【龔成問答信箱】（Q21761-Q21780）

Q21761：

老師你好，我上堂見你有教Benjamin 選股方法，其中一個係計流動資產淨值的3分2

以港鐵#66為例

流動資產=43,495 M
流動負債=41,651 M
流動資產淨值 = 43,495 M - 41,651 M = 1,844 M
流動資產淨值x2/3 = 1,844 M * 2/3 = 1,229 M

25/6/2021 的總市值 = 2,649.53 B
已發行股本(股) = 6,183,275,373
25/6/2021 的收市價 = $42.85

1,229M 除以 6,183,275,373 = $0.19
根據Benjamin 選股方法, 港鐵股價要跌到$0.19 先算便宜

想請問以上計法正確嗎?

龔成老師︰

對，你的計算是正確，但要留意，這只是一個「以資產角度計，貪平的方法」，即是說，我地估值有好多方法，而這個方法，就是假設「就算企業業務再差都好，流動負債點都值錢的」，以爛船都有三斤釘的角度出發。

佢這個方法，只係其中一個估值方法。佢以流動資產淨值，去計算一個有安全邊際的估值。

但由於佢這個方法，只係著重於資產價值上，而港鐵(0066)係一間有潛力企業，未必能有效反映實際情況。

所以，我課堂經常會講，我地最好用多個不同估值方法，去得出一個較立體的估值結果，這個答案，才會較有參考價值。

------------------------------------------------

Q21762：

因為我和家人都有貨(完美健康1830)，但其實不多，大約1-2手，我和家人都不太認識「買賣單位降」和改名會有什麼影響，但我們擔心不知會否影響現時我們持有貨的價錢，

例如現在1手是8蚊，即32000元，但之後改名改股變成8蚊1000股的話，是不是即變成我們持有1手貨由32000變成8000蚊？那麼我們要不要在調整之前賣出，然後降股後買回？

我家人有點擔心

龔成老師︰

其實無分別，只是方便買賣，不用擔心。

我地是否投資一隻股票，重點係佢企業本身架質素。佢改名，其實唔重要，只要佢本身業務和質素係無變，咁就無問題。

完美健康(1830)於7月15日會進行拆細，每一手由以往4000股1手，轉變為1000股1手。從而，令每手買入成本少左。

但作為現有投資者，你係唔會有影響。

以你現時持有一手為例，你有4000股(即1手)，現價假設係$10，你持貨總值就係$10 X 4000股 = $40000

拆細後，你依然都係會持有個4000股，但就會變成4手(因為現時係1000股1手)。我假設現價不變，都係$10。

拆細後持貨總值︰$10 X 4000股 = $40000。

你會見到，其實拆細這個動作，對你手上的持貨價值，係全無影響。因此你唔需要因為拆細，而賣出持貨。

但留意，此股現價略貴。現貨可持有，就暫時不宜再加注。

------------------------------------------------

Q21763：

老師您好！我係您既學生，而家睇緊您本千萬富翁(一路睇放唔低)。

我想創業自己做生意，但一向呢方面既知識唔多，雖然之前返果份工都係做sales...

但覺得自己相比起其他人business sense方面唔太好..想請問有無咩方法改善？老師有無睇過啲好既書本可以推介？

另外，我都明白要認識多啲人加強人際網絡，但係我個人有啲內向型，一諗起呢啲就聯想到要去一啲function自我介紹咁識人，想問下有無咩方法會自然啲？謝謝！

龔成老師：

坦白講，創業最好的學習，就是去創業，你得到的將會比你睇書多好多。

我建議你試下一些低成本的小生意先，例如網上創業等，這是一個很好的進步機會。

你最重要是不斷試不斷試，想，是無用的，試，才可有得著。你可以寫低所有你認為有商機的生意，然後睇下那些較小本，而你又做到，就可以開始。好多時有無市場有無發展，並不是想出來，而是試出來的。

另外，有D生意要真你有較強人際網絡，但有D生意則無要求，所以唔好比這些因素限死左自己。你可以參加一些商會活動，或早餐會之類活動，去結多D人。

至於自然唔自然，其實好主觀的，你去得多就得，所有野都是熟能生巧，做，是最重要的，唔好得得想字。

------------------------------------------------

Q21764：

老師好，有5百萬cash (前幾年買賣樓賺+儲蓄）, 應該買股票好定買樓好？

背景：3字頭，同屋企人住，而家住嘅地方有d遠

人工扣除家用開支，應該儲到1萬左右，有基本嘅醫療、危疾、年金

另外有30幾萬股票：
0002 - 2500股 $73.1
1928 - 2000股 $28.43
9988 - 200股 $225
2018 - 1000股 $41.6
1038 - 500股 $47.3

如果今次再買樓，應該唔會咁輕易賣出，除非好動蕩，最多係用黎自住（近返市區方便d返工同出街）或收租。因為有自住嘅可能，都會揀d高質素少少嘅樓買，咁就會用哂d cash

樓價高，如果只係用黎收租，其實回報唔多，計埋供樓利息可以話冇，不過可以博樓市會升，而家唔買之後可能更貴。但長遠8-10年後，

我唔係太睇好香港前景，覺得會俾大灣區/其他內地城市慢慢取代，所以都驚長遠會跌20-30%

但係另一方面，我又唔敢用幾百萬黎買股票...我就係普通人心態，擁有又驚失去...咁就更加唔上唔落

如果真係唔買樓，而買股票/基金，請問有咩建議？

超長遠目標：返part time、建立1至2個可以一直玩到老嘅興趣，可能要用時間、金錢黎鑽研、再老d或者會移民

唔好意思，寫得好長

仲有一個問題，就係可謂小注？唔同資金下，小注嘅定義會唔會唔同？謝謝

龔成老師︰

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

我地再睇翻眼前而一刻，由於你自住唔算有大問題，那這筆資金，我地應較集中從投資角度，去做考慮。

現時租金回報率唔算好高，投資在優質股，值博率相對較高。

你3X歲，建議你用「平穏增長股」 + 「潛力股」的組合。現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只是合理區，你現有500萬資金可以先投入多50-100萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

但你要注意一點，我地財富組合除左要有增長力和質素外，平衡性都好重要。你長線都要找機會加入物業類，以免成個組合過於偏重股票類。

因此，若你在此期間，發現一些租金回報率唔錯，又有質素的樓盤，你都可以出手。

至於我成日講架「小注」，如果我係講個別股票「質素或風險度」，只宜小注。代表你只宜用總資金的5%左右，投資在這隻股票上。

若我係講緊「買入價」時，現價只宜小注。就是想指出，此股現價水平唔平，建議你只能用打算投入該股資金，其中一小部份去入少少，到有明顯回調，才加大注碼。

------------------------------------------------

Q21765：

你好，我想問如果我要將啲股票分類

公用: 3， 270
地產/房託: 12，66，823，778
賭業: 27，1928
銀行: 1398，2388，3988
平衡: 2800
新經濟: 388， 788，1177，1211，1810，9988

請問新經濟嗰部分可以點分，每個分類應佔組合幾多。
謝謝

龔成老師︰

我建議你可以簡單，從「行業」和「風險度」去進行分類。

「行業」你可以主要分成公用(0003,0270)、地產相關(0012, 0066算半隻, 0823, 0778)、博彩股(0027, 1928)、銀行股(1398, 2388, 3988)、科技股(0788, 1810, 9988)、新能車(1211)、醫藥股(1177)

至於港交所(0388)業務性質特別，你可以分開。

我地投資優質股時，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含55間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

就「風險度」，我地可以分成「潛力股」、「平穩增值股」和「收息股」。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

「潛力股」- 0388, 0788, 1177, 1211, 1810, 9988
「平穩增值股」- 0003, 0270, 0012, 0066, 0823, 0027, 1928, 2388, 2800
「收息股」 - 0778, 1398, 3988

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

這個部份，基本上係因應你人生階段、投資經驗和風險承受力，去作出配置。

例如你係年青人，你就可以「潛力股」、「平穩增值股」各佔50%。若你尚有5-8年就退休，就應「平穩增值股」、「收息股」各50%。到退休，就100%「收息股」。

------------------------------------------------

Q21766：

龔生你好，本人想問你一些意見。我五年前因先生生意問題賣左層樓，已租樓五年，現在想買返樓，請問是否好時機？

我有現金大約三百萬，月入41000，先生沒有穩定收入，兩個仔女一至兩年後大學畢業，本人五十歲。現在租金18500。

我只擔心退休後無屋住，而且已50歲，所以想上返車, thx

龔成老師︰

現時香港樓市，算係合理區頂部，從投資角度，未算好吸引。

但由於你目標係自住，我地考慮重點，唔係現時樓市水平，而係物業符唔符合你需要，講緊係未來10年、20年，係唔係都適合你。

如果係合適，你就堅守住"供得起"這個大原則，就算現時置業都係可以的。

但最好，你可以係置業之餘，留有一定現金，去用優質股進行增值，咁就更理想。

------------------------------------------------

Q21767：

龔老師，您好，我朋友公紹而認識您，我朋友話你分析及推介的股票很準，我初看到閣下的Facebook, 建議買2800，如果大市跌是否會跟住跌，為何會推介2800,因為我股票不太認識。

我有持
1313,9.9元買15000股
914, 45.7買，1000股
1810, 25.15買5000股

最想請教老師我上年$2.9買3988,坐足一年，重貨，跌到約$2.3，利息都補唔番差價，下星期除淨，除淨前會升些嗎？

我想除淨前賺差價，不要息可以嗎？謝謝老師

龔成老師︰

你對派息運作，似乎有點誤解。

在「除淨日」前一天，依然持有股票，就會收到股息。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在除淨前沽出，而出現任何著數。

