今早前往視察「石城至頂埔6座車站」改善工程成功爭取1億4804萬整建工程，已陸續完工！

依據交通部觀光局提供資料，宜蘭頭城鎮旅遊人數是全宜蘭縣之冠，而頭城共有七座車站，頭城車站四五年前配合地方特色整建完成，而石城至頂埔車站老舊無廁所、無階梯供旅客使用⋯

為落實宜蘭縣成為國際觀光大縣，歐珀於108年12月12日交通委員會考察宜蘭鐵公路建設，向交通部爭取1億6千萬改善臺鐵車站規畫經費，並要求配合整體觀光需求，將車站硬體設備煥然一新，目前鐵道局已投入1億4804萬元辦理旅運服務設施效能提升，車站整修已陸續完成，設備煥然一新，加強地方服務滿足旅客使用需求，完善交通建設，品質與需求一併到位，帶來旅遊的動能，帶動觀光人潮、增加觀光產值！

另外，我接獲地方民眾陳情希望烏石港設站，我也在立法院質詢時提議增設烏石港車站，讓火車停靠，獲得交通部認同，但目前須等高鐵路線定案才能做設站考量，我也會持續在立法院督促並追蹤進度！

【龔成問答信箱】（Q21301-Q21320）

Q21301：

龔SIR 我有問題想問

1. 想問股票班，第4堂現金流折現法如果用係股票, 適合用係邊類型股票? 還是呢種方法唔係太適合用係股票?

因為股現金流折現法用係有年期同穩定無增長既資產先適用…

咁股票全部都係無年期, 加上增長率難預測, 咁係咪現金流折現法唔岩用係股票?

2. 另外想問第5堂教的估值法,,合理區範圍要加Buffer,, 想問點計個百分比, 例如合理區係 $100-$200,, 範圍百分比應該係

(a) (100/200)X 100% = 50%
(b) (100/100)X 100% = 100%

3. 都係關於市盈率估值法,,如果某公司佢係行業龍頭, 需要調高10%,,想問係調高佢PE合理區還是計到最尾個Step 先調高合理估值?

參考第5堂Notes P.34, 388為例,,388因為係壟斷狀態, 要調高

咁應該係幾時調高?
(a) 將PE合理區32.7 – 37.7 倍調高10%
(b) 將合理估值加左Buffer 後的 $212 - $298調高10%
(c) 還是無所謂, 兩個是但一個都得?

4. 我用左388 最新數據去計佢個合理估值,.

年度: 2016/2017/2018/2019/2020
每股盈利($): 4.76/6.03/7.5/7.49/9.11
每股盈利增長率(%): -28.96/26.88/24.38/-0.13/21.63

近5年每股盈利 = $6.978
增長率 = 8.76%
有代表性的EPS= $7.53
合理PE = 34.18x to 42.75x
估算合理價 = $258 to $322
因為估值範圍闊度=25% 所以唔洗加Buffer

(a) 想問以上估值計得岩唔岩?

(b) 因為我想增長率準確D, 我用左過往5年增長率相加再除5

[-28.96 + 26.88 + 24.38 + (-0.13) + 21.63)/5 , 得出8.76%,

我想問堂上你話實計既法(複式增長率) 係咪就係咁樣計? 定係我計錯?

(c) 都係關於增長率問題, 我上網睇番”預測每股盈利”

年度: 2021/2022/2023
預測每股盈利: 11.88/13.73/15.64
EPS增長率(我自己計): 30.4%/15.6%/13.9%

我可唔可以用2021既既預測每股盈利增長率30.4% 當作計算有代表性的EPS既增長率? $6.978 x 1.3= $9

咁樣計法會唔會唔準?

(d) 想問估值範圍闊度應該係(322-258)/322 x 100% =20% 還是 322-258)/258 x100% = 25%

5. 第5堂Notes. P.83, 點解公用股可以用PB Ratio 分析? 公用股Average PB Ratio 13x-16x, 大過4x 正常應該唔可以用PB 分析

有勞龔SIR！

龔成老師︰

1) 其實現金流折現法，係最正統的估值方法，基本上係適合於任何股票。

但由於計算上，有不少主觀數字。只要稍有偏差，最終計算結果的落差，係可以好大。

如果你經驗較淺，你用佢來計算現金流穏定，或者資產有固定年期的企業(好似西隧盈利)，係可以。

但若果你想計一些波動性較大，增長力較高的股票，我建議你先用其他估值方法，會較為穏陣。

2) 假如你初步估值得出，合理區係 $100-$200。

你就用佢2者的差額，即$100。再去比對估值中最高價位，即係$200。

以100/200，得出結果係50%。由於合理價格範圍，高於20%，所以你就不用在初步估值上加入緩衝區。

但假若今次，你初步估值得出，合理區係 $100-$110。

以10/110，得出結果係9%，少於我們要求。因此，你要在初步估值上，加入10%緩衝區。

最終估值，會變成$90 - $121。

其實你要明白這個加緩衝區的原理，是希望股價能更有效反映合理區，你不要公式化去用。

3) 其實港交所，一直都係獨市經驗，你用佢過往PE作參考，已經可以。

因為當中已經反映其獨市優勢，不用作調整。

至於所謂的調高多少%，其實是當比較該企業及行業市盈率時，若然這企業是龍頭，若果以行業市盈率作基礎，就有可能調高，但調高多少%，無絕對的，因為最重要是衡量該企業比行業有多強。

4a + b) 我地算增長率，唔係單單用個平均數，而係用過往多年的增長，去計一個每年平衡增長率。

由2016年至2020年，每股盈利大致上升92%。

年度化增長率︰約為+18%
有代表性的EPS= $8.23
合理PE = 34.18x to 42.75x
合理估值︰$281 - $352
由於合理區範圍只有20%，故再加10%緩衝區，估值變成︰$253 - $387

當然有代表的EPS，我用增長率18%，當我地運用時，要理性地分析，往後是否能增長18%，我地不能公式化運用，要明白每一個數字背後所代表的意義。而從18%推算出來的有代表性的EPS= $8.23，由於能有效反映近年的盈利情況，因此，我相信這數字有一定的代表性。

4c) 你都可以參考大行預測，但最好用多間大行的平均數。之後，你可以用佢結果，再更你計算結果，取一個平均數，去作為有代表性的EPS，都係可以。

4d) 以你上述例子，(322-258)/322 x 100% =20%才是正確計法。

5) 由於公用股，主要企業價值，都可以反映在會計資產上。因此，可以用市賬率，作為計算中電(0002)這類公用股平貴指標。

我相信你見到公用股佢PB去到10倍以上，是找錯左數字，你見到的數字，應該不是PB。

------------------------------------------------

Q21302：

龔老師 請教下，0548已過除淨日，係未再回落D再入好D呢

龔成老師︰

首先，你可能對派息運作，有點誤解。好多散戶都會覺得，「除淨日」後會跌，那時候買入就最抵。

其實，這個想法係不正確。

「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。作為投資者，你唔會在此期間前後，去做買/沽貨，而出現任何著數。

