【龔成問答信箱】（Q22441-Q22460）

Q22441：

龔sir你好，本人係聾人，最近對於聾人遇到很多不公平的事，例如社會上健全人在最上層，盲人、其他殘疾人士比健全人地位低，佢哋可說話，可溝通。

可是聾人呢，卻是更低，在最最低層。我們手腳都沒問題，但不能溝通，不能聽電話，只能被壓到社會的最低層。其實政府對殘疾人士，完全零支緩。但我沒有自卑，從來沒有，我總希望自己可以堅強一點。

本人很想向你學習下，為買股票想財富增值。

從未睇你FB前第一次買咗[email protected]（二手）跌咗蝕得甘慘，咁難升番上0.64，打算想賣出後轉到有質素的股票。有咩意見？

今年3月頭，一向都有留意你分享，日日都有睇你的Q&A, 覺得有用，得益不少。如你開班我第一時間會報名，可惜我不能因聽不到（聾不代表啞）

你教的課堂內容，變相會跟不上進度，就係我遇上很大的學習困難,so sad, 唯一方法是購入你的作品，

最近睇咗你三本“80後千萬富翁“，“50後穩健收息股“，“股票勝經“，睇呢本書有d未必一定可以理解，想請教你，有個問題我唔明白又唔懂点計算，

例如建立咗一個長期的「平穩增長組合」，佢哋收入都增長，盈利都保持向上，加上股本回報高，有機會回報高10倍or可能未必成為10倍股 ，所以要睇佢哋之後的業務發展，

請問呢個点計算法？可以舉個簡單例子？可簡單解釋嗎 謝謝

我35歲，月入19k, 每月約有10000作儲蓄，給家用9000元，希望在10年可資產增至200~400萬, 目標：50歲前提早退休，想做財務自由。

現時持貨如下：

平穩增長股
1928 ＄28.25(1手)
0012 ＄35.9(1手)
2318＄68.85(1手)
0270 ＄10.6(1手)

潛力股
1810＄21.65(1手)

收息股
939＄6.13(1手)

我自覺賺的幅度不大，打算將邊投資（平穩股70％ 潛力股30％）邊儲蓄的策略，等跌下會大力掃貨。請問有沒邊啲股票係有機會做到5年或10年後有200~400萬？

不好意思我講到甘多，期望得到你的回覆，謝謝

呢本書你講句“現金不斷會貶值，不是財富“ 你講得好好講得有道理

買咗你本80後，希望睇完增加了一些投資嘅知識，努力

voo定期定額好？月供好？謝謝

龔成老師︰

這個世界，有好多客觀條件，未必到我地控制。唯一可以做的，就是唔好比這些因素，去限死自己。盡力去打破這些限制，為自己創造出更多空間。

只要你有夢想，內心夠強大，其實無野可以難到你。

我當然不能夠明白你的情況，但現時利用文字，在網上或其他平台，都可以作出溝通、發聲、工作，你要加油！

現金，由於可以無限量發行，因此長線必然會造成貶值。所以，我地財富增值，就係將只會貶值的現金，換成優質資產的過程。

令我地財富不被貶值影響之餘，可以有一定增長能力。

你所講的歐科雲鏈（1499），我本身無特別研究，佢屬較高風險類，要睇下你博唔博。過往持續虧損，見佢股價上落好大。只可以話，唔建議大注，自己衡量風險。

計算企業的價值方面，過程其實比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

所以，我好難係而度解釋，或者用例子去講解估算方法。

雖然你未懂估值，但唔代表你唔可以進行投資增值。但方法上，要進行調整，例如用月供或者分注模式，去減少你買貴貨風險。

以你35歲計，現時持股係可以。以你年紀和投資經驗計，平穏增長股和潛力股比重都正確。

你現時應以增值為主，建議你用「平穏增長股」 + 「潛力股」作組合，去創造一個增值平台。

正如你先前計劃所講，你現時將每月5成儲蓄，即$5000做月供。其餘先儲起，用一邊月供一邊儲蓄的策略。

但如果你對這些股票認識不深，可以全供指數基金。如果你都有認識，就可以用你平穩增長股70％ 潛力股30％的分配策略，去選股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$10000 + 現有持股約10萬，10年後大約會增值至200萬。

至於你能否50歲提早財務自由，就要睇這筆資金，是否足以滿足你期望的退休生活水平。我假設你退休後，預期每月需要用2萬開支。以股息率6%計，你就需要本金400萬。

你可以用這個計算結果，作為參考，再去調整你投資計劃。

至於Vanguard標普500指數ETF〈VOO〉，是追蹤標普500指數的ETF，算係平穏增長股類別，都適合你年紀。

其實你做月供或"定期定額"都可以，因為2者都可以做到平均價格效果。但重點係必須長線(建議最少供3年和持有5年)去進行。如果供下停下，或者成日轉變，就唔會有意義。

------------------------------------------------

Q22442：

想請教，阿里巴巴旗下菜鳥網絡牽頭投資一百二十億元，在香港國際機場南貨運區的過路灣興建智能物流中心，作為一帶一路的貨運設施布局，

將為本港出口商再增一個貨運出口選擇，亦便利消費者經由淘寶購物收貨。阿里巴巴這個ai 物流倉是否未來企業關鍵？

帶來豐富收入，9988現價合理？

阿里巴巴這個ai 物流倉是否未來企業關鍵？

好似Amazon AI物流中心，之後股價一直上升

龔成老師︰

阿里巴巴(9988)宣布投入1000億人民幣，於香港機場打造高端物流中心，預期在2023年投入營運。此營運中心，將會是該地區同類設施中規模最大，技術最先進之一。

中心由菜鳥網絡帶頭開發，中航、圓通快遞都係當中投資者。

此個新營運中心，配有全自動化倉庫、溫度空調、空運處理中心、訂單處理中心等。

集團過往一直收入核心，都係來自內地零售商業部份﹐佔收入近75%。集團在內地發展，其實已相對成熟，相信集團預期該部份增長，會開始有機會放緩。

因此，集團開始著力開發更多其他市場，在香港機場打造高端物流中心這個布局，可以睇到佢這方面野心唔細。

這個物流中心，係一個利好因素。但這只是一個資本性投資，到底到集團有多大幫助和效益，現在言之尚早。但長線計，一定係對集團有利。

但估計方面，我暫時唔會有調整，宜再觀察，才再決定。

------------------------------------------------

Q22443：

老師你好，我是之前曾經向你請教過一些問題的讀者。亦都購買了老師的著作

其實我在今年12月便會前住加拿大工作。我現在存有12萬現金。13萬保險基金和12萬股票總值。

1. 0068 （15.3入）2000股
2. 00823 （67.25入）500股
3. 00939 （5.84入）10000股
4. 03918 （7.940入）2000股

想請問在移民的前提下如何分配現有的資產?謝謝老師

龔成老師︰

首先，你要先清楚，移民時是否所有在港資產，都係會變現。

如是，由於你12月就要走，多於1手的股票，你現在就要慢慢分段沽出股票，唔好等到走先一次過沽。

如否，以你剛畢業年紀，應先做好增值部份。建行(0939)只係收息股，增長力欠奉，不宜持有太多。

利興發展(0068)無投資價值，但由於佢停左牌，你現時無野可以做，等佢復牌就沽出。

其餘2隻都有質素，可以照持有。但金界(3918)由於疫情關係，中短期一定會較弱，但長線持有係可以。

12萬現金就先留起，等大跌市機會。

另外，緊記要開始月供計劃，因為我地長遠組合，唔可以只係得1,2隻股票，應該係有不同行業優質股，才算平衡。

------------------------------------------------

Q22444：

1) 明白老師,咁買入一隻股票之後預算要擺幾耐左右先至係最理想?即係要擺幾耐之後先至等收成?去睇吓佢有冇升?

2) 同埋老師我之前睇過你啲書, 如果你話價值投資係一定要買入優質企業然後長線擺好耐,咁樣係咪唔使理個價位高低月供股票都可以?

只要我知道呢個公司好有價值,例如好似中電煤氣咁, 咁咪就算幾貴都好都應該買?

咁樣嘅話月供股票都唔使煩㗎喎?淨係買呢兩隻都乜都得喇?用成副身家買晒佢哋? 總之有錢剩就擺晒落去咁係咪一定賺㗎?

3) 同埋老師想請教你, 我好似你咁講試吓買吓啲月供股票, 但我發覺裏面個倉可能有幾隻上升,同時間有幾隻又會下跌, 情況就好似啲資金只係搬龍門,擺嚟擺去,

咁其實我哋嘅策略應唔應該逢親嗰啲股票上升就賣咗佢, 然之後將同一舊錢入返啲一齊下跌左嘅股份?如果唔係好似每次嘅上升浪同跌浪都好似唔關自己事咁?

其實舊大錢都冇乜點變?定抑或應該全部都長線投資?只要等嘅時間夠耐,長時間全部整體都會升?因為我擔心就算我擺咗好長時間如果佢都係只係搬龍門,有啲上升又有啲跌,

咁最終就算我擺咗好長時間舊錢都唔會多咗好多個喎?謝謝老師

4) 唔好意思老師, 同埋想請教你, 最近睇你寫嘅嘢,你都話要我哋趁後生嘅時候掘多啲井, 儲多啲錢, 準備充足,

咁我想請問如果我每一個月將我全份人工扣除晒開支使費比屋企人同埋信用卡,有政嘅錢如果全部都擺晒落股票有冇問題?

因為我做緊月供股票, 同埋買嗰啲股票都係喺低位先買,逢親低位先至月供個一隻股票,因為我嘅概念就係銀紙係會貶值，咁我每個月將啲錢擺落去一啲穩陣同收利息嘅股票,

就算我將所有剩餘嘅積蓄擺落去,唔知會唔會都冇問題呢?

PS: 我都有啲流動資金可以應急, 有一舊錢可以靈活運用冇問題, 但係每個月出糧嘅人工可唔可以用晒嚟買股票?

龔成老師︰

1) 一般我建議持有最少5年，當然優質股永遠都係長線持有，增值效果才會最好。中短期股價會有波動，會有起有落。但長線股價，必然會將企業質素反映出來。

2) 其實我地買股票，除了要有長線投資價外，"股價平貴水平"和"組合平衡性"，都係好重要。

月供雖然有平衡價格波動能力，但太貴時候，我地都會考慮減供款，甚至停供。但如果你係初學者，對企業估值無太大信心。

我就比較建議你不理價格平貴，一直去供，反而會更好。因為你自行調整，若果判斷錯誤，有好大機會拖低左長線回報。反而不理價格，對你會更有利。

另外，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

3) 你唔好依然停係賺差價模式，我地現在投資增值，係將長線只會貶值的現金，轉換成資產的過程。而優質股，係資產的一種。

但再優質股票，中短期都會有波動，你係唔洗太在意。只要你長線持有，佢都就自然會有唔錯增長。

4) 現時大市只係合理水平，未到平宜區，每月儲蓄你預用一半左右，去做月供好了。餘下一半，我地先儲起，去等大跌市機會。

你現時才33歲，係選股時，應選擇一些較有增長力股票，先去為自已累積一筆資產。到近退休之年，才慢慢換回收息資產，支援退休生活。

所以，你應先集中增長，而唔係收利息。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

------------------------------------------------

Q22445：

你好龔成老師，想請教下: (我45+歲) 現持有組合：

長和 500 股
香港中華煤氣 600 股
匯豐控股 1,091股
恒生銀行 111 股
港鐵公司 1,100股

香港交易所240股
陽光房地產投資信託基金 2000股
領展房產基金 900 股
建設銀行 4,280股
長江基建集團 500股

華潤置地 260 股
工商銀行 4,180股
平安好醫生 100股
金沙中國有限公司 580 股
中銀香港 1,570股

盈富基金 1,090股
交通銀行 930股
中國銀行 2,200股
阿里 100股

這樣既組合是否可以。

請問你是否贊成賣出交通銀行買入復星醫藥 (2196)?

