐盟專利，並提交6份中國專利申請。

佢已於廣州市南沙新區建造的生產設施，根據中國、美國 及歐盟cGMP標準設計及興建以用於生產眼科藥物，其生產能力完備並可用於商業化規模生產。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注，當小注投資下好了，同時要明白當中的風險。但用作月供，就不建議了。

德視佳（1846）主要於德國、丹麥及中國以「德視佳」品牌提供視力矯正服務。

佢的服務可大致分為屈光性激光手術（包括全飛秒激光手術及飛秒激光聯合準分子激光角膜原位磨鑲術）、後房型人工晶體（ＩＣＬ）植入術；晶體置換手術（包括單焦點及三焦點晶體置換手術）及其他（包括用作矯正眼晴屈光不正的ＰＲＫ／ＬＡＳＥＫ及角膜基質環段ＩＣＲＳ植入手術）。

見佢的財務數據都不差，生意與盈利都有穩定增長，現價算是合理，但不是高增長類，同時由於規模未算好大，可小注直接買入，但不宜月供。

另外，我地月供係一個長線計劃，最少供3年，並持有5年，才會有較佳效果。因為月供可以拉平均個買入價，減少買貴貨風險。

若你經常供一陣就轉，會影響到平均價格效果，令最終回報不確定性增加。

------------------------------------------------

Q22048：

我想請教一下，你覺得應該怎樣教育兒童理財？因為看過你的文章/書本，你都提及學校缺乏理財教育！謝謝！

（期待可以在澳門上課的澳門讀者）

我兒子8歲，有時會問我供樓借貸，公司借錢，點解麥當勞可以咁成功等等，我自己本身不是商科，所以都係google咁簡單講俾佢知

龔成老師︰

我建議你同佢玩「大富翁」、「現金流」這些遊戲。

如果佢8歲已經有這些問題，我相信佢對這方面好有興趣，好有潛質，日後可以好有成就，你可以找一些成功的名人、商人傳記之類的兒童書比佢睇。

書本和遊戲，都係教授小朋友理財的理想方法。好似大富翁遊戲，小朋友可以從享受遊戲同時，也會學到不少經濟理論和操作模式。

另外，書本可以令佢從前人身上，學到一些經驗。當然，佢年紀比較細，較難理解我們成年人睇架書籍。

最好先選擇佢年紀水平，和他有興趣的書籍入手。之後才慢慢加入一些，未必是他有興趣，但又對他理財知識有幫助的書籍。

家長在遊戲和閱讀時，要多加讚賞，對佢學習會有激勵作用。

如果你本身無太多理財知識，就係教授小朋友同時，自已都要增進一下，甚至一齊學習。可以作親子活動之餘，都可以提升雙方學習的樂趣。

------------------------------------------------

Q22049：

老師：我在重整現時持有的股票組合，由於未到8月上課時候，唯有再麻煩老師，唔好意思。想請教以下幾隻股票是否優質和他們的合理價範圍。謝謝！

405
939
2822

此外，以上三隻股票是否都屬於平穩增長股呢？謝謝！

龔成老師︰

這3隻股票，都係優質，同時現價都在合理區，可以分注入貨。

越秀房產（0405）和建行(0939)係收息股，增長力較弱，主要係收下息。以你年紀，收息不用佔太多，大約2成左右好了。

南方A50（2822）算係平穩增長股至潛力股之間，有一定波動性。此股適合你年紀，可以考慮。

------------------------------------------------

Q22050：

老師你好！我居住在澳門，今年45歲，自住房屋市值約900萬還欠貸款400萬，每月供17000。

另有一間市值約600萬已供滿收租約9000（澳門租金較低）

因疫情上年失業，現新工作每月薪金只有18000再加上9000租金，每月收入共27000，每月供樓保險加上生活開支剛好月月清，另有60萬積蓄想投資股票市場。

現時手頭沒有揸股票，想問應唔應該賣咗收租樓，還清400萬貸款，剩餘200萬用來買平穩收息股？還是只用60萬積極蓄投放股市？

另外想買老師你的書，我是股票初學者，適合先看那一本？

龔成老師︰

其實物業都係一種資產，除非你收租物業升值潛力真係好弱，或者質素好差，否則持有用作收租，咁會較好。

至於增值，你可以先用這60萬去做。由於你已經有2個物業，故你新資金應先集中係優質股類，以免出現過度集中風險。

以你45歲，可以選擇一些「平穩增值股」+「潛力股」作投資目標。

由於你現時無太多投資經驗，潛力股這類風險較高的股票，你就不要持有過多，最多維持1-2成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-4成，到時要視乎你投資經驗多寡，和了解這些股票程度而定。

大市現處於合理水平，那60萬資金，你可以先用20-30萬，以"分注"形式慢慢入貨。餘下資金，就等大跌市機會出現，才大力度掃貨，並長線投資。

你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22051：

龔成老師你好，剛開始月供股票3個月，其中一隻月供2382 平均價179，佢今個月升左好多

我係想長線持有，但遇著咁大升幅，平均價就會拉高 變貴左。心態上係繼續月供 還是停供一個月先？

龔成老師︰

舜宇光學（2382）係有質素和潛力的潛力股，若你係年青至中年人士，月供這隻股票係可以。

現時此股已經偏貴，但由於未到好貴，我地係唔需要停左個月供。短期成本價，係會有被拉高情況，但係月供係一個長線計劃，長遠個價都會拉平衡。

除非佢再升到一個好貴水平，我地可能要減少股款，甚至停供。但大前題係，你有無定平貴的能力。若果無，我建議你不理價值升跌，一直去供。

因為你自行調整供款，如果時機不對，反而大大影響左你平均價格的效果。所以，若你投資經驗較一般，我建議你選好優質股後，唔好理個價，一直供，反而對你最有利。

------------------------------------------------

Q22052：

龔老師你好，我今年31歲，月入二萬五，月存二萬，手持8份儲蓄保險，有啲五年期，有啲十年期，有啲三十年期（大約150萬左右），

有七十萬流動資金，另外有三十萬買咗股票，但坐緊艇包括:

9988（200)$280買入
175 (2000)$31.5買入
1810 （1200）$29.5買入
0066（2000）$38.9買入
1801 （1000）$90.6買入

龔老師我二年後想買樓，想用呢70萬用二年時間滾到100萬，請問有咩建議。麻煩指點迷津

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你持有股票，都係有質素，長線持有係無問題。但信達生物（1801）仍處於燒銀紙的狀態，不確定性好大，暫時唔建議加注。

我地投資股票，其實等同投資一間企業。希望透過其自然增長，以達至財富增值的目的。所以，我地投資一定要較長時間。而2年只算係一個短時期，股價好易出現波動，增加回報的不確定性。

因此，你這70萬不宜作太高風險投資。我建議用盈富(2800)，再加收息股作為組合。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那70萬資金，你可以先用一半，以"分注"形式慢慢入貨。餘下一半就等大跌市機會出現，才大力度掃貨，並長線投資。

但這個組合增長力，未必足以2年內由70萬滾到100萬。但佢勝在穏定性較高，在只能投資2年的情況下，這個配置會較為穏當。

另外，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

你現時持有儲蓄保險，實在係太多。如果佢了一定時間的，你可以保留。但你還很年青，我建議你長線計，應該取消部份，將資金轉至優質股去做增值，會較好。

------------------------------------------------

Q22053：

龔sir，你好！有幾個投資問題想問。

1. 投資黎講，係咪唔應該買保險，或者唔應該買有儲蓄成份保險？

2. 按回報計算，應該買50年樓齡二手樓，還是一手樓？

3. 未來咩房型或者尺數更適合投資？

龔成老師︰

1) 答案係不一定。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大，即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。

儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

2) 一手樓，好多時都會有一定溢價，變相令你買貴貨，影響長線回報，所以我一直都唔係好建議買一手樓。

至於50年樓齡二手樓，由於已有一定樓齡，除了本身保養成本會較高外。向銀行貨款也較困難，因此投資價值都較一般。

2個選擇，其實都唔係咁理想。除非50年樓係好平，租金回報率又高，而且係一些大型屋苑，才值得考慮。

3) 房型其實無特定，尺寸最好至少有300呎，可以附合到一個家庭的最低限度需要，投資價值會較好。

其實我地投資一間物業，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

------------------------------------------------

Q22054：

你好 龔sir，Follow左你嘅post都有一段時間 我亦都睇左你嘅著作「財務自由行」「80後2百萬富翁」「股票聖經」「50隻潛力股」最近4月中更參加左你加「投資陪升股課程」剛剛都畢左業

其實我一直都想理財 覺得你講嘅理論好實用及貼地，好有循序漸進嘅思維。

老師你所教嘅方法都係由你經驗所堆積出黎嘅結論 炒股散戶10個有9個都輸 你教嘅長期持有優質股其實先係最快嘅捷徑！

我雖然開始理財或接觸真正理財只有半年多啲 但思維上我確實改變左 而我起碼已每日記帳已維持左大半年 而每月月尾也會檢討 (先發現原來自己成日駛好多無謂錢 !) 多謝阿SIR!

老師 就我個人情況 我有幾大重點想請教 先講我背境

今年34歲 未婚沒有仔女 每年有年終雙糧及花紅 年薪為一百萬多啲

換左樓 樓價700萬多啲 做按揭9成 月供約24k 每月可儲到16k 左右 當中10K放左係月供股票

1. 現金約有450k 放左係買樓是「高息戶口 」約 1.4% PA – 都係聽阿SIR教導 留番D現金當做BACKUP 及緊急用錢 – 見戶口又有少少息 所以暫時放係度

2. 股票約有 450k 全部都係2-3月入
788 - 10000股
823 - 400股
1177 - 4000股
1448 - 2000股
1833 - 400股
1928 – 2800股
1972 - 5600股
3067 - 6000股
3918 – 2000股

3. 月供股票 每月10k – 由本年3月先開始供
00175 – 2k
00700 – 2k
01211 – 2k
02800 – 2k
09988 – 2k

4. 沒有其他兼職及副業

問題：

1. 目標 40歲前有1000萬 以上咁樣執完條數好似都未有咩FEEL 想請教阿SIR有咩建議可達到我目標?

2. 計過月複利息回報 上堂提到10-15% 已叫做好理想 但依個都係參考% 點可以令自己既增長穩定D？見住自己D投資上上落落 我連唔蝕都無信心 應該點好

3. 調整緊股票係6:4 水桶1 vs 水桶2 - 一直都賣咁D 1972 而放入D水桶1度 但見住D水桶1好似都無咩升 無咩信心做到阿SIR講既每年10-15%增長 想請問應該點調整好?

4. 因為我工作時間都叫自由 亦都放星期六, 日 但我問題係真係無咩特別興趣及嗜好 點樣先可以令自己多D興趣 從已令自己多個機會有個副業或兼職 我依家只有打工一份收入 好似好危險咁

5. 自己打算2022年結婚 係緊急用錢度預算300k黎用做結婚 都打算結完就生小朋友 如結左婚及生小朋友 應該點調整以上所有策略?

