我成日都講，我細個以為自己好有錢，有錢嘅程度，係我會以為我老豆係「百萬富翁」（當然，其實有100萬都可以去食屎㗎喇😂呢個世界叫得有錢點可以只係百萬！唉！) —— 點解我會以為自己好有錢呢？首先因為以前住西環堅尼地城，間屋有成800呎！養咗好大缸魚！係而家55吋電視咁大個魚缸，而我老豆仲居然養食人䱽！請問邊有人咁黐孖筋，响屋企養食人䱽？咁暴戾做乜？ 然後細個嗰陣時，每次打開雪櫃都要問可唔可以攞零食，人生其中一個轉捩點係發現終於開雪櫃係唔使問人，就覺得自己大個了。以前打開雪櫃，一定有益力多，所以益力多係我comfort food嚟，唔開心嘅時候，會好想飲益力多。然後因為以前永不缺益力多，所以覺得自己好有錢。另外，當年Häagen-Dazs啱啱嚟到香港，我老豆返眼鏡舖响中環，佢放工會買兩支雪條返嚟，食一支好似食咗餐飯咁飽，仲要知道呢隻雪條好貴，所以又一個理由我覺得自己好有錢。再嚟就係當全世界玩緊game boy嘅時候，我係有彩色嘅世嘉game gear！用好多粒電芯先玩到一陣嘅game gear！又由於部機非主流，所以我覺得自己屋企好有錢。後來個世界出現咗tamagotchi ，某一晚我老豆拎住隻tamagotchi返嚟，我當刻相當肯定，佢一定係一個有錢人！ —— 直到屋企要搬，離開堅尼地城，搬入華富邨，係公屋！係條走廊講明不准打球不准喧嘩嘅屋邨！係用鐵閘嘅屋邨！當時我心諗，搞錯呀，乜你哋(老豆老母)唔係好有錢嘅咩，點解會住咗公屋㗎？ —— 細路仔鬼知咁多嘢咩，我到最後梗係好愛華富邨，但不得不承認我嗰陣用咗好長時間習慣由西環間屋塞咗入華富邨嘅。同埋剎那間發現屋企從來都冇錢，「原來沒有、從來都沒有、教我空歡喜心跳這麼久」我只係一個物質上有餘裕、我想食嘅嘢我食得到、打開雪櫃有益力多就得嘅人。 —— 寫於心情古怪嘅晚上， 雪櫃冇益力多，哎。