【龔成問答信箱】（Q21921-21940）

Q21921：

老師，上完最後一堂，多謝你既分享同教導。

我follow左你個page好耐，但都係今年先開始認真學投資理財，以前以為只要儲錢叻就ok.

自問儲錢唔算差(當然無老師勁), 以前一個月揾一萬左右都儲到7至8000左右，因為細個開始就想收租退休

(大學個時我靠幫人補習都儲到10萬畢業)不過總係儲唔到大錢，次次一儲到一筆仔，就會係無厘頭既情況就會用左

直至認真睇投資書，認真睇致富心理先發現原來我方法算ok, 但心態唔好

老師，尋晚你話俾個終極目標自己，我好認同。收租退休都仲係我終極目標，但係依家學識要set short term goals

話說我買左樓，唔係最理想既，但都係我心水地方之一。新界藍籌屋苑，希望會係我第一間有既樓，之後會再換大啲/買多層收租，希望一步一步向目標前進。

多謝你過去8堂授課。雖然我未明得晒，不過都照報左進階班！希望可以學多啲野！

暫時我都只係做緊月供，見次次你講親既優質股都偏貴。同埋啱啱買完樓要少少時間回氣，差不多差左袋。

不過我會留意多啲股票市場，等自己既投資唔好集中晒係層樓度，雖然依家有mortgage link account, 但我諗揀啱股票既回報會更高，更快可以幫我買第二層樓然後開始收租。

Sor for 太長氣

龔成老師︰

其實你未掌握晒，係正常。但只要你努力溫書，再去實踐。好多你唔明的知識，就會慢慢變得明白。

因課堂教你們的，只是一些知識、技巧和經驗分享。你必需要去實踐，去累積經驗，我教的知識才會有用。

你現時投資想法，大致都正確。由於你財富組合，偏重係物業類。現時你應用新資金，先集中投資優質股。而你未對平貴太有把握前，可維持月供模式去做。

而第二個物業，你唔洗太急，最好隔長少少時間，先再考慮，以減低週期性價格風險。

至於進階班，其實你掌握到初班的7成知識，你就應該應付到。如果你覺得自己未到7成，你就在此期間，比心機溫，為進階班好好準備。

進階班見!

------------------------------------------------

Q21922：

你好啊，想請教下因為計劃緊買樓。

1. 你覺得應該放哂全部股票去比多啲首期好，定係留返部分股票唔放之後比少啲首期較好？

2. 另外，如果諗住可能半年-2年內買樓，係咪唔應該再做月供？

因為我同男朋友現時月供我：$5000 / 男朋友：$8000

龔成老師︰

1) 現時按息不高，我建議你借多D，空出來資金，用來投資增值，效益會較高。

而且，我地投資都會講求一個組合平衡性。如果你買樓，而要盡固股票，令成個財富組合，完全偏晒去一邊，其實係唔理想。

2) 要視乎你月供資金，係唔係需要用來置業。如果不用，你維持月供係無問題。

若要動用，你就要睇有多久，才會動用。若只有半年至1年，最好就不要月供，直接現金持有。

如果長少少，可以去到2年，你都可以維持月供。但選股上，就唔可以太進取，盈富(2800)係可以。

但比亞迪(1211)和小米(1810)這類潛力股，波動性太大，我唔建議。

另外，你可以考慮收息股，佢地增長力不高，但勝在股價波動較細，又有一定股息，都值得你考慮。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

