【 港味自慢 ── 世界養生組織 】 先旨聲明，今次文章的標題擺明玩食字 ── 「自慢」是日文「じまん」，跟「慢」完全無關，意思是自己讚自己，賣花讚花香，值得驕傲，假如出街食飯見到日式料理餐廳，招牌寫有「味自慢」，就是老闆都於店內推出的菜式信心滿滿。那麼「港味自慢」又是怎箇一回事？其實解作「香港人細味獨自慢活」的意思，那是myTV SUPER全新原創節目《世界養生組織》的中心思想，是繼《超齡打工假期》（2014）、兩輯《Do姐去Shopping》（2015／2017）、《晚間看地球》（2019）和《Testing Menu》（2021）後，監製周子妮的最新作品，旨在帶出身處「無法出走」的疫情時空裏，香港人怎樣可以找到療癒的方法？ _ 老實講，好多人都以為最出名的「Made in Hong Kong土產」是樓貴，人多，不不不！是單字一個「快」，此字並非單純形容對於所有事情從開始到結束的推進速度，還帶有「不能慢」的潛台詞。不是嗎？香港人彷彿就是一班永遠不能夠「慢」的族群，與其說「不能慢」，更準確是「冇資格慢」！因為你慢了，就趕不上社會步伐，行路要快、做嘢要快、食飯要快、睇劇要快，就連借錢都要「特快批核」，真係反晒白眼：唔該唔好咁黐綫啦！ _ 所以《世界養生組織》的製作團隊想嘗試在講求「黐鬼綫速度」的電視業界裏，推出一個「慢到冇朋友」的節目，還要找陳自瑤和黃翠如主持，帶住觀眾在港九新界尋找養生之道，從內到外增強抵抗力。兩位主持首集去到大埔慈山寺體驗山林療癒、行禪、茶襌，感受生活中應有的「慢活」，透過五感活在當下，視、聽、觸、嗅、味，最直接自然的感受，卻是都巿人最常忽略的環節。 _ 且慢，翠如加YoYo？慢活？養生？非常沒說服力吧？！黃翠如自從由有線電視轉投大台之後，最初主力與洪永城複製舊東家招數 ── 環遊世界拍攝旅遊節目，足跡遍佈全球，到後來主力拍劇，女一作品接二連三，「0628｣（清晨6時至翌日凌晨4時）通告習以為常，手停口就停，怎可以慢？Yoyo又如何？自從《那些我愛過的人》（2020）後演技開始受人注意，加上《萬千星輝頒獎典禮》的「黑面事件」成為網絡熱話，緊接在《好聲好戲》及《識貨》又獲冠軍，令入行20年的她再度人氣急升，另一方面她又積極經營個人YouTube頻道，工作量之大可想而知，花無白日紅，怎能夠慢？興許如此，監製決定邀請同樣患有「不能慢重症」的雙姝上陣，透過節目，促使她們學習放慢腳步感受人生，嘗試引起觀眾共鳴。 _ 其中一幕，由山林療癒陪伴員歐仲南陪伴下，翠如跟Yoyo學習行路……「行禪」才對。 _ 「平時如果喺街度咁行路，畀人鬧呀！」陳自瑤說。「行禪」就感受自己步伐，由提腿到向前踏步，一字記之若「慢」，對香港人而言，難度有十粒星。相信搭港鐵或行商場的朋友都一定試過，只要唔覺意進入扶手電梯左邊，莫講話企定定，只要你行慢些少，恭喜您獲得連串「嘖」聲，繼而就會抵受不住後方的壓力而飛快向前行。（利申：本人確實會嫌別人行路太慢，朋友則投訴我行路太快。） _ 周三（9月15日）凌晨，蘋果公司（Apple Inc.）主席Tim Cook在新產品發布會上，對於應用程式「Apple Fitness+」著墨不少，將運動課程、時間表、身心狀況等資料變成數據，希望方便繁忙的都市人更有效率地做運動。作為其中一家全球重要巨企，Apple此舉說明「保健」和「養生」乃世界潮流，因為有利可圖，產品才推陳出新，但問心這些不是能夠從大自然唾手可得嗎？真的需要花錢擁有？ _ 說穿了，那是另一種的「活受罪」。香港人有句俗語 ── 「慘過死」，說出口的通常都是四肢健全，沒病沒痛，甚至頗有經濟能力、生活富足的人，事關忙著搵錢工作、「辛苦得嚟為供樓」而每天要營營役役的「不能慢重症病人」，什麼視、聽、觸、嗅、味覺早已淪為「急促」的附屬品，享受生活？講笑咩！