想供月供股，每月$3,000，領展（823）-$1500 & 比亞迪（1211）$1500? Or 領展（823）- $3000, 不知道可以適合我 ? 請問你會建議我買哪些股票呢? 盼回覆～謝謝！

請問你陽光房地產 or 越秀房產信託基金 or 領展比較適合我?

龔成老師︰

你現時持股，雖然都係有質素，但數量實在係太多，好難定期檢視管理。長線計，你最好集中翻係10隻左右。

另外，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。你組合中，銀行股佔左唔少，你要審視翻個比重，以避免出現過度集中的情況。

唔建議賣出交通銀行買入復星醫藥 (2196)，復星現價略貴，要回多少少才算合理。

以你年紀，我建議集中在平穏增長股類。領展(0823)係可以，但我地投資唔可以只集中係單一股票，我建議你都加入指數基金，指數基金供$2000 / 領展供$1000。

陽光房地產(0435)和越秀房產信託基金(0405)都可以考慮，但佢地主要係收下息，增長力無領展咁高，以你年紀，領展(0823)會係比較適合。

------------------------------------------------

Q22446：

想問多一問你意見，假設我而家買入一個單位450萬，俾首期兩成，呢個單位會放租，但有機會未必一定請時間可以放租，有機會預算自己都要供樓，

用以上呢個方法就係擔心樓價不斷上升， 而萬一幾年之後股票增長不太理想，可以自住。但假設股票增長理想 呢個單位會賣出 而買入反一個600-700萬單位自住。

問題係，咁會現金用左100萬 俾首期，剩返180萬投資

1） 是否唔應該現在買入一個單位先？ 因為自己租樓住唔想追唔切樓價上升，所以諗緊要唔先買一個單位，同埋有機會五年之後賣出呢個單位，會比起集中只投資效果冇咁理想？

另外擔心一買一賣 都需要印花稅 等費用

2）以我諗法希望5年後有500萬以上 當然希望回報可以再大，可以50%潛力股 50% 平隱增長嗎？

3） 如果用五年時間投資，預留一半現金等大市大跌再埽貨，但冇人知道大跌市係咩時候，咁應該點樣去衡量？

所以例如如果兩至三年仍未大跌市，佢應該keep住月供，或者分注見低就入？

謝謝老師

好希望盡早投資 生活會較理想，多謝你成日比正能量人

4) 老師， 現在平衡股票如下 會長線投資。請問一問 以下組合如何，可給一點意見嗎？

用180 萬 先分注入
再留100 等機會

大約
60%潛力股 ：
1177 12％
1810 17％
3067 17%
9988 12％

40% 增長
2388 14％
1972 14％
0548 14%

月供 $2000 2800
月供 $2000 2845

龔成老師︰

1) 這個問題，無一個100%答案。正如之前所講，現時樓市租金回報率不高，正常用優質股增值，個效果會較好。

但無人知5年後，樓市升快D，定優質股升快D。我地只能用現有水平，去得知值博率係而一刻，係優質股較好。但唔代表最終，樓市唔可以跑嬴翻優質股。

所以，"用投資優質股換大屋"，定係"細屋換大屋"，你要自己衡量。從現時值博率計，會係前者。

但若你相穏陣D，其實先買細屋，再換大屋都未嘗不可。但你要確保細屋升值能力，最少能跟大市同步。

另外，你可能會用來自住，即係佢都要滿足你長線生活需要。而且，間屋唔好太細，最少要有300呎以上(一個家庭基本需要大細)，才有基本投資價值。

2) 可以，但留意如果要直接入貨，現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)算在合理區中上至頂部，可分注入貨，其餘都略貴，想買就要等一等。

但如果係月供，我之前推介你的股票，現價都可以開始。

3) 的確係無人知，但我地投資係唔會"估"走勢，只會用平貴去定策略。現時市況係合理水平，我地應預留3-5成現金，去等大跌機會。

因為我地唔會知幾時大跌市出現，但如果你無現金係手，真係出現時，你會錯失良機。

4) 你計劃係可以，但小米(1810)都仲係有D貴，最好回多1成才入。

你緊記180萬係分多注咁，慢慢入貨，唔係一次過買晒。

另外，深圳高速公路（0548）只係收息股，增長力好弱，唔係咁適合。我建議你將佢換成指數基金，去增值組合平衡性。

------------------------------------------------

Q22447：

龔成老師，這個失敗的組合(0003, 0012, 0778, 1299, 2388,3067, 3383, 9988) …應該怎麼辦…？ 除了aia , 有很多股票由2017，18年坐到現在… 到了3067，我不停加註，怎知愈來愈跌

很灰

龔成老師︰

你整體的持貨不是劣質，不少都是有質素的，但部分你可能在較貴的價位買，以及市況波動，令股價向下，建議你日後多用平均入市法，又或提高計算企業估值的能力。

另外，你提及3067不停加注，記住，投資要有策略，買入前寫低具體的進行方法，投資後要長線，持股5年以上。

只要長線質素無變，中短期波動我地唔需要理會，長線持有就可以。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你現時持有股票，都係有質素，可長線持有。但當中雅居樂集團（3383）負債水平較高，不宜佔太高比重。

我見你安碩恒生科技(3067)都加注左唔少次數，你要留意此股和阿里(9988)都係潛力股類，雖然有長線投資價值，但風險會比較大。如果你年紀較大，或者投資經驗不高，這類股票不宜持有過多。

------------------------------------------------

Q22448：

龔成sir, 你好，多謝你用心的分享，增加咗我唔少投資方面的知識。一直以來都無去做過咩投資，特別是股票，了解不太多。

最近數月，我開始透過youtube及朋友了解到股票投資。

想透過穩建的投資組合去增值資產，而非將錢放銀行貶值。增值資產主要目的在放：

1. 短：5年內換2房半或3房單位（$900萬以下）
2. 中：（10-20年內）孩子將來有到外國留學需要時用
3. 長：（20年）將來退休生活費

現時我（33歲）與老公（39歲）有穩定工作和收入，每月收入扣MPF約$68000。每月家庭開支約$56000，可儲約$12000。育有1個幼兒，有計劃1-2年內生多一個小朋友。

資產：
1. 現金$30萬
2. 物業：市值約$620萬，每月供約$14000（仍欠銀行$296萬），出租每月$13000（自己租樓住$16500）
3. Ibond: $30000
已買基本醫療保險

現在有些投資想法：用一半現金儲備投資股票（用一半在黎緊尼次股市下落中分注買入一些平價位優質潛力股(0700、9988、2845，各100股）；

一半投資穩健收息增值股和EFT（0823/VOO/HD/0303/0006/6823）作儲蓄增值之用；另外，計劃每月供$6000股票（0823/VOO/HD/0303/0006)

Q1. 以上這個投資計劃會否太進取？分佈是否平衡？

Q2. 月供股票主要想放在有穩定收息增長及分散風險的股票，想問我較適合先投資哪些我計劃內的股票？

Q3. 美股我計劃待下跌後再供，VOO & HD咩價位為之適合入市？

Q4. 以上三個潛力股到何價為平（以作參考入市價位）？會否有另一些更合適我投資的優質潛力股？

Q5. 我也有想過入0388，咩價位才適合入市？

謝謝你。

龔成老師︰

其實你3個目標，我地都可以透過用優質股增值，去達成。

1) 潛力股部份，係可以。但另一半，以你們年紀和計劃作考量，我較建議集中在平穏增長股，而非一些收息股。

領展(0823)、VOO、HD係可以，但其餘3隻都係收息類股票，增長力唔高，唔建議用。你可以用以下股票，去取代這3隻。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

2) 由於你3個目標，都係需要財富增值才可做到，因此選擇方面，應以增長股為主。

你月供計劃，同樣有少少保守，建議你將偉易達(0303)和電能(0006)這2隻收息股，換成潛力股，去增升組合增長力。若你相保守少少，換成平穏增長股，都係可以。

每月餘下$6000就先儲起，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

3) 現時佢地價格在合理區，你照保持月供，咁就可以。我地月供只會係去到好貴，才會考慮下調供款額，甚至停供。

如果你本身定平貴能力不高，我建議你不理價格，一直月供會較好。因為你自己調整出錯，就好大機會影響你長線回報。反而一直供，會對你更有利。

4) 上述的潛力股，都適合你。你可以睇翻自已對邊個行業或企業更看好，本身對隻股票，又有一定認知，去決定投資目標。

部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

5) 港交所(0388)都係一隻可選擇的潛力股，但現價略貴，回多1,2成才入，值博率會較高。

另外，你持有的IBOND只係定息產品，無增長力，唔適合你。建議沽出，用來投資優質股會較好。

------------------------------------------------

Q22449：

成哥，想問下以下組合係米仍然繼續特有適合?

700 ，556買入
799，10.94買入
3383，10.94買入
3690，281買入
1810，28.61買入
939，6.2買入

龔成老師︰

騰訊（0700）、小米(1810)、美團(3690)和IGG（0799）有質素，可長線持有。但美團(3690)和IGG（0799）不確定性較高，不宜持有太多。

上述4隻都係潛力股，如果你年青，持有係可以。但若你年紀較大，就只宜好小注。

雅居樂（3383）業務上是有質素的，但中國經濟有少少風險，加上佢本身負債較高，相信會對佢有影響。

這股都有長線投資價值，但負債高始終是風險，唔建議太大注。

而建行(0939)都有長線投資價值，但佢增長力不高，只係收息股類。如果你係較年輕，這類創造穏定現金流的股票，就唔適合你。

------------------------------------------------

Q22450：

龔sir，請問2158 $35.5入 1044 $50.9入現價可溝嗎？可以長期持有嗎？

龔成老師︰

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價依然係略貴，唔建議加注。而且，此股不確定性較大，只宜小注投資。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