盈富（2800）佢係一隻追蹤恆生指數的ETF，所以恆指下跌，佢都會同一比例地下跌。

佢並不是最高回報的投資，但這是一個組合，當中有58隻質素不太差的股票，對本身不懂選股的投資者來說，是一個很好的選擇，加上有平衡組合風險的效果。

就算對無乜選股能力的投資者，提供一個穩健，收息及平穩增長的組合。所以，我經常都會推介佢比讀者，特別係經驗較淺的一群。

你上述4隻股票，都係有質素，若你係年青至中年人士，都適合。

但華潤水泥控股（1313）業務較波動，佢過往的盈利數據上落都大，因此股價的變大亦會較大。

長遠計，房屋、基建發展等因素，都會利好水泥股。但就要留意股價上落會較大，自己要注碼上控制，唔好佔你組合太高比重。

至於中行(3988)佢有質素，算係收息股類，增長力唔高，主要係收下息。若你較年青，就不要持有太多。

而且，我地投資會講求成個組合的平衡性，唔應該太集中單一企業或行業，佔比要維持分別15%和30%以下，才算穏當。

因此，你現時重貨的話，建議你沽出部份，去平衡風險，咁會較好。

------------------------------------------------

Q21768：

龔成老師，您好，我係一位32歲的全職媽媽，留意您的文章有一段時間，但3月才正式入市

270 2000股$24.1
1810 800股 $24.5
1177 2000股 $8
1448 2000股 $7.8

3067 200股$19
2388 1000股$28.5
3800 5000股$2.74
1972 600股$24.3

以上是我手頭上的股票，大部分算高位入市！特別270係咁跌！

1/我們抽中了白居二，可能會在一年內盡量買來一家四口自住，未知是否需要用到此十零萬資金，所以請問我是否需要放曬所有股票？定keep一兩只？目前配置合適嗎？

2/目前住荃灣，應該買唔起附近，以您專業的眼光，如果買樓，邊一區會是個潛力股？因為我今次未必可以買到三房，想以後仔女大左可以換大間！

期待您的解答，感謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時股票，大部份都係有質素和適合你。而且除了粵海(0270)，其他都唔算好高位入，大致係合理區頂至略貴，你可以守。

雖然粵海(0270)帳面值虧損較大，但佢係有質素，你照長線持有，主要用來收息，再加上少少平穏增長。

但現回到你買入價，相信會要較長時間。

另外，保利協鑫能源(3800)現時暫時停緊牌，因為佢仍未出到業績，將公佈業績的日期延遲了幾次。

最近現任核數師更請辭，我對這類股票，會較有保留。但由於現時停緊牌，暫時乜都做唔到，只有等。

初步睇佢的財務數據，都幾弱，相信日後就算復牌，股價都會受壓，要有心理準備。

1) 我地成個財富組合，除左講質素外，平衡性都好重要。因此，我建議人在置業同時，必需留有一定優質股，作增值之用。

這樣才會避免到，所有資金完全側重晒係單一資產(物業)類別。

但若你生活上係有置業的迫切性，你盡用這些股票去買樓，都係可以。但緊記，你最低限度，要堅守"供得起"這個大原則，就可以入市。

之後，你再有新資金，才再慢慢累積優質股。

若你打算1年後置業，由於時間唔長。如果你確定係要動用股票部份去業，你現時就要開始，慢慢分批沽出持貨。唔好等到動用資金個一刻，才一次過去沽，以減低價格波動，對你回報造成之影響。

2) 較高升值潛力地區，除左鄰近商區地段，好似中環、東九、北大嶼(或有變數)外。你都可以留意一些潛力較高地區，好似堅尼地城、大圍、黃竹坑等。

雖然你長線有細屋換大屋打算，故新購物業(細屋)有升值潛力，對將來換大屋較有利。

但同時間，佢都係你自住樓，你都要從生活角度去考慮。2者要取得一個平衡，才算理想。

------------------------------------------------

Q21769：

龔成老師你好，我和太太均31歲，各月入$5萬，資產如下：

- 物業1，2017年買，自住，月供$15k，26年按揭
- 物業2，2020年買，收租，月供$13k，收租$11k，30年按揭
- 股票$150k，005 和 2628
- 現金$1M

每月扣除開支，儲$30k-35k，想50歲有$50k被動收入，資產應如何配置？感激！

龔成老師︰

若你想做到50歲後每月有5萬蚊現金流，以股息率6%計，你需要本金1000萬。

你現時財富組合，物業和股票都有，係理想。但比例上，明顯偏重左係物業類。因此，我地新資金應優先投放股票類，去令組合更平衡。

現時你持有股票，匯控(0005)主要收息，無乜增長力，唔適合持有太多。而中國人壽(2628)雖係增長股，但近年賺錢能力，明顯係弱左﹐不宜持有太多。

這2隻股票，建議你沽出部份，慢慢換至增長股，長線對你會較有利。

你31歲，應利用「平穏增長股」 + 「潛力股」這類增長股，去創建一個增長組合。現在你每月先用5成儲蓄，即$15000做月供。其餘先儲起，用一邊月供一邊儲蓄的策略。

大市現處於合理水平，那100萬資金，你可以再用多30-50萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

假設投資回報有10%（連股息再投資），你每月投資$30000 + 現有資產(15萬股票和100萬現金)，20年後大約會增值至2800萬，相信用以上計劃，很大機會達至你的財務目標。

------------------------------------------------

Q21770：

老師，我現年我33歲，兩公婆每月加埋收入得25000，有一物業供緊剩低50萬左右，但供樓及小朋友同家庭基本開支30000，户口現金剩30萬左右，

我想問下老師意見我仲適唔適合投資股票？

龔成老師︰

以你情況，由於每月係入不敷支，因此重點應先放在這財政問題上，要令你變回收支平衡之餘，也可以有一定資金作投資。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工(如SALES，一些多勞多得的工作)、找PARTTIME、網上生意等。

目標係令你可以應付生活開支同時，每月有資金空出，作投資之用。

當你可以做到這點，你就可以開始月供股票計劃，去為自己增值。

你33歲，可用「平穏增長股」 + 「潛力股」的組合。你每月可用5成儲蓄作月供，其餘先儲起，等大跌市時去掃貨。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）。

至於現有30萬資金，我建議先扣起半年生活支出，作應急之用。餘下部份，你可以先用一半，分注買入上述股票。

如果你唔係好認識這些股票，可以集中買盈富(2800)。餘下部份，都係同樣等大跌市機會出現，才出手入貨。

------------------------------------------------

Q21771：

老師，你可否給我一點建議？
我的情況：

現時37歲
每月收入：$20萬
每月開支：$17萬
現有3層樓，都要供，2層出租，一層自住
股票：$25萬（有2388、2800、3067、9888、6618、1208、941）
現金：$30萬

如果我想50歲財務自由，每月有$50000去用，我應該點做？

龔成老師︰

以你的情況，其實不難的，首先，你現時有兩層樓收租，當你50歲的時候，理論上已還了一定的借貸，加上租金在長遠會偏向上，因此，該物業能為你提供一定的正現金流。

若然到日後供款完成後，現金流將會更加明顯。

如果假設你50歲時，物業未供完，我再假設未有正現金流，你就可配合以下方向去參考。

50歲想每月有5萬蚊現金流去支援生活。我地以股息率6%去計，你就需要本金1000萬。

由於你現時已有不少物業，未來新資金應集中翻係股票類，以免財富組合過於偏重單一資產。

以你37歲，應以增值為主，可以選擇一些「平穩增值股」+「潛力股」作投資目標。

你現時持有股票，都係有質素和適合你。但百度(9888)、京東健康（6618）不確定較高，不宜持有太多。

五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際，這股不建議持有，你可以每有反彈，就慢慢沽出。

中國移動(0941)有質素，但只係收息股，增長力麻麻，同樣不要持有太多。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里巴巴（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，餘下30萬和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 30現金 + 25萬持股，50歲時大約會增值至逾1000萬。

再加上你現有物業的租金收入，相信以上增值計劃，很大機會可以助你達成退休目標。

------------------------------------------------

Q21772：

龔sir 你好 ，我本人26歲。以前買過港股，有買過小米$15.x左右，賺左小小16.x就賣左。現在持貨：

-中國鐵塔$1.5
-3兩黃金平均$18600/兩
-小量美股

近年睇多左你既Page，都覺得價值投資既重要。同埋要建立一個投資組合非常重要。

未來計劃主要想投資美股：

長線投資：
-蘋果
-BRK 伯克希爾 B
-Tesla
-微軟
-台積電

中期：
-美航
-Pala Tech

短期：
-富途
-蔚來、bilbil

我想30歲前儲到100萬，我會儲月入大約55%既人工，目前月入24K，資產大約15萬。

希望老師俾小弟建議。

另外非常感謝你回覆網友問題，post其他網友既case，俾我地見到好多層面既人既經驗，非常值得借監，你既回覆亦值得學習。多謝你！加油

龔成老師︰

美股都有質素，你用來作增值組合，都係可以。

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。所以，你唔好再用短炒這個策略，而係用長線角度，去選擇股票。

你上述股票，都係有質素。只要你係長線投資，再用平均價格或月供去儲貨，咁就無問題。

但留意，Palantir Technologies Inc (PLTR)和Bilibili Inc (BILI)都有投資價值，不過由於佢地至今都未有盈利，不確定性較高，不宜太大注。

另外，雖然疫情開始穏定，但始終存在不少變數。加上航空業賺錢能力，已經係弱左，American Airlines Group (AAL)這類企業，唔係太建議你投資。