所以，「除淨日」只係一個用來扣除派息權益的日子，與你是否投資一隻股票，係絕對無關。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以，但就不要對股價有太大期望。現價合理。

------------------------------------------------

Q21303：

你好阿sir，我已睇左三本你既書，分別係選股、股票同年報勝經

本人都對金錢系統同時間值有概念，識捕捉市場恐慌同熱市同有明確目標6年要有100萬

目前進度用左15個月18萬貨，4萬現金，問銀行借左平loan 10萬等恐慌入市機會

但睇完三本書始終吾識做估值衡量股票平貴

一般既市盈率同現金流折現法都明白，但吾識衡量股票平貴同搵潛力股
求指點

龔成老師：

對，保持閱讀與進步，長遠來說，你的知識一定同財富成正比。

至於借貸投資，則是有危有機，雖然利息不高，但你都要明白，這動作有風險的。我一般較建議「有明顯機會才動用「借」這個最後動用的「皇牌」，在一般情況，不太建議為借而借。

如果你現時已經借了資金，就可以等大跌市時，好好把握機會，但唔好心急動用，寧願輸利息，都唔好心急投資。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q21304：

老師你好呀！
請問你點睇1358同2899呀？謝謝你

同埋358

龔成老師：

普華和順（1358）主要於中國開發、製造及銷售再生醫用生物材料產品；輸液器產品；以及骨科植入物產品。

本身業務有點波動，同時未見有好大獨特性與規模，整體的投資價值未算好高。

佢派特別股息後，股價除淨大跌，而派特別股息令佢現金減少，整體企業發展力不強。整體的投資價值唔高。

紫金礦業（2899）佢主要從事黃金及其他礦產資源的勘探、採礦、生產、冶煉及銷售。

但你要留意番，雖然這類資源股雖有投資價值，但只算中等。

原因是這樣，資源本身有一定的價值，但盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。這類企業都有一定的投資價值，但就不會太高。

江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。

------------------------------------------------

Q21305：

老師，目前只有以下的股:
939@4000,
968@2000,
1177@2000,
1810@1000.
1257@2000

想問1257和956邊隻較好，
睇左老師的書，想入

1317或1569两者選一，
1448，1830，1928，696，1458，老師可以比d建議應該咩組合較好

另外，也想問下老師如何評價558，我見佢都升得多，
謝謝你抽空睇我的留言

龔成老師：

現時持有的組合，基本上都是有質素的股，長線持有無問題，但要留意，當中持有的小米（1810）、信義光能（0968）、中生（1177）都是潛力股類別，這些都是可長線投資，但都不能過度集中在潛力股。所以當你日後增加潛力股時，要留意翻比例及上限。

新天綠色能源（0956）本質不差，值博率會高少少，有一定的增長力，但由於都有一定的負債，考慮到風險因素，現價只是合理區，未算平。

你投資都可以，分注無問題，但由於這企業規模比較細，加上有行業風險，因此唔建議太大注。

至於教育股，可考慮楓葉教育（1317）。

至於另外的5間，都是有質素的，如果想收息及平穩增長，可考慮金沙（1928），如果想潛力，可考慮褔壽園（1448）、必瘦站（1830）（當然這兩股回翻少少就較有值博率）。

------------------------------------------------

Q21306：

老師您好，請問一下必瘦站1830，您如何分析及看好的原因，希望能夠詳細地瞭解一下您的看法。非常感謝您！

龔成老師：

必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

這股我自己都有貨，都是長期睇翻，見佢之前的發展一直唔差，加上疫情仍有錢賺，這是加分的地方，你可以推算到，當經濟正常翻，佢的生意一定會唔錯。但近期升了好多，已貴，最好回少少先小注，大跌先正式買入，會較穩陣。

------------------------------------------------

Q21307：

老師我剛開始月供股票，2800 $2000，823/2388各$1500，現在有2個小朋友約10歲，我想將佢地既利是錢用黎買股票希望在佢地成年時已有一筆唔少既錢比佢地繼續投資

如果我用佢地既錢用晒黎買3067長線可以嗎？還是有其他穩陣長線部署？

自己持有
8000 股 1313 $9.34
2000股 358 $16.76
可長線持有嗎？

龔成老師：

你現你月供的盈富（2800）、領展（0823）、中銀（2388），都是有質素的，都可以長期進行。

至於現時持有的股票，華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，你長線持有就得。

至於江西銅業股份（0358）係中國一家綜合性銅生產企業，主要業務範圍為於江西省東北部經營銅采礦、選礦、熔煉與精煉以生產陰極銅、銅杆線及副產品，包括硫精礦、硫酸及電解金和銀以及稀散金屬，如鉬精礦。

佢亦會為客戶根據來料提供熔煉和精煉的加工服務。

就過往的業務情況來分析，這股不過不失，盈利較為波動，反映無乜產品價格自主的能力，長遠企業價值增長只是一般。

這股不是劣質，但都不是高質，相信股價長遠未必有明顯上升，只是較普通的企業，投資價值只是一般。因此不建議持有太多貨。

至於你小朋友，集中投資恆生科指（3067）不是不可，但就始終有少少風險，要睇你地的風險承受能力。這是一個潛力股基金，當中都是潛力股，回報高，風險大。從你小朋友長線投資角度，不是不可，但就要明白這動作的風險，如果承受風險能力不高，就只宜部分投資這基金，不能全部。

------------------------------------------------

Q21308：

你好，想問下﹐我用個個估值方法對於某d股會偏差好大。

好似我用來計1177﹐佢收入一時可以增長40%﹐一時又得16%﹐今年仲下跌左﹐變相好難預計以後增長幾多%

龔成老師：

當我地進行企業分析，以及進行估值時，最重要是找一些核心因素。

例如你見佢有時收入增長較多，有時就較少，而我地會著重佢長期的收入增長是多少，而不是一年半年。

同時，你不能只公式化去運用，你要懂得將財務數據「意義化」，你要解釋翻，點解佢該年會增長較多，而另一年增長少，當時的大環境怎樣，而將來的大環境發展又會怎樣，從而推算將來的收入及財務數據情況。

因此，你要利用對企業「核心」，及「長期」的因素作為分析點。

------------------------------------------------

Q21309：

龔成老師，如果3067咩價位入比較適合？

175，2600現價可入？

龔成老師：

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

吉利（0175）業績弱將會對股價短期不利，企業價值都有少少影響，不過最重要睇翻長遠價值，吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區中上部至頂位，股價波動，有貨可長線。如果現價入貨，小注都得。