若你本身計劃分多注投資恆安的話，現價加1注係可以。如果你資金不多，等佢再回多1成左右，值博率會較高。

------------------------------------------------

Q22451：

龔sir, 你好！想請教你，我現在月供

$5000港交所
$6000騰訊
$6000 阿里巴巴
$5000中國平安

中國政府現時加強監管科技、教育、物管和外賣股，我應唔應該繼續供？還是有其它股票可以平衡風險？請龔sir 指教！

另外，美股科技ETF 值得買嗎？

龔成老師︰

中國政府在不同行業拖加新政策，都造成不同程度的風險。但我地要分析翻，這些政策係唔係明顯會對企業長線發展，造成核心性影響。

就你所月供4隻股票而言，影響係有，就暫時唔算係一些核心性問題，這些股票依然有投資價值。

但你而家月供組合，太偏重左係潛力股(0388, 0700, 9988)，佢地雖然有增長潛力，同時風險都較高，不宜持有過多。

若你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

同時間，每月儲蓄唔好盡用，要留有3-5成現金，等大跌市時去入平貨。

美國科技ETF，都有投資價值。

你可以考慮三星FANG ETF（2814），佢係追蹤NYSE FANG+指數的表現。是一個美股潛力股基金。

首先，FANG+係代表美國上市多隻領先既科技股票，即係代表Facebook、Amazon、Netflix、Google，而該指數會再加上其他科技股，如Twitter、Tesla、百度等，即是全球處最前列的科技類公司。

這基金是一個潛力基金，長遠正面，但要留意價格會較為波動，加上近年科技類公司上升左唔少，因此現價唔算平，建議以月供的模式投資，買入後長遠持有。

但你要留意一點，你現時港股有內地的阿里(9988)和騰訊（0700），再加上這美國科技基金，你就會成個組合，非常集中係科技相關股份。

由於佢地係同業，最好維持不多於組合3成，以免出現過度集中性風險。

------------------------------------------------

Q22452：

想問一問愛康
點解 我買入既一手 都咁差

龔成老師：

投資要不斷學習的，如果投資因為自己分析不夠完整，下次就分析得更好。我15年前開始，一年平均睇50隻股，每隻要花6小時分析，然後一年只買1、2隻股票。

其實愛康醫療（1789）不算差，以長遠業務分析，正面的。

佢以「愛康」品牌從事設計、開發、生產及銷售骨科植入物，並專注於髖關節及膝關節置換植入物。

睇翻佢的資料，佢的產品包括用於初次手術的骨關節植入物，以及為置換、修復或升級前次手術的植入物或部件的翻修手術而專門設計的骨關節植入物。都是有前景的業務。

這股業務不差，有增長潛力，盈利增長，這反映企業有實際的價值提升。

不過，投資時要考慮價格風險。現價合理區頂，另外，佢業務是有潛力有風險類，因此要明白較為波動。

------------------------------------------------

Q22453：

成哥，我上年先開始學投資，果陣見到d科技股 升極都仲有得升， 有幾隻股等左好耐想入，之後早排回落左都算多 就入左 d，發現原來仲有得繼續跌

例如阿里 果陣300，跌到落 230 我無貨 ，果陣都見你話仲係略貴 但都係入左1手 ，依家落到191 ，其實都有信心呢隻股係無問題

但覺得買貴左好多， 如果當拒上返 大約23x度 我放一放，再耐心d等拒跌 比較平既價位再入 如唔會比較好？因為初初開始投資 唔知道原來耐性好重要

龔成老師：

阿里（9988）有質素，中短期一般，但長遠仍有增長力，之前貴，現價去翻合理區。

係業務層面，擁有相當的優勢，不少業務處於壟斷狀態，同時增長理想。加上正不斷發展延伸業務，這都會成為企業增長的潛力，預期增長會持續，這是阿里最大的賣點。

以企業的長期發展計，這股的確優質，但股價都有一定的波動，現價算是合理翻D，但都不是大手時候。

始終將面對內地監管可能收緊，因此風險度增加左，不過，我相信佢的整體優質度仍在，內地不是不想佢賺錢，只是想規管佢。佢已建立好完善的業務，因此本身是無得輸，只是賺多賺少問題，現時監管多左，點都會影響賺錢能力。

對於這類優質、有發展，但現價未算特別平的股票。

你有貨，可持有，上到230，其實未算貴，如果你賣出，無人知能否買得翻。

你這種想法，就是一種估走勢的做法，而巴菲特等投資大師，都不會這樣做（因為佢地認為無人能做到），你現時的想法，同一般散戶一樣。而我希望你能進步，加強知識，不要停留在一般散戶層次。

------------------------------------------------

Q22454：

龔Sir 你好
對於股票最近真係跌到懷疑人生
股票長期持有，其實應該點處理
有些股票原先有賺，但諗住長期持有，近期一直下跌，已經跌至虧損。

其實對於長期持有，應該係賣出？一直持有不理？還是依然要睇圖下跌時離場？

係咪就唔使理止蝕，只要長期持有就得？
應該點操作才對

龔成老師：

我記得2003年，香港樓跌到好勁，港股都是，我已有投資港股，當時好多朋友都講「港股玩完」「樓市玩完」。

98%的投資者，都會以短期股價做分析點（樓市都是一樣），這是一般散戶的思維，而投資大師，則能平常心面對股價，著重企業的長遠發展。

到樓市、股市升翻，散戶又話「如果比多一次沙士價我就好了」。

這種思維，就是散戶。

你現時，要睇翻該企業，有那些核心因素改變，分析佢3年仍的業務情況，推算佢盈利是否有明顯下跌，唔好好似一般散戶，只著重短期股價。

我希望你能進步，能學知識，而不是停在一般散戶的思維！

------------------------------------------------

Q22455：

阿sir ，企業質素有冇核心性轉差點樣睇？

龔成老師：

你要分析佢的長遠財務數據，分析3年後，財務數據會否明顯減弱，市場佔有率有否明顯下跌，產品的賺錢能力有否明顯減少。

------------------------------------------------

Q22456：

老師，除淨日會自行調整股價，即派$1息股價會減$1, 咁對於買股收息這件事，仲有咩用？反正收幾多息，股價都跌返個數

龔成老師：

對短期投資者，無用。但長線投資者，就是一種現金流的概念，你要以一盤生意去思考，你買入一盤生意，佢會分派股息，分派股息的當刻，市場價值會減，但只要不是短期去出，長遠生意又會慢慢增值，以及不斷分派股息。

------------------------------------------------

Q22457：

龔sir 你好，突然有10萬，我可以點樣漲大呢10萬價值呢？

我指的是買有咩股票好

龔成老師︰

你可以利用這10萬蚊，去投資一些優質股，進行財富增值。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

潛力股︰比亞迪(1211)、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）。

平穏增值股︰盈富（2800）、港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)。如有投資美股，可考慮：VOO。

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

大市現處於合理水平，那10萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

另外，收息股和平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22458：

龔sir ，我依家18歲仲讀緊書，啱啱出嚟做嘢試吓一兩個月，返緊地產行業，眼見好多人都好成功搵到錢，我自己都想成功，遲吓都會想玩下股票請問新手有冇啲咩要注意，

同埋想知道點樣先可以變到有錢，理財很重要嗎？

龔成老師︰

非常好，把握假期時間去工作，吸收工作經驗之餘，可以門開闊視野，對你將來選擇人生路係有幫助。

理財係十分重要，而且範疇好廣泛，由你打工儲錢，到投資增值。若你想成為一個有錢人，你就需要好好學習。

現時你要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平，香港的監管不差的，風險不大。你可以先了解下不同的收費。

第三，將每月的部分資金，去做月供股票，供指數基金。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，指數基金是一個組合，適合絕大部分人投資，風險不高，長期儲貨可助你財富平穩增值，記住要長線持有。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過幾個月，有知識及少少經驗後，就可以利用你手上的資金，其中一部分，去投資股票。

------------------------------------------------

Q22459：

龔老師。本人睇左好多你講關於月供股票、投資心態的文章和影片，真的獲益良多。本人30歲，工作繁忙，心感難以日日留意市場捕捉買賣價，

所以希望走向月供之路。以下是我的一些想法，希望老師指教。

每月可儲錢$25000︰

1. 5000 現金儲蓄
2. 5000 月供JPM 美國科技
3. 5000 月供JPM 美國企業成長基金 / 美國巴郡B ETF
4. 5000 月供建行
5. 5000 月供長建

如果可以，打算無限供，未知老師可否指教指教，謝謝

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。因此，你係無成日睇住個市的必要。

而月供，係一個長線計劃，月供最少維持3年，並持有這些股票5年以上，才會有較理想效果。當然，如果企業質素一直無變，最好一直持有。因為，優質股持有時間越長，財富增值效果就會越理想。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你30歲年紀，應以增值為主。你現時月供股票，大致係可以。但建行(0939)只係收息股，增長力唔高，唔建議你用來月供。

你可以用以下股票，去代替。

平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

另外，現時大市只在合理區，現在你每月先用5成儲蓄，即$12500做月供。其餘先儲起，用一邊月供一邊儲蓄的策略。餘下一半資金，等大跌市出現，才去動用會較好。

------------------------------------------------

Q22460：

老師你好，我今年29歲，與家人同住，無男友，無投資經驗，無保險，每月可儲大約萬三，另有現金40萬。

最近有諗緊需唔需要買保險，另外因為同屋企人（妹妹）基本上喺屋企互當透明唔會講野，有打算搬出去住，但如果買保險同搬出去住，洗費就會大增，

可儲嘅錢就會變少，所以有所卻步，老師可以比少少意見嗎？

三個月前開始月供$7,000股票，分別為

港燈（2638）$500
長江基建（1038）$500
盈富（2800）$4,000
粵海（270）$1,000
安碩恒生科技（3067）$1,000

請問老師我現在嘅月供股票組合有問題嗎？有何需要調整嘅地方？麻煩老師了

龔成老師︰

如果無實際必要，我唔建議你搬出去住，因為會產生額外開支，拖慢了你增值計劃。

我地理財，要做到「攻守兼備」，保險、備用現金等是防守，但防守部分不用太多，餘下資金就應進攻。保險最大的作用是「保險部分」，反而投資作用一般不大。

即是買保險，最大作用是醫療、人壽、財產等的風險轉移，將你不想承受的醫療費用等不可預測支出，轉嫁比保險公司。但儲蓄保險這類產品，但不宜持有太多。

而我地投資增值，係會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你29歲，應以增值為主，你可以用有增長力的股票，去創造一個增值平台。