6. 年年交稅都10幾20萬 好肉赤 有咩方式可以減少 或更好處理方法

最後想問阿sir你係咪真係有開到糖水鋪？哈哈 我要去幫襯一下 ! 謝謝

龔成老師：

我不會公開你的名，不過問題會放上網，等更多人能學習。

1）你現時的理財不差，配置平衡，同時配合你的年齡情況。但如果要去到$1000萬，就要再加努力，因為你現時每月儲到$16000，一年約20萬，就算計及投資回報，以及你現時持有的資產去增值，要滾存到$1000萬都不易。

除非你之後用一些較進取的方法，例如集中投資潛力股，以及自己發掘潛力股，早市場一步找到，投資並得到數倍計的回報，就有機，但這要你付出較多，你要每星期花大量時間去尋找潛力股。

2）我地最重要睇長期回報，目標一年有10%-15%，但不用每年睇，而是睇長期的平均，你已經方向正確，保持進行就得。

只要你多做功課，全面了解企業，以及其增長力，就會好有信心。

3）你要睇長期，你的思維仍停在短期股價。其實你要睇「企業成長及價值」先得。

4）你要多了解自己。如果唔知自己想發展D乜，就「試」，有時試試下，你就會更了解，例如試下做小生意，找一些你平時不會想過做的兼職，唔好浪費左你的時間。

如果無野做，就花多D時間去研究企業，睇年報。

5）最重要是你預留$30萬以上的現金，餘下先投資，由於2022年與現時已接近，因此這$30萬不宜投資。

只要預算要結婚的資金，準備好。餘下資金就算進取少少，都無問題。

6）如果有需要，就開公司，當然你最好問翻會計師佢地的意見，現時公司頭$200萬的盈利，交約8%稅，比高薪打工仔交的稅仲少，你可以上網了解下。

------------------------------------------------

Q22055：

龔成老師你好，我想问下7522只股，当时听朋友介绍买下7522，平均价为3.75买入8万股，这股现在一直向下，我应该怎樣处理，是否应该溝貨，还是走货？请賜教。

这只股會否會跌倒变费纸的

我不憧买股，这段时间看了你的视频，知我买的股亂七八糟，有909、9888 全部虧損。我有一百万來投资，现在用了一半，我应怎樣重新组合，麻煩晒。

龔成老師︰

你先要緊記一個好重要的概念，我地買入一隻股票，一定要知道佢質素、行業前景、財務狀況等，才去投資。

唔好聽朋友講、或者聽消息，就去買貨。如果你連隻股票背後買什麼、公司如何賺錢、行內有什麼優勢、點解未來有發展和增長潛力，都答唔倒自已，咁就要停一停，唔好投資住。

ＦＩ二華夏納一百(7522)投資目標是提供在扣除費用及支出之前，盡量貼近納斯達克100指數每日兩倍反向表現（-2x）的每日投資業績。

如果納斯達克100指數跌1%，你就會獲利2%(另扣管理費)。但若然納斯達克100指數向上，你就會虧損。

我對這類產品有保留，納斯達克100指數在過去一直反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

其實，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

明源雲(0909)和百度(9888)都係偏向潛力股類型，都係有長線投資價值。若你係年青至中年人士，只要唔係持有過多，可以守。但若佔你佔合較多，最好沽出部份，去平衡一下風險。

若你對投資知識不多，我建議你先用月供去儲貨。現在你每月先用5成儲蓄做月供。其餘先儲起，用一邊月供一邊儲蓄的策略。

大市現處於合理水平，餘下50萬和每月儲蓄，就等大跌市機會出現，才大力度掃貨，並長線投資。

若你現時組合，只係得1,2隻股票，我建議你都將部份股票，換碼至上述優質股，令組合風險可以更分散，整個組合也會較健康。

------------------------------------------------

Q22056：

老師，我近期抽到白居二，想購入沙田愉翠苑，為小孩的校網作準備。

問題1. 三房盤唔多，呢期成交量又高，價錢有的癲，三月至今升了12.3% 有的單位價亦企得好硬，心怕而家唔安排，睇定啲遲下連盤都冇！借問一聲，你有何看法？

問題2. 看新聞明年會加息，我究竟用H息口好，定用P息口好呢？

人生第一次 去選擇買樓 這麼重大的決定，真想跟老師分享

有睇中到盤, 但價錢不到位,預700-720萬, 睇中單位為740萬，在想要不要去馬, 怕錯過左, 之後就冇合心意的盤...

老師...求你指引我...