中國鋁業（2600）主要從事鋁土礦、煤炭等資源勘探開採；氧化鋁、原鋁和鋁合金產品生產、銷售、技術研發；國際貿易；物流產業，火力及新能源發電業務。

過往的業務與盈利都較波動，反映企業較受外圍價格影響，產品價格自主能力較弱。

質素算中等，現價合理，但又唔算吸引，投資價值只是一般。

------------------------------------------------

Q21310：

啊Sir，多謝你之前回覆，之前請教過你後已減持左一半煤氣轉到9988，同時亦投入左一部分係3067。以下係小弟現時既倉。

想問以下問題:
1. 餘下的煤氣應在那個價位完全減持？

2. 鐵塔長期表現不佳，我應否轉股？如果轉的話那個價位開始減持和轉那一隻股票？

3. 小米和阿里，暫時是我第二、三大持倉，我應在那價位再增持？

4. 福壽園和舜宇光學我非常看好，應在那價位增持？我看福壽園最新業績理想，合理區會由$7上升多少呢？

5. 3067,我在$19.51入市，應該算略貴，我應該如何是好？和在那價位再增加呢？

麻煩晒啊sir

優質股:
1. 煤氣x3,000@$14.5,
2. 銀娛x1,000@$52.25
3. 港鐵x3,204@$38.93
4. 領展x2,137@$62.83
5. 金沙x5,322@$28.78
6. 盈富x2,[email protected]

-潛力股
1. 鐵塔x90,[email protected]
2. 小米x5,400@$25.89
3. 舜宇x500@$129.8
4. 雅生活x3,250@$31.92
5. 中生製藥x12,[email protected]
6. 福壽園x6,000@$7.67, 4.96%
7. 阿里巴巴[email protected]
8. 3067x3,700@$19.51

龔成老師：

1）煤氣（0003）不是無質素的，因此你餘下的貨，持有都無問題。

除非你好想集中資金在潛力股，但其實我又不太建議。

2）中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。

這股長遠仍算有發展力，可長線。不過，潛力度比過往略減。

其實只要你持貨不過多，就無問題，如果你較擔心，就賣部分轉其他較有增長力的。

3）如果已經佔有一定的比例，就唔好心急，其實一隻股佔股票組合15%已經是上限，你可以考慮翻這個因素。

同時當你已經持有一定的比例，就更加不要心急加注，小米（1810）最好落翻2成以上，而阿里（9988）就落翻1成以上，先考慮加注。

4）這兩股都是有質素的，但經常都唔平，其實你可以考慮月供。如果你本身有貨，可考慮跌翻1成以上加注。

5）你預恆生科指ETF（3067）合理區頂約在$16/$17，如果低過這價，你又資金足，其實可以慢慢分注買入，以長期儲貨的模式進行。

------------------------------------------------

Q21311：

老師你好！之前因為要買樓俾首期所以將所有股票都賣晒，而家要重新建立股票組合，想再請教一下老師。

三十歲，穩定職業，月入大約十萬，扣除供樓及生活雜費後，每月大概有三萬元剩，打算每月投放兩萬蚊於股票投資，一萬作儲蓄，另外現金有30餘萬打算放入投資市場。

暫時自己選擇了
穩健的包括：

- 美股ETF: VOO

- 創科實業

潛力股包括：
- 小米
- 金沙中國
- 金界控股
- 必瘦站
- 舜宇光學
- 福耀玻璃
- 阿里巴巴

想請問一下老師我的選股是否正確，比例就應該怎樣分配？多謝老師，祝生活美滿！

龔成老師：

基本上，方向正確。

你剛買完樓，可以重新配置個整個財富組合，由於已置業，在之後的配置上，考慮以股票作為增值，是可以的，亦是較平衡的做法。

你所選的都是有質素的股票，都可以考慮，以你30歲的年齡，基本上是適合的，如果你本身有一定的投資實力，潛力股可以去到60%，如果投資實力一般，就大約30%已足夠，你可以睇翻自己的實力及風險承受程度去配置。

$20000作投資（可以利用月供或分注），以及$10000儲蓄，方向正確。

至於現金$30萬，以現時的投資市場平貴，你動用一半資金，以分注模式買股票，可以的。餘下就留現金，去等機會。

至於上述股票，無問題，VOO是ETF，佔比多少少都得，至於其他，就投資適當的比例。

要留意福耀玻璃（3606）、必瘦站（1830）、創科（0669）、舜宇光學（2382）現價唔算平，投資時要控制注碼或回少少先考慮。

------------------------------------------------

Q21312：

阿Sir！好開心我睇完你本書買左1211同1830，都係短時間升左好多

所以1211我無忍得住5手放左2手，不過已經攞返本金。必瘦站就吸收左經驗，無放到，但又後悔無買多啲

我呢種心態係未唔係幾好要改？

另外正題
我股票有

1830,13638股
1211,1500股
0066,1039股
1928,400股
823,213股

全部都係大跌嘅時候買，
所以以家全部都係賺，
但係而家有一個問題，
我唔知可以再買咩

因為好多都唔平，
但係我又唔想月供，
係咪一年只係等一次機會入，
儲多啲錢先？

龔成老師：

比亞迪（1211）同必瘦站（1830）都有質素，同時長遠有發展力的，你餘下的貨，可長線持有。

至於心態，我地永遠無得後悔，投資好需要你理性，因此你平常心就得。

其實，你現時持有的，都是有質素的股票，你持有就得，唔需要太著重當時買入價。

因為最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

至於你唔知可以再買咩，其實，投資不要心急，不要為買而買，要有機會才買，現時大市在合理區，如果部分較貴的股票，就不要心急入貨，但有部分股，其實現價仍可考慮，當然，你要有一定的資金留低，而不是用盡現金，因為以現時的整個大市平貴狀況，你留翻3-5成現金，其實都可以的。

如果你現金較多，可以考慮一些合理，平穩增長股，例如：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果不想月供，就分注進行。

但要記住，留部分現金，等機會，都是重要的。

------------------------------------------------

Q21313：

Hi, 你好. 有個關於轉工嘅小問題想請教下你

之前有間公司, 經agent幾年前問過我有冇興趣一個post, 跟住我話冇興趣, 幾個月前同一個 agent 搵我去interview 同一間公司 一個post,

佢請咗我同事, 佢係 restructure 要攞package嘅人, 跟住依家有另一個 post open, 同我而家做緊嘅嘢差唔多, 星期五agent叫咗我去interview, 星期六朝早收到offer,

佢減咗我3k人工, 大約有 50% 人工升幅, ~10k, 現在我在這間公司做了11年, 工作環境, 老細, 同事不錯, 只係沒有什麼升職機會, 想請教下你的意見, 萬分感謝

因為我公司將會有restructure, 大約5-7月才知道, 請問我應該推掉 offer, 等restructure之後才找工作( 如果真是被裁員), 其實我現在的工作也挺穩定的, 未必會被裁員,

現時3X 歲. Thanks a lot

現時人工30k

龔成老師︰

你可以多從「長期」視點去分析，就工作來說，無論做那份工作，我地的主要目的都是薪金，以及興趣。

你可以想想，10年後你希望自己的薪金如何，職位是甚麼，當你有左這個大方向，就知道這一刻的情況。

因為2份工作表面上，工作內容係一樣。但當中可以學習，進升等機會，相信會有所不同。

你已在現在公司做了11年，應該會了解，5年後、10年後、甚至20年後，你發展會係點。而這個結果，是不是你想要的?