現在你每月用$7000做月供，其餘先儲起的策略，係正確。但港燈（2638）只係收息股，增長力欠奉，唔適合你。

現時大市只是合理區，你現有40萬資金可以先投入10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

同時間，你要去多讀投資相關書本、年報，新聞和課程。

書本上，你可以睇我寫架"80後百萬富翁"、"財務自由行"和"股票勝經"，都適合初學者。

另外，本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21721-Q21740）

Q21721：

龔sir,你好
想請教下如何有效咁儲錢

我人工只有17000
分期還緊卡數，
找完數每個月只剩下3000蚊

每個月都清，儲唔到錢
如何可以處理現況，或增值儲錢方法？

沒有任何投資經驗
謝謝

龔成老師：

第一，你要定目標，如果無目標，就無動力去做。不用太誇張，但就要適合自己，例如一年儲$50000，5年儲$50萬等。

第二，減少用信用卡。

第三，習慣每天記低花了多少錢，不是要求你不花錢，而是要知。

第四，分清想要同需要。

第五，如果你本身自控能力較弱，可參加銀行、保險公司，月供基金、月供儲錢、月供股票等計劃。

就算每月只供$2000，長遠都能累少成多的。

你可以睇我的書《80後百萬富翁》，適合你的。

------------------------------------------------

Q21722：

龔成老師，老公最近係書局睇到你既書，買了回來，覺得好大啓發同鼓勵，謝謝你！

我地剛結婚，而家有地方住，但因長遠想有小朋友所以想地方大啲，諗緊買樓，想請教一下你的意見：

老公同佢屋企大概有350萬首期，我自己就大概有80萬資金，我地一年前開始睇樓，但因為疫情反覆加上老公轉工，一直未决定到點買同買咩，而呢段時間樓巿都升了不少；

老公黎緊7月會返新工，我地呢排都睇緊樓；

你覺得我地應該進取啲買9xx萬既樓，定保守啲老公買7xx萬的，我自己則另外搵細價樓（如500萬下）投資？

另外因為老公7月先返新工，你覺得係咪應等到下半年先買？不過近來樓巿交投暢旺，下半年會否要更貴？

抱歉問了很多問題，謝謝你！

龔成老師︰

由於你地現時有地方住，距離你實際需要目標新屋，其實都有一定時間去準備，所以唔需要急。

目標係"9XX萬的自住物業"，定係"7XX萬的自住物業 + 5XX萬收租樓"，我會偏向前者。

我地做決定時，要考慮成個財富組合的配置，如果你係"自住物業 + 收租樓"，你成個組合會偏左係物業類。

當樓市出大問題時，你成個財富組合，會有嚴重影響。這不是價格，或者配搭上考慮，要係講成個財富組合的平衡性。

因此，你應該係置業之餘，都要同時留有一定股票，進行財富增值，成個財富組合才算健康。

由於有一定時間去準備，你可以先用一半資金，去投資優質股作增值。

你可以投資「平穏增長股」和「潛力股」。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只在合理區，你可以先用一半資，分注買入上述股票。餘下一半，我地就等機會，當大市出現較大回調，就加大力度掃貨。

此期間，若你發現合適單位，價格又唔錯，而且你們有信心，長線都係「供得起」，就可以考慮動用這筆資金入市。

------------------------------------------------

Q21723：

龔成老師你好：我就尼26歲，女，月入扣除強積金供款約$40000，每月俾父母家用共$10000

月供$2000儲蓄保險，供左1年，仲要供多4年

月供2份住院保險共$3300，供10-15年後可全數本金取回$515000

銀行存款約港幣$60萬，另有價值共$13萬的外滙

有一份現值$115000的派息基金，每月約派息$670

想投資一個$250萬的為於大角咀的新工廠大廈單位，你認為好不好？只係比較擔心樓價會跌。

如果唔好，你認為投資咩最好？月供股票？

你覺得依家適唔適合買樓？

同埋我已經幫父母買哂醫保，將來即使有健康問題都不太擔心醫療費用，我亦暫時未有結婚念頭。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你26歲年紀計，你應該先做好增值部份。

"保險"只係理財中防守部份，買足夠保障就可以，增值可以留比優質資產(如優質股、物業等)去做。

現有儲蓄保險，你可以保留，但未來唔建議再投資太多這類儲蓄產品，因為會拖低你財富增長力。

13萬的外滙，你可以睇翻有無實際用途，如果無，你可以換回港幣去投資。

至於基金，暫時派息率都可以。但要了解清楚，這個派息率是否保證。同時，你個基金會唔會出現"賺息蝕價"的情況，才決定是否持有。

其實工廈，近年的回報率不高，投資價值只屬中等。投資與否，你應睇翻佢租金回報率，來作決定。

另外，近期興起的在家工作模式，有機會影響到工廈、寫字樓等的潛在需求。影響有大，係一個未知之數，但會多左一個潛在風險。

現時從投資角度出發，整體上投資股市，相對投資樓市，值博率會係較高。

當然，如果你這個工廈，係肯定租金回報率較高，又有升值潛力，其實都可考慮。

否則，我建議你月供和現有資金，去投資優質股，咁會較好。

策略上，你可以投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那60萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q21724：

龔sir你好，以前無意中發現你的專頁，就一直keep住follow，最近幾個月將你的所有書都買曬返屋企了，之後要逐本睇曬佢~

因為我對理財投資係完全零認識，所以我亦買曬全套的富爸爸窮爸爸，唸住睇曬先再睇你的書，起碼有d底先，再睇投資類畫會好d。

見到你都會有解答讀者的一些問題，就睇下我會唔會咁好彩，你會見到我message~

本人29歲，以前係做會展, event類工作的，都唔知好彩定唔好彩，2年前轉行做了department admin, 一過試用期就疫症，

眼見好多同行都失業或者停薪留職無工開，我唸我都算好彩。。。但呢個位係死位，無人工加無職升，除非跟大圍每年幾幾％，如果唔係都唔會有調整0

。好多熟d的director 都同我講，有得走就好走，呢個係死位。。 同埋覺得呢份工真係唔適合我，做左2年都係覺得好辛苦，好頹，

甚至1年前因工作而抑鬱而差d自尋短見，d人成日羨慕我份工咁hea唔洗做福利又好，但我真係覺得好辛苦，無成就感，無嘢係我負責的感覺好唔鐘意，

如果我係有家庭或等退休，咁呢份係絕世好工。。。有試過搵工，但依家個market好似無咩地方請人。。 同埋最驚係，再遲d 過慣退休生活，會出唔返去。。

連我男朋友都話我似足佢退休ge阿媽。。因為我日日真係唔洗用腦，唔洗點做嘢，返去坐。。。同埋連自己都覺得，真係蠢左。。。哥下先恐怖。。

以下係本人財務訊息：

資產：
現金：月光族，銀行永遠只keep有3000現金
儲蓄保險 100,000 (一筆過，不用供，現每年收息，約4％)

收入：18k (1k公積金，實可支配現金17k)

支出：
保險：2,000
固定費用：1,000
家用：3,000

儲蓄：
定期: 1200
月供基金 (富蘭克林科技基金): 1200

負債：40,000 (信用卡分期, 每月還3,000)

以前只要儲到錢，就會用黎去旅行去，所以依家基本上都無咩儲到錢，自覺出年已29＋1。。先發現財政狀況實在可怕，但感到唔知點算好。。。。

因為現時財政係負債緊，亦唔敢轉工。。。因為依家有醫療福利，交通津貼，食飯津貼。。 但真係好辛苦，好驚自己會抑鬱落去。。但又唔敢辭職。。

希望參考下龔sir你的意見。謝謝。

龔成老師︰

基本上，我99%留言都會回覆，想盡量珍惜大家互動溝通機會。但由於近排比較多讀者發問，所以最少都要好幾日，先至可以回應到。

睇完你的留意，我覺得你係一個成熟的人，很會為自己長遠作打算。

我相信你對前途，已經係有一個想法。只是礙於現時疫情，再加上現有債務上負擔，令你唔敢去改變現狀。這一點，係完全可以理解。

的確，現時求職市場唔係咁理想，你而一刻去作出改變，風險會唔細。但我地唔係無野可以做，你可以想清楚，自己未來10年、20年的路。

我地唔係要而一刻，立即全面去改變。但我地可以為未來去準備和舖路，等待時機出現，我地就可以更有效率和本錢地，作出行動。

例如，你要學什麼野技能，才可以做到心目中的理想工作。你可以先去讀相關課程，甚至去做這類型工作的兼職、問下這方面有經驗架朋友，去一步步行近自己目標。

記住，我地係要睇長線，只係對長線發展有利，短期可能人工較低架工作機會，我地都應該要考慮。

至於你財富增值方面，你要先處理好信用咭負債部份，因為佢利息好高，會拖垮你投資回報。

同時，你要努力去審視自已開支，睇下有無地方可以節省，盡力每月空出一點資金，去做月供股票，去進行財富增值。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。

已一筆過交付的儲蓄保，你可以保留。但未來唔好再投放太多資金在儲蓄保險，因為會減弱你財富增值能力。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時29歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

定期這類定息產品，無乜增長力，唔適合你。

基金你可持有，但必需了解當中持股(最少要了解10大持股)，是否優質和有增長潛力。

投資策略上，你可以在處理好咭數後，投資「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我寫架"80後百萬富翁"、"財務自由行"和"股票勝經"，會較適合你這類的初學者。

記住，世上沒有問題解決不了，只要你不放棄，總會在不同地方，找到一條適合你自己的出路，加油。

------------------------------------------------

Q21725：

老師你好，近日睇完你新作，同埋睇左好多有關吸引力法則既書。我知道要盡快行動！

我根據自己既專業成立左一個專頁，目的系分享，希望做第一步。唔知老師有冇咩提議呢？

因為專頁會叫你俾錢做宣傳，想問下老師一開始整專頁時有冇咁做呢？

龔成老師︰

其實整專頁，同做生意一樣。

除左你要比人睇到你的專業外，這個專頁對讀者有無創造價值，令讀者可以從中獲益。

另外，你要突出你個專頁獨特之處，跟其他競爭對手，有什麼不同，為什麼要睇你，唔睇其他人。

你從讀者方向去想，怎樣才會造成雙嬴，人流就會自然增多。

我最初無特別比錢做宣傳的，之後就有。

你最初可以透過身邊人去做宣傳，叫佢地幫手，同時初期你可以問翻身邊人意見，睇下點樣先較受歡迎。你要找市場歡迎的，不是自己盲目比資訊出去。

------------------------------------------------

Q21726：

龔sir，一直有留意你嘅文章，有東西想請教。本人37歲，月入10萬左右，扣除各方開支，月儲2萬左右（其中1萬會預留交稅）。現想找方法投資，希望60歲退休每月有3萬蚊息收下。

1. 想過月供股票，但亦有聽過，其實月供股票到最尾係會輸錢/回報十分低。比如說，2015年到2020年，如月2800，其實際回報只低於3％。如果係咁，有乜方法建議呢？

2. 如月供股票可很，想請教有關組合及操作方式。
謝謝

龔成老師：

1）月供股票是一個穩陣的方法，但的確不是最高回報的方法，但我一向會建議初階者先月供，因為初階者根本無法把握買賣時機及企業估值，如果做錯決定，就會有負回報。

因此，我建議你每做月供，每月$1萬，同時學投資知識，到了有一定的投資知識，就不用月供。

至於選股，最初你可以選ETF，如2800、3067，到你有一定的投資知識，就可自行選股。

2）簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

月供最重要的一點，是「選股」，如果你無選股能力，就投資ETF，如盈富。

------------------------------------------------

Q21727：

老師你好，首先多謝你，我跟你價值投資法，購入6隻股票，只有一隻9988未賺錢，不過我會strong hold！

今次有幾個問題想問，我覺得電動車係黎緊大趨勢，想問你有無電動車股推介？之前你推介過的2845好似現價略貴？

另外請問吉利汽車現價處於合理區嗎？
謝謝

龔成老師：

現時電動車的佔比仍好少，而這是大方向，因此仍有一定的潛力。

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區中上部，股價波動，有貨可長線。如果現價入貨，小注都得。

------------------------------------------------

Q21728：

龔成老師，多謝你回覆，我係依幾個月入左少量股票如下:

3067~600股@18.24
1177~4000股@7.905
0066~500股@43.7
0014~1000股@29.2
2800~545股 (月供)
0027~43股 (月供)

