［1000蚊美金個雪糕，梗係好味，但點解？］朋友兼舊同事LinkedIn睇返嚟嘅故事，作者唔係佢，係另一印度人Rajan Singh（https://bityl.co/3nP0）（＊）。

TLDR：1000蚊個雪糕，梗係好食啦，因為你自製浪漫。但，更高境界，應該係食垃圾都可以當米芝蓮咁食。

1. 作者講返，拿，紐約Serendipity 3呢（＊＊），可以叫個1000蚊美金的雪糕。呢度就收藏住快樂嘅秘密啦！點解？睇落去

2. 食1000蚊美金個雪糕，是好快樂的。但點解咁快樂？1000蚊美金嘅雪糕係咪好食過牛奶公司？咁肯定，但絶對唔會好食幾百倍。固然用料靚啲，你坐在餐廳裝修又靚啲，侍應又靚啲，加埋你仲可以打卡晒命。但，作者話呢度都唔係重點。重點係，好大程度個快樂嚟自你自己，你嘅心靈，你嘅腦袋，自製出嚟的。Mindfulness 呀（＊＊＊），佛教嘢呀。

3. Up乜？做乜1000蚊美金雪糕都關佛教事？佛祖都會食雪糕咩（答案係會嘅，但應該唔係1000蚊美金一個）

4. 你諗下你食平嘢，牛奶公司雪糕（我食緊），點食架呢？咪上住網食，寫住文食，一路玩住電話食，然後諗聽日要返工。買嗰時？去七十一買返10個8個（呢排特價喎），質落個袋度（唔係YUU會員，唔使問）。「真係唔係幾尊重隻牛」。食嗰陣？大大力咁筆，甚至飛埋落枱都有。

5. 但你去食個1000蚊嘅雪糕係點架？嘩，唔同喎。事先已經心中J咗一輪，睇咗一輪歷史。去到正襟危坐，抹乾淨個電話（影相嘛）。食嗰時？嘩，影完相，仲要睇下個色澤，聞兩聞，細細啖先放入口，吞落去時感受下個溫度，感受下佢點在你口中喉嚨中融化（＊＊＊＊），然後奶埋隻羹（一千蚊美金唔係唔奶下話？）。真係每一啖都係工匠精神，黃子華話頭，人地開法拉利，最鍾意塞車，每分鐘都晒緊條命呀。

6. 作者話，拿，呢啲就Mindfulness Eating啦！生活中嘅小確幸呀！（你個小確幸都好貴）。去唔到澳洲咪去澳門再唔係去大澳門，入鹽田梓打卡都等於去瀨戶內海藝術祭呀！

7. 苦樂嘅嘢，在主觀的心呀！不在客觀的事！樓下飲冰室主人都係咁講！

8. 作者亦話，真係架，呢啲只係業障（佢冇用呢個字，我講嘅）。平價十蚊紅酒，倒落支一千蚊嘅靚酒酒樽，飲起上嚟都好high架！（我諗起李兆波，不如拎個星巴克紙盃去裝公司啲即溶咖啡，「然後落樓下星巴克望女」）

9. 真的，如此類推，攬住李嘉誠都當係李嘉欣，攬住鄭欣宜都當係鄭希怡！手痺？it’ nothing！用你嘅意志克服佢。

10. 好似係，除非唔係。

11. 其實背後嘅理念，我係同意兼且明嘅。就係講集中，心無旁騖。真的，食平嘢你真係唔多尊重，一路食一落諗其他嘢。但食貴嘢喎，幾大都只係專注當下啦。每一啖都係錢，每滴水都係道呀。

12. 不過，有冇諗過，「正係因為平價嘢難食，我先要一路諗住其他嘢！」。邊個係因邊個係果？雖然，照計貴嘢，唔會好食到你即時忘記晒所有煩惱—但我估我攬住周迅而唔係他信，應該都十分忘我，唔會諗甚麼其他嘢。