所以節目中提及的「活在當下」才是香港人最需要學習和掌握的事，懂得在適當的時候放慢腳步。回歸自然，那種療效只有親身體驗過的人才會明白，幾年前我的情緒曾經出現問題，需要看心理輔導，而其中一個救活我的，就是大自然，無論去行山、露營，這位從來神隱的「山先生」總是不介意接收我散發出來的負能量，而且不收分毫，過程中你只能集中精神享受當下環境、應付眼前的難關，如果嫌這些都太過Hardcore，也可以像翠如和Yoyo那樣，簡單的熊抱大樹或者赤腳在草地上走，作為上一步的喘息，亦為迎接下一步作準備。 _ 當然，養生是一回事，拍節目介紹養生又是另一回事，《世界養生組織》意念雖新，但執行上似乎充滿旅遊綜藝節目的影子，無法成功透過畫面帶出安靜的感覺（幾年前香港電台的《好想藝術》做得到），結果有些時候Yoyo太似背稿，顯得不自然，我會懷疑，到底拍攝時Yoyo有沒有用心感受？有些部份則太拖拉，塞車開Tab睇真係會瞓著。今時今日拍節目真的要求做足功課，瞓身投入，如果要讓觀眾看得舒服，有想「Join埋一份」的衝動，台前幕後先要理解養生的獨有節奏和氣息，「搣甩」拍緊節目的意識，才能夠吸引觀眾有動力追看下去。 _ 《世界養生組織》： ＊第一集免費試睇，共13集，逢周二更新。 _ （18092021） _ #游大東影視筆記 #游大東 #世界養生組織 #黃翠如 #陳自瑤 #慈山寺 #mytvsuper #18092021 @mytvsuper

【 睇波先啦！／傑志 ╳ 理文決戰旺角 】 _ 香港運動員繼「東京奧運」奪得一金、兩銀、三銅的歷史佳績後，又在隨後舉行的「東京帕奧」（又名東京殘奧）勇奪兩銀三銅，總計兩項大賽，合共獲得11面獎牌，為本地體壇寫下光輝一頁，全港觀眾親眼見證運動員博到盡，在此興奮情緒帶動下，很自然會覺得「身痕」，加上快將揭幕的「全運會」，以及2022年舉行的「世界盃」和「亞運會」，相信這股近年難得一見的「全民做運動」熱潮會持續一段時間 ── ViuTV覷準時機製作大型運動綜藝節目《力圖打排球》（節目已於9月4日播出）、梁朝偉因電影《尚氣與十環幫傳奇》（Shang-Chi and the Legend of the Ten Rings）接受「Do姐」鄭裕玲訪問時提到自己「每天都做兩小時運動」引起網民討論，已足證上述見解。運動項目跟電視節目一樣有好多種，這邊廂觀眾為「劍擊F4」、「鄧謝配」打氣尖叫，照道理，當下是推廣港足最佳時機，何解球壇仍然「靜過太空」？ _ 參考「香港足球總會」網站公開的「香港超級聯賽」（港超）數據，2018年至2020年賽季（2020至2021年暫沒數據），除了部份較矚目的賽事，例如2018/2019賽季，傑志對東方龍獅，吸引幾千人入場，但更多情況是冷清得只有二、三百人買飛睇波，埋單計數，平均每場大概只有700至900名觀眾，每月門票收入總額只得40至50多萬（港幣，下同）。以小學程度的乘除數去平均計算，8支港超球隊，即每隊每月能夠帶來約５萬至6.3萬門票收入（未扣除成本和開支）。 _ 但原來未算最殘酷。「足總」數據顯示，2019年9月10日香港大球場舉行了「世界盃外圍賽 ─ 香港對伊朗」賽事（伊朗世界排名26，香港排名147)，當日的總入場人數有13,942人，淨門票收入總共有198萬多，相當於大約4至5個月「港超」賽事門票銷售的總收入。 _ 「世界盃嘛，梗係要支持啦！」「輸梗㗎喎！」「輸都要踢，呢啲咪體育精神囉！」 _ 結果，當天有接近1.4萬人親身入場睇波，由於香港佔主場之利，粗略估計觀眾席上逾八成都是現身撐「港隊」（斷估唔係支持伊朗啩？）。 _ 同年11月19日，「世界盃外圍賽 ─ 香港對柬埔寨」在香港大球場上演（柬埔寨世界排名：179），當天約6500名觀眾入場，結果港隊以2:0擊敗柬埔寨，球迷情緒高漲，下半場84分鐘，中場球員羅拔圖（Roberto Orlando Affonso Júnior）在禁區頂起腳射入奠定勝利的第二個入球掀起了全場高潮，與在上半場較早時間入球的夏志明雙雙成為香港隊取得勝利的功臣。 