現正打算月供3000蚊0027，3000蚊1810，請問會唔會太散亂？

本人年紀30中，另外打算再投資多10萬蚊落股票，請問點樣配置會比較好？謝謝你無私分享

龔成老師：

唔會亂，你上述持有的，都是有質素的股票，同時隻數不過多，你預一般組合，10隻股票都可以的，反而過份集中一隻股，會出現集中風險。

上述都是有質素的股票，可長線持有。

而你的年齡，可投資潛力股+平穩增長股，如果你有實力，潛力股可較多，若實力不足，潛力股不宜過半

你月供的兩隻股，無問題，可以長期進行，當然，如果想組合更加平衡，就加入ETF，如盈富（2800）、恆生科指ETF（3067）。

至於$10萬，你要留有一定的現金，餘下可考慮盈富（2800）、恆生科指ETF（3067）、港鐵（0066）、中國電車基金（2845）。

------------------------------------------------

Q21729：

龔Sir您好：經過了3個多月的新手學習(不斷睇你的FB和讀你的書)，慢慢有了基本的投資概念，現時手頭上有的股票：

銀河 71.35x27股
比亞迪電子 45.1x43股
領展 68.6x100股
比亞迪 208.6x9股

舜宇光學 181.4x10股
盈富 29.4394x163股
GX中國電車 114x50股
安碩 18.8619x2400股

老師，請問安碩會否過於集中，而其他又太零散呢？有什麼建議可以給我嗎？

龔成老師：

你持有的股票，基本上都是有質素的，但就有幾個問題。

第一，部分股價在貴的價位買入，反映你未有企業價值概念，建議你加強這方面的學習，同時，在未掌握前，多用分注、月供等這類方法，將買入價平均，能有效減少你一次過在高位買入的風險。

第二，潛力股都佔了一定比例，潛力股長遠當然對我地財富有較好回報，但同時要求你的投資實力較高，因此，暫時潛力股比例，不宜過多。

第三，你部分有集中行業風險情況，例如電動車及手機相關，佔了一定的比例，你日後要注意翻。

至於你所講的安碩集中情況，問題不大。而整個組合不算散。

你要同時留有現金，唔好太快去一次過買入太多股票，慢慢立一個長遠平衡的組合。

------------------------------------------------

Q21730：

成哥你好，有個有關失業貸款嘅問題想問你，希望可以得到解答

小弟今年廿中，雖然我而家失業但我之前都儲左筆錢可以應付到一段時間嘅生活，最近政府出左個失業貸款年利率1%好似幾吸引咁，可以分6年還錢，如果我申請到失業貸款再將呢筆錢放落股票市場會唔會係一個明智嘅方法？

如果我拎呢筆錢拎黎買美股voo（因為呢筆錢係借所以揀呢個風險最低嘅黎投資），根據數據一年平均都有1x%嘅增長

變左我可以將呢筆錢去增加我嘅現金流/總資產，而且在預定還款期末或之前還清全部貸款和利息後。

龔成老師：

唔建議。

其實你這樣即是借貸投資，雖然利息低，但始終借貸投資都是有風險的，加上你本身無收入，如果投資不幸出現損失，對你的影響會好大。

美股VOO，近年回報的確不差，但你不能以這數據去推算往後都不錯，現時美股唔平，如果出現較大調整，對你不利。

另外，借貸投資只合高階投資者，因此如果實力未到最強，暫時就不要動用。

同時，借貸投資只會在市況好平，及恐慌期才會動用，而這刻，並不算。

------------------------------------------------

Q21731：

龔Sir之前抽中一手百度50股，但一直跌，点算好

仲有阿里巴巴$271買入300股，都係咁跌，点算好

麻煩龔sir有時間回覆，感謝

龔成老師︰

百度(9888)為全球最大的中文搜索引擎，是內地用家搜尋資訊主要對口，2019年百度用户規模突破10億，而百度App日活潑用户2億，信息流位居中國第一。

當你坐擁不少資訊和客戶群，就可以利用佢地去發展很多不同業務。

百度在規模和質素上係有，但你預佢中短期會較波動。現貨若佔組合不多，唔需要太過擔心，一直持有就可以。

阿里巴巴(9988)近期面對內地監管可能收緊，風險度增加左，令佢出現波動。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左。你買入價係略貴，但唔算好多，現貨可長線持有。

------------------------------------------------

Q21732：

阿sir 你好，參考左你之前嘅意見，最近開始左月供股票，加上上緊股票班中，上你堂好開心，學好多野，整理左自己嘅投資組合：

基本資料27歲，月薪$4萬，現時每月儲蓄2萬（因上股票班時你建議最好儲蓄人工嘅一半，就唯有慳啲）現有15萬現金，及10萬股票，希望3年後100萬，目標買樓。

月供股票$8000:
盈富基金：$3000
領展 ：$2000
阿里巴巴：$2000

之前買左：
盈富基金： $ 24.3 ，1500
海吉亞： $65 ,800
東京健康：$157， 300

希望阿sir 可比少少意見，謝謝！

龔成老師：

現時你方向正確，你27歲，是累積財富的黃金期，所以努力儲蓄，把握機會投資增值，絕對有價值的。

我相信你要3年後完成目標，絕對有可能。

但要留意，由於你打算3年買樓，因此投資時間唔算好長，你最好不要100%投資潛力類企業（因為這些公司增長需時）。

另外，到你接近買樓的6-12個月，就要開始賣股票，為資金作出準備，因此，你其實投資的年期唔算長。

現時你持有的，其實都是有質素的股票，海吉亞醫療（6078）以腫瘤科為主的醫療機構，主要在中國經營醫院業務、第三方放療業務和醫院托管業務。

此股上市不久，故很難估值，而且要時間才可以慢慢見倒真章。

2019年盈利約0.4億，但市值去到300億。初步睇佢股價在一個十分高水平，所以風險不少。如果投資，小注好了。

其實現時組合無乜問題，最重要是你之後的配置，要考慮翻我上述所講，因為買樓的因素，而不要太過進取。

------------------------------------------------

Q21733：

您好，本人年41歲，月入25000元 + 兼職 12000元至 13500元 （未扣除MPF）。月供股票：港燈2000元．盈富基金6000元、港鐵2000元及恆基 4000元，由去年12月開始月供，加上其他股票，合共超過170000元。

另外持有現金480000元，每月可儲蓄超過一半。內地有物業，正等待通關後出售後可得到大約100萬港元。

由於本人和丈夫在香港沒有物業，居所是奶奶提供，其實沒有迫切自住需要，究竟我拿著資金，應該置業放租 / 投資？ 還是繼續投資股票 / 收息股票?

丈夫他53歲，也有100多萬現金，他最近改變主意，覺得沒有下一代，買房子日後無人繼承，不如手持現金? 但我又不認同，覺得是投資工具嘛，或是購買車位也可以考慮。

龔成老師：

其實你最重要的，就是財富的配置，物業、股票、銀行產品、現金等，都是配置的其中一部分。

由於你地無自住需要，因此，物業對你地來說，是一個投資工具，雖然可作為財富配置的其中一部分，不過，如果以現時香港樓的投資值博率計，只是一般。

不是無投資價值，但如果從長遠的增長力來說，投資股票會較好。

因此，這刻可以先投資股票，令財富增值，但不代表不能投資物業，若然樓市出現下跌，有一定的投資吸引力，都可以考慮。

另外，我地進行財富配置，—平衡都是一個因素，因此你若果股票比例較多，而你有較多資金想投資物業，這方向其實都可以，但就不一定好急去進行。

------------------------------------------------

Q21734：

你好呀，龔成老師，我想買隻高息股，考慮緊中石化、中海油、農業銀行、中國電力，請問可以比啲意見我邊隻比較前景/增長力，現價入唔入得過？

謝謝

龔成老師：

其實上述的，都是可考慮的收息股，我會建議你建立一個組合，唔好單考慮一隻。

中國電力（2380）、中石化（0386）、農行（1288）都可以的。現價合理的。

另外，你可以可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21735：

你好,龔成老師
本人今年28歲，上個月剛開始月供股票
$2000 恆基
$2000 盈富
$2000 騰訊

另外，有基金$50000
上年ibond 3手
儲蓄保險供左$100000
住院保供左$100000
儲蓄約有$500000
月入$50000

今個月開始見到股價回落，尤其騰訊，之前見股價跌，我又諗緊入唔入，但我其實本身已經月供緊

我應該加入咩股票月供好，但諗過港燈收息都好
唔該老師

龔成老師：

你現時持有太多防守性工具，以28歲來說，未必好適合。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

在理財上，當然要攻守兼備，但守的部分，其實不用太多，你ibond、現金都太多，而保險如果有需要，則無問題。

騰訊（0700）有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績十分理想，又身處高增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。

現價合理區頂，小注或月供可以。你唔好買入得太急，保持月供就得，除非有更大回落，先考慮一手手去加注。

至於港燈（2638），並不是對你最理想的投資。

由於你投資知識不算高，建議你加大月供至$20000一個月，但暫時就不用一手手去買入股票。

除了上述原有的股票，可加大金額去供外，你同時可以加入優質的平穩增長股，及潛力股，去長期月供。

------------------------------------------------

Q21736：

老師，我又有野想請教你了
本身12.9 入左一手00270
想問依隻是否適合月供？

我見佢現在價位長期處於11個幾，我地揀月供係咪要揀依d無咁大上大落既股票？

但我有追開你fb ,我諗住月供1211 ，每月2000蚊，但見佢股價又上返150蚊 ，想問而家開唔開始月供好？

我現在32歲，有一個小朋友，穩定工作
以下是我的投資組合

00978 20000股
00005 2400股
00012 3000股
01816 30000股

00548 6000股
01038 1000股
00939 7000股
00435 10000股

00386 10000股
02689 2000股
00006 500股
00270 2000股
00175 1000股
00778 2000股

我想加d潛力股，所以已set好下個月開始月供1211，每月2000蚊，想問埋現在可否月供阿里1000蚊？ 唔該晒老師

龔成老師：

月供股票，最重要是供一些「優質股」，不用刻意供一些無大上大落的，粵海（0270）、比亞迪（1211）你都可以供，至於供那一隻，就要睇翻你自己的風險承受能力，以及投資配置。

記住，月供是長期的，是一個持續儲貨的狀態，因此不用理短期股價。

比亞迪只要你月供金額不過多，都可以供的。至於阿里（9988），都可月供的。

至於你現時持有的股票，大部分都是有質素的，但增長力的確不強。你可以加入一些潛力股，最簡單是分注投資：安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

至於現時持有，增長力較低的股，如一些收息類股，其實可以減部分。

------------------------------------------------

Q21737：

你好龔sir，我同太太現時30歲，共月入$6萬，餘下儲蓄都用作月供股票。已購入一自住物業，按揭還款尚欠$693萬，每月大約還$24500。持有現金$110萬，另持有大約$30萬股票，詳細持貨如下:

心通醫療 2000股x$15.26
金沙中國 800股x$32.8
完美醫療 8000股x$2.86
阿里巴巴100股x$216.8
水發興業能源 6000股x$3.44

萬國數據200股x$81.8
福壽園2000股x$7.43
富力地產1200股x$9.6
同仁堂2000股x$5.46
比亞迪111股x$80
平安好醫生100股x$87.5

