【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17601-Q17620）

Q17601：

Hi, 上完咗老師嘅堂都兩年了, 全因為你, 我開始咗月供計劃, 成功累積咗一小筆錢, 感謝你🙏🏼🙏🏼

我第一次見到自己買嘅股票1211, 1177倍升, 好開心! 但因為唔等錢用, 所以無放到, 決定長期揸!! 但依家有個煩惱, 就係倍升咗之後唔想同一隻供咁多, 所以依家想review 個月供組合.

我本身29歲, 近半年升咗職, 月入$58000, $10000俾家用, $6000供自己學費, $2000供媽媽同自己嘅保險, $2000娛樂/旅行基金, $7000生活費, $10000儲蓄(緊急開支/現金)

我個月供組合本來:
2800 $5000
0003 $2000
0027 $5000
0066 $3000
1211 $5000
1177 $5000

但有感 0003同 0066質素同增長力比以前差, 而且老師你叫減減1211同1177嘅供款額, 所以想改變個組合

改做:

2800 $5000
0027 $5000
1972 $3000
1211 $3000
1177 $3000
1810 $5000

咁會唔會平衡一點?

其實本身唔介意高風險一d, 潛力同值博率高d, 因為依家單身, 無家庭負擔, 打算都係5至10年後先買樓.

Btw, 遲啲得閒啲一定會報進階班, 同埋多謝你花時間去俾意見我! Thx!

龔成老師：

以你的年齡及情況，的確可以進取翻少少，正如股票班第二堂所教的配置概念，我地最重要是建立長期的組合，當中有不同類別的股票，新經濟不少都是水桶1、舊經濟則是水桶2，兩隻都有當中的價值，你只要照課堂所講的比例，以及配合自己的情況去調整就得。

你新的組合，可以進行，見到都是有質素的股票，同時比例都適合你，無問題。

總之，你每月月供的同時，能夠儲到一定的現金，咁就得。

好。遲D進階班見！

------------------------------------------------

Q17602：

老師， 我已經買咗您的幾本著作 《80後百萬富翁2》
《股票勝經》《50優質潛力股》2020版《選股勝經》《年報勝經》《財務自由行》

近排我會盡量將您的著作買齊 因為咁啱見到商務有8折優惠價 之前都無優惠價 好開心

非常佩服您十年如一日記錄自己的日常開支
每天都正能量激勵自己
鼓勵別人影響別人

從2019年12月由朋友
度識左你之後
我每一天都會追蹤你的問答信箱 好多時都見到您係夜晚11:00幾或12:00左右先將問答放上網

第二天好早又會放d好有用嘅資訊係網上
我覺得你好似鐵人 非常敬佩您 好感動
我其實有好多感謝的話想說 不過都係算啦費事阻你時間睇我嘅廢話

應該有好多人感謝你
我覺得你真係一個非常好非常好
心底非常善良的人
希望有一日係街上可以和你偶遇 就憑你把聲線就知道是你

最後祝你身體健康
龔成名就

龔成老師：

我20年前開始，睇好多成功人士與有錢人的書，在佢地身上學到好多野。

我都是由零開始，但因為前人的經歷與分享，到今天算是有少少成績，所以都好想幫人，因為我知有唔少人同我20年前一樣，好想取得成功，但又唔知點做，所以我想希望盡少少力。

你加油呀，我相信你已經行係成功的路上，只要不斷進步就得！記得保持進步，運用書中所教！

------------------------------------------------

Q17603：

龔sir，唔好意思又阻你，自從睇左你fb 同書之後成日同自己講唔好理股價短期升跌，如果公司係有實力就冇問題，要睇長遠

亦開始係生活上留意唔同行業ge股票，但我係初哥，冇物投資知識又未識睇報表哥d, 希望遲d有機會上到你ge堂。

疫情對旅遊業航空業打激都幾大，最近見到隻00694 北京首都機場股份，股價應該跌到係近幾年尼低位

疫情後長遠發展係咪應該較正面，到時航班量應該多番同正常番，想問下阿sir我甘諗有冇問題

同埋le隻股票值唔值得投資。另外想問埋阿sir 點睇788中國鐵塔，感謝

龔成老師：

方向雖然正確，但都要留意一些業務本質情況。

北京首都機場股份（0694），近年質素有少少下跌情況，受到北京大興國際機場轉場方案，令航空及客運量下跌，而這企業會採取新措拖去減低影響。

當中的轉場，以及新機場費用，會令這股的盈利減少而這因素都反映在股價上，所以你見佢近年的股價表現較弱（而不單是近期）。

整體來說，首都機場仍有佢地位，但質素的確有少少跌左，賺錢能力減，整體只屬中等的質素。

現價已反映新機場等不利因素，現時的估值合理，至於疫情因素，會令佢中短期弱，不過長遠來說，會慢慢向好，因此都有投資價值，但由於本身上述所講的情況，因此不建議太大注。

中國鐵塔（0788）有質素的，之前有少少炒概念，所以之前估值有少少貴。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價。

由於這股有發展力，可長線。

但如這刻買入，分注入可以的。

------------------------------------------------

Q17604：

龔成老師，想請教你我家人如果有 1500 萬留俾後人，應該怎去分配?