正如你所講，現職地方無乜升職機會。若果你目標係更上一層樓，咁你就要諗下現時工作環境是否真的適合。

如果不適合，我建議你可以考慮一個新環境，試一試。

當然，此前你都可以問下你轉左新公司的同事，了解一下這公司的情況，去再作衡量。

至於裁員會係一個風險，但唔係而一刻你決定去或留的主要理由。更重要係睇長線發展，邊一間先會更大機會發展到你心目中的目標。

------------------------------------------------

Q21314：

龔成老師您好，小弟對派息基金有疑問想請教下您。

留意到XXX有一種叫每月派息兩次既基金計劃，佢嘅做法係首先喺月頭買入一隻係月中派息的基金，等到佢除淨之後，就將舊錢轉落另一隻月尾會派息嘅基金度，

咁就變相一嚿錢同一個月收兩次息。我明白個本金，會因為要派息而下降， 但我留意到佢基金價格都尚算穩定，10年來只係緩慢下降，過往紀錄派息記錄好穩定。

就算基金價格慢慢下跌，但收到既利息係扣除基金價格下降後仍然有利潤 。計劃提及會有每月10%利息。

Btw我留意到XXX有同樣嘅做法，佢自稱一個月可以最多轉四次，但要喺操作上邊好完美先做到。

XXX動力亞洲高收益債券基金
XXX基金 - 亞洲高收益基金

龔成老師︰

首先，你要先了解，到底收息資產，是否適合你自己。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

因此，若你係年青至中年人士，而一刻應先集中財富增值，收息產品並不適合你。相反，你已近退休之年，又或者你係好保守架投資者，將資金投資在收息資產，係可以。

債券和派息基金，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利(你可以睇睇《財務自由行》一書，我從財富本質上，講述了當中原理)。同時，現時息口低，但未來有機會重回加息週期，債券未必是最好的投資工具。

至於債券基金，坊間分好多種，你要小心睇，因為有d風險低，無乜問題，有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

你以所以提及的，都是收息類產品。XXX派息基金計劃，派息係吸引。但你要留意翻是否全數為「保證部份」，還是會有波動。

而「XXX動力亞洲高收益債券基金」和 「XXX基金 - 亞洲高收益基金 」 ，主要都係投資一些「未達投資級別的高收益證券」。

這類所謂「高收益債券」，即是「垃圾債券」，風險唔細。

唔係話唔可以投資，但你要明白當中有一定風險，而非一個穏陣的收息選擇。

------------------------------------------------

Q21315：

龔成老師，你好!我現時剛出來工作，為專業人士，工作穩定，月入三萬，每月可儲2萬，現暫定每月固定存1萬去股票戶口。暫定來年會用16萬去進修，目標是30歲時買到700萬的樓。

上年開始接觸股票，現時股票戶口有 27萬，分別為
港股 15.6萬
美股 6.7萬
現金 4.8萬

另外有銀行有5萬存款、2萬 ibond及10萬定期 (4月到期)

以下為港股詳情
1. 9988 X 300 平均價:257.3333
2. 00001 X 500平均價:57.6
3. 1093 X 2000平均價:8.5
4. 00003 X 1050平均價:13.7524
5. 3319 X 250平均價:30

6. 6618 X 50平均價:146.
7. 3067 X 300平均價:17.2333
8. 1317 X2000平均價:2.3
9. 3033 X200平均價:8.675
10. 3313 X 20000平均價: 0.1515

問題1: 我打算等3313回去比較高位置就賣出，這做法可以? 除了3313外，想問問上述組合有甚麼需要改進的地方? 我需要多增加潛力股，還是增持現有個股(3319/1093)，或增加現金?

問題2: 9988 佔倉好像比較多，但之後有機會波動，我應趁低吸納，還是維持現狀，甚或賣出一手?

問題3: 想問問我的買樓目標會不會太難達成? 我又可以以甚麼方式加快達成目標?

問題4: 想問問 1523 珩灣科技是否優質股? 因為其ROE在30%升至40多%、EPS、及派息都長期穩定增長，現時PE在15左右，亦不算太高

加上5G時代對其SD-WAN路由器銷售應該起剌激作用，初步分析正面。可是，由於沒有太多大行研究報告，所以不太肯定其預測盈利。

如果是優質股，同時想問問其合理價。

問題5: 想問問6186 中國飛鶴是否優質股? 因為其ROE在這4年都維持在40多%，且5年間淨利率增幅(10.91%  40%) 顯著高於毛利率增幅(54.61%  72.5%)，反映公司有效降低成本及定價。

如果是優質股，同時想問問其合理價。

問題6: 想問問1297中國擎天軟件是否優質股? 初步分析: ROE平均有20%; EPS穩定增長，而2020年度更是有100%增長;

流動、速動比率持續有6以上，反映公司現金流動性甚高; 公司業務(退稅軟件)具低成本，高獲利性，且沒有太多競爭者。

如果是優質股，同時想問問其合理價。

感謝你的回應。

龔成老師︰

1) 雅高控股（3313）主要從事大理石開採、加工、貿易、銷售、商品貿易及貨運、倉儲和物流業務。

公司市值不高，盈利十分波動，質素不佳。企業不斷虧損，無乜投資價值，賣出這股較好。你唔好預佢會升翻好多，因為佢投資價值好低。如果你唔想一次過沽晒，你可以分注咁出都可以。