另外月供緊以下股票每隻$3000，現時持有:

銀河447股x$60
領展403股x$66.2
中生3347股x$7.38
盈富997股x$27

我有以下問題想請教:

1. 負債比率是否過高？應唔應該加快還款？

2. 下個目標係想買第二個物業收租，但如何係高負債下做到？

3. 股票組合是否太分散？有冇咩要執？

4. 110萬現金現時存放在mortgage link，應如何使用？

5. 如果想10年內財務自由有可能嗎？現時有咩可以做？

唔好意思問題比較多，多謝你耐心解答

龔成老師：

1）要睇你物業價值。

除非你較高位買物業，否則，以你現時的整個財務情況計，應該問題不大，你30歲，可承受風險，同時現時低息環境，你還錢不一定有利。

2）如果太急買第二個物業，就會令你過度集中在物業比例，以及令你負債太高。所以，暫時建議你以股票等資產去累積財富，到你有一定的股票比例，到時再將部分轉去物業，就較平衡。

如果要做高負債，其實唔建議，如果真的要做，就要同另一人名買樓及有足夠的收入做按揭。

3）勉強可以，建議你唔好太心急買一些上市不久的股票，除非有較大的獨特性及優質度。

現時月供的，可保持進行。

4）可以將其中$30萬-$50萬，投資優質股，善用現金，以你的年齡，其實可投資一定的潛力股比例。

5）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以加入一些潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q21738：

龔Sir你好，本人38歲，已婚，有兩個小朋友，一個4歲，一個快1歲。 每月家庭收入8萬幾，開支大約4~5萬，現金200萬，定期 50萬，另持有以下股票：

2800 x 2500股 ($25)
1299 x 200股 ($79.5)
2638 x 6000股 ($7.9)
3918 x 4000股 ($8)
3067 x 300股 ($15.92)

近半年睇你facebook 後開始知道投資的重要性，過往都係持有現金/做定期。

希望55歲退休，到時每月能夠有4~5萬生活費。請問以我而家既狀況有機會/ 點先可以達到？係咪需要放多d 資金去投資？如果係，請問咩投資組合適合？

開始明白投資心態的重要性，有基本會計知識，不過投資上就係初哥，請問邊本書適合睇？

而家習慣每日起身睇你專頁，漸漸被您既正能量感染，感謝您！

龔Sir, 另外，仲想幫兩個小朋友做投資，請問係咪應該月供2800?

謝謝您


龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲去計，應先努力做好增值部份。定期這類定息產品，不適合你年紀。

另外，持股中的港燈(2638)是收息股，增長力好弱﹐都不宜持有太多。

未來投資，你可以集中在「平穏增長股」和「潛力股」。你每月5成儲蓄，其餘先儲起，用一邊月供一邊儲蓄的策略。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。到你有一定投資經驗﹐潛力股比重才慢慢調升至約3-5成。

現時大市只是合理區，你現有250萬資金可以先投入約50-80萬，用"分注"形式，慢慢買貨。餘下資金和每月所儲倒的資金，就等大市出現較大調整，才慢慢大力度掃貨，然後長線投資。

如果你希望55歲退休後，每月有5萬蚊現金流，以股息率6%計，你需要本金1,000萬。

我假設投資回報有10%（連股息再投資），你每月投資$30000 + 250萬本金，14年後大約會增值至1900萬，故相信以上安排，很大機會達至你的財務目標。

書本上，我建議你先我寫架"80後百萬富翁"、"財務自由行"和"股票勝經"，會適合初學者。

而小朋友增值部份，由於佢地還很年幼，可增值時間較長，故計劃上會相對簡單。

你可以幫佢地儲盈富(2800)，佢係包括55間質素不錯上市公司股票的組合，有一定增長力。

若你想增長力較高，可以儲安碩恒生科技(3067)。但此股波動性會較大，要睇翻你自已風險承受能力。

基本上，以你小朋友年紀計，持有以上2隻股票都係可以，但你明白當中風險。

------------------------------------------------

Q21739：

男神，我去咗國外先留意到你既專頁，想報你啲班都無機會住，書又買唔到，而家只可以叫朋友買完寄比我

我想問吓，我有一百萬現金，應該點分配可以做到目標五年翻五倍？

仲有想問吓你對中國鐵塔同埋中國移動有咩睇法？ 好似見你比較少提呢兩隻

我中國鐵塔$2入咗， 去到2.2無放就擺到而家

請指教指教

龔成老師︰

我地做財富增值，一般希望做到架合理回報，係每年增長10-15%。你現時這個目標五年翻五倍，用股票投資去做，風險會好大，較難達到。

如果你無其他增值方法，建議你按部就班，透過月供和買入優質股，去為自已資產作增值。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。雖然你買入價偏貴，但此股有質素，你可以守。這股長遠仍算有發展力，不過，潛力度比過往略減，要回到你買入價，相信要點耐性。

中移動（0941）都質素的，5G雖然對佢有正面影響，不過，中國政府希望相關費用不會太貴，令資訊流通更好便利，所以，對佢的賺錢能力方面，未必能帶來突破性的增長。

可視佢為收息股，增長力不算強，較適合年長或好守的投資者。這股有長線投資價值﹐現價合理，可以分注。。

------------------------------------------------

Q21740：

你好, 龔 sir, 我係你既學生, 想問下關於睇年報既問題, 岩岩睇2800(盈富基金)既年報, 有小小問題想問:

1. 點樣分析盈富基金? (我見佢唔會有市盈率/ 市賬率呢類資訊)

2. 呢類基金係用咩方式黎做估值

3. 見佢全年係虧損, 咁會唔會影響對佢既估值?

4. 係年報 P.19 (投資淨(虧損)/收益呢部份, (未變現投資收益之變動) - 意思係咪即係手持而未賣出之股票既市價減去購入價之賬面上既利潤?

5. 另外, 龔 sir, 我岩岩嘗試做 303(VTECH) 既分析, 但我搵唔到相關行業既競爭對手做比較, 咁我係咪只可以用返佢過往數據黎做分析?

感激回答!!

龔成老師︰

1) 盈富基金(2800)就係追蹤恆指，所以你用大市水平，去評估佢平貴就可以。

以往市盈率大約10倍開始平，但由於近期成份股加入不少新經濟股，故要上調少少，大約13.5倍開始算平。

2) ETF你可以用返佢追蹤的指數，去參考平貴。好似盈富基金(2800)，你就要睇恆指水平。

當你分析時，你不應集中分析盈富的報表，而是分析恆生指數，了解恆指平貴，又或以盈富頭10大持股，去計算這些企業的估值，從而計算翻恆指平貴（當然，這只是一個參考方法。

3) 佢係一籃子的企業，分析時唔可以好似一般企業咁，睇個損益表。這類ETF，你直接用佢相對指數，去做估值就可以。

盈富報表所顯示的，只是一些會計上報表問題，你不用分析。

4) 你可以簡單理解為，佢組合中持有或已賣出的股票價值變動。但我地分析盈富基金(2800)價值時，這個不是重點。

5) 如果無直接競爭對手，可以作比對。我地就用佢過去數據來分析，但你都要留意，大環境有無改變。如果無大變，過去數據才有參考價值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21241-Q21260）

Q21241：

致龔Sir，我是股票班舊生，感謝你的教導，開課前買了不少跟風炒作的新股，因為有試過贏，所以後來輸更多，完成課堂後，我就沽出沒有盈利及風險較大的B仔股止蝕，亦沽出了多年前跟風炒作，直至現在沒有盈利還大玩財技的股票，又沽出自己不懂分析的股票。

新股都是我長久以來輸得很多的類別，上課後才知這有如新樓盤一樣，能令有錢人決定售出的資產，一定貴，難怪輸多贏少。

順豐房託是我在未買就分析的新股，沒有抽新股，到現在還未持有的，我的分析如下，請賜教：

預計1.3億可分派利潤
發售基金單位：5.3億
股息率5.3％-5.9％
定價$4.98

計一計數
每股可分派約$0.25
除以股息率
估算合理價在4.23-4.72之間

雖然定價較高，但因應市況不境，還算克制，新上市即大跌一成半，證明老師所說的沒錯，股價終歸會回到合理價值

基金組合包括香港、佛山及蕪湖物業
可租面積30.8萬平方米，估值60億，出租率95.3％

2019年全年溢利1.74億
2020年全年溢利下降84.6％至267萬

集團解釋下跌主要受投資物業充值下跌及融資成本大增影響，但若撇除投資公允值變動後的運營溢利，則按年增4.5%；而同期，集團物業收入淨額，即租金收入扣除物業運營開支，則有2.16億元，按年升4.29%，增長平穩。

如果物業充值下跌只不過是會計上的估值，就應該不用擔心

展望集團在未來能透過收購併購壯大資產，或通過母公司順豐注入物業項目。

母公司順豐控股於中國50個城市擁有物業項目，規劃總建築面積440萬平方米，已竣工建築面積170萬平方米，大部分為物流綜合設施。單以後者計算，便相當於目前順豐房託可出租建築面積的5.4倍。

總結分析，派息不差，物業質素好，出租率高，幢憬未來併購及母公司注入資產，增添了普通房託缺乏的增長動力，由於未來發展只是估計，以現時資產，股價在約4元以較有投資價值。

謝謝老師看完我的分析，如分析有任何偏差及計算錯誤，請告知，定當虛心學習，進階班見！

龔成老師：

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

我睇翻你的估值方法，合理，反映你已有一定的知識及明白課堂所講，我地估值時，最重要明白背後建基於甚麼因素推算，你估值的數，能反映企業價值。

而你表示展望集團在未來能透過收購併購壯大資產，或通過母公司順豐注入物業項目。這個因素將會長期帶動這房託的增長，但我地作為投資者，都要理性分析，這個情況將會怎樣發生，當中的可能性，收購的程度，到時2191幫母公司買物業，作價是否有著數還是只是正常價因素去發展，就這點，我自己不會過份樂觀，只會視這股為有質素，合理價的房託，而暫時增長力不會定義為好強。

其實你的分析不差，招股書有好多有用資料可以分析的，你可以再深入睇多D。進階班見！

------------------------------------------------

Q21242：

呀Sir, 請問你點睇00270 粵海投資呀？最近跌多唔少。投資專家睇淡。

香港人移民固然影響東江水少咗人用。但佢投資大灣區既projects 我又覺得可能一年內會升番

因為宜家我一手都冇，想趁低吸納，之後佛系式咁等升同收息。亞sir 你見解係？...