而黃金是貴金屬，有「終極貨幣」之稱，主要作用是對沖黑天鵝事件。

不過，黃金沒有現金流，持有無法創造出經濟價值，持有過多，反而會拖慢成個組合的增值效果，我建議佔財富比例太多，大約3%以內好了。

至於投資部份，你每月可先用5成儲蓄去做月供，其餘先儲起，用一邊月供一邊儲蓄的策略。

餘下的另一半現金，我地就等機會，當大市出現較大回調，就加大力度掃貨，然後作長線投資。

除了可考慮月供上述美股外，我建議你加入Vanguard標普500指數ETF〈VOO〉，是追蹤標普500指數的ETF。佢係一籃子的優質美股，有助提升你組合平衡性。

我假設投資回報有10%（連股息再投資），你每月投資$12000 + 15萬資產，30歲時大約會增值至90萬。

所以，你想提高成事機會，最好再調高少少個月供金額，會較理想。

------------------------------------------------

Q21773：

Hi，有事想請教我收到另一間公司offer

其實我好迷惘 有2個offer 一間全球top 5 會計師樓 一間係中型既list co

Top 5 個間係高壓文化 must ot 會好辛苦 但學既野會多 有朋友話不少人捱五到一個月就走 for junior 位 捱到既senior 就做得耐

另一間中型既list co manager super nice 我覺得 但學既野五太多 佢話五洗ot 兩間既人工offer 一樣

我考慮既點 係要challenge 自己入去個間高壓文化做下 捱到 就會係有料既人。定舒舒服服入去中型list co 做 利申26 years old

講多少少 我自己係能力是ok 我最大問題是情緒問題 一五開心 一驚 表現先大打折扣 有自信信心 表現超好 所以五太岩高壓既環境

但屋企人勸我入個間高壓文化捱下 捱到你咪情高提高

龔成老師：

其實你個考慮點，應該都係放係長線因素，你要知道邊度架經驗、資歷、知識、甚至做事方法，會對你投入這個行業，以至長線發展，會係最有利。

你可以問下一些行內朋友，或者同學意見。再加上你以往在中型/中小型會計師樓經驗，去綜合一個結果比自己。

高壓文化、OT，這些唔係唔可以考慮。但這些相對你成個職業生涯，只係一些中短期因素，我唔建議你睇得太重。

------------------------------------------------

Q21774：

老師, 今次真的可以實名的叫龔老師, 因為我已經報讀老師的課堂.

對上一次請教您, 已是一年多前, 很多手上的爛股都去掉, 現時入的,都是看老師您回覆, 再加上自己預估的, 買了一些股, 老師可否幫忙, 看一看有冇入錯, 謝謝您.

我現年43, 月入50000, 積蓄有80萬, 想再入啲優質股, 保留30萬在手, 所以計劃想投資50萬左右,

現時手持,
1810 x 2000股
788 x 40000股
992 x 2000股,
1478 x 2000股,
2800 x 2000股

本人計劃想買700, 2269 or 1772, 2128, 1347，想請問老師有咩高見? 謝謝您.

另外, 我老豆有些股已經跌左25%, 想請教下, 可唔可以再守? 2188 同860.

感激老師.

龔成老師︰

你現時持有股票，都係有質素，照長線持有就可以，但中國鐵塔（0788）增長力減弱左，你不要加注。

至於你計劃買入的5隻股票，都係有質素，但有幾點要留意。

中國聯塑(2128)現價偏貴，最好等有明顯回調，才入貨。

贛鋒鋰業（1772）、藥明生物（2269）不確定性較高，不宜太大注。

你以上所講的股票，除了盈富(2800)、聯想（0992）算係平穏增長股外，其餘都係潛力股，佢地雖然有增長潛力，同時風險都較高。

以你年紀，不宜持有太多，大約佔3-5成(視乎你投資經驗和風險承受能力而定)，餘下應集中以下平穏增長股，否則會令你組合風險過高。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

現時大市只在合理區，你可再投資在30-50萬，餘下資金就等大跌市機會。

當然，你可以不用急，唔洗即刻走去再投資。你可以等上完堂，對整個投資概念有較完整理解，才出手都可以。

至於你父親的持股，力世紀（0860）其實好難分析，因為佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險唔細。

泰坦能源技術(2188)規模好細，而且近幾年都係出現虧損，投資價值不高，建議沽出。股票班見!

------------------------------------------------

Q21775：

成老師，想你提供一些理財意見，現有狀況如下：
年齡： 43
職業： 企業銀行

1）現有資產共HK$16.94 Million

- 現金 ： HK$1.1 Million （remarks: 2%p.a. deposit rate for staff with deposit balance within HK$1 Million）
- Asian Currency Bond Fund : HK$0.1 Million
- 自住物業： HK$13.5 Million
- MPF : HK$1.4 Million

- Equities : HK$0.61 Million
>5 HSBC @ 3156 shares
>3988 @1,000
>1398 @1,000
>3968@650
>16@500
>700@200

>1@50012@1,000
>27@1,000
>9988@100
>1448@7,000
>3067@1,000

- 合資格年金累算權益：HK$0.105 Million （已繳兩年）
- 保單累算權益： HK$0.125 Million

2） 每月收支

- 每月收入: HK$90,000
- 每月合共開支：HK$70,000
（父母家用: HK$15,000）
（供樓：HK$39,000）
（日常開支：HK$14,500）
（MPF 供款: HK$1,500）
->每月平均盈餘 : HK$20,000

請問在50歲時能否做到每月有HK$30,000 被動現金流? 另外，如何能達成？謝謝！

另外，想補充一下, 本人現樓按結欠HK$6.9 Million, 尚餘16年期

龔成老師︰

你現時43歲，財富仍有一定增長能力，可以利用這7年時間，將財富增傳值，到了近50歲，就可轉翻一些現金流類別的資產。

如果你希望7年後每月有3萬蚊現金流，以股息率5%計，你需要本金720萬。

現時大市在合理區，現金和股票最好各佔一半，你現時持有現金水平係偏高。雖然你現金有2%員工利率收取，但這程度的增長力，唔算理想。

建議你用這筆現金和每月儲蓄，去增持一些有增長力股票，去累積這筆財富。

現時持股，大致上可以。但匯控（0005）、中行（3988）、工行（1398）都是收息股，增長力唔高，唔好持有太多。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。但佢地波動性和風險會較高，你要自己平衡。

你現有110萬資金，可以再投入多20-30萬，用"分注"形式，慢慢買貨。餘下資金和每月儲蓄，就等大市出現一定程度的下跌，才大力度掃貨，然後長線投資。

以大市過去年平均回報10%計（連股息再投資），你每月投資$20000再加上你現有資金和持股（約170萬），7年後大約會增值至560萬。如果要達至你的財務目標，月供金額必需增大至$35000。

現在你要看看你自已的開支，有沒有一些部份可以調整來增加月供金額。如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升，以助你達成目標。

------------------------------------------------

Q21776：

因為本人媽媽不擅於投資，我剛開始接觸股票，幫佢review股票組合發現大部分都係蝕錢，我應該幫佢止蝕定由得佢等落去呢？

0042 平均價2.14
1398 平均價5.72
0998 平均價5.68
1288 平均價3.94

3988 平均價3.5
1680 平均價2.98
2628 平均價26.22
2009 平均價3.86

2866 平均價 4.35
1766 平均價11.67
0390 平均價 8.52
0005 平均價78.69

有一部分已蝕一半已上、帳面合共虧損30萬左右，我可以點幫佢調整呢？因為佢年紀都十分大，亦唔適合過高風險投資。唔該曬龔sir。

龔成老師︰

我地先要睇翻隻股票有無質素，如果佢帳面虧損，但係有質素，我地都可以守住先。若無質素，就算帳面無蝕，我地都要考慮減持，甚至全部沽出。

東北電氣(0042)、澳門勵駿(1680)投資價值不高，建議有反彈，就慢慢沽出。

中國人壽(2628)、金隅集團（2009）、中遠海發（2866）、中國中車（1766）、中國中鐵(0390)有投資價值和增長力，但增長力唔會好強，質素算係中等。

若佢唔係佔組合太多，持有係可以。若較多，可以慢慢換碼至優質的收息股。

匯控(0005)、工行(1398)、中信銀行（0998）、農行(1288)、工行(3988)、有質素的收息股，主要提供現金流的股票，適合你媽媽。

由於你目標係收息，帳面賺蝕反而唔重要，除非佢本質出現問題，否則你長線持有收息，就可以了。

但你要留意，現時你媽媽組合中，有不少銀行股。個別行業，不要佔組合30%以上，否則會有過度集中性風險。

而且，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。所以，你都要幫她調整一下個比重。

以下是一些有質素的收息股，給你參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21777：

咁佢哋都有能力成為10倍股？但似乎來講指數好難升到10倍股⋯⋯水桶一指最大潛力，有冇機會係10倍嘅選股？

阿sir，唔知道你有冇留意啲細價股，汛和（1595）會比京基借殼上市，咁1595值唔值得投資？將來等收成？

另外，我想問第一視頻（82）值唔值得長線投資？因為佢改名做瘋狂體育，未來幾年係體育年份，佢係唔係一隻潛力股？謝謝阿Sir


龔成老師︰

水桶1，係指增長潛力較高股票，通常都是處於行業快速增長階段初至中期，故相對其他股票，有較大增長潛力。

但要指數ETF(如3194、3067、3032、3033)增長10倍，係會較難。

由於佢唔係單一企業，要做到10倍增長，即係要絕大部ETF中股票，出現大幅爆升，因此要ETF成為10倍股，機會較微。除非你投資一個長時間，都有可能。

京基欲借殼汛和（1591）上市，暫時未落實，無人知發展成點。若言成事，我地才可以從新業務，可判斷此股有無投資價值，現時所有都係得個估字。

以現時集團質素計，投資價值不高，唔建議持有。

第一視頻（0082）從事互聯網業務，包括在中國經營體育彩票新零售業務、網絡視聽新媒體、其他互聯網相關的投資，以及阿聯酋杜拜的衛星電視台業務。

業務持續虧損，質素一般。除非你好確認佢之後的發展正面，就可小注博下。

記住，我地投資股票，就係投資緊一間企業，要分析係長線的企業投資價值。佢用乜野名，係唔會對佢業務有影響。

另外，唔係好估走勢或者估消息。我地要用實質理據，去做投資決定。

而且，就算再優質股票，都要時間去成長。唔好用賭博心態，諗住博某股票業務突然改變，從而令其股價爆升。

這個做法，只是投機，並不是投資。

------------------------------------------------

Q21778：

老師，原來我有好朋友關注你，同埋有一個上過你堂，佢依家做到財務自由，佢隻1211原來佢40元樓下買左萬幾股，依家都冇走貨，我問佢幾時走，佢話當你見到成街都係電動車就可能會走！