------------------------------------------------

Q21923：

老師，我係你股票班學生，上年上你堂，真係獲益良多，感謝你一直既分享，同發放正能量，令我覺得自己都有機會做到。

但可惜我剛上完堂，婚姻出現問題，呢半年我經歷情緒問題，好想自己慢慢放下件事，好想向前行

想為自己打算，要靠自己係香港置業，決定自己生活，但睇過好多小單位，一個人供真係好吃力，供得樓黎，又無多餘錢投資，令我覺得無希望一樣。

睇住自己之前建立既股票組合，阿里同中煙都跌好多，而令到心情更差，好似已經努力存資金，但覺得唔會達到財務目標一樣，好灰心。

想多謝你的正能量分享，有時令我覺得仲有希望。另一方面我對唔住你，發生件事後，我無好好溫習，可能課程內容已經俾反晒老師你了。

但我呢排情緒好轉，我亦打算抽時間溫習，希望會pick up 反。感謝

龔成老師︰

每個人一生中，難免都會經歷一些人生起跌。在不順境時，會覺得做什麼事都很困難，有一種無形的無力感。

但你要明白，這個世界，唔會永遠只係給你不如意的事。就好似大雨過後，你是總會看得到晴朗的藍天一樣。

你可以給自己一個時間，去慢慢調整自己心情。有需要時，你可以尋找專業人士意見(如社工、醫生)。之後，你再調整投資和置業計劃都未遲。

中煙國際香港(6055)和阿里巴巴(9988)都有質素，中短期波動總會有，但佢地質素無明顯變差，你照長持有就可以。

月供方面，如果你係用我之前建議，你就照進行，就可以。

記住，你要先照顧好自已，才進一步去計劃其他的事。只要我地要按部就班，一步步去處理眼前問題，總會找到方向。

------------------------------------------------

Q21924：

龔成老師，我最近買了一些股票，比亞迪1211，恆大汽車708，中國平安2318，信義光能968，中芯國際981，工商1398，粵海270，這些股可以長期持有嗎？需要set止蝕嗎？

另想問問中國有贊8083有潛力嗎？想買黎長線投資，值博率高嗎？

另完美醫療最近兩日回了不少，現價8蚊左右可買入嗎？還是等待合理價4～6蚊再買？

VESYNC 2148我12蚊買，依家跌到10蚊想問需要止蝕嗎？佢係小家電龍頭，但由於之前有部份股權有禁售期，黎緊18號解禁，我怕會再大跌，請問需要止蝕嗎？但看佢基本面是強的，唔該哂。

補充一下買價︰

比亞迪1211：$171｛佔比10%｝
恆大汽車708：$36・35｛佔比10%}
中國平安2318 ：$83 ｛佔比20%}
信義光能968 ：$13・93｛佔比10%｝
中芯國際981：$24・75，｛佔比10%｝
工商1398：$5・02｛佔比20%｝
粵海270：$11・5 ｛佔比10%｝
阿里巴巴9988：$217・8 ｛佔比10%｝

龔成老師︰

這些股票都有質素，係一個偏向進取的組合。若你係年青至中年人士，這個組合係可以。

但比亞迪(1211)現價係貴，現貨可持有，但加注最少等到$135以下，才好考慮。

另外，恆大汽車(0708)雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。投資時，必需控制注碼，不能太大注。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

完美醫療(1830)現價依然唔平，你最好等佢有明顯回調，才慢慢小注儲貨。

VESYNC（2148）有少少潛力的。佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

業務不算差，發展有潛力，但企業規模始終較細，業務未穩定，整體都有風險。若你只係小注，持有無問題，但就要明白當中的風險。

至於解禁，解禁唔代表股東一定沽貨。而且與企業質素無關，你係唔應該考慮。

------------------------------------------------

Q21925：

龔sir, 最近我睇完你一篇關於現金貶值的文章，這樣

你讚不讚成加按物業去做投資，例如股票、基金或年金？

龔成老師︰

現金長線都只會係貶值，我地今天借錢，明天雖然要回歸還同等金額的現金，但當中價值，其實已經係貶值了。

在現時低息環境，加按物業去投資，係可以考慮。

但大前題係你有無個明確的投資目標，可以確保你有效運用這筆資金，去增值自己的財富。優質股、基金或年金都可以考慮。前2者，你可以比較翻個回報，邊個較理想。

而年金，由於本身回報唔算十分高，若按息增加，有機會令你賺取的息差收窄，甚至消失，你要明白這個風險。

之後，我地就要因應你年紀，去睇翻自己現時負債水平，係唔係適合再加重負債。

若你係30歲，總負債相對總資產去到90%，都可以。但若年紀較大，到50歲時，就最多只可以50%。

------------------------------------------------

Q21926：

龔sir. 我現有的股票組合ok嗎？

恒生 16.97%
中國銀行 4.08%
領展 26.87%
中國人壽 11.28%
港鐵公司 15.38%
阿里巴巴 14.93%
小米 10.49%

月供組合ok? 已供1年

盈富基金 53.14% ($4000)
恆地地產 21.99% ($1000)想停供，供左1年都未供到一手...
小米 21.99% ($1500)
香港電訊 2.88%(供左1個月停供左，因為你說要先增值才再現金流)