13. 我自己想發表嘅係：over咗了。其實咁玩法先係業障！肯定釋迦牟尼聽到都激到返生呀！

14. 都話本來無一物，何處惹塵埃。要1000蚊美金食個雪糕先mindfulness，就肯定披上袈裟事更多。點解係要裝落個La Fite樽先覺得好飲？

15. 記得睇過《酒佬日記》，成套戲不停Pinot Noir。但我最記得係，最後呀男主角撞到前妻同前妻新老公，仲知道佢大咗肚。男主角大受打擊，開咗佢支珍藏，一支1961嘅 Château Cheval Blanc—但點飲？佢在路邊搵間快餐店，拎個發泡膠杯飲咗佢！唔記得有冇拎嚟送薯條。

16. 嗯，其實我屋企都有支在意大利，摩德納（Modena）酒醋莊買嘅Balsamic vinegar。百年嘢，紅藥水咁細支，千幾兩千銀！香港買就一個開。但我而家都冇用過—照計應該搵次拎嚟點麥當勞薯條。

17. 真的，呢啲咁嘅嘢，適可而止，太多咪係負累。特別係買咗唔捨得食嘅窮撚（即係我），就自尋煩惱啦。埃汾太（八周年！！！）話頭，佢啲名校女生中學冋學，著對Timberland去打波，一個月唔夠著爛就換一對！個Prada袋打波隨手掉落場邊花槽架咋！

18. GS Elevator 話齋，” I don't have an iPhone case. I'm not irresponsible or poor.”， 「有冇聽過洗Chanel衫嘅故事呀？」（https://bityl.co/3rIv）

19. 所以呢，「唔好成日去啲你要睇價錢嘅地方食飯」。要睇價錢，咪即係食唔起咯—當然好多人都Afford到買張頭等機票，但你懂的，唔同嘛。正如亦係GS Elevator 講：No first class selfies.

20. 不過其實，又真係沒有最低，只有更低。我以前以為坐長途商務影相嘅人（例如本人）已經夠low—「但而家啲人係拍片甚至開直播的」
　
最尾先廣告時間，其實我Patreon都有分享呢啲有趣小故事，趁月頭訂抵呀（https://bit.ly/31QmYj7）

（＊）我並不認識Rajan Singh，not even on LinkedIn，但由公開資料睇到，佢在賓洲Wharton讀MBA，做過McKinsey，做過私募基金。而家自己搞咗幾檔嘢，其中一檔教下你淨化心靈呀mindfulness呀Zen呀之類（https://bityl.co/3nPF）。寫啲文都不錯（https://bityl.co/3nPI），可以睇下。另外佢仲有搞啲線上嘅不同活動，好多都免費，「例如齊齊讀書一小時」，反正免費，你冇乜損失。又，都話我唔識佢，梗係冇任何利益。至於我舊同事，返咗孟買年幾，咁我總冇理由叫你「去開孟買搵佢」，所以唔開名。「但如果我去開孟買就會搵佢」，去開的話

（＊＊）明顯我冇去過美國，又冇乜睇美劇。但講開好貴嘅雪糕同漢堡包就有印象。又，原來在東京原宿有分店！嗚，可惜之前唔知。

（＊＊＊）Mindfulness中文叫「正念/靜觀/覺察」，雖然講英文有型好多，而我唔明做乜釋迦牟尼講英文。Mindfulness呢味嘢，近十幾年極商品化，十分搵錢，嗰班友搵到你錢就肯定搵到Mindfulness

（＊＊＊＊）你應該知我諗緊乜

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

【先唔好講移民，外國生活係咪咁難？🤔】

首先，無謂嗌交，如果你接受唔到working holiday或者講一句移民，哪怕你只係講吓諗吓都嘈嘅，呢篇文請唔好篤入嚟睇，罵戰不回。

先有英國，再有澳洲，雖然一切未落實，或者講十劃都未有一撇，但我相信呢兩個地方，有好大機會俾你移民到，都成為咗好多人眼中嘅救生圈，或者講係一個出路，尤其當大家睇唔到香港有咩前途時。如是者，我收到唔少讀者問我外國生活嘅問題。