我依家30歲開始學投資，算吾算遲，其實我五年前已經開始接觸股票，一直都係輸，有時可能贏小小就用晒，到最後本金都輸埋！又重新來過

我開始明白你經常講嘅一句，買股等於企業，企業慢慢去發展，企業既成長，等於我儲蓄！

我而家買入嘅股票我都唔會再輕易去走貨，因為佢係錢搵錢

我放假要再去買你一本書，你經常提我知識好重要，係邊本書係簡單容易明白

我第一本書就係睇你介紹嘅50隻優質股同埋10隻潛力股！

我想學知識，邊一本我比較容易明白
等待謝謝你的回覆

龔成老師︰

你可以睇我寫架"80後百萬富翁"、"財務自由行"和"股票勝經"，較適合初學者。

其實30歲，依然係一個財富增值的黃金時期，只要你認真學好正確的投資方法，一樣可以做到不錯的回報。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，建議你用「平穏增長股」 + 「潛力股」的組合。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

現在你每月先用5成儲蓄估月供，其餘先儲起，用一邊月供一邊儲蓄的策略。

而你朋友買的比亞迪(1211)，係好優質的潛力股，現時未算行業爆發時間，長線持有，待佢慢慢發展上去，回報會更理想。

但由於現價已經偏貴，要月供最好等佢回到$150才開始，會較穏當。

------------------------------------------------

Q21779：

老師，我應唔應該買樓？出面話公務員會減薪, 咁你覺得樓市之後係咪應該會下跌?

咁我係唔係應該要等多一陣先買?

龔成老師︰

若公務員會落實減薪，某程度上，都會影響到私人市場的薪酬變動。

但樓市之後會唔會下跌，係要好多因素，唔係單單睇薪酬變動咁簡單。而且，我地投資唔好太著眼1,2年架事，要諗長線少少。

香港樓長線都係供不應求，因此樓價長線都係睇升。

始終市場需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

但中短期係有機會出現波動，造就入市時機。但你唔好預佢大跌，若係自住樓，只要係合你需要，而且長線"供得起"，你就已經可以出手了。

至於你之前講的房屋政策，只係好初步，無人知會唔會成事。就算成事，又要等到幾時先可以立法執行。

因此，你在做決定時，要在現實情況和這些存在不確定的未來政策中，自己取個平衡。

------------------------------------------------

Q21780：

龔Sir，你好。想請教一下，手上有匯豐控股（00005），平均買入價$57.8；電能實業（00006），平均買入價$66.7。

早幾年買，錯過左高位賣出時機，而家帳面蝕錢，不過睇返多年收過股息算打平。而家係咪應該賣出，定等機會股價升返？（好似好難）

龔成老師：

首先，要睇翻你的年齡與投資目標，你上述持有的，並不是無質素的股票，這些都是收息股，不過，增長力就不強。

如果真的賣出，可以等過1、2年，經濟好轉，等佢地股價上翻D先賣。

如果你年輕，其實未必太適合持有，應該在適當的位置，轉其他。

如果你年長，又或風險承受能力較低，又或投資目標著重現金流，其實就可以持有的，因為這兩股都是不差的收息股，只是你買入價少少高，但如果以長期收息的角度來說，其實無問題的。

另外要留意，你不能持有同一隻股票太多，你應該建立一個組合，同一隻股票去到15%好了。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19181-Q19200）

Q19181：

你好，想請教你一些出售股票時機的問題，好多時候，錯過了高位出售或止蝕的時機，會浪費很多資源

但如出售了的是一隻持續上升既好股，喎種情況比蝕錢更難受，老師是如何思孝這些問題？

龔成老師：

你這是一個心理問題，並不是投資的核心，成功投資者都很理性，你要克服這問題。

我地最重要是「建立一個長遠優質平衡的組合」，所謂錯過高位賣出，是天真的人事後孔明的想法，其實根本很難做到，至於止蝕時機，只要見到企業無質素就要止蝕。

至於賣出持續上升優質股。所以我建議優質股，唔好賣晒，點都要有貨在貨。

你要跳出「買入價」「賺蝕」這些心理因素，要著重「建立組合」，長期持有。

------------------------------------------------

Q19182：

成哥，想問關於7500的問題。

以下是我對於7500的看法和應用：我認為7500在大升市時是很好用的投資工具。

當恆指去到33000點或以上時，7500的股價肯定被壓得很低，出現投資值博率。而大市一定不會永遠處於牛三的狀態，股市過熱泡沫一定爆破。此時此刻7500的股價可能得3蚊，4蚊或更少。

當泡沫爆破，恆指急速插水，恆指跌穿30000點，其後進入2萬多點的範圍。現時我將7500賣出或許已賺了5蚊，6蚊接近範圍的差價。我將這筆資金再投資放入正股如1810，令財富不斷增長。

a.可以評論一下我以上的做法嗎？

b.7500的昂貴，合理，便宜區分別是多少？

c.既然2800和7500目的都是賺差價，為何不見老師推薦買7500？

最後，謝謝老師解答問題

龔成老師：

A）ＦＩ二南方恒指（7500）是反向工具，恆指跌，佢就會升2倍。

這方法都不一定成功，因為當大市去到33000，你覺得已經是泡沫時，如果當時真狂熱期，可以去到誇張到你唔信，唔好嘗試估頂。

同時，就算33000已經是貴，如果經濟向好，貴可以慢慢變成合理，如果33000上到40000再過一段時間變翻33000，之前的33000是貴，最新的33000是合理，7500有一定的成本，你已經輸左。

所以，表面是有值博率，但是否一定成功，未無人知。

B）初步睇，大市如果去到33000是貴，即是7500是平，但到時要睇經濟情況。

C）我建議投資盈富（2800）是組合的配置，而你上述7500，是賺差價模式，是兩種完全不同的方法。

------------------------------------------------

Q19183：

老師如果我想向銀行借萬應錢投資我可以點部處？

老師如果我想向銀行借10萬用黎買哂房地產基金收息之後再分兩年還每還完一次都重復同一個動作咁樣可行嗎？

我收入扣除強積金係17600每月要用佢1萬4千蚊做家用但我老婆每兩個月會存返1萬入戶口嘢我再用呢1萬儲同還錢我計劃大概就係咗想幾年內做到收兩萬股息

龔成老師：

唔好為借而借，要有機會先借。

其實你這動作，如同將資金提早到手而買房託，原理如同「提早買入」。首先，你會得到息差回報，但更重要的是，會否出現「賺息蝕價」的情況，因此，有無著數，要睇你這刻的買入價好，還是之後的買入價好，如果這刻股價是平，就對你有利。

所以，你一定要思考，如果確保現時是一個較好的買入價。

現時房託一般股價為「合理區」，未算平，以值博率來算，中等，但未算高。

------------------------------------------------

Q19184：

阿sir我想問一般機構備嘅目標價之後佢哋公司係唔係會叫職員去 分段咁買

到咗目標價之後就放？

因為唔係好明點解有啲股票目標價咁高但係依然升唔起

龔成老師：

唔好太信「目標價」，你當參考下好啦。

就算佢地分析左，都未必會去買，這只是一份報告。

同時，我在過往曾經見過有些投資公司，一邊叫人買，話目標價會好高，另一邊自己在賣出。所以，唔好太著重這些分析。

你應該集中分析「企業業務本質」。

------------------------------------------------

Q19185：

龔老師你好, 希點指點教導
以下是我持有的股票

中石化(386) 26000股 4.19
潤電(836) 28000股 10.02
建行(939) 31000股 6.6
農行(1288) 17000股 3.26
工銀(1398 6000股 4.18
中銀(3988)3000股3.6

因打算作收息用途, 暫時亦沒有緊急開支, 但看到現時共蝕了十多萬, 始終有點苦惱。

1. 由於在澳門銀行買股票手續費相對高, 所以習慣了存了一定量現金先買股票, 沒有月供, 請問我現時持有的股票情況, 需要賣掉部分較劣質的, 再把資金投放另一個股票嗎?

另外, 我發覺我持有的, 偏重內地股+銀行股, 我日後有資金, 應投放哪類型股呢?

2. 現時我和另一半二人每月都會拿一筆固定的錢作兩層樓的供款及共同開支的費用, 由於一開始預算是預多的, 所以E+每月都會有錢剩, 是不是最好都不要理剩餘的錢, 作日後共同大開支的後備資金?

3. 我現時持有大約30萬現金, 扣剩每月固定的公數, 以及個人消遣, 課堂等等開支, 預計每月剩一萬至萬五現金, 當中我都希望可以作投資用途, 投資方面是不是六成左右較安全?

4. 我本身有公立醫院免費醫療的, 但我希望萬一有大疾病時, 可以選擇更好的醫療, 所以有買醫療保, 意外保

另外, 亦有買儲蓄型的人壽保(但估計當作保終身用); 單純型的儲蓄保, 供五年就日後可選擇逐年取小金額現金, 或者日後遲點先開始取, 但每年金額就提高, 或者子女繼承。

由於人壽+其他保險的死後賠償, 已經可以COVER到我欠下的貸款, 醫療方面, 大疾病/住院都應該可以保, 。

還有,我現時強積金連埋僱主個份, 每月供七千左右, 做多廿多年想提前退休先可以攞足, 這種情況下, 如無必要, 我自己買個份儲蓄保我應該早少少每年提小金額現金, 投資, 還是任得筆錢繼續滾大, 直到我要錢周轉先用?

