有段時間，好似去到邊都仲聞到殘餘喺空氣嗰種催淚煙氣味。兩年過去，呢種令人眼水鼻涕直流、皮膚通紅灼熱嘅氣體終於消退，但呢兩年間香港人流嘅眼淚卻冇停止過，因為每日都有更荒謬、更令人絕望嘅事發生。 每次想放棄嘅時候，我都會聽返某次悼念周同學集會入面一個手足講嘅說話，嗰段說話令我覺得好被激勵。今日再睇一次，發現呢個社會好多野都已經改變咗；但我仍然好想同大家分享呢段說話（我特登錄低再逐隻字打返出來架，原文太長所以刪減咗）。希望可以帶少少力量俾同路人，記住我地唔係因為有希望先堅持，而係因為堅持先會有希望。 /大家好，我算係一個半前線嘅抗爭者，係一個基督徒抗爭者，我今日係懷着一個好沉重嘅心情同大家分享，分享我嘅感受、理念，同埋作為一個基督徒嘅睇法。 其實喺4月28號民陣反修例13萬人嗰次遊行呢，我已經開始參與呢個運動。喺100萬人一齊行啦、 200萬人一齊行啦、包圍立法會，各種遊行集會我都好盡力去參與；買裝備、貼文宣、派傳單、捐錢啦、上連登上twitter上fb推post啦⋯無論如何我都想為香港做啲事。尤其我作為一個爸爸，我想為我嘅小朋友創造一個更自由、更公義嘅社會，起碼佢日後長大之後，我可以好自豪咁同佢講，我有為佢嘅將來做過野架。喺5月到10月呢個期間，其實我見到呢場光復香港嘅運動，個能量巨大咁爆發。五大訴求確立，徹底實踐我地雨傘運動做唔到嘅不割𥱊、不分化嘅精神；上至老人家、中年，下至青年、幼童，我地一齊緊緊地團結。香港人再一次展示世界級嘅公民力量、質素 ，而且更加成功連結國際陣線。 或者我地幻想好快會勝利，我地好想喺煲底脫下面罩擁抱慶祝，但係林鄭政府嘅拖字訣，喺近月好似逐漸咁見效；港共政府冷血、麻木不仁嘅態度；警隊強暴同埋屠殺不斷升級，無數嘅人被黑警打傷：有手足失去雙眼、失去雙腿，有人被性侵犯，有人被強暴，有好多手足被跳海自殺、被跳樓自殺。直至琴日(9/11/2019)，離開咗我地嘅周同學⋯ 面對一個殺人嘅政權、殘暴可恥嘅警隊，極權嘅制度好似令我地感到害怕、感到疲累，士氣有點倒退。大家有冇開始諗想逃避呢個昏亂嘅社會， 開始想脫離連登想脫離tg，開始想返到去五個月前所謂嘅正常生活。宜家你地可以望下你地身邊嘅人，你睇下佢有冇疲累嘅眼光，係咪開始覺得攰喇？但你地甘唔甘心呀？我一定唔甘心，我一定要堅持落去，我地香港人係可以被擊倒，但唔可以被擊敗！ 我要提醒下大家嘅初心，就係團結我地一切嘅「五大訴求缺一不可」。或者有好多人問緊我地香港人究竟想要乜野呀？撤回惡法，撤回暴動定性，撤銷所有義士嘅控罪，成立獨立調查委員會追究警暴，落實真正嘅雙普選。正正係呢個五大訴求背後嘅價值座標，就係正正解釋咗我地點解要堅持落去。我地香港人追求嘅係社會制度嘅公平、資源分配嘅正義、法治精神嘅貫徹、政府治理嘅透明、人民參政嘅充份。今日香港人嗌破喉嚨，走上街頭，就係「五大訴求缺一不可」正正提醒我地唔會放棄，因為我地喺度捍衛緊我地應有嘅自由同公義！ 經過五個月密集式嘅行動，或者我地承認係一場持久戰、一場好漫長嘅持久戰已經進行緊。喺三權分立已經失效嘅社會，行政不仁、立法會不義、司法不公嘅時候，我地已經活緊喺一個軍政府嘅時代；但我地香港人從來沒有被擊敗。我地拒絕、我地精神上拒絕共產黨嘅統治合法性，我地唔會習慣暴政，我地一定會繼續保持憤怒，我地要堅持抗爭嘅初心。大家一定要記住，記住呢個抗爭嘅初心！所以喺呢個漫長嘅持久戰當中，我鼓勵大家將抗爭融入我地日常嘅生活：持之以恆參與所有嘅遊行集會；建立黃色經濟圈，杯葛任何中資背景嘅機構；紀念運動中重要嘅日子，同埋對香港民族重要嘅日子，將一直走來運動嘅歷史同所有義士嘅記憶，好好保存；成立各行各業嘅罷工工會；全民支持、支援被捕人士及佢地嘅屋企人，全民支持因政見而被解僱嘅手足，全民支持流亡海外嘅港人，全民支持全力抗爭嘅義士；有錢出錢，有力出力。每個人嘅支持都好重要。 而作為一個基督徒，我有咁嘅睇法：謀事在人，成事在神。作為基督徒，我地應該把眾人所求嘅事、所謀嘅事，交俾我地嘅上帝。耶和華同我地講：「我嘅意念非同你們嘅意念，我嘅道路非同你們嘅道路。天怎樣高過地，照樣，我嘅道路高過你們嘅道路，我嘅意念高過你們嘅意念。」 上帝喺人類嘅歷史運行佢嘅奇妙旨意同計劃，當暴政肆虐嘅時候，佢嘅手仍然牽引人類嘅歷史軌跡。上帝曾經帶領亞伯拉罕走入迦南地，上帝又引領過摩西同以色列人走出埃及，上帝又引領大衛嘅手戰勝巨人歌利亞。而今日，我相信上帝一定帶領香港人戰勝最邪惡嘅暴政！請大家保持憤怒，堅持信念，對香港嘅民族有信心，對上帝要有信心。 然後，我地將受傷嘅肢體交俾上帝去醫治，我地親自去求上帝安慰我地受傷嘅靈魂， 求主去擁抱離開我地嘅靈魂。喺以賽亞書41章裡面講到：「我們不用害怕，因為上帝與我們同在；不要驚惶，因為耶和華是我們的神。耶和華必堅固我們，上帝必幫助我們，上帝用祂的公義右手扶持我們。」痛苦唔會令我地消沉，悲傷唔會令到我地卻步，對佢地嘅記憶，我地會永永遠遠咁保存。佢地抗爭嘅道路走完喇，宜家輪到我地接手。我地應當剛強壯膽，將香港民族嘅意志承傳落去，咁樣先可以對得住佢地。 最後我想解釋點解我戴呢個V煞面具，係因為呢套電影有句講到:「面具之下只係一個血肉之軀，但係面具之下還有一個理念，就是信念不死，刀槍不入！」希望可以成為各位堅強、堅持嘅信念！