我相信無論澳洲或英國，有好多基本「問題」，大家出發前都諗多咗，先唔好理Working Holiday或移民，最基本最日常嘅生活習慣，我諗大家都要先調整個心態。

👉🏻去到做二等公民喎，我要搵返好似香港咁title架！
其實我會覺得好多時候係馬死落地行，Working holiday又好，長期移居都好，有時冇話搵唔搵到心儀工作，但餓唔死你之餘仲有多個錢，喺香港冇乜可能搵得到。舉個例丫，如果有睇我小說都知道，我曾經有一排朝早執房、夜晚洗碗，係，呢兩份工係好辛苦好累，但果時我兌8.5（我知依家跌到乜咁🚬），講緊20蚊一個鐘，我有成170蚊港紙一個鐘，仲有人哋紅日有double pay，我一星期已等於香港一個月人工。
係呀，係身水身汗，都有唔開心時，但如我成日分享會所講，我喺澳洲學到嘅係職業無分貴賤，人地唔會歧視你係執房仔、洗碗仔、屌你冇career path，辛苦之餘你仲有work-life balance，落場時去海灘坐喺樹下面睇書，幾咁梳乎。成日話稅重、租貴，但果時我交埋稅、租埋屋（冇記錯AU$135兩星期，單人房包曬水電），我仲儲得到錢。你香港拎果萬幾兩萬人工，有返工冇收工，收工日日夜夜奪命追魂call，精神嘅累對比起體力嘅累，你揀邊樣？咪當做運動囉。明白Working holiday同長住，諗嘅係兩條路，我想講嘅係，放低身段只要你肯做labour intensive，香港人眼中可能睇唔起你嘅工，正常時期（當然唔係講疫情啦）你起碼唔會餓死，生活艱難都活得比香港開心。搵唔到心目中嘅title，做住先頂一頂真係唔會死。

👉🏻我唔識英文喎，點樣去呀？
估唔到由八年前澳洲返嚟到八年後，都有人問呢個問題。雖然我自問英文溝通完全冇問題，但同期見到好多日本人台灣人韓國人，完全唔識得英文，都一樣死唔去。好多時，生活智慧嘅嘢，全在乎你肯唔肯學、肯唔肯嘗試、肯唔肯溝通，你日日喺Chinatown打工、放工又群埋香港人，英文一定唔會好，但放膽出去識吓朋友、日常生活講多幾句，英文自自然然都會好。正如我去南美一粒西班牙文都唔識，初期連買張地鐵飛都買唔到，行咗五個站，到最後邊講邊學，識得基本幾句用語，溝通到之餘，一樣完成到旅程。

👉🏻果邊天氣好凍／好熱喎，我頂唔順喎！
英國我唔知啦，但如果講澳洲，你點凍點熱都一定舒服過香港。係呀，我喺Queensland、Northern Territory果邊，溫度可以高達超過40度，但你行出條街都唔會好似香港30度咁辛苦。一來人哋係乾熱，就算好似Queensland偏濕熱，最少空氣極好，天氣嘅嘢，其實唔駛擔心得太多。當然，澳洲北部烏蠅過多，另計，要克服要習慣，都唔係問題嘅。

