【彈地波點撲🙌🏻】

好多時彈地波係好多龍門嘅勊星。個波又快又要彈下彈下，即使企喺度接都有機會接得唔好甩手。要撲走就更加有難度🙈

好多時龍門輸彈地波除左球速快，而你個準備動作又準備得唔好，即係對腳釘死喺地下嗰啲。而彈地波嘅球速都會因應唔同場地及天氣有唔同，例如一啲舊嘅仿草場或者膠粒多嘅仿草地喺乾地嘅球速較慢。第二樣會影響到嘅係彈地角度。彈地角度越低 (低入射角），球速就會越快。假如入射角高，甚至接近垂直角度。球速當然慢，但要留意好多時比對方笠死，個波都係喺自己面前彈一下過埋頭就知道出事🙈多數彈地笠死就係錯路線預判🙌

所以第二個影響你嘅問題係預判彈地落點，多數龍門輸彈地波除左笠死或者甩手。最難救係要撲嘅彈地波。好多朋友輸呢類波係錯誤預判落點，個波8成都係喺係橫撲嘅時候喺手前彈高，之後高過你出手位置置，之後眼白白睇住入🙈其實係你要預判個波幾時會落地，先決定幾時撲。但好多朋友睇到個波射兩邊，下意識嘅自然反應會落地，而忽略左個波彈地嘅角度。

當射橫嘅時候就要靠你去橫移拉近撲波嘅距離，到個波彈起時先出手會比未落地就撲較易搵到接觸時間。就係靠個波岩岩彈地再彈起嗰一剎那就係最好嘅Timing。要搵到呢個Timing就一定靠練習。

至於撲彈地波單手定雙手，主點喺睇你同個波嘅距離，近身少少可以喺你撲緊嘅時候打開你嘅W手(又係基本功），個波彈起之後用W手接。而遠嘅波緊係用單手，會賺多一隻手掌位。如果飛撲嘅時候有錯判，你嘅top hand 都有機會幫手做修正。至於撲完入唔入就要睇你嘅角度、力量同運氣。

彈地波係難救，所以當撲彈地波嘅時候要多留意個波嘅落點，先容易搵得到出手嘅時機。當然時機係要透過練習去不停做修正。

如果有咩想版主拎出黎分享對邊類波嘅處理方法，都可以留個言。再搵個機會同大家一齊研究分析🙏🏻

#彈地波 #彈地波係龍門勊星 #睇準出手時機 #預判路線及落點 #守門員技術 #守門員訓練 #龍門訓練 #龍門技術 #守門員技術