你才剛踏入社會，算係年青一群。投資上，可以較為進取，以「平穏增長股」 + 「潛力股」作目標，比重大約各佔一半。

ibond和定期這類收息產品，增長力好有限，唔建議用。

至於組合上，你而家太偏重左係潛力股，佢雖然有增長潛力，同時風險都較高，不宜持有過多。

未來時間，你要加大翻平穏增長股部份，令組合更平衡。

平穏增長股：金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

2) 阿里巴巴(9988)成個組合近3成，明顯偏高，有過集中性風險。緊記，相同行業不可佔組合多於3成，而單一企業不要高過15%。

就算佢跌，你都唔好再加注住。到你組合平衡翻，你先再作考慮。

3) 大市過去年平均回報10%計（連股息再投資），你每月投資$20000再加上你現有定期、資金和持股等(約值45萬)，5年後大約會增值至250萬。

相信這筆資金，足夠幫助你置業。

4) 珩灣科技（1523）過往的增長不錯，相信長遠有發展，但公司好細間，一年盈利只有不足美金$1500萬，風險較高，現時估值算是合理，都有潛力的。

若你想投資，可以好小注博下。

5) 中國飛鶴（6186）不差的。

佢係中國從事生產及銷售乳製品，以及銷售營養補充劑，以生產嬰幼兒配方奶粉產品為主，當中可分為高端嬰幼兒配方奶粉及普通嬰幼兒配方奶粉兩大類別。

產品有一定的品牌與市場，同時過往的增長力理想，長遠有前景。

比較大的問題是估值，近期經常在合理區中上部至略貴的水平，股價有時投資值博率不足，因此要注意風險。長線投資可以，但就要控制注碼。

6) 中國擎天軟件（1297）本質不差的，市場擔心佢之後的增長動力減慢，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。現價其實有投資價值，但就唔建議太過大注。

------------------------------------------------

Q21316：

你好，龔sir ~ 我是在上月開始閱讀「80後百萬富翁」及 「大富翁置富藍圖」。我很後悔現在（30多歲）才閱讀你的書籍，浪費了很多時間。

我現在剛踏入股票巿場，想你幫忙分析一下組合是否合理？

周大富 20% $11入
盈富 25% $29入
海螺創業 33% $36入
太古地產 8% $24入
新鴻基公司 8% $4入
3067 ： 3% $17入

現在有2000是供基金（最少要多供2年，不算之後也會月供），月供$4000 （供2800，1929及 0586）。

另外，手頭有6萬現金，因要讀書。我應該先投資在股票巿場，都要交學費才換回現金，還是先保留？

最後，近來中國都在研究氫能量，請問你對1907 旭陽集團的前景有何看法？我比較擔心佢負債情況，但佢是行業龍頭，加上同地方政府有不同合作，也很吸引。

不好意思，一下子問你這麼多問題，希望你能騰出一點時間回應我的疑問。謝謝

龔成老師︰

你現時持有和月供的股票，都係有質素，適合你這年紀。但緊記個別企業，唔好佔組合15%以上，否則會有過度集中風險。

你周大福(1929)海螺創業（0586）明顯有這個問題，所以你月供可以先用另一隻股票代替。而現貨可持有，唔洗沽出，用新資金去慢慢平衡翻個組合，咁就可以了。

而盈富(2800)雖然超過15%，但由於佢係一籃子股票，而非單一企業，所以比重上係無限制。另外，恆生科指ETF（3067）反而你加翻少少比重都可以，但當然不是一次過加，只是這類ETF，組合佔多少少都無問題。

至於手上6萬現金，如果你1,2年內就要用來讀書，我就唔建議你投資了。因為時間太短，回報不確定性會好高。

中國旭陽（1907）無特別分析，只見之前有些報導。

佢之前公布，澄清最近涉及其於河北省定州市及內蒙古的氫能項目的若干媒體新聞報道，指定州項目試產，並擬於呼和浩特市建加氫站。

該集團指，有關於定州經濟開發區河北旭陽新能源產業園內建設運營氫氣儲運和建加氫站，有關生產基地去年7月開始試產，探索區內在氫能存儲、運輸和燃料相關電池布局機會，開拓京津冀市場等。