龔成老師︰

1) 本身三房這類大單位，供應係較少，故價格較敏感都係正常。雖然佢近期升左唔少，但由於白居二始終跟市價，有一定拆讓，故有一定吸引力。

加上這個是你自住房，考慮重要主要係是否配合「你長線生活需要」和能否做到「供得起」。如果係無問題，你都可以考慮入市。

2) 明年是否加息，暫時都係一個問號。以現時狀況計，H息會較好。但政府規定，居屋只能用P按，故你其實無得選擇。

------------------------------------------------

Q22057：

老師你好！我係你股票學生，完最後一課，感受到老師的愛心同努力，一星期兩晚3-4小時站立不停講課，課程內容非常豐富，非常感激, 辛苦你了。

另外，想請問之前不懂股票，自己又想穩健及有利息，買了：

恒生銀行 。3500
匯豐銀行。4400。
領展。$2000。（月供）
盈富基金。$3000 （月供）
小米。200
瞬宇光學。300

其實之前買匯豐恒生作收息，其他是認識你後才購入。我知道要減持銀行股，請指教應該怎樣保留。謝謝

龔成老師：

你現時較大的問題，是銀行股較多，你不要再增持這類，你應該溫翻第2堂的筆記，慢慢調整翻一個適合你年齡及風險承受程度的組合。

我會建議你過1年後，經濟好翻D，匯豐（0005）上翻D，減持部分，餘下就慢慢減，直至去到適合你配合配置的比例。

至於恆生（0011），質素比匯豐好，因此留低的比例不較匯豐多。

至於其他選股，其實無問題的，都是一些有質素的股票，你持有無問題。至於月供部分，你可以長期進行。

------------------------------------------------

Q22058：

老師 我抽中白居二 但而家二手樓市都好貴

但唔利用今次機會又怕再抽唔到
你覺得其實買公屋（eg 華貴邨）有你升值潛力？

樓齡29年 - 但好似有地鐵2026年華富有地鐵。

另外一係買私樓 要承擔有機會租唔出時 要俾供費 ，心目中係天水圍wetland seasons bay.

主要都想升值 搵到錢 可以財務自由！

你點睇呢兩個選擇，我知都幾大分別.....

龔成老師：

從自住的角度，你好好運用白居二會較好，公屋在投資角度的價值不及私樓，但從自住角度，其實可以考慮，因為你能以較少的現金流支出，解決了自住方面的問題，你就可以有較大的餘下現金流，去進行其他方面的投資。

華貴邨在地點不差的，港島區始終近中環，但地鐵相信有排先起好。因為佢要拆左華富邨，安頓好原本的居民，之後先用地鐵一整發展，相信要10年時間先落成。

華貴邨在公屋裡，算是有質素的，但不是大升類，只是平穩增長。如果你從自住的角度考慮，不是不可。

------------------------------------------------

Q22059：

龔 Sir，現時持有：

1000 股 9988 @$213
4000 股 1928 @$36.9
120,000 股 728 @$2.58
2000 股 941 @$48.7
30,000 股 3033 @$7.9

請問對此組合有何意見?建議加入金股，車股到組合?

現時買 7299 定2840 會較好?

龔成老師：

你現時持有的股票，基本上都是有質素的，其實問題不大，你持有就得，部分股雖然略有回落，但長線有得守的。

但你長遠，最好建立一個更平衡的組合，同一股票，最好佔組合比例15%以下。

你可以加入ＳＰＤＲ金ＥＴＦ（2840），這是一隻追蹤黃金價格的交易所買賣基金，當金價上升，佢都會上升，當金價跌，佢都會跌。

睇翻佢過往的價格表現，基本上都追蹤到黃金的價值，因此都可以成為投資黃金的工具。

只要佔組合比例不過多就得。

------------------------------------------------

Q22060：

想問，其實如果我長揸6666，唔會會可以上番去呢？

好驚佢會爆煲啊，到時渣都冇

龔成老師︰

若母公司出事，的確有機會出現，母公司要沽出恒大物業(6666)股權套現還債的情況。如果真係出現，的確會令股價受壓。

但你要記住，我地投資係睇長線，和企業本質。恒大物業(6666)負債情況，無母企咁差，加上物管行業，預期未來會發展得唔錯，因此有投資價值。

不過，集團大部份物業，都係來自母公司。故母公司出問題，令發展減慢，有機會會影響到集團發展。

當然，這些都是未知之數。以現時狀況計，恒大物業(6666)都有投資價值。如果你真係較擔心佢前景，你可以沽出部份，去平衡風險。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16941-Q16960）

Q16941：

老師：本人今年37歲，由20歲左右開始買賣股票，但埋單計都係賺得唔多。因本身對股票知識唔多，直至近排接觸到老師fb專業，了解到長期持有先係致勝之道。(比好多人遲左好多年先起步)

本人月入34k, 工作穩定，已婚有一小朋友，有一單位作收租用途，租金夠每月按揭支出，扣除開支，每月可儲20k, 另有45萬儲蓄，現只持有少量美股。

1) 請問老師我呢個年紀，如想投資股票增值財富，應該投資落邊d優質公司/應該怎樣投資？

2) 另我已閱讀老師的<股票勝經>,請問仲有冇其他書會較適合我增加對股票知識去選取優質股？

3) <股票勝經>中有介紹要計算一間企業價值，從而計算股票合理價格，最簡單是否總資產減去總負債，再除以發行股數？

謝謝

龔成老師：

1）你這個年齡，財富仍是增長期（當然不是進取模式），所以可投資平穩增長股，同時加少少潛力股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。唔建議太大注，同時最好回翻D先入。

2）《選股勝經》《年報勝經》《50優質潛力股》，以及有關巴菲特相關的書，都可以睇。

3）這是其中一個計算方法，是針對企業的資產價值，但唔好只盲目去用，因為現實中，市場並不是用$1的價格去買企業$1的資產。同時，投資者一定要配合業務價值去分析，有些資產是不值錢的。

------------------------------------------------

Q16942：

龔成老師你好！ 我有3個問題想問你嫁

1. 我係股票新手 一直有睇你投資分享 都知價值投資係好 但係早排因為個市跌 做左個錯誤決定 就係入左反向工具，2700股 7500 （買入價7.857） 想賺少少 點知個市就升到咁 而家好迷惘 唔知應唔應該放左去好 驚放完個市先尼跌... 想問下你意見 點樣睇幾時放好