想放左恆基轉投2800，想利用沽左既錢每月加大供2800月供金額到5000元，龔sir，請問你的睇法，謝謝

龔成老師︰

先講現有持股，質素上係可以。以你41歲年紀計，都適合你。

中國人壽(2628)質素只算中等，不宜持有太多。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

但要留意，銀行業營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，盈富(2800)係不受此限，因為它是一個包含58間優質企業的基金，這些企業來自不同行業。因此，盈富(2800)就算在組合中佔較大比重，都唔會造成過度集中性風險。

你現時恆生(0011)、港鐵(0066)和領展(0823)係超標，但由於佢地都質素，因此你不用沽出，只要利用新資金，去慢慢拉翻平衡，咁就可以。

月供方面，無問題。如果你想集中供盈富(2800)係可以，但唔建議沽恆基(0012)現貨，因為此股係有質素，碎股唔應該係你持有一隻股票與否的考量。

現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q21927：

龔老師想請教一下，早前以26蚊入左2手 0241 阿里健康，今日跌到18蚊，請問如呢幾日以18蚊入番1至2手，呢隻股下半年，有無上升既潛力？

^_^感激不盡！

龔成老師︰

我地投資股票，其實等同投資一間企業。希望透過其自然增長，以達至財富增值的目的。

所以，我地投資一定係長線，而唔係短期炒賣，去賺差價。

阿里健康（0241）這是潛力股，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

我唔知道佢下半年會升定跌，但以長線潛力計，這股有投資價值。但由於不確定性較高，這類股只建議小注持有，但你預佢股價上落大。

若你資金非常充裕，就算再加1,2手，都只係佔你組合比重好少，否則不建議加注。

------------------------------------------------

Q21928：

龔sir, 你好！ 有問題想請教你意見，本人43歲，而家住緊一層已供完既未補地價居屋，先生剛剛又買了一層新樓大約明年底可收樓，之後打算住新屋。問題是我層居屋可以點處理好呢？

我唔會補地價放租，亦唔想冒險放租。咁樣應唔應該賣左層樓佢呢？

層樓大約可放到450萬左右，加上我有130萬現金，可否用500萬買一啲收息股來用作生活費。理想係有每月2萬5，我今年開始冇做野，家中無小朋友，先生亦都唔想我再工作。

新樓方面先生可以自己供無問題及支付到大家既生活費。先生亦提出話如果賣左層樓之後10年股票收入會唔會追唔到通脹？

如果真係賣樓轉買股票請問邊啲會合適？（是否銀行股和公用股好）麻煩龔sir比啲意見我呀。唔該晒你。

龔成老師︰

你個情況，比較複雜。我一般會建議，最好將空置物業放租，避免浪費了收取現金流機會。

但你不考慮去補地價放租，我建議可以的話，你們先住居屋。新樓則放租出去，用以租養樓的策略。變相，你先生每月都可以空出一些資金，去用作生活開支。

如果你地都係希望賣樓，去買收息股，都可以。只要你選擇的股票係有質素，長線必然係跑嬴通漲。

但由於收息股作用，主要係提供穏定現金流，去支援你生活開支。因此，你唔好預佢有明顯增長力，只會係收下股息而已。

若你希望每月有2.5萬蚊現金流，以股息率6%計，你需要本金500萬，故你賣樓後，資金係足夠的。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