👉🏻果邊冇曬朋友喎，點算好？
呢樣嘢以前唔敢講，今時今日當你身邊朋友個個都話走時，分分鐘你去到果邊仲多朋友過香港，隨時成個圈子搬埋過去。咁當然，英國同澳洲都極大，一南一北直頭要搭飛機，但諗返果時我同澳洲識嘅朋友要見面，又唔係想像中咁難。
同埋，當你「落地生根」一個地方後，自自然然就會搵到圈子，加埋網路發達，自會有好多唔同群組俾你交流。我認當年陷入過一段零朋友低潮期，但喺個舒適環境下，你冇朋友行下山望下海，一個人精神狀態，都好過你香港有成堆朋友，但最後只不過星期五晚出嚟啤啤佢呻工作唔開心。當年我都慢慢搵到所屬圈子，有啲直頭值得深交落去，又唔係話一定要群埋間全部香港人sharehouse先得嘅。當然啦，文化差異初頭點都會唔習慣，群外國人同群返亞洲人，都係兩種唔同生活態度。你問我，我係鍾意群亞洲人（先唔好講識唔識廣東話／國語，起碼生活文化相近），但有時接受吓外國文化，都係一件幾有趣嘅事丫。

👉🏻果邊物價好貴喎
以澳洲嚟講，物價絕非如你想像中咁貴，好多時仲會覺得，喂貴得過香港咩？餐餐出街食，當然貴，但如果自己買嚟煮，我曾經試過令自己一日只需五蚊澳紙，就解決得到曬三餐。好多西方國家，無論係歐洲定美國，如果你有經歷過自己煮，並不如你想像：西方國家物價一定貴。今時今日你甚至可能覺得，好難貴得過香港喎！

諗返當年去working holiday，我反而冇今時今日大家諗咁多，去咗先算，總會有自己條路。的確我都經歷過搵唔到工、冇曬朋友（直頭係長期一個人，但有筍工時，你想要工定朋友？），最後都成功到，仲有段好難忘旅程。當然，我明白working holiday同下決心要永遠走、打散工同打長工，絕對係兩回事，而當我哋再唔係十八廿二，要放棄要抉擇時，都真係要諗多好多嘢，但有時要得到外國生活嘅美好，有啲嘢都要取捨、要嘗試。要點樣維生、要點樣長居，呢啲問題當然要諗，但比較minor嘅生活議題，事後回想，又唔係想像中咁困難嘅。

我諗近排大部份香港人或多或少都諗緊走唔走、開始睇緊外國生活嘅相關資訊，甚至有朋友賣樓都話要走，收到inbox問我澳洲生活嘅嘢都大增。未來係點冇人知道，現刻世界各地疫情爆到七彩，相信話走都唔係聽日突然間嘅事，不過有好多外國生活嘅心態調節，你睇再多「攻略文」都未必有用，最緊要自己接受到，亦都要有個後備方案，喂搞唔掂喎搵唔到工，返香港好丫，定點樣呢？呢類問題都可以諗諗嘅。

當然，小弟當年超級黑仔，好多突發意外，例如電腦突然壞咗、行李喼爆咗、全身突然生曬唔知咩瘡，呢類問題真係唔似香港你落街就搵到有人幫你整幫你醫－－最諷刺曾住過地方好多蛇，俾佢咬到10分鐘內會死，但最近醫院要20分鐘車程、維修中心原來要搭飛機，不如買過部新，但當你解決得到呢類奇奇怪怪問題同疑難，我會覺得，都係人生一個成就解鎖。

後記：呢張相係我最無聊最寂寞嘅日子，但依家諗返，可能係我人生中最逍遙最自在嘅日子。果時你覺得攤喺沙灘放空好無聊，今時今日自會懷念。

📣文字工作者也得要吃飯，你的支持是我的原動力。請給點心意，給小弟寫更多好文章，歡迎透過payme課金以作支持🥳：https://payme.hsbc/jackyhei
或使用QR code：https://bit.ly/3a9wOzy
或透過Paypal捐款：paypal.me/jackyhei

🙏感謝各位支持，小弟執筆之原創小說私人貨存已全部售罄，有意者可到此文章內的連結購買：https://bit.ly/3dRuUWu

【IG請follow】www.instagram.com/travelerwithmovie