由於世紀疫情關係，這一屆的世界盃外圍賽由2019年踢到今年，除了上文提及，兩場於大球場舉行的「香港對伊朗」和「香港對柬埔寨」之外，2021年6月3日另外有一場外圍賽在巴林上演，香港再一次對戰伊朗，港隊雖於半場落後一球，但港隊前鋒安永佳沒有放棄，終於在85分鐘以頭鎚破蛋建功。 _ 回到「東京奧運」期間，若商場有直播賽事的話，都會迫滿人，就連平日不怎運動的三姑六婆，都忽然暫時放棄追劇，變成游泳、劍擊等賽事的小粉絲，約齊三五知己見證歷史時刻，就算單人匹馬走到商場睇直播也不會覺得尷尬，與陌生人分享喜悅，或互相安慰，因為「港隊」二字抵萬金。 _ 「何詩蓓吖嘛，好叻女！係香港人嘅驕傲！」 _ 但何詩蓓成為「香港人的驕傲」之前，只是「港隊游泳選手」； _ 夏志明和羅拔圖成為代表港隊，於國際賽事入球功臣之前，只是分別效力港超聯球會「冠忠南區」（擔任前鋒）和「R&F富力」（已於2021年加入「傑志」）；至於安永佳，現時跟羅拔圖一樣都是效力「傑志」，擔任前鋒。冇錯，是過往幾年，每個月大約只帶來「幾皮嘢」門票收入的香港本地足球球會；他們都是有能力在國際賽事為港爭光的香港足球員，但普羅大眾對他們的了解其實一般。 _ 換句話講，其實香港人極之撐「港隊」，只是那股力量不是用來撐「港足」。「足球」是一項非常講求團隊合作的運動，「香港隊」的成就亦倚仗本地足球的發展。兜咗咁大個圈，只係想講，要撐香港運動員，就要身體力行，唔好得個講字！今個星期六（9月11日），旺角大球場將會上演傑志（2020-2021年度港超冠軍）對理文（2020-2021年度港超季軍）戲碼，承接「東京奧運」的「撐港隊」餘溫，大家別只做「節慶球迷」或「勝利球迷」了，除了「英超」、「西甲」，「港超」更需要自己友支持。喂喂喂，畀啲「體育精神」，由撐本地波做起，球場見啦大家！ _ 《Nike呈獻：傑志90週年挑戰盃 ─ 傑志對理文》 日期：2021年9月11日 時間：下午5點半 地點： #旺角大球場 票價：$120（成人）#、$50（特惠票）# 網上直播收費：$50（on.cc直播） *挑戰賽收入扣除成本後將全數撥捐「傑志慈善」用作舉辦公益活動 購票連結：https://bit.ly/2X6k1fZ _ （09092021） _ #游大東 #游大東影視筆記 #kitchee #香港足球 #kitchee90thanniversary #安永佳 #賓紀文 #何振廷 #09092021 @mrdan91 @tsz_hold @official_huiyin @ilovemyoq @berlinhooo. Hu@footballnewsexpress @footballdaily_hk

屯門悅品酒店Staycation報告📑 #企鵝主題房🐧 早前提到因為想帶奶油仔去屯門百田遊園同共融公園，方便我呢位孕媽媽可以輕鬆啲玩，就係屯門揾一晚住宿🛏 今次揀左價格親民嘅屯門悅品酒店，我地八月尾去，八月中大概$550訂到希臘主題房，無包任何餐飲。 ✨Check-in情況✨ 入住當日係星期日，仲係暑假嘅關係，本來寫3pm可以check-in，我地2:50pm到達，前台話要等多30-45分鐘先有希臘主題房，如果泰國房就即有😅等到3:30pm問多次，要再等多30分鐘😱不過今次就有企鵝房揀（企鵝房價錢較貴，不過今次可以免費upgrade)。最後我地就入住企鵝房啦🐧🎉 ✨游泳池 🏊🏻‍♀️✨ check-in 時想book游水，但職員話已經full晒，可以每段游水時間開始後排waitlist。