至於去年，該集團合營企業與呼和浩特清水河縣政府簽訂另一項氫氣項目框架協議，合作於清水河縣開展氫氣開發項目。

與定州項目相似，該集團將負責於清水河縣進行氫能生產、運輸和建設加氫站，把該市發展為華北地區氫能輸出基地。

只可以話有風險有回報的類別，如真的想投資，一定要控制好注碼。

------------------------------------------------

Q21317：

老師你好，本人24歲，扣除家用每月儲蓄約$15,000(自己較少開支和娛樂)，現金約有$100,000。

目標是28歲前置業，但預計現時置業需$400-$500萬或以上，不知這目標是否在能力和資金範圍內，所以想請教你的投資方向和意見。

股票如下：
0003 11.5，10,000股
2382 175，100股

另外，想問繼續買0003，還是賣出？定轉移集中買其他潛力股如舜如丶中生或小米。謝謝。

龔成老師：

你有4年時間準備，都可以利用投資，去適當利用股票去進行財富增值，到你準備買樓前的一年，就要將股票分段賣出，準備所需的資金。

你可以投資「平穩增長股」，加上小量「潛力股」為組合，助你幾年內財富增值。

煤氣（0003）增長力不強，你不宜持有太多，建議減部分，但留部分是無問題的。

另外，舜宇（2382）、中生（1177）、小米（1810）都是適合你的，都是有潛力的股。不過，你不能只集中在潛力股。

你現時的現金，可以動用$5萬，分注投資。

至於每月儲到的$15000，初期可月$10000去做月供或分注，到後期，就要慢慢減金額。

------------------------------------------------

Q21318：

hello 啊Sir
想問問

#2318 中國平安
#2518 汽車之家
#388 港交所

呢3隻長期持有可以嗎？
合理價大概係幾多？
謝

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

港交所（0388）絕對是優質股，獨市生意，加上香港的金融中心角色，這企業有長線投資價值。

多年來的生意與盈利都有理想增長，派息不差。

但要留意，由於這股的盈利會受股市成交影響，因此股價都會有影響。

這股雖然有質素，但近年成為市場焦點股，令佢經常處貴的水平。現價略貴，你預回1成較好。

這兩股都好有質素，你月供都得。

至於汽車之家（2518），都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

透過旗下網站為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q21319：

你好，想請教你，25歲，月入$25000，一直都是月光族
每個月要還卡數$7500（大約仲有1.5年）

但依家想改變，唔想再喺呢個循環，因為經常都會自責、內疚，依家想儲錢結婚、買樓，自覺好似得番好少時間，已經25歲

已報了你的投資班，希望學習投資知識，因為一直都無接觸理財、投資知識。

屋企人有買你的書，應該睇邊本先？

依家我打算先儲蓄、供月供股票，但係我應該供邊隻，同埋應該供幾多錢？仲有d咩可以做？
謝謝你！

之前只在中銀開左個股票戶口，我應該喺中銀做月供股票，定係有其他建議？謝謝你！

龔成老師：

過去的情況無得改變，自責無意義，你只要做好這刻就得，你現時25歲，只要行翻正確的方向，已經比好多同齡的人做得好。

現時，不要再增加卡數，如果卡數利息較高而又可以提高還款，就盡早處理。

之後，就要留有一定的現金，作為備用及等投資機會。

到餘下有資金，可以長期都不動用的，就可以做長線投資。

你25歲，財富有增長力，可投資「平穩增長股」+「潛力股」，在你知識未算高時，潛力股不用太多。

暫時，你可考慮一些ETF，如盈富（2800）以及恆生科指ETF（3067），至於個股，我會建議你上完堂後，先正式加入。

另外，現時大市波動，唔好用盡現金投資。

投資不用急於一時，這是一個長期的策略，所以好多野都可以等你上堂先進行配置。

------------------------------------------------

Q21320：

本人在銀行工作，part-time 要徵詢公司的同意，是不可能的事，但轉工是一個可行方案。不過，本人在這間公司任職，倘餘幾個月，快將7年了！

如果工作屆滿10年， MPF （僱主voluntary 部份）可以拿到100% 。現在要離開公司的話，損失40%, 大概都有幾十萬，唔捨得！

距離屆滿10年，尚有3年多，現在打算好好裝備自己。

老師，我明白在股票投資組合裏要取得平衡，投資增長力較強的股票的同時，亦要投資平穩增長股。

請問如果用7年的時間分別投資平穩增長股及增長力較強的股票，平均7年回報的差距有多大？

龔成老師：

其實我以前都做過銀行10年，我未過試用期，已經出現做兼職了，當然，銀行不會同意，佢地亦不會知。

這當然有風險，但有時做人，又唔好有太多限制思維。

但如果你不想做兼職，當然無問題，只要好好利用這幾年的時間，裝備好自己就得，因為我都睇得出，你的目標是起碼想做多3年，那你就好好利用這3年時間。

如果用7年時間，投資平穩增長股，我假設回報為8%，假設每月投資$10000，預期7年後滾存到$108萬。

如果用7年時間，投資平穩增長股，我假設回報為15%，假設每月投資$10000，預期7年後滾存到$130萬。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19661-Q19680）

Q19661：

Hello~龔成老師，我見咁多人問你問題，我都想問吓

我而家32歲，全職樂手/音樂導師，由18歲開始我就醉心於打鼓。我每月平均薪金係$20000，扣除家用，其餘嘅錢(3-4k)我都放在音樂進修&器材上，基本上係月光族，沒有儲過錢。

我讀左你課程，原因係：
70%想成為世界級樂手，需要錢～
30%學識理財為退休預備。

咁我現在有睇你嘅書、巴菲特嘅書、投資知識.....去預備上堂。

想問下：我有咩仲可以準備？
上堂時，我應該專注邊一part去幫助自己？

龔成老師：

我相信你日後，都會放大部分時間在音樂事業，而理財投資方面，未必能放太多時間，所以，你應該學習一些，相對不用花太多時間的投資模式。

上堂之前，你可以睇《股票勝經》作準備。

上堂時，當然全面學習好重要，因為整個課程是一體的，而對你來說，一些較簡單，或日後不用花太多時間的投資策略，會對你較重要。

課程頭3堂都是較適合你的部分，你要盡力留心，到之後的課堂，如選股、企業估值、年報、企業質素分析，你當然要盡力聽，但在日後應用上，如果你日後投放分析股票的時間不多，這方面就未必是你的主力。

我相信，你集中時間發展音樂，對你會較好，而股票方面，就用不太複雜的策略進行就得。

------------------------------------------------

Q19662：

想問下老師當年點知比亞迪有潛力，而且可以手持十年，例如好似2018瑞星科技

我朋友108入左現在跌到45，佢都手持左幾年，而且現在股市又經常受中國大陸的決策影響

真的不知道如何找到一隻穩陣有潛力的股票然後長渣

龔成老師：

當我地分析時，要睇一些較長遠的因素，如果只停在「這刻」的情況，就永遠不能找到10倍股。

首先你要想想，比亞迪（1211）在2008年已推出電動車，但反應不好，甚麼原因令車主卻步？原因是信心及配套，下一步你要想想，這些因是是否可解決？

比亞迪電池起家，多年來投入發展的資金好大，當技術不斷進步，普及是遲早的問題。即是佢的潛力度，只是時間問題。

至於瑞聲（2018），其實都不差，但不是高增長股，佢雖然都有光學技術，但聲學技術方面較強，你試想想，你用手機，對聲音方面的追求有多大，你會否願意為高音質而比多幾千蚊？

相反，消費者對鏡頭就有較大的追求，質素，數量，不斷向上。所以你見到舜宇光學科技（2382）有一定的質素。

------------------------------------------------

Q19663：

龔sir，我對於你果句“股市係行先市場“好深刻，但吾太明背後大道理，可吾可以解釋下？同點樣應該落個股做例子呢？感謝

我理解例如而家有隻股上升好多，因股票係行先市場為前提？我kick住左

龔成老師：

其實無絕對的，但根據過往的經驗，好多時，股市都比經濟，行前6-18個月不等。

這是由於股市現時的股票價格，是反映市場預期之後的企業情況，例如2020年3月，肺炎因素令全球股市大跌，當刻的經濟未有問題，點解會大跌？

就是市場預期經濟將會差，企業盈利弱，所以股價跌，這是反映「將來」的。

到2020年尾，股市已比3年月上升好多，但2020年尾的經濟比3月時差，點解會升？

因為股市而反映，預期2021、2022年，經濟會好轉，所以先行反映。

至於超前的時間，無絕對的，只是市場以一個可見將來，能分析的時間去推算到時的經濟與企業情況。

------------------------------------------------

Q19664：

你好 龔sir有件事請教下你，我公司岩岩攞左政府百份百擔保貸款160萬，我地用左黎萬買儀器，同10萬比左中介費。連其他雜費餘80萬左右。

佢係160萬 利息2.75 還款期5年。

咁依家中介果邊同我地講 可以攞多個SME 大概可以攞到300-400萬 年息6% 5年還款期。

咁我同合伙人都有意思想利用呢筆錢去投資買層物業主要用黎收租之後3年又賣出咁。

不過我想個既係當中我要留意有咩風險？
我要計d咩數？
未來5年既供款？

龔成老師：

現時的物業，租金回報率其實唔高，你收租根本唔夠比利息，你這樣會創造了「負現金流」的項目。

加上無人知3年後樓市是否一定上，你這動作的「風險與回報」唔算吸引，即是值博率唔足夠。

除非你好有理據，樓市會上升多過20%，否則，唔能夠對消你的利息及風險。

------------------------------------------------

Q19665：

老師，我想請教你一下我現在狀況，我一家四口，我家庭主婦，短期唔會做嘢，一個出年讀k1，一個9個月大。

我老公工作，收入約3萬，現金約20萬，股票400股領展，1000盈富，500股中芯，5000股中國中車，我想5年後買樓，請問我應該點樣投資或如有計劃理財？？謝謝

家用$8000
我$12000
老公$10000

龔成老師：

如果目標是5年買樓，以你的情況，可以投資平穩增長股，加小部分潛力股。

現時的股票，可持有。

至於現時的$20萬，暫時動用$10萬，慢慢買入股票，餘下$10萬就等機會

另外，要盡力每月都儲到D錢，投資股票增值。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股可考慮：安碩恆生科技ETF（3067），不過注碼較少，以及慢慢入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19666：