5. 疫情下, 我留意到好多奢侈品仍然加價, 亦有二手巿場 過往我都沒有買奢侈品的習慣, 但現在我想每月額外存一筆錢, 買些自己會用到的奢侈品, 如名錶, 精品手袋, 亦可作不同場合之用, 不過又怕失敗其他投資的機會, 好爭扎

龔成老師：

1）持股並不是完全無質素，但選股技巧要提高，上述不少股質素不是最高類股，以及增長力不算強。

你應該考慮其他類別的股，唔好再加注在上述的股。

如果唔方便月供，就自行一手手投資，不過，一定要同時留有現金。

你可以考慮盈富、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

2）暫時唔需要特別用，如果真的較多，就買少少盈富。同時，當見到股市大跌時可以投資。

3）可以。

4）如果你本身都有一些保障。保險方面就唔需要買太多，因為買保險，「足夠」就得。

5）如果你不是對這方面好有研究，建議你不要投資。

------------------------------------------------

Q19186：

龔Sir本人25歲 ，好辛苦草到50萬 最近學人玩美服 新能源車 一開頭賺得好開好

但佢一跌就20% 2晚唔見咗18萬 好唔開心 辛苦草既錢冇哂 宜家只想回本

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

新能車最近都在熱炒，好多相關股票都已經係貴，出現回調係唔奇。

重點係你要睇翻自已投資架股票，企業係唔係真係有質素、行業發展如何、財務狀況是否健全等，再去決定是否值得長線持有。

另外，你唔好再同一般的散戶一樣，停留在「賺差價」，你要用「建立長遠的組合、財富配置」，去進行投資。

如果你同其他散戶投資方法一樣，永遠都唔會賺到錢。

------------------------------------------------

Q19187：

老師你好。我今年18歲，正在修讀副學士學位，我爺爺去年過身後，給我遺留了50萬元。

請問你認為那幾隻股票適合我
給我來緊五年供？

龔成老師：

你最好分注投資，或以月供的方法，好好運用你手上的資金，要投資優質股，長線進行，同時，唔好用盡資金，點都要留有一定的現金在手。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）。

另外再加幾隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067），但這基金股價上落會較大，因此唔建議金額太多。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q19188：

龔老師，你好

本人目標3年儲50萬

自己都有學習ROE分析股票，然後買咗農夫山泉(9633)(34.5買入)同亞里巴巴(9988)(251買入)
這2隻過往都有12%以上(如果我無計錯的話)

同業務都唔錯

想問下我對呢2隻股票嘅質素有無誤解?
同埋我仲可以用哪一個指標來判斷哪一隻是優質股?

另外，有留意藥明康德(2359)同藥明巨諾(2126)，值唔值得投資?

2359我睇落都唔錯(過往ROE表現ok)
但2126係咪伏黎(睇IPo d profit 係 負數)

如果要達到我嘅目標，仲可以點做?

龔成老師：

你用ROE作為分析，是其中一個指標，但不是唯一的指標，同時ROE背後仍有好多分析技巧的。

阿里（9988）長遠仍是有發展，賺錢能力雖然有少少減，但長遠會同政府同議一些監管方法，以及找到合理的賺錢模式，你預阿里$250以下是合理區的頂位，這股可長線。不過，中短期會波動。

如果有貨，可持有，但就唔需要太急加注，如果未有貨，現金足，可以這刻小注，之後跌1成以上再加注。

你有貨可守，但未必要太急加注。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

這股適合長線的，不過要注意平貴，唔好投資得太過多。

至於醫藥股，分析過程都幾複雜，你唔能夠只睇過往的財務數據，同時要睇該藥的市場、發展，以及佢研究的藥，當中的發展潛力如何。而這行業可說是有風險，有潛力的行業。

------------------------------------------------

Q19189：

老師，請問點睇隻235, 謝謝。

龔成老師：

中策集團（0235）質素唔太好。

佢主要從事投資證券、金屬礦物及產品及電子組件貿易、放債及證券經紀業務。

睇翻過往的業務情況，非常波動，生意上落大，有時大賺有時大蝕，風險高。加上企業規模不大，投資價值不高。

這股股價有時會大升，但可能只是中短期業務與消息，長遠未必一定利好。

------------------------------------------------

Q19190：

龔成老師，我聽你講正在月供港鐵及領展。但想問一問對於一啲以往冇派息記錄既公司，就只能依賴佢公司增長潛力帶黎收益。有其他指標嗎？

龔成老師：

其實最重要是睇業務。

例如領展（0823），過往多年派息不差，保持向上，投資者要想想，點解佢能有錢派息？

一間公司，要有錢賺，先可以保持派息，如果佢業務波動，派息就會受影響，我地要從佢業務方面著手，生意情況如何？

以領展來說，業務就是收租，睇翻過往的租金情況，多年都是保持向上，反映佢有加租能力，同時承租情況不差。到近期疫情，生意當然受影響，所以派息都可能受影響。

但我地要想想，這個影響是短期還是長期，疫情總會過去，因此，對佢的影響只是短期，長遠仍是正面。

------------------------------------------------

Q19191：

龔成老師，想請問一下資產分配你會點樣建議? 會建議持有較多現金等待熊市黎，定係分批入貨持有優質股? 兩者哪個會比較好?

如果按比例分配嘅話，應該持有幾多成現金等待機會，幾多成股票會比較好?

龔成老師：

唔好100%等大跌市，我會建議就算在合理區的市況，都要持有一些優質股。每月儲到的資金，可以部分買入優質股，部分留現金。

至於比例多少，好睇你自己的風險承受能力及現時大市的平貴度。現時大市合理，部分持有優質股，部分留現金，可以。

我地最重要是建立一個「長期的財富組合」，這是一個配置過程。

------------------------------------------------

Q19192：

龔成兄你好，近月不時都有新聞話李嘉誠同李澤鉅透過李嘉誠基金會買入長實集團股份

我想請教吓，佢哋作為公司高層，理應熟知公司運作同前景，應唔應該信任佢哋對公司股份價值嘅判斷，跟隨佢哋嘅買入價去買入？謝謝

龔成老師：

李嘉誠佢地，一定好熟識公司的情況、價值，所以，佢地的動作都有參考價值。

長和（0001）本質不差，不過由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。

佢地的分析點，不是這刻，是長遠，佢地認為自己公司現價吸引，雖然中短期業務一般般，但之後會慢慢向好，從長遠角度分析有投資價值。因此，佢地不斷增持。

我相信這股有投資價值的，不過就不是高增長。現價合理區中下部。

------------------------------------------------

Q19193：

老師，可吾可以教下我 3808 中國重汽吾小心買咗重貨 22$ 第二曰跌7% 而家20$ 唔知點算好

求救

龔成老師：

中國重汽（3808）這股都有質素的，但近期上升了唔少，現價唔算平，這是風險所在。

佢主要業務為專營研發及製造重型卡車及有關主要總成及零部件。總部及主要生產基地位於中國山東濟南。

佢連同母公司按銷量是中國最大的重型卡車生產企業。長遠來說，其實是有質素的。

睇翻佢資料，佢重型卡車產品品種包括貨車及貨車底盤（總重超過１４噸）、半掛牽引車（准拖掛總質量超過１２噸）、自卸車及各類專用車底盤等，是國內驅動形式最全和噸位品種最多的重型卡車生產企業之一。

重型卡車產品廣泛服務於基礎設施、建築、集裝箱運輸、物流、礦山、鋼鐵及化工等行業的客戶群。

過往的生意與盈利理想，有長線投資價值。

其實這股本身無問題，不過你重貨，以及買入價較高，是風險。

現價合理區中上部，你或者睇位賣部分，餘下就長線。

------------------------------------------------

Q19194：

請問你如何分析到必瘦站是一隻優質股？

龔成老師：

要解釋有排講，你可以睇翻《50股》一書，這是其中一隻。

你會見到佢財務數據理想，ROE高。加上就算派息比率高，佢都有增長力，反映有內部增長能力。而佢生意與盈利保持增長，業務發展理想。

------------------------------------------------

Q19195：

成哥 如果水桶法，例如賭股為例，板塊係一齊上落 咁我先買200，爆升機會高，之後再換番1928 咁係咪好d？

姐係用同業既細價/市值細，換取緊多子彈，再換番落靚野到。咁呢個行業水桶法可唔可行？

龔成老師：

運作起上來，其實有點難，因為無人知到時係咪真的新濠國際發展（0200）上升力度較高，有可能金沙（1928）仲上得多過去，所以無絕對的。

概念上唔係唔得，不過運作上未必如預期。

------------------------------------------------

Q19196：

成哥，想問幾樣看看係能否解答

地產業 房價過去不斷增長很多，但恒地 新地 10年增長相對其他藍籌其實不算很多倍，長和反而有10多倍，為什麼

保險股友邦中人壽一樣，10年增長相對低，是保險公司較少營利嗎？

反而港鐵出奇地，原來增長了那麼多倍，往後10年你覺會否一樣？ 還是都是新經濟科技或醫藥等股為主，值得投資

龔成老師：

第一，地產股在過往年代認為較好賺，而的確毛利較高，所以過往年代，如10年前，市場比佢地的估值會較高。

到左近年，賺錢能力及增長力無之前咁強，雖然仍是有錢賺，佢政府的限制多左，同時地價又貴左，獲利少左，所以就算樓價上升，市場認為佢地賺錢能力減左，所以估值都減少左。

令到股價增長力不及樓價。

至於保險股，由於佢地有一部分的業務來自「投資」，當這部分的貢獻減少左，佢地的股價增長力都會反影響。

港鐵（0066）佢的獨特性好強，壟斷香港的鐵路，加上地產方面好好賺，風險少賺錢能力高，自然有一定的價值。我相信長遠仍是正面。

當然，增長力不及新經濟股。

而我地應該建立「平衡的組合」，並不要過份集中在某一類，要平衡，各類別都有。

------------------------------------------------

Q19197：

老師，最近我計6098，根據上堂教睇研報同我既分析，6098既peg現在等於1，加上增長力係全行業最強，有強既現金流又冇重負債問題，預測市盈率45左右

我又覺得唔算高，最近4十幾元買左，但最近係咁跌，我都有d開始懷疑自己有冇睇錯，我想問我分析有冇錯？thanks

龔成老師：

如果因為買入後短期股價下跌，你就認為該企業質素有問題，你就大錯特錯！

課堂多次強調，短期股價無人知，但長遠股價會回歸合理價，這個長期，一般都要3年。

另外，這股一直都唔平，現價仍在合理區頂位，而peg只是其中一個估值方法，這方法不能視為估值的核心，只是輔助一下。

碧桂園服務（6098）無論在業務本質、規模、品牌、財務數據、前景，都是理想的，反映這企業有一定的質素。加上有一定的現金流，背景發展等，投資價值絕對有，相信這企業的前景不差，有長線投資的價值。

