［101］傳Amazon拆股摶入道指，但點解要拆股先入到？道指又點計？又有幾低能？

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折

TLDR：拆細可能有誘因，但，真係要入道指？

1. 雖然好多嘢寫，但都寫埋呢單先。話Amazon會拆股，今次業績就會公佈。咁今次業績係幾時？係美股星期四收市後，即係香港星期五天光之前。

2. 呢單都幾神奇，早幾日由狐狸台記者Charles Gasparino獨家爆料。冇乜詳情，只係引述消息人士，話會令到光頭佬Jeff Bezos拋離 Tesla嘅Elon Musk，更加鞏固首富地位云云。因為拆股就會令Amazon成為道指成份股。出完個 tweet後，股價即時彈咗2%，當然股票唔會話你知點解升。實情股票一年250個交易，有大新聞嘅可能得20日？

3. 會定唔會？好快你就知。不過即使Amazon冇拆股，記者亦可以堅持話「因為我篤爆咗佢先縮沙」，量子力學咁，觀測者改變埋個結果（嚴格嚟講：觀測者唔應該評論啦，你做實驗睇光子都唔會吹氣），難以驗證。

4. 呢個猜測一直都有，而近年大家知，蘋果拆過股，Tesla亦都拆過。Amazon會跟亦唔奇，而如果係做嘅，公佈業績時做埋亦好合理。

5. 更重要嘅係，Amazon之前亦都拆過三次股，分別係1997年，同1999年（一年拆兩次）。不過，亦都要問，對上一次拆股超過20年前，做乜過去咁多年唔做，而家忽然改變主意？

6. 先講記者答案：為咗有得入道指，進一步拋離Elon Musk．呢度就可以講多少少。冇錯，Amazon並唔係道指成份股。FAAMG之中，只有蘋果同Microsoft 係道指成份股，Facebook Amazon Google 都唔係。原因？我都唔知，你去問班委員，透明度好低的。

7. 肯定嘅係，雖然全部係「道瓊斯工業平均指數」，但並唔一定要工業股先入選。

8. 不過有一個問題，之前都講過（懶搵舊文），道指係十分古老嘅東西，清朝（冇呃你！）產物，差不多140年歷史。咁當年計算工具同而家爭好遠，所以佢啲嘢十分求其（下面會詳細講），亦因為顧及計算方便（＊）。之但係，為咗傳統，就咁多年都冇改，就出現好多問題了。

9. 有名你叫，道瓊斯工業平均指數，就真係30隻嘅平均。點平均法？最初就係30隻嘅股價，加埋佢，咪指數咯。易計嘛！清朝咋大佬，將就下啦。

10. 後來都差不多，只係多咗Divisor，你加埋晒30隻成份股嘅股價，再除返呢個Divisor．而家嘅Divisor大約係0.152（聰明嘅你可以諗下，點解會細過1，附注會答）（＊＊）。咁你問，點計呢個Divisor？可以寫多幾千字講，但實務上，Google 或者搵 Wikipedia啦！仲清朝咩！

11. 都話，撇除咗個Divisor影響，道指就係30隻嘅股價加埋一齊。咁戇居都得？就係咁戇居！有乜戇居？好簡單，你諗下兩隻份股，如果一隻而家500蚊，另一隻1蚊，咁有乜後果？即係1蚊嗰隻，基本上升幾倍或跌九成都唔會有影響。500蚊嗰隻？我升1%，對個指數等於你1蚊嗰隻升5倍！亦即係話，股價大嘅公司，對指數嘅影響力就大好多！

12. 冇錯，任何股票指數，都會有啲權重（equal weights嘅例外）（＊＊＊），weights，加權平均數，我年代中四定中五數學要學。咁你每隻成份股佔幾多比重，就各司各法了。

13. 一般現世做嘅，都係market cap weighted，頂多有啲調整。恒指係咁，標普指數係咁。但道指因為係清朝嘅嘢，就用stock price嚟做weight

14. 咁有乜問題？因為個「股價」per se，係冇意義的嘛！A公司股價高過B公司，不等於佢大過B公司喎。我升1蚊可能係100%，佢升一蚊係0.1%，點可以放埋一齊比？

15. 所以，之前蘋果咪有呢啲咁搞笑嘅嘢，原本在道指嘅比重大約係12%，一拆四之後呢，變咗比重係4%，係咪夠低能？

16. 講咗咁耐，咁同Amazon有乜關係？關係就大。一般相信，Amazon同Google，入唔到道指，就係因為個「股價」太大。我懶慢慢計，但而家道指最重磅嘅係United Health，股價4舊水，佔比重已經7% — 咁我放隻3500蚊嘅Amazon入去，加埋隻2400蚊嘅Google，其實係咪睇呢兩隻得了？