龔成老師：

粵海投資（0270）正面的，最近業績較一般，但從長遠來說，仍是有質素。佢主要因為水務以外的業務，影響左佢業績。

至於東江水，其實長遠仍是穩定的，不會大跌，當然，增長力不是強的類別，是平穩增長型。

這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

------------------------------------------------

Q21243：

老師 本人係單親媽媽

過住二十年獨力帶大女兒根本無儲蓄 現女兒已出身每月可儲蓄大約2.5萬 本人一點投資知識都沒有希望十年後退休後有一千萬作生活費

現有現金十萬及每月可儲蓄2.5萬 想請教老師怎樣才可達成目標 本人今年47歲

龔成老師：

你現時47歲，在累積財富方面，可以以「平穩增長股」作為核心，到你10年後，目標是有一筆財富，再轉為現金流類別。

你可以考慮平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

每月月供$15000，餘下$10000儲現金，等機會投資。

每月$25000，一年$30萬，投資10年，如果假設回報為10%，你將會滾存到$480萬。

或者你可以增加投資年期，例如去到15年，就會滾存到$950萬，較接近你的目標。

又或者，你可以選擇加大金額，都是一個方法。

又或，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

------------------------------------------------

Q21244：

1810最近因投入大量資金造車，而造車像Tesla要10年以上才有回報，稍一不慎有機會虧本，趁高位而沽。用沽出的資金再買入其他較有潛力的優質股

本來也睇好，打算長線持有的小米，造手機及其他家电市場是有潛力的。但因把賺了的錢大量投入造車市場才引到担心影響業績，所以才打算沽出後換馬

龔成老師：

的確有你所講的風險，佢發展新業務，這一定會有不確定性，最後成功與否，無人知。

不過，如果成功，就會有倍計回報，如果你太著重這刻的回報，只集中睇眼前的分析，就會錯過了一些倍升股。

而小米（1810）佢過往的研發能力，產品定位，市場化的能力都很強，所以我對佢其實都有信心（當然，不確定性一定有）。

而我地投資者，如果要有倍計回報，就要有長遠眼光，在可承受風險的情況下，取得回報。

------------------------------------------------

Q21245：

老師你好，請問一下2269小數股東損益有$300萬這麼大負數。這個代表什麼？

是否這個負數影響2019年的每股盈利？

龔成老師：

我睇翻藥明生物（2269）2019年的年報，你所指的部分是「小數股東權益」，或叫「非控股權益」，2019年出現了$346萬的數字要扣除。

其實這個數並不是一個正式影響藥明股東的盈虧，你可以理解這是一些會計上，之前計多左，要扣除的數目。

------------------------------------------------

Q21246：

2238 的廣汽集團
2333 的長城汽車

都注重發展電動車
你認為哪一個企業會比較值得投資？

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得，如果想正式入貨，最好回少少先考慮。

其實兩隻都不差，而長遠發展，長城汽車會略好。

------------------------------------------------

Q21247：

你好老師,平時沒投資股票,有儲蓄$習慣.通常儲到一定金額去行銀買人壽一放就10年.

我返飲食行業留意近埋同事有投資,想了解股票慢慢令財富增加.睇左老師留言我月供盈富基金，

作為我返工10小時新手,好似老師當年睇好比亞迪一樣，

目標平穩增長又吾想單一月供盈富，我認同老師講法買股票是企業增長同業務，因為我新手想問去邊找到資料來做功課,從而分析企業選優質股

龔成老師︰

有定期儲蓄架習慣係好事，但儲蓄保險係財富增值角度，唔係一個理想架選項。

因為"保險"只係理財中防守部份，其實你買足夠保障就可以，增值可以留比優質資產來做。

而我地可以去決定一間企業是否優質，會從企業質素、行業前景、財務狀況等因素，多方面去作出一個全方位的分析。

相關資料，你可以睇翻公司年報、公司網站、財經新聞等地方找到。

盈富(2800)係包括55間質素不錯上市公司股票的組合，對於無選股能力的初學者，會係一個唔錯架選擇。

當然，如果你有一定經驗，可以慢慢創建一個適合自已的增值組合。但在現時經驗尚淺的時候，未懂選股前，先用盈富(2800)作為增值目標，會係較穏當架做法。

另外，你要記住，投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

長遠，你要懂分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21248：

老師好！我而家應該賣左結婚時D金器作股票投資用嗎？

龔成老師︰

我地先從黃金本質來分析，黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，不用佔財富比例太多(<3%)，而且持有的應該為實金。

如果佢佔組合太多，反而會減弱左你財富增值架效果。但由於"結婚金器"有點特別，它除左係黃金外，也存在金錢以外的意義。

所以，你係決定是否賣出用作投資前，除了從投資角度計算外，也要從金錢以外角度去作出考量。

------------------------------------------------

Q21249：

龔sir, 你好，本人三十多歲，月入$3萬，丈夫月入$7萬，收入穩定，由於過去十年投資比較保守，主要買入一些收息股票為主。如下：

港交所 2000股
領展 1000股
友邦 4000股
煤氣 1000股

讀了你文章後開始月供股票盈富基金、港鐵、恒生科技各$1萬。這些組合可以嗎？

但本人需要增長股的幫助，希望目標在五年內能買入多一層現時價$1200萬的物業作為自住，而將現住物業出租（貸款還餘$300萬）。

因為本人不知全數賣出現有股票去買$1200萬好，還是繼續買股票增值好，希望老師有時間回覆，謝謝！

龔成老師︰

若果你係打算3-5年後，才買入一個新物業。中間都尚有一段時間，可以利用用優質股作增值。到你要實行置業計劃，才慢慢分段沽出股票。

你現時持股，其實都係有一定增長力，而且都係有質素的。但有個較大問題，組合上太偏重左係港交所(0388)。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

港交所(0388)明顯係佔比重偏高，但而一刻唔需要沽出，因為佢始終係高質素。我地用將來投入架新資金，去將個組合慢慢咁平衡翻，咁就可以了。

你所講架月供組合，盈富基金(2800)、港鐵(0066)、恒生科技(3067)每月各$1萬，適合你現時情況。

其實這幾隻適合你的，有平穩增長股及潛力股（3067），如果你投資目標，希望增長方面加強翻，其實可以3067比例多翻D，不過，要留意恒生科技(3067)雖然優質，但同時都會有一定波動性，你要明白有這個風險。

另外，現時大市只在合理區，每月可儲蓄的資金唔好盡用。最好留有部份，等大跌市出現時，可以用來掃貨。

我假設投資回報有10%（連股息再投資），你每月投資$10000 + 現有持股(約值135萬)，5年後大約會增值至400萬。相信這筆資金，對你置業有一定幫助。

但緊記，在買入新物業時，股票最好唔好盡沽，必需留有部份，用作增值之用。

------------------------------------------------

Q21250：

老師，我而家30歲，頭幾年返工一直係月光族。而且，三四年前股票高位入d股票，點知買完一直跌，其後我又急住買樓蝕住賣套現，結果輸左好多錢。

我一直耿耿於懷，因為當時低位賣既優質股（700, 2318, 175等）而家已經升左好多好多，同時我買左層樓又樓價開始一直跌，我覺得自己好黑好灰心，近兩年我拒絕睇任何財經既資訊。

直至朋友介紹下認識你，買左好多本你既書，之後我決定要改變自己理財既心態，希望你俾d意見我。

1. 我想好好建立自己既財富組合，想係3年內有120萬，你覺得有可能嗎？

以下係我既財政狀況：
月入45k，供樓10k，家用及個人開支20k，每月最多可儲10-15k。

而家手頭有現金20萬，同大概9萬既股票
1177 x 4000
3319 x 500
823 x 3我200
1313 x 2000
7500 x 3000)

2.有無d現價合理又有潛力既股票？

3.我想報7月既基礎班，但會考慮有每星期一堂？

謝謝你既耐心解答，同時感激你既書令我有得益，我仲學習做一個有耐心既人

龔成老師︰

投資最重要是理性，你太過執著於過往，其實無意思，最重要是分析，這一刻怎樣建立一個優質、適合你、平衡的組合。

1) 以你現時情況，每月儲$15000 + 現有持股和現金(約29萬)。我假設回報率為10%(連股息再投資)，你3年後大致上會增值至100萬。

若你想達成這個120萬架目標，你就要加大儲蓄力度，大約提升至每月供$20000，才可以做到。

同時，你要明白3年唔算係一個長時間，中短期股價係會出現波動，影響你最終回報，你要明白有這個風險。

另外，你現時持股中，ＦＩ二南方恒指（7500）係反向追蹤恆生指數每日表現。當恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

增值策略上，你可以投資「平穏增長股」和「潛力股」。但「潛力股」由於波動性較大，所以你可較集中在平穩增長類股，至於潛力股，只宜小小注。

你每月5成儲蓄，即是用$7500做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下20萬資金，可再投入多5,6萬，分注入貨。餘下資金和每月儲蓄，我地就等機會，當大市出現較大回調，就加大力度掃貨。

2) 部份潛力股已有輕微過熱情況，只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

但若然係做月供，這些潛力股都係可以。

3) 你預7,8會有機會有，你可以留意我FB公佈。

其實你過往投資架股票，都係有質素。但你在成個理財計劃上，出現左問題，令到成件事架效果事倍功半。

我建議你除了學好選股外，也要學好成個理財觀念，咁成個財富增值計劃的效果，才會更明顯。

------------------------------------------------

Q21251：

同埋好想請教老師你，納米盤如果四百幾萬係新樓但係得180尺開放式單位，或者可能最多得一房 200尺，呢啲盤好似上車容易好吸引

（因為只係比500,000左右首期，仲可以做九成按揭，又容易過到壓力測試）其實我哋應唔應該買入呢啲單位？

定抑或喺二手市場搵一個700幾萬嘅單位但係有兩房 五百幾呎，兩者比較邊一個更適合或者反而更化算？

龔成老師：

記住，唔好比「易上車」，吸引，這只是其中一樣我地的分析點，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

因為總物業金額、首期，並不是衡量物業平貴的核心。

因此，你要小心做功課，然後先決定是否投資。

另外，250呎以上的物業，一般投資價值較高，因為是一個基本家庭所需的面積。

如果以你上述的比較，二手市場搵一個700幾萬嘅單位但係有兩房，五百幾呎，會比該新樓較好（當然，你仍要作出比較）。

------------------------------------------------

Q21252：

老師想請教你剛剛見到你寫嘅文章，如果你話「真正的股災是在你想不到的情況出現，大家想到的股災就絕對不是股災」

如果照呢種講法嘅話咁係唔係你平時話價值投資嗰啲優質股都要放咗佢？

如果我哋等到自己預料唔到嘅情況突然之間出現股災咁連呢啲優質股都會瞬間貶值，咁係唔係我哋應該要早啲賣晒啲股票？連休即古都要賣晒佢？

但又好似有啲矛盾因為我哋成日話長線投資，唔應該短線獲利，

但股災又會突如其來出現？咁會唔會好矛盾？究竟應唔應該長線投資？定係短線獲利就要走啦？

需唔需要成日擔心會出現股災？
謝謝老師

龔成老師：

第一，股災無人能預測的，所以你根本做不到「預日賣出」這動作，因為無人知幾時真正大跌。

第二，股災其實是股價大幅下跌，這是指「股價」不是是「質素」。

如果一間企業有質素，股價下跌，根本不會影響到佢業務營運及企業發展，因此只是一個表面因素，對我地的核心財富，往往只是中短期的情況。

因此你唔需要太過擔心股災，只要持有的是優質股，企業運作正常，在長期角度，股災對佢無乜影響的。

------------------------------------------------

Q21253：

想問吓老師心態嘅問題
例如美團3690

剛開始睇嘅時候4XX最高位
跌下來365元入第一注
之後跌倒2XX

其實應該在跌時候溝貨（有預留資金）還是應該升返320多的時候止蝕離場。

我選擇咗後者，重新檢視返個組合同埋比例，因為如果再繼續加注會去到成個組合嘅30%

龔成老師：

首先，一定要睇企業質素，如果無質素，就不會加注，同時不值得佔組合比例太多。

第二，我地會分析平貴，如果美團（3690）在$280仍是貴，當你在$365買入，而佢現時跌到$280，你都未必值得加注，因為你本身已有一定的貨，再買入時就應該以較平或合理翻D的價位先會考慮。