2. 我今年25歲 目標係30歲買到樓 現時有10萬現金 每個月有一萬蚊可以用尼儲/投資

現時持有股票
1手阿里巴巴
1手長江基建
1手比亞迪

月供緊
每月 $2000 盈富（現時有903股）
每月 $1000煤氣（現時有531股）

請問現時呢個投資組合能唔能夠達到我目標，有咩可以改善？

3. 遲啲想入港交所 合理價位大根係幾多？

唔該晒

龔成老師：

1）無人一開始就識投資，我自己最初投資時，都是炒炒賣賣，輸左幾年錢先識晒，之後用「價值投資法」就開始賺錢。最緊要識得從中學習。

你這類估市走勢的方法，並不是真正賺錢的方法。建議你賣出止蝕，之後就唔好再用這類方法。

2）現時持有的，都是有質素的股票，可以長線持有，至於月供，都可以保持，你可以加大少少月供盈富（2800）的金額。

你現時的組合有平穩增長效果，以你現時情況，30歲可滾存到$80萬-$120萬，要視乎你這段時間的投資。其中一個關鍵位，就是如何有效運用現金。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

3）港交所（0388）是優質股，不過現價開始有少少貴，你預跌翻10%會開始合理。

------------------------------------------------

Q16943：

龔老師，您好！

現年50多歲，持有以下股票多年，請問這幾隻股票是否適合繼續長線持有？
或建議轉哪股票？

939 建行
941 中國移動
2628 中國人壽
2823 A50

龔成老師：

以你的年齡，其實已開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

隨著年齡增加，慢慢增加收息股的比例。

上述的股票，其本上都有質素的，可以持有。

A50（2823）是平穩增長。建行（0939）、中移動（0941）是收息。

中人壽（2628）的質素不及平安（2318），你可以考慮轉平安，而平安是平穩增長型。

只外，由於你較集中在中資，可以考慮加翻少少香港類別的股票，地產股這刻都有投資值博率。

------------------------------------------------

Q16944：

龔SIR早晨, 我想問下呢, 其實點解有D股既股價會波動得咁勁,幅度又大, 但有D股就相對地平穩D ? 例如388港交所我見佢波幅都幾大下,點解呢? thanks

龔成老師：

每隻股票的特性不同。本身的業務、市場對佢的睇法、市場資金流動、熱炒情況。

買股票就是買企業，如果企業業務穩定，企業價值變化就會較少。相信，當業務變化大，市場對佢的想法都可以有較大變化，股價自然較為波動。

當某股或某行業成為市場焦點，就會有較多資金流入流出，股價的變化就會較大。

------------------------------------------------

Q16945：

你好， 我係一個零投資經驗的人 28歲 ,月入萬五左右 , 預可投資5000左右 , 睇左你幾個post 都係話簡盈富 base on 反 我e 個case 係米都係簡盈富好？

同埋應該宜家開始定等多幾個月等疫情同社會狀況比較好才開始較好 thx

另外都有買緊儲蓄保。。。
係米都係買月供股前景會好d

龔成老師：

對於投資初階者來說，盈富（2800）是很好的工具，第一，你未有選股能力，投資一個組合（盈富），就是買入50隻股票，風險得以分散。

加上這些股票，基本處都是有一定的質素，以及有平穩增長力，因此會適合你投資。

由於月供是一個長期的過程，因此，你已經可以開始，長期進行能有效將買入價平均，減少風險。

儲蓄保在理財中，有防守的作用，但你唔需要買太多，夠就得。你28歲，是財富增長的時間，應該將較多資金用於進攻。

------------------------------------------------

Q16946：

你好 我現在仍是學生 但有返下兼職 暫時草到$20,000 可以投資

我應該點樣投資好？ 還是再草多d錢先？

因為我暫時睇中的有 02382舜宇 ,00823領展依2隻股
你認為依2隻股買得過嗎？

如果買得過 我應該點樣分配 ， 那個價位合理買入 和那個價位算是平宜區
我都打算長線投資

還是有其他股推薦？
謝謝

龔成老師：

如果從理財的角度，你應該保留現金，等多少少現金先開始投資。

但如果你想多學習，以及你本身都可以承受到少少風險，這樣，你可以預留$5000-$10000現金，餘下的資金就可以進行投資。但唔建議你這刻用盡現金，因為大市並不是特別平。

舜宇（2382）、領展（0823）都是有質素的股票，你都可以投資，現價合理，可以進行。如果你想較平價買入，可以等佢跌多約10%。

另外，你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q16947：

龔成你好， 我同女朋友 (26及24歲) 現有資產包括現金約$150k及以下股票: -

0003 562股
0005 4,340股
0012 400股
1038 1,000股
1843 84,000股
1871 8,000股
2800 2,000股
2888 800股

我地每個月合共可儲~$18k (未扣除月供金額)，並於2019年12月開始月供股票 ($14k)，由於疫情及國安法等不穩定因素，加上我地兩三年後打算結婚/買樓，我地打算修改月供金額($4k) 如下: -

0012 $2k --> $1k
2800 $8k --> $2k
0003 $4k (2020年4月開始供股) --> $1k

另外，我地打算將80%現金作定期存款。

1) 請問你對我地 (i) 修改後嘅月供金額同比例，及(ii) 作定期存款嘅現金比例有咩睇法或其他建議?