17. 冇錯，道指是一個很低能嘅指數，所以真係「專業」嘅都會講標普指數，例如你見比較啲股市表現呀，都應該用標普。唯獨咩情況會用道指？你見啲要做到好耐data嘅就會，因為標普指數係1957年嘅產物，戰後嘅事。

18. 而媒體照報道指，只係因為習慣，亦因為傳統。扯開少少，同樣地，恒指都係麻麻地，但當然已經後生過道指好多，所以冇呢啲問題。但你見「機構投資者」，好多都睇MSCI 香港指數—咁所以，你話港股咁多年冇寸進嘅，睇你睇乜指數啫。

19. 好啦，講咗咁多，如果Amazon想入道指，應該就一定要拆股啦（雖然拆左亦不代表一定入到）。之但係，有冇諗一個問題：入嚟做乜？又或者，搞咗咁多年都冇入，離埋婚拆多份畀前妻上埋富豪榜，都仲係首富，做乜仲要理咩入道指？

20. 記者講法話，可以令佢身家進一步拋離Elon Musk，我就唔知個邏輯在邊。即管當光頭佬會care，但點解入道指就會身家升？入道指股價就會升？似乎唔係好站得住腳吧。有都只係暫時，同基本因素冇乜關。仲要根本追蹤標指嘅基金大過道指好多。

21. 記住，David Webb（唔係講廣東話嗰個）提過好傳神嘅比喻：你個pizza切多幾切，唔會多咗啲（嚴格嚟講少咗添，餅碎又冇咗啲，把刀又痴實一啲）。

22. 你拆股，拆幾多次都得，但點會影響股價？呢個亦係我見親啲人話煤氣「送紅股」嘅搞笑。屌你，送紅股咪即係拆股！

23. 咁至於點解啲公司咁鍾意拆股？官方答案話，提高流動性。即係可能一手長實定騰訊定港交所 十幾廿萬（冇check），太貴，散戶買唔起咁。當然實際上，就同點解啲公司供股用埋啲仆街比較一樣，點解要咩13供5呀咁，咪會有大量碎股，咪可以搵鳩你笨收埋你。間間都係咁玩，包括匯控渣打。

24. 之但係，喂，美股係冇一手手架嘛！所以根本冇呢回事。咁點解仲要拆細？可能就真係為咗降低入場費：但，你問我，一股Amazon都係三萬蚊港紙有找，一股都買唔起嘅，不如都係專心讀書返工？

25. 但但但，時代唔同嘛，而家YOLO嘛，鬼佬連登仔嘛，咁你三千幾蚊美金一股，可能啲網友就真係冇乜動力咯。所以，講到尾，可能都真係吸到多啲散戶？

26. 又然後，美股雖然冇一手手，但如果啲股票一路唔拆，升到幾萬美金一股，咁咪變咗又係入場費好高？不過其實而家可以買Fractional share的（＊＊＊＊）

27. 無論如何，你睇到篇文時，應該已經有答案。你話睇咗咁多對你賺錢有冇幫助？冇乜，但咪識多啲嘢。況且，Patreon一早寫咗啲對你賺錢有幫助嘅嘢啦

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

（＊）正如有一段好長嘅時間（講緊我睇銀行股時都仲係咁！），中國加息減息係要0.27 0.36咁去的，十分低能。點解唔係0.25？因為 0.27 0.36 之類畀9除得盡，易計啲。咁你話9/365 咪又係一堆混吉？錯，佢地用360的。

（＊＊）開估：好簡單，因為啲股票不停咁拆，所以個Divisor要一路縮細先令指數在拆估前後冇變（呢度唔解了）。但點解股票不停拆？因為股票係不停升嘅。又學到嘢了。

（＊＊＊）冇錯係有equal weight嘅指數，美股都幾常用。但，equal weight咪即係全部權重都係1，一樣有。正如唔選擇都係一種選擇。

（＊＊＊＊）呢度真係要搞清楚，有人話Fractional share係碎股，完全錯。Odd lot 先係碎股。香港要一手手買，咁唔足一手嘅咪odd lot，你可以買1股港交所。咁你話，有乜分別？我可以買0.1股 Google，有乜分別？—分別就大啦。你渣住1股港交所，就係股東，你可以入場媽叉李小加或者歐冠昇，1股都係股東，根據我理解佢不能唔畀你入場。之但係，你渣0.1股Google，你就應該冇得入場媽叉皮猜。我唔100%肯定，但就我理解，渣住0.1股嘅唔係股東。法律上最低單位就係1股。你可以去試下。咁你話你唔使媽叉人唔使食西餅嘅，有乜分別？應該冇乜嘅。之但係，美股一股都買唔起嘅，我勸你都係專心返工讀書吧啦。