我在想是否應該學你2年分注買入盈富港燈中電這些收息股，滾大果筆錢，長期制做被動收入，好過直接一筆過分晒俾子孫，謝謝你寶貴時間

我媽媽那筆遺產主要目的是想有一舊錢俾我爸爸每月有穩定入息，其餘就是給子女自己用。

龔成老師：

以你上述的情況，我會建議穩陣少少。

你可以將這$1500萬，分成5部分。

第一部分投資股票，「收息股+「平穩增長股」。

收息股，你可以建立一個收息股組合，你可考慮港燈（2638）、香港電訊（6823）、工行（1398）、中電（0002）、置富（0778）、陽光（0435）、深高速（0548）等，大多有5%股息。

（你可睇下《50穩健收息股》當中仲有好多）。

同時，可以有部分（要睇你地的家人，風險度及情況），投資一些平穩增長股，你可以考慮盈富（2800）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。相信這部分對你父親方面有一定的作用。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$1500萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q17605：

老師 最近已經購入了一個東涌565萬的物業

黎緊會供樓真係未必會會好多現金係手 所以如果有儲到少少現金 都會想購入以上股票作長遠投資

會一直關注老師的面書多多學習 暫時叫完成左人生第一件大事 之後會繼續努力

都好多謝老師經常鼓勵大家 先令我有動力去踏出置業既第一步

如果黎緊有星期六/日既班都會考慮去報 因番工平日比較難抽時間上堂

龔成老師：

好！記得要留有一定的現金先，唔好心急將資金全投入在股市。

始終你現時有物業，要同時增加翻你的防守力，有基本的現金在手始終較好。做好這點後，就可以將資錢投資增值。

我間中都會開星期六班的，通常一年開1、2次，星期六下午時間。

下次可能在年底。

你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp，你可到時先決定報唔報，無所謂。因為而家已經有唔少網左留定位先。

------------------------------------------------

Q17606：

老師。我現時月供股票18000。5千平安 5千 2800（己4年）2千銀娛。

2千港鐵（4個月）2千港交所。2千1211 （1個月）我35了。想65退休後財務自由。問 這組合可行嗎？ 謝謝您

龔成老師：

可以，這是一個不差的組合，當中都是有質素的股票，同時有不同類型，組合平衡。如果想風險更為平衡，可以增加翻盈富（2800）的金額，當然，你最好同時有現金剩。

我相信到你55歲，已經會有一定的財富，到時可以重新配置一下，提高被動收入。

------------------------------------------------

Q17607：

成哥我持有中國國航4.82入左一注。坐緊。請問應等待嗎？

得睇書睇peg果到 你有教人計。但我唔明計出黎之後個數係點定義平定貴

龔成老師：

中國國航（0753）的質素，只是中等，唔算好有質素，這類股就算投資，都唔會太大注，如果你持貨太多，要賣部分，如不多，都可以持有的。

其實企業估值有好多方法，好多時我地幫企業計算要配合使用。而PEG的估值，只適用於「高增長類」股票，因此未必適合在這股身上。你預現價在合理區。

------------------------------------------------

Q17608：

老師，感恩與你結緣，日日追看你的網站。

近期1211升左，自己1516是否應放一半，留一半作長線投資。秘密講你知我的平均價是43元，之前見到50至低位37，因我鐵定老師的分析精準無比。其實賺錢固然開心，雖然未落袋，但緊記老師肺腑之言「現金不是財富」，但更開心係自己今次的決定無誤。

記得自己決定報名上老師堂時，我仲問朋友有冇興趣一齊上。大家都異口同聲話我癲，竟然相信一個講古佬，仲買咁多佢嘅書來睇。我無言，只是自己一把年紀唔想再輸，就算老師講未必係真，但學些理財概念也不錯，自己增值下又和小朋友講下，希望早點引起他們的興趣。