2) 假設我地之後收入有所增加，多咗嘅錢應該再投放落月供 (建議增加邊隻股金額，或增加邊種股票種類？)，定係定期存款呢？唔該晒！

龔成老師：

你地現時持有較多的銀行股，而當中的增長力不強，未必適合你地這年齡，暫時唔好再加注在這類，到日後股價上升後，可考慮賣出部分，將資金比例投資在有基本增長力的股票。

1）(i) 盈富（2800）無問題，修改後可以進行。但恆基（0012）與煤氣（0003）是同系。你可以供恆基，同時供其他股。

(ii)至於現金方面，小部分可以在這刻投資，但宜留下較大部分。

銀娛（0027）、港鐵（0066）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

2）由於你2、3年後要用資金，因此唔能夠全部投資股票，你都要適當地留有現金。至於餘下的部分，你可以投資盈富及上述我介紹的股票，都可以。

當然，具體選股要睇翻你收入增加時，到時的市況。

------------------------------------------------

Q16948：

龔成老師你好。想請教一下，匯豐這隻藍籌股，早年「高價」$76時買入了3手，現在實在慘不忍睹，我應該如何做？

有計劃趁低吸納再買一些。是因為疫情暫時停工，但又不想坐食山崩，請教一下意見。

龔成老師：

唔好單單因為想「拉低平均買入價」而加注。

匯豐（0005）賺錢能力與增長力，已不及過往年代，你只能視佢為收息股，唔好對股價有太大期望。

所以，你要分析翻，現時你加注入這股，目標一定是「這筆新資金想收息」而不要期望對增值有好大作用。另外，同一隻股票與行業，都唔應該佔你組合比例太多，你要注意翻。

另外，如果你現時未有工作，在投資上唔好太進取，應該留一定的現金。如果想投資收息，可以建立一個「組合」，而唔好只集中在個別1、2隻股。

------------------------------------------------

Q16949：

你好，請問現在3690值得入嗎？

龔成老師：

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，發展力有，但估值難，市場對佢的睇法不一，這一定會令股價十分波動。

只可以話現價唔平，但貴唔貴，的確好難講。如果投資，不是不可，但就只能在現價小注。

------------------------------------------------

Q16950：

老師你好，本人23歲，剛接觸投資，打算7月開始做月供股票，每月供$12000。請問以下選股及金額分配合適嗎?還有更好的月供組合建議嗎?

盈富(2800) $4000
港鐵 (0066) $2000
恆基 (0012) $2000
港交所 (0388) $2000
金沙中國 (1928) $2000

另外想問港交所現價的估值有點貴，其他則合理。若果下月價格沒有回落，是適合開始進行月供的時機嗎?

謝謝。

龔成老師：

你這年齡，是財富增長的年齡，你可以投資平穩增長股及潛力股，上述都是平穩增長股，如果你之後有更多投資知識，可以加翻少少潛力股（因為這類股都要求你有一定的分析力）。

上述的股票，可以進行，分配都無問題。港交所（0388）你都可以月供，但可以減金額至$1000，長期進行，如果出現回落，先加翻至$2000。

最重要是你每月，除了月供外，能夠餘下一定的現金。

以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16951：

阿sir 你好。本人今年35歲沒有投資經驗一年前開始看你的page，覺得得真的太遲認識你，小小問題希望你能指教，謝謝

本人買了你所有著作， 當中80後百萬富翁真的令我獲益良多，相逢恨晚， 而50收息股等著作對我幫助很大，很方便我這些懶惰的人尋找股票首先多謝你， 本人在50 收息股中選擇了很多房託作為現金流

一）：當中置富產業信託和朗廷，冠君產業下跌了很多令 本人十分擔心希望老師能指教這幾隻股票還能保留還是需要換其他銀行收息股

二）： 在50倍升股中本人選了比亞迪和天鴿互動，唐宮中國，華潤醫院作投資用， 但當中天鴿互動和唐宮中國跌了很多 這兩隻股票有得守嗎？

我嘗試看年報天鴿互動的盈利每年不斷下降中，是否已脫離倍升股的行列？ 而唐宮中國有授出獎勵股份是不是 會影響原有股東的利益？

三）： 領展 和長江基建 我聽股評人說平均價80元和60元可大手買入， 這兩股能有機會會到80元和60元嗎嗎，還是我需要止蝕？

四：） 本人數年前得到一筆資金$900萬元，現在月入一萬， 現金400萬，股票300萬，不用供樓，本人打算用四百萬投資收息股退休， 希望利息能有兩萬元， 月用一萬，一萬供股票 ，300萬用來增值， 十年後能有機會有一千萬嗎？

謝謝老師， 祝老師一紙風行身體健康

龔成老師：

1）這都是有質素的股票，香港的地產，中短期當然會較弱，但長遠來說，仍是有價值的，你可以持有，不用擔心。

2）天鴿互動（1980）質素的確有少少下跌，這類股業務其實有不確定性，不宜大注。而當大環境變化時，佢的增長力都會減弱。如太多要減持，餘下小小可守。

唐宮中國（1181）有得守的，佢面對中短期不利，長遠仍是有質素，但增長力有可能比過往弱左，因此唔好心急增持。

3）領展（0823）、長建（1038）都是有質素的股票，不過中短期都會較一般，但長遠的價值仍在。現價合理，可分注投資，上翻$80及$60，要較長時間。

4）以你的年齡，唔需要太快投資收息股，反而可以投資有增長力的股票，只要你建立平衡組合，投資優質股，就可以了。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

反而你可以考慮，現金$200萬，股票$300萬，然後將部分資金，投資物業。其實，這是一個財富配置的過程，你應該將資金，建立一個更平衡的組合。否則會太集中在股票類別。