現時大市只在合理區，你可以先用一半資金，慢慢咁分注入市。餘下就等大跌市，才出手入平貨。

但你要緊記，唔好太集中係個別企業或行業，成個組合要平衡。相同行業不可佔組合多於30%，而單一企業不要高過15%，否則會有過度集中性風險。

------------------------------------------------

Q21929：

龔成老師，你好。手上有幾隻股我列為灰色股，已持有好幾年，已經跌到一個點，現在想重組下，我應該放哂佢，還是那些可以繼續持有，搏翻身？希望你可以給我意見，萬分感謝

1）1165,順風潔能，均價1.3,持有30000股
2）1848,中國飛機，均價9， 持2000股
3）6136康達環保，均價1.75,持23000股
4）1668華南城，均價1.65,持14000股
5）1800 中交建，均價7持6000股
6）1186中鐵建，均價7.6,持3500股
7）665海通，均價3.7,持30000股

希望你能抽空看一下

龔成老師︰

順風清潔能源(1165)睇唔到有明顯投資價值，你最好係沽出。

康達環保（6136）質素好一般，長線建議你換至其他優質股，會對你較有利。

華南城（1668）、中交建(1800)、中鐵建(1186)、海通國際（0665）質素只算不過不失，這些股唔建議持有太多。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。