但要留意，行業有時會有較大的炒作，股價上落大，要注意風險，而整體是有長線投資價值的，這股不少時間都在合理區頂水平。

這股可長線投資。

------------------------------------------------

Q19198：

你好龔sir！今次唔係問問題，係想分享返自己既經歷同埋多謝你。

自從舊年9月上完你堂開始建立組合，暫時回報已經有40%，呢個係仲短炒緊既我唔會想像到既數字！

之前一直短炒又唔會去了解買左既股票(公司)係乜嘢，所以輸錢係好應該。 自從認識價值投資後，學習到巿場真係好容易俾唔同消息影響。自己keep住有留係d財演短炒group，目的唔係跟炒，係參考下散戶既狂熱/恐慌情緒。

到3月疫情爆果時，個市日日係咁跌，個個都不停賤賣股票，明顯係唔理性地恐慌。其實當時自己個心理質素未可以做到好理性面對，人人賣貨自己調轉頭係到買貨不自覺地會俾左壓力自己。

最後好好彩都叫能夠把握機會入左d貨。雖然後來檢討返自己果刻既操作仍然有好多改善空間，但親身經歷過巿場失去理性呢個經驗真係無價，好好咁上了一課，亦為下一次既機會做更好既準備。

知道阿sir你花好多時間好有心機咁答人問題，有時睇到好多重覆又重覆既問題你都繼續咁有耐性去答真心佩服。希望係到話你知你做既野係有人睇到、有人欣賞、有人真係受到正面影響的。

知道你心理質素好強唔會介意坊間其他人/同行既質疑，只希望你可以keep住做而家做緊既野，唔好咁快退落嚟，繼續為更多人帶來正面既影響。

龔成老師：

好呀！見到你有成績，咁就好了，其實我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

另外，多謝鼓勵！

價值投資法一定是最正確的方法，我會一向教人用這個方法。大家都加油！

------------------------------------------------

Q19199：

長遠 港股受疫情及社會活動影響？負面多？
美股比新總統政府影響？

但長遠投資是。正面及有增長空間？

應該是如果將强積金投資是港股及美股基金 長遠是有賺？ 因為股票市場會升？

龔成老師：

疫情當然會影響，但我地分析企業，最重要是睇長線，唔好太著重短期的分析。

至於美國政策，未必具體的對中國情況。但我地最重要是分析「企業本質」，以及建立一個平衡組合。

我相信在長遠，中國及美國是兩個最強的經濟體，都有投資價值，如果你想平衡，就兩邊都同時持有。

------------------------------------------------

Q19200：

老師，首先謝謝老師指點本人較早前小注買入1211 $50 位入，會作長缐持有！

另外想請教老師，本人於2018 年尾衝動下買入葵涌區活化左既工業大廈，其中一個翻新的單位，有管理，尺價$13000，實用面積53‘尺

現時作收租用途，請問這些類似既活化工廈單位長遠有沒有投資價值？謝謝！

龔成老師：

比亞迪（1211）如持貨不算多，可長線。

至於活化工廈，相信長遠仍有價值的，香港始終土地不足，持有土地就是持有資產，長遠一定有價值，而葵涌區都正面的，不過我就唔清楚該區現時類似物業的平貴水平。

你都可以作長線收租的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16141-Q16160）

Q16141：

老師，我是你股票班學生，想請教一些發行股數每股調整等問題。

1) 為何使用最新一年的已發行股數去計算過去的每股盈利，這樣得出該年的每股盈利還是該年的每股盈利嗎, 為什麼？定係我仲係理解錯?

2) 使用最新一年已發行股數計算過去每股盈利只係適用於每年穩定地調整股數的公司嗎還是所有公司只需用最新一年的已發行股數就可計算出正確數目？

3)在計算市盈率時，由於公司收入出現虧損，盈利是負數，令市盈率亦出現負數，咁有以下問題想老師幫忙解惑(練習對象：盈富基金)

a) 咁即係代表這個市盈率沒有意義，要用其他方法估值？

b) 定係基金係唔可以直接以咁既方式估值, 因為佢係以唔同比例持有50間公司的股份？

c) 優質股票是資產，咁盈富是否資產型股票，是不是用市賬率去分析會比較好？

4)老師曾提過恒指24000點以下的時候才是開始入市的時候，這是如何得出這個指標？

5)我見網上，有指只需找出恒指近年來最高點然後以這指數的70-80％作為判斷入市的其中一個參考，這方法可行嗎？

如蒙老師解惑，不勝感激。
近期不斷翻看老師的筆記及著作，每翻看一次都有更多對理財的明悟，實在感謝老師的用心。

龔成老師：

1）如果公司2010年發行1億股，賺$1億，每股盈利就是$1。2020年，發行2億股，賺$2億，每股盈利就是$1。

公司的盈利在這10年增加了，但如果睇每股盈利，就無增長過，因此，每股盈利要有適當的調整，例如2010年$0.5，2020年$1，就能反映到盈利增長了一倍。

2）原理同上述一樣，這往往考慮左一些股價的調整問題，其實要解釋，好難三言兩語講到，反而，我會建議你用整間公司的角度計算，估值及分析，因為送股對企業價值無影響，只是當計算每一股股價有調整。

3）會假設當年是「無數字」。

A）如果其他年份有正數，都可以照用該方法，但如果無正數，就要用其他。

B）如果是基金，要睇翻佢追蹤D乜，例如盈富（2800）就要睇恆指，而不是睇盈富數據。

C）你要睇翻該50隻成份股，是否大部分是資產型企業。

4）利用恆指過往市盈率做估值，第二堂有教過。

5）無根據。

------------------------------------------------

Q16142：

龔sir你好，我想問下配置
我29歲，穩定職業，月儲2萬多
主要資產為

1. 現金 70萬左右
2. 股票 34萬左右
恆地 35.5x2000
銀娛 48.3x1000
MTR 47.5x1000
吉利 16.8 x1000
建行 6.05 x 4000
中銀香港 27.3x4000
日清 6x3000
鴻福堂 0.89 x1000

由於家裡只是租屋，所以一直預留現金作首次置業之用，目標以不多於64萬的首期買入450萬以下的一房單位。

但現時股票市場回調吸引，心儀屋苑樓價反而未有回調，此刻黎講，股票搏值率明顯比物業高。

不知我應該堅持預留現金置業，還是投資於股票。心裡隱約覺得即使樓沒有股票那麼高的搏值率，但還是得買樓，因為始終要住，想再聽下你意見

龔成老師：

如果你打算2年內置業，你的現金就唔好動用。

這刻的投資值博率，港股的確比港樓為高，不過，買股票原理是買入企業，買入後耐心等企業成長，所以要較長時間先有收成，就算這刻買入，2年內都未必見到。

香港經濟將轉弱，1、2年樓價會向下（當然，不是大跌），長遠來說，會因供應不足，而向上。

所以，你可以把握這2年的時機，等機會入市。

至於你現時的股票，基本上都是有質素的，持有無問題。

------------------------------------------------

Q16143：

你好，龔成老師。本人是澳門人，自雇人士，與另友人開有一間公司，都快7年了，月入平均3-4萬，年頭太太有了第二胎，也要和本人媽媽一起居住。

所以年初賣了原來的細二房單位（母親名下），成交價488萬，母親會給我一260萬+我自己本身60萬存款，選了一個間三房單位640萬，澳門首置可借足8成，首期+印花稅雜費+裝修後，應該還剩100多萬資金，月供21xxx .

由於我太太最快也要2年後才可搵工分擔供款，我想法是借盡銀行首置8成，餘下的資金可去幫補每月的一半供款，我想請教老師

我應該怎樣去運用者畢資金去作一個穩定的投資，可以令資金不會放在戶口貶值

有什麼方向可以在保護本金（我也明白要增值也要承擔一定風險）的大前題下作出一個投資手段，謝謝，期待你的答覆

龔成老師：

借8成的確可以令你現金剩下較多，如果運用適當，的確可以增加回報，不過，這無可避免令你風險度增加，所以你要自己衡量。

如果澳門都有一些如香港的「按揭高息戶」，即是該戶口的息率，等同你按息，你可以將一半現金，投放在這裡，作為流動資金，等機會，這部分當見到十分大型的跌市，所有股都處好平宜的水平，就可以動用，這會有效令到你財富增值。

而部分的現金，你可以投資收息股，由於現時不少收息股都跌了很多，其實已可以作出投資，只要分注就得。
市下跌，可以買平貨之用。

你可以建立一個收息股的組合，目標是6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。就算有些近年的派息會減，如匯豐，你都不用擔心，因為最重要是長線投資。

買入時，要分注，慢慢入。

------------------------------------------------

Q16144：

龔sir本人是股票新手，白紙一張，看你的書有不明白的地方，問題比較白痴，請不要介意。

1. 股票聖經37頁，說送紅股對股東沒有實質權益增加，因為總股數增加，股東手上所佔權益就會攤薄，這裏我明白，但是股價會自然地向下調，這裡不明白？

因為股數增加，權益攤薄，等於打了平衡，為什麼股價會向下？0003收息股，如果我們長期持有，不就是賺了他的派息嗎？為什麼說送控股對股東沒有實質權益增加？

2. 股票聖經208頁，優質企業因為貨幣系統，經濟成長，自身成長，令企業價值不斷上升，帶動股價長期向上。所以量化寬鬆，長遠來說，是會帶動股價上升，可以這麼認為嗎？ QE對股票市場或整個經濟體系有什麼不良影響？