其實我最感動是你第八堂分享你自己的夢想。敢想未來才會更精彩。

多謝老師的理財心得，讓我知道書中自有黃金屋。多謝你。

龔成老師：

其實唔怪得你的朋友，因為坊間的「所謂專家」，都是亂講為多，但我自己其實最想「分享知識」，講個股只是一些輔助。可惜唔認識我的人，都唔會明白，無所謂。

正如我自己20年前不斷睇書，身邊人都笑我，話「如果睇書可以發達就無窮人」，但講這句說話的人，基本上都從來無認真睇過書。

我後來明白，致富的確有方法，但一般人就是唔肯花時間學，唔肯努力做，佢地寧願買六合彩，都唔會一步步進行長期的致富過程。

你的方向正確，保持進行就得，比亞迪（1211）有潛力的，但中間如果你覺得貴，賣部分都可以，平衡進行。長線投資要有耐心，能克服中短期的股價波動。

------------------------------------------------

Q17609：

成哥，我想問下小米（01810） 幾多錢先入手好？

我覺得佢上升嘅潛力都幾大，因為公司業績良好，同埋佢股價應該會受惠於中國5G而上升，係一隻優質潛力股。但係我唔係好清楚應該幾時入手

龔成老師：

小米集團（1810）其實有增長力的，因為佢的產品的確受歡迎，同時處於增長狀態中。

中短期當然會有不同的風險，但長遠來說，這企業仍是不差的，有持有的價值。

小米現價合理，分注投資可以。

------------------------------------------------

Q17610：

龔Sir您好，我是你股票基礎班和進階班的學生。謝謝你的分享和教導，增加了我理財的知識，亦令我更好的規劃購買股票的策略。給了我很多正面的影響。

我想問，我如何可以擴大自己選股研究的成果?

透過股票班學習了一些選股和分析方法後，現在選擇心水股票後，都會分析各種財務比率及合理值範圍。

然而，所有成果只用於購買股票中，好像未能完全善用自己的分析成果。除了幫助家人投資外，我暫時想不到有其他方法可以善加利用研究成果。

請問你以前也遇到過類似的情況嗎? 由於我沒有任何執照，所以幫助朋友買股票、公開評論股票，好像都是犯法。
如果我只對股票分析有興趣，對其他債券、期權、窩輪等衍生工具沒有興趣的話，我應該進修一些正式課程，考取這方面的專業資格嗎?

龔成老師：

我過往都有利用自己的知識，幫身邊人投資，即是做一些類似「基金」的模式，當然，你要明白當中的利弊。

因為從我的經驗，這會有好多麻煩野出現，所以在運作了幾年後，我結束了這個項目。

至於網上評論，如果你無相關牌照，小心犯法，具體的情況可以向證監會問下，坊間有人偷雞做，有些無事，但要坐監的都見過。所以，了解左法律先做。

另外，你可以發展你的事業，做銀行或同證券有關的行業，我相信你已經有一定的理財知識，如果想有效發揮，就可以進入這些行業，我相信你的知識能更有效運用。

近年有幾間理財公司，比錢佢地的員工上我的堂，鼓勵員工進步，因為員工學了相關知識，可以更有效應用在工作上。

------------------------------------------------

Q17611：

Hi sir
我現廿九歲，目前我的股票組合如下:

銀娛
太古地產
領展
港鐵
盈富
領航標普

目前總共約50萬本金，之後會一直視乎情況加注，目標是10年內將本金翻倍。請問在選股和配置上有問題或可以更優化嗎？

如果我很看好比亚迪，而現在冇貨，我應該入嗎？還是等佢回落至$60左右再想？

龔成老師：

現時你持有的，都是有質素的股票，可以長線，不過，你29歲，上述組合並沒有潛力股類別，你應該增加翻少少這類股在組合的比例。

阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

我會建議點都要加少少，但就唔好多，同時要留現金。

如果比亞迪（1211）在$6X，你可以入一注先，之後等跌先再入。

------------------------------------------------

Q17612：

老師，我買錯老千股，現時此股已將儲蓄輸掉（50k),現金都冇乜，來緊只有靠出糧時先再有儲蓄再草番

扣掉供款家用洗費 可以草8k, 你會建議都留做現金等大筆d 可以跌市入貨定提早開始月供優質股？

龔成老師：

你要從基本開，不要心急「我要盡快追翻輸的數」，投資一定要理性進行。

你這刻先要儲現金，等自己有基本現金先。之後，就可以做月供股票，儲優質股，到你有一定的現金在手，已經可以開始，總之長期進行就得。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

最後，你一定要多提高知識。你的財富與你的知識成正比。

------------------------------------------------

Q17613：

老師，我現正閱讀第五本著作，如果閱讀了12本老師的書本後我的財務知識去到什麼程度？謝謝！

龔成老師：

如果你全部12本書都讀完，保證你的實力，比95%的散戶強，之後要多睇巴菲特相關的書，以及多睇企業年報，實戰應用。

------------------------------------------------

Q17614：

請問龔Sir最新優質股同買樓書係邊本?