只要你分配平衡，並不進取，只投資優質的項目，其實在風險的角度，會更好。

------------------------------------------------

Q16952：

龔sir你好，小妹依加工作上遇到瓶頸位，想問下你意見。

事源係我本身做緊關於美容行業(美睫師)，之前學左另一樣新技能(紋繡半永久)。

因為依家在職公司冇哩個服務提供俾客人，所以我係其他地方俾錢學嘅，算係增值自己，投資自己嘅一種。

因為公司薪金其實吾會有太大加復，所以學左新技能就去見左另一間公司(比較小型嘅公司，本身做緊果間公司未辭職)。當然明白新入行新技能人工開頭會低小小，好多野要重頭嚟，加上依家環境經濟吾太好。

而不久前我係ig建立左個igshop係賣自己嘅美睫服務，不過岩岩起步未有好多客。本身打算一邊翻工，放工放假再自己接客做，嘗試發展自己事業，但依加經濟氛圍差有小小難起頭。

而另一份工請咗我，提供到一個平台俾我練習到我所學嘅技能(半永久全套包括美睫)不過人工當然少過依家。

因為我係屋企經濟支柱，家中兩老冇工作，退左休，所以我煩惱緊應該要點做好。

方法一: 辭依家份工，轉公司，開頭人工低d，要捱，但有平台練習手藝

方法二: 繼續做依家份工，收入高小小(比較另一間公司入職時)，繼續慢慢發展小小嘅創業路

文字小小長，期待你嘅回覆

龔成老師：

我會比較建議「方法一」，我相信你已經找到你的方向，問題是怎樣實行會比較好。

如果你現時手藝未算強，而長遠你又要在這方面發展，你就應該去一個能助你成長的地方。

你可以一邊跳去另一間公司練習手藝，同時間，並行進行自己的網上平台。雖然中短期會比較辛苦，但長遠來說，這是較易得到成功的。

如果你擔心收入問題，就唔好太快辭去現時的工作，等你在這份工儲多少少錢先，之後有現金在手，較安心時，才跳去另一份低人工但學到野的工作。同時在這段時間，努力發展網上業務，希望可以提高收入。

------------------------------------------------

Q16953：

老師，我上年上左你的股票班
首先好多謝你教嘅正確投資態度
所以呢排好波動都未有話好驚

不過呢幾日嘅社會同國際發展真係令我有啲擔心
我手持一定數量匯豐(00005)

上完堂知道佢唔算係太優質不過平穩收息，所以前排開始跌時都再有入

到佢話唔派息，我都唔係好擔心因為我認同係長線投資
亦記得你話唔好有止蝕心態變咗喺最低位沽

但呢排美國同中國（當然更加係香港）嘅關係變化
我開始驚係咪佢最基本嘅價值都有所變動
我想請教下你嘅意見，睇吓應唔應該開始放...

龔成老師：

好呀，記得多溫書、用評估表。

你最緊要睇翻，匯豐（0005）佔你組合的比例，是否適合

首先，這只是收息股，增長力有限，你要問翻自己，想水桶3的佔比多少，同時，就算是水桶3的部分，都要建立平衡配置，唔好只集中在一隻股。

香港的確存有變數，但暫時睇，情況未算好差，國際對香港都是不好核心性的改變。匯豐仍可以持有，作收息，但就要睇你想的比例分配。

（簡單來講，你唔好睇賺蝕數，而是睇你想這股佔你的財富比例）（另外，由於這股優質度不算最高，因此唔好持有過多）。

------------------------------------------------

Q16954：

老師，我想問問，我看地產(1113)及物管公司(0808)沒有明顯的質素改變, 為什麼股價還是受壓?

是因為市場對以上兩種行業發展前景唔理想嗎?

龔成老師

長實集團（1113）有質素，不過市場擔心香港的經濟，會影響賣樓等情況，因此地產股都會有中短期的影響。但相信這只是中短期，長遠來說，企業仍是有質素的。

至於泓富產業信託（0808），這是房託，主要是透過收租來賺錢的，業務穩健，只是中短期市場睇淡，長遠來說，都是不差的收息股，有投資的價值。

------------------------------------------------

Q16955：

請問如何判斷再次入手同一隻股票既時機，因為我新手之前入左一手中銀香港

依家見佢趨勢好似唔錯想打算入多一手，但中途入多手係唔係唔多適合？唔該你

龔成老師：

首先，你要再次確認這股是否優質股，質素上有無改變。另外，你唔好比過往曾經的買賣影響左，要視為現時重新建立這部分的財富組合，以「新」的角度分析。

考慮翻這股的質素，以及平貴，去衡量是否適合買入。中銀香港（2388）質素不差的，現價合理。

------------------------------------------------

Q16956：

老師，我有一個問題，可能比較愚望老師不要見怪，你說要買入企業，著重企業的長遠發展。

那麼老師我想問，如果成為該有長遠發展的企業的大股東不就能賺大錢嗎？那麼嘗試創業又是否可行？

龔成老師：

當然可以。

首先，如果是已上市的企業，如果有質素，你要成為大股東，就要好多資金。（這是一個購買資產的過程）。

另外，如果自己創業，你要建立到一盤有價值的生意，並不易，你可以試，如果成功了，你會得到巨大的回報。（這是一個自己創造資產的過程）。

------------------------------------------------

Q16957：

Hello 龔sir , 我今年31歲，月入約$30000，任職小學教師。我每月$6000家用，供樓$15000，負債$4000(當中$1800仲有兩個月還清

其餘是之前問銀行另借貸款差額做新樓上會)，兩個月後，每月可儲現金$2500。

由看你書本開始投資有差不多2年，經驗不多仍實踐學習中，另外之前入左一手9988@$197和11@$133.7 。另外月供股票$6000如下:

2388 @$1000, 1211@$1000, 66@$2000, 2800@$2000 (到現時共儲左$80000，因供樓和其他支出後就斷供左,隨後等太太有餘錢後會再月供)。

太太月入$20000，因她要兼顧娘家和借左娘家$30萬作首期，所以每月給回娘家後暫時難以有餘錢儲蓄。

想問

1）如果我每月儲現金$2000，到儲有一定現金後應如何部署，點樣投資好呢？留多少現金做後備作生活用較穩陣?(投資方面，想平穩增值得較快。)

2）另外，我仍有$70000現金等待發展商回佣給我，應否投資美股，以作分散投資，作出突破?