3. 股票聖經316， 你說2016年賭場連跌10個月期間，你分批買入金沙股票，想請教一下，如果我再遇到呢一種機會，假設有500,000資金，應該分別投資幾多隻股票？分幾多次入手？每次應該入幾手？

假設我整個股票組合是100萬，50萬潛力股，40萬平穩增值股，10萬收息股。

本人30歲 謝謝.之前你建議過每跌10%入一次，但係我都不能很好地分配及掌握到入市的資金分布，因為好少機會可讓我連續入市2次，假設金沙$28買入第一次，第二次買入$25.2, 第三次買入就要$22.68（比較難達到這個位置）

最後想問，澳門班幾時再有？

龔成老師：

1）如果一間公司價值$100億，發行$10億股，每股價值應該是$10。如果佢的發行股數變成$20億股，公司的價值不會因此而改變，所以都是值$100億。

但每一股的價值就會變成$5，這就是自然的調整。

煤氣（0003）每年都會派紅股及派現金股息，現金股息，的確有實際的得益，但紅股，只是一個虛數，股東唔會有實在得益。

2）QE會令現金的價值進一步減少，因此，資產項，例如物業、優質股，長遠的價格就會向上。

3）你首先要計算，單一股票只能佔你總股票組合的15%，而同一行業，只能佔30%，你以這個數為基礎，去計算出每隻股，能投入多少金額。

另外你買入時，要分注，最好每注相差10%以上，你的價格設定，可以。

4）預期今年澳門班，會在第四季舉行。

------------------------------------------------

Q16145：

老師，我留意左2588已經好一段時間，已經回調左好多，相信是因為短期航空業不利消息影響，驚航空公司倒閉會壞賬。

龔成老師：

中銀航空租賃（2588）可說是有風險有質素的股票，業務本質的確不錯，生意與盈利都保持理想增長，加上賺錢能力不低，同時企業有獨特性，因此企業正面。

但要留意，佢的業務原理，是利用借貸投資飛機然後放租，由於收到的租金比借貸的利息成本高，因此賺取了中間可觀的利潤。

但如果日後加息，或航空業好差，對佢盈利有影響，同時，佢現時的負債不少，這都是風險的來源。

整體來說，這股有投資價值，你可以考慮，只要注碼不能過大。中短期我唔分析，但長遠計，這企業不致於市場這刻睇得佢咁差。

------------------------------------------------

Q16146：

龔Sir好，我在買樓方面有些事情想向龔Sir請教。

本人37歲，為公務員，月入$73,000，太太在私人公司工作，月入32,000。

太太名下有一個沙田2房單位，在我們早年結婚時買的，估價約七百八十萬，尚餘按揭二百五十萬，現放租15,000。

我們手上可用現金為二百萬。
我們向一名4歲女兒，也有外傭。

我們現住宿舍，但由於是新制公務員，我們需要在今年9月遷出宿舍。現正考慮遷出宿舍後的安排。

我們心儀美孚新邨700呎三房單位，方便女兒上學。我們正考慮應該是買還是租美孚新邨。美孚新邨700呎單位約八百五十萬，租約二萬四千。

由於美孚新邨已有50年樓齡，買是否合適？

若果租美孚新邨，我打算用手上的現金買一個荃灣或大圍(如金獅花園)的細兩房單位，約四百萬作收租。由於我是公務員，我只打算做5成按揭，以免違規。另外，我們也怕租美孚新邨會經常被業主迫遷。

哪個安排較可取？敬希襲Sir指教。
謝謝！

龔成老師：

從長遠自住及物業質素的角度分析，美孚新邨會較適合你地。我會建議你，考慮在適當時機，買入美孚新邨。

現時沙田單位，就保持收租。

雖然美孚新邨已去到50年，但物業優質，銀行估值足，維修方面無大問題。

你現時現金$200萬，如果要以5成按買到美孚新邨，未必得，所以，你可以考慮加按沙田物業，就算加按後，每月的租金都能夠足夠還款，因此風險不大。而這一步可以加大你現金。

當然，你都要計算好，買入美孚新邨單位後，每月供款是否無問題，因為買樓，最重要是「供得起」原則。

------------------------------------------------

Q16147：

龔先生，你好。請問，我是退休人士，暫時沒有財政壓力，但如果想增值財庫，不想坐食山崩，10年后可以用。我應該跟你教其他人一樣，選擇月供股票？

定係現在就買股票？我心水也是盈富，領展，中銀香港，長建等。

例如我有200萬在做定期，早幾年息有3厘左右，應否停了去買股票？因為只有200，買樓又買不到。謝謝你。

龔成老師：

你現時的情況，應該做好「配置」，月供一般會適用於累積財富的人。

你最好建立一個平衡組合，收息股可以是其中一部分，但不是唯一的。你應該著重收息，同時加上適當的增長，這會較適合你。

你上述的股票，都可以投資。

如果你想更加穩健，可以將財富，分配成多個部分，著重現金流，低風險，你可以將這些現金，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）置富（0778）、陽光（0435）、深高速（0548）等，都可以。而你上述的股票，同樣可投資。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q16148：

halo 阿SIR, 我現持有100萬現金,因疫情生意大受影嚮, 所以還是每月咬緊牙關過活中

原本已作每月供股5千,分別2800,3同12, 見到現今股價好多平貨,不過未知幾時係底,

有思考過先拎50萬買貨, 餘下50萬用黎供股,亦或者等巿跌幅度再大D時先購入,亦一方向就係提高金額每月加注,例如5萬一個月咁去供股

但因為怕現貨平宜, 而供股每月先供一次,而會錯失良機,阿SIR你會有任何建議嘛?

龔成老師：

首先，你要睇翻你自己要多少現金作備用，我地理財，要先防守，後進攻。

生活上、生意上，要有多少現金，如果6-12個月要頂住，是否足夠？

剩下的現金，就可以投資。

大市比幾個月前跌唔少，部分股票已到了合理區底，或略平的位，你可以動用現金，以一手手模式，加快買入，把握這個機會。

總之，你記住幾個要點，第一，這是「閒錢」。第二，買入要分注，慢慢入，唔好一次過用盡資金，第三，要預留一定的現金，無人知幾時是最平，但有現金就一定有用。第四，要建立一個平衡組合，唔好只集中在幾隻股。

------------------------------------------------

Q16149：

成哥。。想請教。。

我現在有1000萬現金在手。。剛剛37歲，有自住樓
月入十萬左右

想問下點樣可以發大佢。。
唔該曬

龔成老師：

如果你本身已有物業，在財富平衡的角度，你應該將資金分配到優質股，利用股樓平衡作增值，同時，如果見到樓價大跌，可以買多一層做投資。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股最多小注。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，你已經可以動用其中的$300萬，分注投資。你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

總之你記住，投資不是炒賣，而是如何將你的現金，轉化成有質素的資產，建立一個平衡、穩健的組合。

------------------------------------------------

Q16150：

你好，我係新手，我持有1000股03690.係高位價$115入市.之後一直係咁跌，見升極係92左右又跌返，請問我係咪可以估佐先等低位轉入其他

另外9988我都持有1000股.$205入，係咪等跌再溝貨還是買其他算

匯豐舊年59蚊入貨，係咪都可以出佐先.麻煩曬，我都係最近2個月先學玩股票，多多指教

龔成老師：

美團點評（3690）有潛力的，不過這股要進行估值難，而股價亦比較波動，因此唔建議太大注。

你唔好太理會中中短期股價，分析股價是無意思的，你應該分析企業的業務情況。

如果你持貨不多，可持有住先。

至於阿里（9988）有質素，有增長力，但之前一直都貴，要去到$180以下才算合理。加注與否，要睇翻這股佔你組合的比例，如已有一定數，就算。

匯豐（0005）只是收息股，唔好對股價有太大期望。如果想增值，其實應該考慮其他股票。

------------------------------------------------

Q16151：

龔老師你好呀！
想問下 眾安在線(6060) 這隻股有潛力嗎？

龔成老師：

眾安（6060），並不是無質素，佢業務高增長，但最大最大的問題，就是這企業仍處燒銀紙的狀態，虧損不斷出現，根來無人知幾時先有較似樣的盈利。因為行業的不確定性都幾大，難估值。

這就會出現一個嚴重問題，企業值幾多錢先合理？

答案是無人知。

市場根本無法正確估到佢地企業價值，那就只能單憑概念、前景，去估這股的股價值幾多。這就會令這企業的股價十分波動，因為大家都只是估估下。

潛力有多大，企業值多少才合理，無人知，但這類股，我地一定不能大注。

------------------------------------------------

Q16152：

龔老師， 1. 2826 雲算etf 現價可買入嗎？ 打算長線吸納。

2. 可長線持有9988嗎？雖然未係藍籌，但都算係優質股吧？ 謝

3. 3918係咪可以入了

龔成老師：

1）ＧＸ中國雲算（2826）有長遠的增長力，不過估值方面較難，所以分注慢慢入較好。可長線投資。

2）阿里（9988）有質素，加上有潛力，可以投資，你預$180以下就是合理價。長線持有無問題。

3）金界控股（3918）有質素的，但風險度會比澳門賭業股為高，因此要控制好注碼。現價在合理區中下部，可以投資，這股有長線持有的價值。

------------------------------------------------

Q16153：

老師, 您好! 我剛踏入50歲, 現手持下列股票, 由於以往很喜歡購物, 所持現金不多, 只有幾千元美金及幾千元英磅;

2手00002中電; 2手00005滙豐; 2手00011恒生; 2手00388港交所; 1手01398工商銀行; 4手02388 中銀香港; 1手 09988阿里巴巴

見老師多提議供股, 所以下月開始會股2800盈富基金$2,500, 00006電能實業$1,500。

每月基本洗費約 $30,000, 包括保險供款 $15,000;

請問老師, 如果65歲退休, 以上述所持股票, 有多少現金流呢? 需要調整股票分配嗎? 請老師指教。

另外, 老師是否有一本書, 介紹50歲的投資策略?