用你上次教我的方法, 用盡吃奶的力終於上左車, 感謝你.由零開始只要有決心都可以成功.

雖說自住, 但港島區樓齡32年(大廈已做保養翻新), 實呎270, 買入價卻係5.25m, 希望平安無事供得起. 現時月供18k, 淨3k洗費1k備用現金, 應該要等搵到外快先可以儲蓄投資了.

但想請問新書會唔會有提及樓換樓, 以我case賣出換樓, 還按揭等的分析同秘訣?實在覺得呎價太貴.雖然環境交通唔錯設施配套成熟又近公司可以慳交通錢.但過幾年有小朋友都希望換大少少..

請問我咁會太急進嗎?因為覺得過左35年樓齡就無咩市場, 唔洗話要升..

咁樣樓換樓可行嗎?最重要係:如果要定個目標儲蓄金額去換樓(6.5m)應該定多少?

股票分配係咪照舊平穩增值0066+0823+2800就可以?(因為買樓, 所有股票清零了..在此多謝Sir介紹1211)

270呎有梗廚有廁有2房有廳及大量儲物空間), 都係我簡喱個單位的原因

龔成老師：

先在這裡恭喜你！你要先守有一定的現金，作防守用之後，之後先慢慢將資金用作投資。

你可以睇《50優質潛力股》（2020年版），同埋《5年買樓4部曲》。

你唔好太快想換樓的部分，只需要做好這刻就得，《5年買樓4部曲》都有教你細物業換大物業的過程，總之，一步步，你唔好太急追進。做好這刻先。

物業只要保養等各方面無問題，就算40年仍有市場的。

首先，你這刻儲多D現金。增加收入，努力儲錢。

下一步，投資股票，平穩增值，你所講的3隻都可以的，盈富（2800）比例可以較多。

你的方向已正確，之後保持進行就個得，同時，要努力增加知識，因為你的知識基礎仍來足夠。

------------------------------------------------

Q17615：

老師，我買左你本年報勝經黎睇，諗住wfh有時間努力一下。請問老師會考慮有網上教學班嗎？其實我想報但番工時間問題無辦法，否則要等調到95位先可以報了

另外，想看看老師對電子煙如6969的看法。

龔成老師：

遲些會搞一個關於資產配置的網上課程，希望今年內完成。

至於股票班，暫時唔會，因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

思摩爾國際（6969）有獨特性，這股有投資價值，有發展力的，不過現價唔平，你或者可考慮小注先，等跌先正式入。

------------------------------------------------

Q17616：

本人35歲 亦很喜歡自己既工作 對提早退休無咩諗法

本人已婚育有一子
兩公婆月薪共約7萬元 工作穩定
公司有宿舍可住
另加兩層收租物業

每月租不抵債 供樓需額外加二千左右
共欠銀行按揭約600萬元
我亦於上年出左皇牌幫另一半置業向銀行借貸30萬分五年還

最近見股市有較大波幅
優質股票亦到心理價位

想係呢個市到買一啲有質素既股票長揸
正考慮個人再借30萬開個股票倉收息
現有股票 0003 0017 1928 1113
約20萬價值

想問一下老師 我借多30萬建議如何
若我借30萬
總共50萬股票變動如下

公用股
0003我會買多小小溝淡 平均價17
再加0066 佔10萬左右
地產股

0017&1113 會轉0012佔8萬左右
賭股

1928會加碼到8萬左右

金融股

1398佔5萬

租務股
823&778佔8萬

零售股 科技
178&1810各佔5萬

酒店股
45佔5萬

龔成老師：

你現時的負債已一定水平，我擔心你風險度高。反而在現在組合中調整較好。

你的職業與收入是你的優勢，但都唔能夠太進取。始終你有家庭。

你現時兩物業加負債，以你的背景，已經是上限，我唔建議你太進取。

這刻，你應該集中在儲蓄方面，有一定的現金先，下一步就是適度投資。

上述持有的股，大部分都有質素，如果想增加組合回報，你之後應增加一些較有增長力的股。一些轉為收息及公用類的，你原有貨可持有，但之後就未必值得再加。

你現時的持股，已較多在酒店、地產、零售、旅遊相關，在長遠雖然部分有值博率，但唔建議過度持有。

------------------------------------------------