3) 由於我現時工作是不穩定的，每年要看學校開多少班才決定去留，相信現校因之前擴班可頂多3年，所以我都盡力借助現職的薪金去投資。想問在這個情況我應如何作出突破?

(目標: 就算如此，我都已努力向財務自由目標進發，並體驗到長期這樣擔憂每年工作都未必有用，因此想趁在職有薪金期間，鋪定路作出突破。)

謝謝你的耐心教導和解答，希望唔好嫌我太多問題去問，而我一直都追隨著成哥並加以學習為榜樣!! (已買埋年報勝經了)

龔成老師：

1）由於你現時有物業，供樓中，因此你最好留有一定的備用現金，你要假設一些情況，例如收入如果在短期內大減或無收入，現時的支出如何，這就要你有一定的備用現金。一般都是你每月支出的3-6個月，視乎你個人的情況而不同。

2）可以。

投資香港以外的市場，可以令你的組合更為分散，不過，你一定要對所投資的美股有認識，如果不懂選股，就投資指數基金，如領航標普五百（3140）。

3）你現時有工作，最好是「一邊工作，一邊發展自己的事業」。雖然這會辛苦少少，但就是最好的方法。

你要利用自己教育方面的專長，然後在這幾年內，想出一些可給自己長遠發展的方向。

當然，如果你長遠都是想打工，想有穩定收入，你就可以利用這幾年時間，盡力「提高自己的身價」，令自己更有「市場」的競爭力，而不是只留在原有的工作位置。

------------------------------------------------

Q16958：

你好 龔成老師
本人26 歲 月入17k
手上現金7萬
現持有以下股票 但眼見股票一直下跌 想尋求你專業意見 你覺得應繼續持有以下股票？

00005匯豐
[email protected]
[email protected]
[email protected]
[email protected]
[email protected]

000939建行
[email protected]
[email protected]
[email protected]

000435陽光
[email protected]

龔成老師：

第一，你唔應該見到股價一直跌而不斷加注，最重要是賺翻該企業的業務本質，以及應該佔你組合的比例。

第二，你太過集中在銀行股，其實一個行業的佔比，去到你股票組合的30%已夠。

第三，匯豐（0005）、建行（0939）、是收息股，你26歲，未必最適合。

陽光（0435）可以持有。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你可以慢慢調整翻手持的股票，建立一個更平衡的組合，等佢上翻D其實已可以開始賣出，轉其他。最簡單就是盈富（2800）及其他有穩定增長力的優質股。

至於現金方面，暫時就持有現金先，比例上可以。

------------------------------------------------

Q16959：

龔成老師你好，我今年30歲，月入兩萬五，我的家人在去年過身了，留下了一些股票。

由於本人不是太熟識股票，但眼見它們的股價越跌越低，不知道如何入手，朋友介紹說龔成老師可以給予一些建議，希望老師可以指點一下應該如何部署？

IT (0999) @6.23
中國人壽 (2628) @27.4
中國中車 (1766) @19.4
招金礦業 (1818) @15.6
HSBC (0005) @55.6
中煙香港 (6055) @22.8
中信証券 (6030) @33

謝謝老師

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

所以，你唔好太大比「買入價」這個因素影響，反而要睇翻企業的質素，以及佢在你組合中的比例，如果較優質的，持有比例可較高。

上述的股票，大部分的優質，算是中等，不算差，但又不算好好，這類股不會持有太多。

IT（0999）中短期風險較高，香港經濟好轉後，仍股價都會好轉，但不要預期上翻你買入價。同時這股不建議持有太多。

中人壽（2628），有質素，可守，但增長力未必有過往咁強。

中國中車（1766）、匯豐（0005），平穩類股。收息可以，但就唔好對股價有太大期望。

招金礦業（1818）是商品企業，質素不算好高，投資價值中等。

中煙香港（6055）有獨特性，可持有。

中信証券（6030）只是一般，唔好有太大期望。

如果你想財富有較大的增值，可能慢慢將上述股票，轉成較有增長力的股票，或盈富（2800）都可以。

------------------------------------------------

Q16960：

你好，1826我1.9買的...而家跌左9成！
現在應否溝貨..還是放棄

龔成老師：

旭通控股（1826）主要在香港從事提供金融相關信息及技術服務；改建及加建工程、維修、專門工程及新發展工程之承包服務、項目管理及提供建築諮詢服務。

業務的獨特性不強，這類股估值不會太高。

過往每年的盈利平均約$2000萬，現時市值$2億，現價是合理價，股價已經無可能上翻$1.9，因為$1.9即是市值$20億，以每年賺$2000萬的企業來說，無可能值$10億以上。

現時的$2億是合理價，但由於企業的獨特性不強，無必要用合理價買入一間普普通通的企業，不如將資金投資其他企業更好。

唔好比過往的投資限制左自己，無意思的。最好在反彈後賣出。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。