龔成老師：

首先，你持有的股票不是差，但有點集中在銀行股，而我地投資，同一行最好在30%以下，否則會出現集中風險。

所以你之後唔應該增加太多銀行股。

至於月供方面，你供盈富（2800）及電能（0006）可以，基本上已經可以開始。

你現時每月供$4000股票，假設股票有8%的複息增長（要當你收到股息後，再投入買股票），65歲，會滾存到$130萬，加上你現時的股票，預期$180萬。如果這筆資金收到5%股息，大約一年有$90000，每月收息$7500。

如果你想增加這數，有兩個做法。

第一，增加每月的月供數，第二，投資較有增長力的股票。

運用「先增值，後現金流」作方法，初期投資較多增值類資產，到退休，則應投資較多保守類項目，因為初期財富系統未成形，同時可承受的風險度較高，所以會著重增值為先。

到退休，先集中投資低風險，現金流類別的項目。

------------------------------------------------

Q16154：

Hi 龔成老師，我現時27歲 月入32000蚊 擁有一個物業 而家按揭9300蚊左右 扣起生活費

一個月可以儲或投資14000蚊左右 現金我大概有60萬 而家暫時月供3000蚊2800 而家見到個市有波動

想增加月供嘅錢之外 想拎多10萬出來買幾手股票長線投資 請問0006或0003會適合我嗎？thanks

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你27歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，煤氣（0003）、電能（0006），以你的年齡來說，都不算最適合。

你可以保持供盈富（2800），同時可考慮銀娛（0012）、阿里（9988）、港鐵（0066）、舜宇光學（2382）、小米（1810）等這類較有增長力的股票，只要建立一個平衡組合就得。

------------------------------------------------

Q16155：

老師你好，有點問題希望能幫忙解答，小弟雖然做左幾年野，但一直都是月光族，沒什麼儲蓄，到現在31歲發覺太後悔，希望能佢發奮，前幾年有試過在股票牛熊學投資，但都爛尾收場！

而家可用資金只有20k左右，股票手持蟹緊既772,135(各一手) , 月供每月$1500, 每月可儲8k, 我希望年半可以有40萬-50萬上樓，請問老師有可能嗎？

簡單的是希望每月能生活好點，有額外的收入，這年紀在投資方面應該要怎樣？ 謝謝

龔成老師：

投資衍生工具，我20年前都試過，輸好多，之後唔再投資，其實好多人都中過招，只係有人會醒，有人唔識醒。

之後唔好再投資。

如果你現時現金不多，建議你努力儲現金先。

閱文（0772）不是全無質素，但估值是最大問題，這類股只能小注。至於昆侖能源（0135）質素中等，都可守往先，就算要賣都要等油價上翻先。

你每月儲$8000，一年半後本金為$12萬，你想累積到$40萬-$50萬，這要好高回報先得，我擔心你為追求過高回報而面對過高風險，正所謂「財不入急門」，小心。

建議你每月月供$5000。

你可以考慮盈富（2800）$2000。另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市波動，你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16156：

龔成老師，我一直有看你的書近在這一年間。我是住在澳門的

以下問題是針對澳門情況，想請教你有關分注入市中衍生的一些交易手續費貴的題，分注入可減低很大風險，長期持有令交易成本高的問題不顯著，當短期少至一兩星期時，平均成本大增

澳門沒有太多證卷行，有的都在十多年前關門大吉了。澳門銀行的交易手續費，買入買出在固定手數以下的股票時，大約共320元。

有沒有意見對於短期持有時的操作方法，能在盡量減少分注注時又可分散風險的建議。

剛在宏達訂了你的2020版50隻優質股。

龔成老師：

如果澳門手續費咁高，買賣成本高，就更加不要做短炒，而我一向都不建議的。

你要減少買賣次數，儲多少少錢後先一次過買，就可以減少成本。

當然，我地投資時會用分注，這裡就要取一個平衡點。你可以計翻，手續費的佔比，唔好高過成本的1%，如果少過這數，有效分注買入是較好的。買入後，長線持有。

希望書盡快去到澳門，好似話好多人排緊。

------------------------------------------------

Q16157：

成哥。首先謝謝你先，上緊你堂，再睇左你介紹的書，真的明白好多野。學到既野我希望現市個大跌市，(你說的係機會黎)，希望我可以學既野可以拎出黎，但怕行錯路，請給指點

1)請問依嫁個市，越跌越有，啲優質股越來越平又正。本人30歲未婚有30萬，請給我意見，入咩好，比多少少方向我。

2)再說幾多成盈富幾多成潛力幾多成平均增長好，做進取型希望個組合有一百萬

我相信現市係個大機會，我怕入錯野令個30萬發揮唔到最大作用。。襯現市（跌市機會）買入，買入后希望來緊二至三年后個組合有賺一百萬。謝成哥！

龔成老師：

1）以你的年齡，以及已經有一定的投資知識，可以一半水桶1、一半水桶2。

前者如比亞迪（1211）、小米（1810）、中生製（1177）、新意網集團（1686），你亦可以自己選股。至於後者可以考慮這刻較有值博率，希慎（0014）、金沙（1928）、領展（0823）、加上盈富（2800）去平衡組合。

2）盈富可以佔股票組合3成。

就上述的股票，現價已可以入，但當然不會一次過入，而是分注，慢慢入，同時留現金。只要在較平的位入到，要打上一倍以上是好合理的，所以我地而家好希望優質股股價跌。

------------------------------------------------

Q16158：

成哥，你好。我係進階班學生，你份24大比率表好正，thx

請問流動比率（倍），最少及最大，我唔識入，你筆記教用100%以上合格200%以上理上。。100%，200%，是否就是100%=1倍，200%=2倍?

龔成老師：

我希望用好多列表，又或簡化的模式，去幫同學學到一D本身唔易掌握的概念！

你只要將「流動資產」÷「流動負債」就得，例如流動資產有$10億，流動負債有$10億，就是100%，這就合格，這是剛剛找到數。

如果200%，就為之一倍，即是$20億流動資產，對比$10億流動負債。

------------------------------------------------

Q16159：

老師你好
1. 看了大富翁致富藍圖有些不明。你講資產如果優質可以什至永遠持有。例如我買了個好優質的股票，但是我不賣，我就沒有現金去應付日常開支。

2. 另外，大市似乎到了便宜區。我現金不多，既想入股票，又想保留現金買樓用。好矛盾。因為一方面覺得現在是買入優質股好時機，但短期未必放。

另一方面打算2020年買樓結婚。想投資優質股又驚短期要用錢。如果不買樓，就白白浪費了入市良機。

3. 雖然老師常強調不要理股市短期升落。但看到自己在便宜時買的變更便宜，就感覺擔心。

4. 最近有些股票跌到3年低，就算股票是優質，那3年豈不是仍“白過”嗎？

5. 在2018年尾已月供2800 $7000，823 $4000，1211 $2000。如果今年29歲，現在應該放幾多%的錢在股市，應該留多少現金最好？而且在股市上，潛力股 : 低風險股怎樣比例才合適？

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

然後我地會進入「財務自由」的狀態，在不消耗任何資產的狀態下，利用租金、股息等現金流，已足夠日常支出。

2）如果你想在1、2年內買樓，就唔好投資股市，就算股市平，我地都要長線先有效果，因為買股票就是買企業，企業成長需時。

因此，你這刻應中儲現金，然後把握樓市1、2年內有可能下跌的機會，作出置業動作。

3）好多人都著重「這刻的股價」，但這是錯誤的，如果我地明白企業價值的概念，就知這刻應該開心，你只是心理問題，並不是投資問題。

其實要克服心理因素，就要有「將來財富」的概念，我投資股票20年，久不久都會遇到一些大跌市，當時我都會持有有一定的股票，身家會縮水，當刻如果我好集中在「這刻的股價」「這刻的股價」，我都會唔開心。

不過，我每次都係著重「入貨的機會」，而唔理我原有的貨有無蝕錢。通常過一年後，身家都會大增。

當我經歷過幾次後，就會明白，如果我想之後的身家大升，就要這刻的身家縮水，這刻縮得愈勁，之後身家就會升得愈勁！

簡單來講，在大跌市，我唔理「之前買的股價蝕左」，只著重「這刻的入貨機會」，同時會心裡想，如果可以比我用更平的價入貨就好了（就算我已經持有這股並賬面上蝕緊），所以，我當刻反而希望跌更多！

4）同（3）的概念一樣，要長線。

5）如果不計你買樓的部分，你應該投資較多比例在股票，現金剩下3成已可。但如果你買樓，就另計。

------------------------------------------------

Q16160：

龔成老師 本人33 今年頭先發覺到理財的重要性
本人一家三口 只有我工作

月入四萬五 於屯門有一單位 市值六百萬 樓按三百四十萬 暫時自住

無儲蓄

想請問假如我按到盡加上屋企人幫幫手 一間開多間五百萬既出租是否好方法增加財富資產？

龔成老師：

這策略，有好有壞。

首先，你總負債會多左，風險會高左，如果你收入出現問題，風險就會好大，因為只有你一個工作。

當然，這會增加了你的資產項，長遠會對財富較有利，但要「供得起」，這是重點。因此，你要自己衡量。

整體來說，風險度是「中高」，如果樓市大跌到較平，值博率就會增加，這時才考慮會比較平衡。

反而這刻，集中儲蓄及投資股票，在負債上保持原有水平，風險度會較平衡。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。