Q17617：

龔Sir.我係之前未接觸過任何股票或者基金 完全唔識點樣買賣股票 我想月供盈富3000

但不識如何買賣 想開始但又唔識點做 同埋交易係咪用銀行證券賬戶就可以？手續費會唔會好錫抵？

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q17618：

龔成老師，買了你本新書，5年買樓4部曲。同埋有幾個心態上問題想請教下你

1，專注問題，睇過你書，知道你係極度專注於致富，所以時間都花在礸研理財投資上。但我自己覺得好難，咩都想學，又想學投資，又想學琴，又學其他野，又想有啲時間娛樂，感覺自已好心散，樣樣做唔好。你是如果作出取捨?

2，我睇啲書話要遠離啲思想負面埋怨的人，剛好父母就是這類人，心情很易受影响，但搬出去住又貴，同埋你都建議同家人同住可儲多啲錢，所以好矛盾。

3,你說不要信用咭消費，但有時買電腦哩類工具都成6-1萬，一次過俾錢，感覺你嘅資產咪一下子冇左好多錢?能分期付款俾我感覺每個月用幾百錢蚊就買部電腦來用。

4，另外，諗住同家姐夾份一齊買樓，希望可以快啲成功，同親人一齊買樓有咩要注意地方（因為未睇你本書唔知入面有冇講）感謝你的回覆

龔成老師：

1）你要想想先後次序的問題，我地時間有限，所以要做左一些較重要及較有意義的事情先。

另外，你應該專注做1、2項野，至於其他，就只投入較少時間。如果你太過分心，只會無樣做得好，巴菲特講出他成功之道，就是「專注」。

2）家庭情況我地無得決定，但識朋友你就可以。

父母你可以「聽完就算」，因為我過往都是。我1X歲已同我屋企講，我會有「$1000萬」，阿媽不斷講「唔好發夢」，到2X歲，我唔會再同佢地講我的夢想（但都會保持正常關係，只是有些事，已無講的必要）。

我就是因為「唔理人」，所以先可以完成目標。

3）只要你是能「控制到消費」的人，適度去運用信用卡，都是可以，但如果你有「幾百蚊就可買某物品」的概念，證明你未能成功控制到消費

4）這是較麻煩的，一定要同家人講清楚條款，如何公平進行，如果出現某些情況（例如其中一方供唔到、其中元個想賣出、自己住等），應該點樣做。

最好大家共識後，能寫低記佢，或利用 WHATSAPP等比對方同意，最重要是「有記錄」，而不是純口頭講。

------------------------------------------------

Q17619：

老師想請教一下投資意見，無限感激。

本人35歲 年收入約200萬. 現有一層供斷的物業， 現金有700萬. 有一份 長線儲蓄保險 年供 4萬 ， 一年支出需要20萬。 不會生小孩。對生活追求不大，十分節儉。

因為不太懂得投資，不知如何善用資產退休。
工作壓力太大，很想40歲退休。 靠收息和積蓄生活。

請問如何安排資產管理。 謝謝

龔成老師：

以你的年齡，財富仍有增長力，但同時，由於你想40歲退休，所以又唔建議太過進取。現時你有物業，建議之後你以「平穩增長股」為主，加小小潛力股。如果資金足夠，而到時樓價大跌，你可以買多一層（到時先，唔急，唔一定進行）。

到40歲，進一步減少風險。集中投資在收息類的工具。

首先，你可以考慮指數基金，盈富（2800）、南方Ａ５０（2822）、VOO可以配置一定比例。

另外再加其他股：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17620：

我想問1936 你點睇呀？

龔成老師：

RITAMIX（1936）佢係一間馬來西亞公司，從事分銷動物飼料添加劑（例如話：氨基酸、添加劑、維生素、礦物質及酶），以及一d食品配料（包括小蘇打、礦物質、親水膠體、乳化劑及維生素）。

佢亦都有用自家品牌（包括ＬＵＴＡＭＩＸ、ＰＯＷＥＲＭＩＮ及ＧＲＡＩＮＰＨＯＳ），去生產四種主要預混料，包括維生素預混料、綜合混料、礦物質預混料及酶預混料，同時有係馬來西亞設有生產工廠。

生意算是穩定，但企業獨特性未算好強，行業中未去到強的位置。

質素算是中等，但見佢股價上左好多，擔心這刻反而貴。

除非有一定好充足的利好理由，否則，這刻要小心。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。