至於上翻去是否離場，其實要睇翻這股佔你組合的比例，如果佔比較多，而佢上翻去時又已經貴，其實應該減持部分。

其實，一隻股票佔你組合15%以下會較好，去到30%已經是較多的水平。

------------------------------------------------

Q21254：

你好，我有意換樓，近來都有人睇樓，但本人願意出售的價錢比估價高3～4%，原因本單位有景有裝修，放售約1個月，請問以現時市況，我應該堅持，或減價加快放售呢？請俾俾意見，謝謝

出售樓：估價502萬，九龍灣區
換樓目標：750萬，何文田區

HKG:9988 阿里巴巴－ＳＷ 100 @$190
HKG:9618 京東集團－Ｓ 50 @$330
HKG:1833 平安好醫生 100 @$96.5
HKG:6618 京東健康 50 @$72
HKG:9992 泡泡瑪特 200 @$39

HKG:0522 ASM PACIFIC 200 @$111
HKG:3067 安碩恒生科技ETF 700 @$18.6
HKG:0823 領展房產基金 400 @$67.55
HKG:1299 友邦保險 200 @$66
HKG:0636 嘉里物流 500 @$23

另外, 上面係我在2020年4月開始建倉, 本人可以相對高風險, 請問是否有野要執呢?

龔成老師：

如果九龍灣區，應該有一定的質素，加上現時香港樓市其實唔算差，你唔需要太急去減價賣。建議你找多幾間地產代理代，幫你放盤，等多D客去睇樓，我相信當你貼近市價時，要賣出不難的。

如果你目標價想比市價高，就以這價開多1、2個月，睇下市場反應，之後再慢慢減價。

另外，何文田區都是有質素的地區。

你上述持有的，都是有質素的股票，基本上都可以長線持有。雖然潛力股部分有少少多，但不是過多，同時有質素問題不大。

嘉里物流（0636）你原有貨持有就得，但就不要太心急加注，因為近一年升左好多，股價較波動。這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

另外，Pop Mart泡泡瑪特（9992）暫時不宜加注，佢是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

整體而言，這企業都有質素和發展前景。睇佢數據，過往幾年增長唔錯。

但始終是新股，參考數據唔多，未來能否一直維持咁高增長，要有待觀察。所以投資時，我地要保守D，唔好太進取。

現價貴，但有潛力，你持有就得。

------------------------------------------------

Q21255：

老師我見到你上左去富途果度做節目，我自己用過幾日就del app因為果個完全係一個為短炒既人而設計既apps真係會害死人。

但我絕對理解同埋明白你叫人月供盈富基金既目的，係對於完全冇投資知識唔識選股既人而言真係一個幾好既選擇。

我都明白價值投資法係香港推廣係好難做，特別而家市場上既股評人都係技術分析為主導。但都希望你可以堅持落去

都好多謝你出現左係我人生入邊，你同埋另一個價值投資法既股評人(洪龍荃)都真係幫左我好多

特別學習估值/分析企業方面，你地兩位有好多投資理念都90%接近(當然佢可能因為基金經理真係進取好多)
另外larry其實佢係佢一個收費既理財教學節目都有建議初學者月供股票

佢都有建議月供盈富/煤氣或者買一D有質素既ETF，佢話當年屋企人都係因為月供股票，然後慢慢幾年後發現D錢竟然夠買層樓既首期。(如果有需要可以share條收費片比你)

而未來港交所亦會更加進取，會放更多有高增長既成份股入恆指，令盈富基金更有升幅。

我最近呢一兩年都不斷用價值投資法去影響我屋企人同埋身邊既朋友

希望佢地謝絕短炒同埋技術分析。
我都希望你可以繼續努力將巴菲特既投資理念推廣出去
如果有人質疑你既，你叫佢show個持倉成績出黎比較下就OK~

龔成老師：

其實，價值投資法一向是最賺錢的方法，你見全球全賺錢的人巴菲特，以及一些出名基金經理，都是用價值投資法。

不過，就算這方法已經是最賺錢，但香港散戶，仍是集中在短炒，因為佢覺得短炒會好快賺到錢，但事實就不是。

有錢人始終是少數，就是一般人的知識有限，明知有一個賺錢方法/但都唔會用。

其實，我一向都好明香港人心態，一般散戶唔中意價值投資，中意快，所以，價值投資一向在香港都唔受歡迎。其實我無乜所謂，做左要做的現財教育就得，至於散戶是否聽，就是佢自己的決定。

大家加油！繼續做好自己就得！

------------------------------------------------

Q21256：

1.運用老師上堂教的，自己嘗試計美圖（1357）的估值，大概合理範圍$2.37-4.29,這樣的估值合理嗎？老師認為合理價又是多少？

2.美圖（1357）主要收入是否廣告牌和高級訂閱？佢好似已經過左最壞時期，這股潛力好嗎？值博率高嗎？

3.見佢2018開始投資活動現金流都係正數，係咪姐係佢冇再投資發展？咁佢算唔算係水桶1？

另外睇到佢2016損益表有項（其他項目公平值變動及減值）係5606109（k¥), 令佢果年既股東應佔虧損6260880（k¥）,e項究竟點解？

龔成老師：

1）+2）美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

至於估值，坦白講，我未深入研究，同時這企業業務變化大，過往持續虧損，但見佢開好有正現金流，因此預期向好，但估值難，如果業績向好，估值可以好高，但如果差，估值都可以大跌，因為這刻的財務數據基礎不足，無盈利令到估值有好大不確定性。

3）至於投資活動報表，我睇翻只是一些定期轉換問題，其實與之前無太大變化，因此仍是有投資的。

至於損益表，我睇翻佢當年的資料，該項目為「可轉換可續回優先股」而出現虧損，而這你可以理解是一些會計上的項目，不用太過擔心，我地分析時會集中在營運上的盈利。

------------------------------------------------

Q21257：

Sir，我係你舊生，我以590計算,2015至2018中間四年市盈率為6.99-18.26, 以平均盈利在過往近四年（2016-2019）是1.97

咁我是用行業市盈率11至14定還是調高少少？

我仲係唔係好掌握到，點樣推算隻股票合理市盈率
望指教

龔成老師：

由於佢的市盈率範圍好闊，這反映市場對佢估值分歧較大，所以當運用6.99-18.26市盈率時，會較為小心。

因為太闊即是參考價值會低左，我地未必能視為好有代表性的數據

因此，會同時運用行業的市盈率，配合佢自身市盈率去運用。

你預六福（0590），如果去翻正常經營環境，大約有代表性的盈利$1.8-$2.0，可以作為參考。

至於市盈範圍，大約9-13倍都可以作為參考。

因此，你預$20是這股的合理區中間左右。

------------------------------------------------

Q21258：

龔sir,想請教一下，本人今年45歲，剛剛由於私人理由辭職，現況：

物業：第一幢剛賣出，取回現金約600萬
第2幢自住，7年前買入價1400萬，現約值1600萬 （按揭尚欠650萬）
第3個為澳洲物業，買價約為350萬，出租中，沒有按揭，每月租金約為8500）

股票約值：220萬
現金：650萬 （包括第一幢賣樓所得）
MPF: 現值110萬

現考慮移民，希望利用以往獲得的資產，在外國用低成本享高質生活，龔sir 有什麼建議？賣樓的600多萬可以如何善用（若移民可取回MPF 的110萬）

第二幢亦在放盤中，但比較難賣，若出租可能收月租大約30000左右。在外國亦在考慮應該租還是買樓？

龔sir 有何建議？可以如何善做配置？我是否應該留香港多幾年賺多些錢才可以去外國過半退休生活呢？

龔成老師：

你到外國初期，不用太心急買樓，可以租住外國樓先，等過幾年，睇到時情況及需要先決定在當地買樓。

至於現時的自住物業，不用改變狀態，可以先放租，令你得到租金方面的現金流。

至於$600萬，建議你投資物業以外的資產，並建立一個更平衡的投資組合。你可以將這$600萬，分成5部分。這些都是較低風險，著重現金流類別，相信較適合你過半退休生活。

第一部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21259：

即係0016繼續keep住，定係咩位放咗佢好？
因為我都屬於新手，多多指教

同03380呢隻點睇？

龔成老師：

新地（0016）仍是有質素，當然，增長力減少左，預期佢中短期都是弱，不過，這股是睇長線及超長線的。

佢較多業務在傳統經濟，增長力一定不強，但不是無質素。是平穩增長類。投資收息及少少增長，可以。但就唔好對股價有太大期望。

如果你追求平穩增長，這股可持有。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，你可考慮，不過，由於佢同新地都是地產類，你不宜過份集中。

------------------------------------------------

Q21260：

龔sir你好,我有個問題想請教一下你,澳門供緊樓貸款餘130萬左右,每月供9千,

現金80萬左右,每月可存1萬,這狀態下,好唔好係大陸珠海香洲供個單位好?

龔成老師：

唔建議太急去集中物業。

我地建立財富組合，最重要是「平衡配置」，例如建立一個股樓平衡的組合。

你現時有物業，之後的配置，可以先考慮股票，等股票有一定的數量比例後，之後再投資物業。

至於珠海地區，有質素的，是大陸其中一個有長遠發展力的地方，如果找到一些交通配套等都不差的物業，日後都可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

💘你的訂閱、喜歡和留言是對我最大的支持 https://pse.is/AnJieTaiwan
📌影片每周二、四、六 晚上8點 準時播出！
記得訂閱開啟小鈴鐺的全部通知才不會漏掉影片唷😘

/

這周體重終於低於52公斤！好感動QQ
到目前為止，半個月左右的時間，減了快2kg左右！
希望可以繼續維持下去😍

/

📌更多我的日常生活
▪ https://pse.is/AnJieLife

📌安J的街頭美食紀錄！幫我訂閱一下😍
▪ https://pse.is/AnJieASMR

📌21天搭火車勇闖西伯利亞
▪ https://pse.is/SiberiaAngela

📌更多關於我
▪ Facebook：https://www.facebook.com/AngelaLeeTaiwan
▪ Instagram：https://www.instagram.com/angelaleeta...

/

逐家好，我是安J啦！
從俄國留學回來之後，決定還是要待在台灣工作，
於是畢業後便在台北租了一間小房子，
展開了我在台北的打拼人生。

平常喜歡煮煮飯，給自己和自我對話的空間；
喜歡在假日出去踏青，放下手機，親近大自然。
薪水不高在台北生活，原來也是可以很有生活品質的呀！

/

🎵Music：Epidemic Sound
📩業務邀約：angelaleetaiwan@gmail.com

#台北生活 #台北日常 #日常Vlog #生活VLOG