最大的風險來自佢高負債，佢業務原理是借錢，買飛機，再租出給飛機公司。

航空業不確定性較大，對佢有影響，加上佢利用槓杆，風險點都會有。不過，這只是中短期情況，長遠仍是不差的。

現貨可持有，但總投資注碼不能多。

我相信你投資，存在不少核心性問題，例如選股、定價、理財概念等等。

見你持有股票，不單係質素較弱，而且好多時都係買貴貨。你要明白，買股票就同買企業，你必需要了解企業架優勢，點賺錢、行情有無發展，財務狀況等。

唔好聽消息，或者只係知個號碼，就去投資。另外，你要學識點樣去做估值，點去定平貴。

唔好受大市氣氛，影響你判斷。大市好狂熱，人人買股票，你就要小心。因為個價好易被炒高晒，影響你長線回報。

在你再投資前，我建議你先睇我寫架《80後百萬富翁》、《財務自由行》和《股票勝經》，相信可以幫助到你，去認識正確的理財概念。

之後你再重新計劃，你往後投資之路。

------------------------------------------------

Q21930：

早晨龔成老師 我想問一問關於6666恆大物業 自從我係16.4入左4手之後就一直跌到依家 跌左差唔多一半

我買之前都有做功課見佢持現金比例都好高 賺錢能力又唔錯 見佢管理物業嘅面積都增加緊 但預計嚟到佢9.8配股 佢母公司3333恆大又出債務等壞消息

想請問老師對6666前景睇法點 現價算唔算平 同埋如果母公司出事對佢有幾大影響 唔該晒老師

龔成老師︰

恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

至於配售，暫時只係預測，而且2.7億佔已發行股數，係一個好少的比例，影響不大。我地投資與否，應集中翻係企業質素本身。

恆大(3333)和恒大物業（6666）是2間獨立公司，就算恆大(3333)出事，財務上都唔會直接影響到恒大物業（6666）。

但恒大物業（6666）不少收入，是來自母公司提供之物業。若母公司恆大(3333)出現債務問題，影響其物業發展速度，將有機會出現負面影響。

你買入價略貴，近期股價回調不少，但都只算係合理區頂部。若你持貨不多，可以守。但持貨較多，最好沽出部份，去平衡風險。

------------------------------------------------

Q21931：

老師，好鍾意你本新書，教左我一樣好重要的事，失敗係必然，有機會去錯係好事。。。。但我都想問一樣你無咁專的事，就係我到30歲先知自己過度活躍症加d亞斯保加。。。

越來越覺得自己好難打工，因為唔鍾意跟大隊，唔明老闆的暗示，無法一心二用，易得眾人，短期記憶差。。。。。。

但我睇野好通透，危急時好應變到，長期記憶好好，觀察力好強，數理好好，英文好＜＜＜其實都比較係這兩個病常見的特質

你所講那5條路，邊條你覺得我行好？

謝謝阿sir

龔成老師︰

首先，多謝你支持我的新書。

你的健康問題，可以先請教醫生意見。以我理解，係可以透過藥物和一些訓練去治療的。

至於5條路點選擇，其實好睇你個人意向、興趣和專長。你現時健康上的問題，我相信唔會明顯影響到你行任何一條路。

「經紀團隊」、「專家」你可試下。其實「生意」都可以，但你可以試左「經紀團隊」、「專家」先，在這兩個類別，有好多你這些無法明老板想甚麼的人，反而更成功。

其實，行這些路重點唔係你當下能力。而係你是否願意投放時間，將自己磨鍊成一位專家。

當中會經歷無數次失敗，你覺得自己有否能力堅持下去，才是成功與否的重點。

------------------------------------------------

Q21932：

龔sir，有財務上嘅嘢想你幫手分析

本人30歲，已婚，暫時未有子女，但將會計劃生小朋友，與太太收入共50k左右嘅穩定收入。

資產：

1）約100萬現金
2）60萬基金保險儲蓄
3）一隻價值約30萬手錶（非必要不會變賣）
4）一層300呎一房單位，價值500萬左右，位於新界元朗區，於2018年做9成按揭上會，月供15000左右

現時與太太居住於家人嘅住所，每個月會俾番$5000家人作租用

有2個問題：

1）我應該作出投資嗎？因為驚拎錢出嚟投資，將會有小朋友需要用錢時，擔心未能即時調動

2）我應唔應該賣咗現時擁有嘅物業，因為我想買番近少少自己現時住嘅地方，當初置業係一時衝動，現時想平手賣出現時物業，並以9成按揭買另一較大嘅物業。

龔sir，我應唔應該賣出現時嘅物業再買入另一較大，樓齡較舊嘅物業？求解答，好困擾

龔成老師︰

1) 現金長線只會一直貶值，不作投資，變相你的實際財富，其實一直在減少。當然，我地都要因應實際情況，去預留一些現金，作日常交易和應急之用。

所以，你要睇翻你自己人生規劃，去調整投資大計。若你短期內，例如1-2年就打算生小朋友，時間較短，故這部份資金，最好以現金儲起備用。

但餘下的資金，我建議你進行投資增值，咁會較好。

你現時財富組合，已經有物業類。將來投資，我會較建議用優質股進行增值，這樣財富組合平衡會較好。

以你30歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

大市現處於合理水平，那100萬資金(要先扣除，有需要預留的資金)，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

2) 至於換樓，你要先想清楚。因為香港買賣樓宇成本，其實唔細，一買一賣你當中會無左唔少錢。

作為自住樓，除非佢好唔適合你"長線"生活所需。或者投資價值好弱，否則我唔建議作出變動。

若你真係有實際需要，要轉換自住物業。你可以有2個方法，一個當然是沽出現貨，再換另一間。

另一個就係將而有物業放租，自己另租自住物業。這樣做，就可以保留你這個物業資產，同時也可以滿足你生活需要。

但大前題，係你這個物業要有投資價值，最少有能力跟大市同步，否則就無投資意義。

------------------------------------------------

Q21933：

你好，我買了2618（京東物流），現在我心態放寬，等盈富再跌，再入

京東9618 我也賺了少少時放了，把錢集中在剩下中

都是因為龔sir 建議，已留名你澳門班

龔成老師︰

京東物流（2618）都有質素的。

京東物流係中國領先的技術驅動的供應鏈解決方案及物流服務商。通過科技賦能提供全方位的覆蓋各個業務領域的供應鏈解決方案和優質物流服務，從倉儲到配送，從製造端到終端客戶，涵蓋普通和特殊物品。

根據一些調查報告，按總收入計，這企業係中國最大的一體化供應鏈物流服務商。

2018、2019 及 2020 年，京東物流營收分別為人民幣 379 億元、人民幣 498 億元和人民幣 734 億元。

京東物流於 2018、2019 及 2020 年產生的虧損淨額分別為人民幣 28 億元，人民幣 22 億元及人民幣 40 億元，不過，如果扣除一些非現金流的開支，又未算太差。