龔sir 我想請教如果我想係我組合入面加一隻新能源股，例如信義光能或者信義能源，邊一隻會比較好，定係仲有其他會好過2隻呢？

我依家組合有1762，6988，6993

所以依家物色緊多1、2隻股，一直留意緊1177希望番番去合理價左右先考慮入貨 金莎亦係我留意緊既，自己大約想30蚊左右入 全部都係希望，另外仲想問呀sir

如果啲價位貴，你係咪唔會考慮，但個隻係優質股既話？

又麻煩到係啦，我就黎睇完你第三本書啦

龔成老師：

信義玻璃（0868）會較穩定，同時相對無咁貴。

這股在《50優質潛力股》中，一直是其中一隻潛力股，無論在2016年版，還是最新的版本。可見，這股有長線投資的價值，這類股有貨可一直持有。

當然，近年股價上升了不少，股價是唯一的風險，業務則仍是長期睇好，市場長遠發展正面。

現價大約在合理區頂，如投資，這刻唔建議大注。

萬咖壹聯（1762）質素唔算高。另外兩隻可以。

其實你最重要建立一個組合，要長期，要平衡，你要分析自己想組合各類股的比例如何，如果想潛力較多，就加中生（1177），合理區頂，想平穩，就金沙（1928），現價合理。

好，保持進步！

------------------------------------------------

Q19667：

老師 860 力世紀 投唔投資得過？都係買一手
覺得佢幾有潛力 電動車應該係嚟緊趨勢

醫藥科技有無邊隻推介？

龔成老師：

力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。你如果真的想投資，當小注博下好了。

至於醫藥，其實好多唔同類別，要睇下你要那方向，中生（1177）都可考慮。

------------------------------------------------

Q19668：

請教老師，旅遊、酒店等等股票你認為邊幾間可取為優質股、潛力股？幾時投資合適？

縱橫遊8069如何？謝謝您！

龔成老師：

金沙（1928）、銀娛（0027）會較為穩健，風險較少，現價仍合理。

縱橫遊控股（8069）風險較高。

業務非常波動，過往持續出理虧損，其實投資價值不高，因為佢就算疫情之前，都是虧損的。所以本身質素已唔高。

------------------------------------------------

Q19669：

早晨龔sir，想同小朋友儲多d錢 佢而家5歲 儲左3萬幾蚊，想買d穩健增長型既股票（收成年期約13年左右）
請問是否應選擇盈富？

月供我見大家都要二三千 對我來講有點吃力
如入盈富 現價是否有點貴？ 謝謝

龔成老師：

對，盈富（2800）是最好的選擇。如果可承受風險，就可同時月供小小安碩恒生科技（3067），但由於風險較高，如果你本身資金不是太多，就不建議。

暫時可考慮盈富，如果你現時金額不多，暫時儲下現金先，之後等有較多的現金，才開始每月供$3000，長期進行。現價合理的。

------------------------------------------------

Q19670：

龔sir，我入市4個月，每晚都學習相關知識，但還是人雲我雲的跟買，自己總是找不到方向原因，請求龔sir能指點一下！

龔成老師：

投資不能急的，我建議你睇《股票勝經》，當中有完整的投資概念。

你要記住，投資不是炒賣，是建立一個平衡、優質、適合你的組合，長期持有。如果你不懂選股，就由ETF開始，例如盈富（2800）、安碩恒生科技（3067），前者現價合理，後者合理區頂，你了解下先。

------------------------------------------------

Q19671：

老師，本人80後。月入8萬元。多年前因炒牛熊證輸身家，更欠下接近70萬債項。

現已金盤洗手。已全部清還債項。同時儲下20萬現金。年幾前20萬全數以40元買左融創中國

想請教應該點做？應該沽出再買回優質股嗎？

龔成老師︰

短炒唔係一個賺錢架方法，衍生工具更加係好難現，這都是經驗之談，唔好再用這個投資方法了。

融創中國（1918）雖然都有質素，但此股有一定風險。首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但你要明白背後的風險，同時明白這一定會令股價較波動。

但由於你組合只有融創，咁樣會有過份集中風險。個別企業唔應該佔組合15%以上，你要沽出大部份，換至其他股票，去令組合更平衡。

------------------------------------------------

Q19672：

老師，想問一問你意見。黎緊打算買入一個約500萬嘅單位，需要賣出股票嚟做首期，有以下選擇：

1. 賣出全數比亞廸約2500股，平均買入價約$44及動用少量現金

2. 全數保留比亞廸，但要賣出其餘全數股票，包括盈富，港鐵，金沙，莎莎，
潛力股如中生，栢能，天鴿，擎天，及動用8成現金

3. 賣出一半比亞廸，部分股票及少量現金

請問邊個選擇會較好？如選擇3，賣出邊幾隻會較好？多謝老師回答。

龔成老師︰

我地會因應佢地現時估值，長線質素和組合的平衡性，去決定沽貨策略。

簡單來說，你要思考「你想餘下的組合怎樣？」

你要設計一個優質，適合你，平衡的組合，不要被過往買入價、賺蝕數影響。

比亞廸（1211）好高質素，點都唔應該無貨係手。

你選項3），會比較合適。你持股中，栢能（1263）、天鴿互動（1980）、中國擎天軟件（1297）和莎莎（0178）質素上相比其他無咁優質，可以賣多少少。比亞迪貴，可賣少少。

------------------------------------------------

Q19673：

龔成老師 多謝你之前嘅意見 我依家一直月供緊小米同金沙 都有少少成績

見股價都升咗少少 想問下兩隻股票分別去到咩價位就應該停止月供？

（我知唔應該預測短期走勢，但我唔想股價貴都一路照供）

龔成老師︰

其實一隻股票有質素，一直維持月供，唔理個價格都可以。長線計，佢會自行拉平均左個價。

但有時個價去到異常地高，這時候可以增加現金比例，去減少或停止月供。

金沙（1928）和小米（1810）現時都在可月供範圍，而小米有一定潛力，雖然現價偏貴，只要月供金額不過量就無問題，因為要到超過熱水平，仍有距離。

------------------------------------------------

Q19674：

老師 剛開始上你的堂獲益良多 亦在調整投資心態
老師想请教買etf 同fund 選股原理也是一樣嗎？

想重新整理一下n年前買嘅fund 及强積金
再利用現金去投資

問題如下

以前嘅fund 應該揀水桶3
現金2M投資則20/40/40?