好彩我地都有得游☺️不過泳池個位係酒店building圍住，太陽唔係好曬到，加上會無啦啦有陣陣冷氣吹出來，啲水都幾凍，所以游左20分鐘就走啦～ ✨房間🐧✨ 我地入住嘅企鵝房，好可愛！房間唔大，不過由牆到床，到沐室用品包裝都有企鵝仔嘅蹤影，奶油仔見到都超開心🥳 我地臨走仲買左呢隻企鵝公仔返屋企💕 ✨Playroom✨ 酒店5樓有間playroom，官網有package包免費玩playroom，如果無包就另收費 。有電動車，啱細小朋友嘅玩樂區，同小朋友cosplay唔同職業嘅制服。因為package無包playroom，加上啱啱玩完百田遊園過來，所以就無玩酒店呢間lu~ ✨餐飲✨ 酒店有間火車主題嘅餐廳，不過我地睇見屯門有其他餐廳想試，就無留係酒店食啦~ ✨酒店位置+附近設施✨ 酒店行去V City、輕鐵站同西鐵站都係5分鐘內，好方便。搭輕鐵大概15分鐘可以去到屯門市中心同屯門公園。附近又多野食😋 V City有一田，屯門市廣場有Don Don Don Donki~ 夜晚去行下，買下日本生果，幻想自己去左日本都好😆 ✨行程✨ Day 1️⃣ 11am 百田遊園 12:30pm 加藤屋 Lunch 1:15pm 屯門共融公園 2:50pm 悦品酒店check-in 3:45pm 上房休息+參觀酒店 5:00pm 酒店游水 6:30pm Food Combo Dinner 7:30pm 行V City 一田 Day 2️⃣ 7:30am 房中早餐 （尋晚一田買） 9am 輕鐵到屯門公園 9:30am 爬蟲館 10:00am 屯門共融公園 11:45pm 牧羊少年 Lunch 1:00pm check-out 返歸 ✨總結✨ 同之前玩同嘆埋酒店設施嘅staycation唔同，今次主要係book間房瞓一晚，玩同食四週圍嘅野。屯門悅品酒店都好方便同企理乾淨，加上有咁得意企鵝主題房，我地都滿意今次住宿🥰 ********************我是分界線********** ********** 有興趣睇睇其他Staycation報告嗎？ ‼️ 因疫情措施常有變動，上年2020年的酒店安排分享可能都不太適用，純粹看看環境和設施應該還可以😉 ✨ 2021年東涌世茂喜來登：https://www.facebook.com/100063911911638/posts/202488331891563/ ✨2021年挪亞方舟：https://www.facebook.com/100063911911638/posts/192778386195891/?d=n ✨2021年黄金海岸：https://www.facebook.com/100063911911638/posts/172706114869785/?d=n ✨2021年愉景灣：https://www.facebook.com/109743250379384/posts/497651548255217/?d=n ✨2020年海洋公園萬豪：https://bit.ly/39wDmuL ✨2020年迪士尼探索家：https://bit.ly/3iXtwnk ✨2020年長洲西園：https://www.facebook.com/109743250379384/posts/438866234133749/?d=n 暫時去過呢幾間酒店staycation，奶油仔心目中嘅冠軍🏆仲係東涌世茂喜來登 3日2夜瘋狂食+游水之旅💕 阿娘鐘情嘅就係已經encore過2次嘅黃金海岸酒店同迪士尼探索家度假酒店 💕因為比較鍾意度假嘅感覺🏖 大家嘅心水又係邊返呢🥰? #育兒 #育兒日記 #親子 #hkmama #hkmum #hkmami #hkmom #hkbaby #香港媽媽 #香港媽咪 #親子blogger #孕媽媽 #懷孕 #懷孕日記 #staycation #親子好去處