［The poorer you are, the more frequent that you see ghost］穆迪下調匯控（HSBC）（＊）評級喎，冇乜見人講？

TLDR：核爆級云云，當然係呃你的。睇股價咪知，唔呃人，99%情況，股價反映晒任何已知發生嘅嘢，人類智慧總和。咁寫當然係諷刺而家啲友，濫用強烈嘅詞語，同落重調味一樣，係作者冇信心嘅表現。

1. 實情十分合理，預咗，所以對股價應該零影響。早幾日下調咗大英帝國主權評級，咁銀行就差不多一定接住。除咗匯控，仲有萊斯（官方譯名叫駿懋），桑坦德都一齊。

2. 至於RBS皇家蘇格蘭（其實而家係國民西敏NatWest）點解冇份？唔知，因為一早係國企？但，都係分開評級的（正如四大中資行同中國主權評級都分開），況且早幾日大英帝國被下調時都唔覺有郁NatWest

3. 下調英國評級嘛，都係嗰幾味。經濟差，債重，保就業但錢從何來？。本人不止一次寫過，MMT（Modern Monetary Theory）係金融巫術。如果你認為真係work嘅，不妨諗下，如果國家可以不停用本幣發債而冇任何後果—咁，仲使乜收稅？

4. 又，換著香港？又成班乜柒學者出嚟講，嘩，發債成本大升呀，利息開支加呀，雪上加霜呀，惡性循環dead spiral呀，外資拋售呀，好多基金要睇住信貸評級呀。

5. 係咯，係咁簡單就好。你不妨睇下美國上次被下調評級後，融資成本有冇升到。「美國點同！」。咁你可以睇下英國，或者香港。再唔係睇下希臘國債而家幾多厘息，睇下見唔見到大嶼山。

6. 又又又真係要講，「評級機構都好信嘅？」。正如今期流行嘅「民調都好信？」，的確，「評級機構都好信？」。中文唔好（英文更差），但即係，credit rating agency 頂多can suggest a price, but cannot enforce it．

7. 實情呢句「評級機構都好信？」，質疑極有道理。雷曼債都AAA啦，係咪？之後的確評級機構大受評擊，政府話要整治云云—轉眼間雷曼爆煲12年，唔知整治咗乜。穆迪當年20蚊，而家300，不停創新高。

8. 事實上呢個商業模式幾好，同Visa/Master一樣，穆迪同標準普洱Duopoly，但因為穆迪「只係」520億美金市值（Visa嘅十份一），一般人根本唔會接觸到，所以唔會畀政府搞。如果信咩共濟呀郭文貴呀阿波羅新聞嗰啲，咁穆迪直頭係美國金融大殺傷力武器添，點會搞佢？「咁點解穆迪下調美國評級？」「苦肉計呀，冇聽過呀？」

9. 以上種種，當然Patreon寫過，可以去訂（https://bit.ly/31QmYj7）。冇錢？買Moody’s啦，都話上市公司。

10. 冇時間睇？「唔緊要，照科水就得」。講真的。今日同讀者食飯，講話到埃汾畀人炒魷（你覺得冇呢一日？再鋒利嘅刀都會生鏽，況且我又唔係未畀人炒過），就應該可以扮村上春樹咁，日本又住幾個月，韓國又住幾個月，泰國又住幾個月咁。靠嘅除咗係科技，當然就係眾多讀者支持。諗到呢度真係令我覺得好幸福。「但未開關喎」「咁……一晚在麗晶大賓館，一晚在麗晶酒店都得嘅」

（＊）嚴格嚟講，係HSBC嘅英國unit．係喎，香港又分另一個評級的。因為發債係間銀行發，一般唔係HSBC Group發（得吾得架呢？好似唔得）。唔止講過一次，你做銀行同業嘅，你拆錢畀DBS Bank Hong Kong Branch 同DBS（HK）已經係兩回事。有限公司嘛，理論上後者執笠，前者完全唔使承擔任何債務。Vodafone嗰時阿根廷subsid爭落一身街數，母公司都係有得佢的。並冇母公司要上身呢回事。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7

———————————————————
instagram @ivanliresearch．七成金融（短打）兩成嘢食一成其他嘢。

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145