本人已經50+ 無業
希望老師比D意見

龔成老師︰

基金和ETF，選股大致跟一般股票相同，都係因應人生階段，去調整策略。以你年紀，都有增長需要，但策略上要保守些。

如果你基金集中晒係水桶3，會拖低左個增長力，可放一些在水桶2，因為你50歲、財富仍有增長力，不過你現時無業，就要保守翻少少，水桶2不能太多。另外，基金會有一定收費，長線用佢做增值，未必係一個理想做法。

現時，你可以較集中在平穏增長股，再配一些收息股，創造一個有增值之餘，又較平穏的組合。

現時大市只是合理區，你現有200萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

但由於你待業中，在投資前，必需儲起最少半年開支，咁會較穏當。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、長建（1038）。

收息股︰目標是5%、6%股息率 - 例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。

------------------------------------------------

Q19675：

阿sir 請問點睇3333
06690

06993 黎緊既發展前景？

龔成老師︰

恒大（3333）有賺錢能力，但負債情況不理想，處於極高水平，令這企業存有風險。

對經濟好時，佢有賺錢能力。但經濟轉差，物業滯銷，資金鏈出現問題，後果可以好煩。

整體來說，這股都有質素，現價只算在合理區中上部。由於此股風險不少，若投資只能小注。

海爾智家（6690）和藍月亮（6993）都有質素，以佢地業務去分析，相信會有平穏增長，但唔係爆升型。

2隻股票都有投資價值，海爾智家現價都算合理，但負債不少，唔好太大注。

而藍月亮現價唔平，有貨可持有，但暫時唔好加注。

------------------------------------------------

Q19676：

sir, 請教你，近日我買了一些0941作長期，因為有股息收，這樣做對嗎？

因為我爸爸中風後，用錢很多並且不能損失。
我常常看你的文章學習。

龔成老師︰

中國移動（0941）是有質素的股票，不過規模太大，增長力不算強，但始終有優勢，長遠可以慢慢平穩增長。若你目標係收息，唔想股價有太大波動，這股可以。

現時的股息率有7%以上，算是合理區底部，有一定吸引力，可開始分注，慢慢入貨。

但我地投資唔可以只集中在個別股票，咁會有過度集中風險。萬一佢出問題，你成個組合都會受影響。故個別股票，最好佔少於組合15%。

以下係一些有質素架收息股，效果同中國移動一樣，都係收息為主，波動性低，你可以參考下。

目標係5-6%的股息率︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）

現時大市只在合理區，資金唔好盡用。最好留有部份，等大跌市出現時，才用來掃貨。

------------------------------------------------

Q19677：

Hello... 其實我未認識你之前 我都係亂聽人地講或者短炒 最後都係蝕左錢

但我同男朋友自從係2020年年中睇左好多關於你既投資方法 - 企業價值投資法

我地都跟左呢個方向投資 結果真係work架⋯⋯多謝你先！

但我有一個煩惱想問一問你既專業意見 因為一直都過唔到自己果關

我同男朋友兩個手頭上股票再加現金都有$90萬左右（係跟左你既方法投資 比起年中多左20%）

一直都想搬出黎住 俾首期其實都俾到 但男朋友一直好想買新樓 覺得舊樓好低投資價值 但新樓就要俾樓花 未收樓前又要供

其次就係 我地要賣哂手頭上既股票 all in先買到樓 最後俾哂其他費用 可能一舖清袋

所以我地決定租$12000既樓住住先

佢覺得一來我地手頭上既股票本金唔洗賣哂出去套現買樓 二來仲可以滾存多幾年 到時唔洗捱貴股票再入返（佢話佢都係參考過你既concept）

但我覺得草錢又慢左 同埋租樓又好唔抵
好想問一問我男朋友咁諗岩唔岩？租樓係咪錯誤決定？
定係可以買樓而唔租樓 白白幫人供樓？
謝謝

呢兩日就要決定係咪租樓 因為咁岩搵到一個靚裝修既租盤。個心又十五十六 好怕會後悔。

龔成老師︰

你男朋友想法，大致都正確。買入物業後，必需手上仲可以持有一定股票。同時，未來每月依然有額外現金流，去作投資，才算係理想。

其實這是一個平衡財富，以及增值的概念。

如果呢一刻因買樓，而要用盡財富，未來每月開支又只能持平，咁你地架財富增值就受到影響。

現時你地資金唔係咁多，我建議先用優質股去累積財富，之後再買物業。

但我自己唔係咁建議買一手樓，因為一定會有溢價，令你比多左錢。係2手市場去物色，反而有機會找到物超所值的物業。

我建議你和你男友睇我本新書《5年買樓4步曲》，當中會有較詳細說明，由儲蓄、投資增值，到上樓架方法，同埋值得留意架地方，相信本書可以幫到你地。

------------------------------------------------

Q19678：

龔老師你好，2018瑞聲科技值得投資嗎?市場對這公司看法普遍負面，以你專業分析，透過報表，公司盈利能力如何?

龔成老師︰

瑞聲科技（2018）質素不差的，手機行業的增長比過往年代弱，相信佢只會進入平穩期。

佢本身有一定的規模與技術，整體前景不算差，但就要多點時間去轉好。

長遠發展正面，不過，佢增長力不是好強，只能視為平穩增長類別。現價合理，可以分注投資，長線持有。

------------------------------------------------

Q19679：

我現時有
中交建（1800） 1000股 買入價$10.18
東瀛遊（6882） 6000股 買入價$1.35
四環醫藥（460） 1000股 買入價$3.33

呢3隻需唔需要賣出?
有冇機會升番上我既買入價?

龔成老師︰

中交建（1800）不是全無質素，但近年賺錢能力有所減少，這股不是高增長股，之後只會平穩增長，現時估值合理。

你唔好對股價有太大期望，要上翻你個買入價較困難。若你目標係收息，持有都可以。

東瀛遊（6882）質素中等，唔計現時疫情，過去生意穩定，但多年都無增長過，反映發展空間有限。

而盈利則比較波動，投資價值唔算高。要上翻你個買入價，可能要些時間。若佢佔你資金唔多，守無先都可以。

四環醫藥（0460），這股比較麻煩，質素不太好，賣出是較好的策略。

------------------------------------------------

Q19680：

龔sir, 請問美股有冇推介，有冇潛力股定平穩增值既美股?

我見美股長期都係上升trend，如果長線投資，係咪美股好過港股?

龔成老師：

我相信，長遠來說，中國、美國，在往後的20年，將會共同是全球兩大經濟體，你持有相關股票，都可以。因此，無話港股（當中好多中資）定美股好，而是可以配合。

你可以同時持有都得。美股最簡單是買入ETF，如VOO，追蹤標普500指數，長期分注入就得。如果可承受風險，就QQQ，追蹤納指的，由於現價唔平，如投資要慢慢分注，控制金額。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。