佢表示，上市集資所得，部分將用於升級和擴展該企業的物流網絡；部分將用於開發與供應鏈解決方案和物流服務相關的先進技術。

企業有優勢的，長遠發展正面，但中短期股價未必有好強的表現，這股都有投資價值，但現階段未必值得大額投資，小注投資係無問題。

至於沽出京東(9618)，若你係因為風險承受能力，而作出的調整，係可以。

但從財富增值角度，緊記優質股係一定要長線持有，才會有理想效果，唔好升少少就沽，目標要放遠少少。

希望疫情盡快受控，可以早點，可以回澳門跟大家見面，澳門班見!

------------------------------------------------

Q21934：

老師，買了你的書看，學到不少價值投資法。本身持有自住物業，打算月供股票計劃約行2年左右，我都比較保守，想上落較少+慢慢增長，以下組合可行嗎？

進行了約半年：

1）AIA $3000/月
2）HKEX $3000/月
3）建行 $3000/月

打算加：

4）新鴻基 或 領展 $3000/月

供完余下每月約$10000 cash flow作buffer，有其他投資推介嗎？

龔成老師︰

你現時打算月供的股票，都係有質素。當中港交所(0388)盈利較受大市波動影響，會係較高風險的一隻。但只要你長線持有，以上5隻都係無問題。

這個組合算係平穏增長型，若你係年青至中年人士，這個組合都係可以。

新地(0016)和領展(0823)都有質素，但增長潛力，領展會高少少。至於餘下$10000，我建議你先儲起，等大跌市機會，才出手掃平貨。

緊記月供係一個長線計劃，月供最少維持3年，並持有這些股票5年以上，才會有較理想效果。

你月供2年勉強都可以，但再優質的企業，都要時間去增長，所以你必需要用長線持有模式，去處理這些月供得來的股票，才會有好回報。

------------------------------------------------

Q21935：

龔sir你好，今次係第二次聯絡你，過去半年期間，我買晒你所有著作睇晒(除左買樓4部曲果本)，亦閱讀左好多巴菲特同凱恩斯講價值投資既書，叫做開始慢慢理解股票係乜野一回事

我背景今年34歲，月入只有約18k，加埋太太都係只有約30k，上年買左層6m新樓，月供約15k，今年年尾亦會多個新生命，本黎以為一世人就要供樓供到60歲退休，

但自從睇左龔sir既經歷同著作，我深深相信只要有無窮既意志力同不斷增加知識，一樣可以改變人生，就係呢團火令我將所有非必要既支出cut晒，

放工/放假亦搵多份part time增加收入去投資(雖然真係好攰)，所以我先多謝龔sir令我改變左人生態度!而我亦係呢幾個月開始建倉，詳情如下:

66@500 $45.75
175@1000 $24.75
270@2000 $13.16
1099@400 $17.7
1177@1000 $7.74

1928@400 $38.4
1972@200 $23.75
3067@200 $18.96
9988@100 $217.6

暫時仲有約$250k(全副身家)係morgate link

有幾個問題想請教龔sir:

1)你對我所持股票組合有無乜建議?如果我目標係以增長為主，有無邊隻應增持/減少?或加入邊隻股票?

2)現有組合算平衡嗎?

3)我理解龔sir所講，優質股如果股價下跌，反而有加注既機會，但有樣野唔明就係如果我買入一隻股後，股票從未跌穿買入價，咁應該如何去𧗾量加注與否呢?

因為對於資金唔多既小股民，如果只持有一兩手，財富增值一定有限，但如果高於買入價加注咪會拉低左回報囉?

4)我打算短期內最多只會動用多50k投入股票市場，因為要再增加收入/同儲蓄後先會再拎出黎投資，餘下200k就留低以備不時之需，

但現在是否未到時候?係咪應該留起呢50k，等大市有明顯回調先動用?

5)1810&1448我自己好想入，如果無貨幾錢入第一注好?還是起碼等到合理價先入貨?論增長力是否1810會比1448高?

再次多謝龔sir你改變左我人生觀!由於我現時做零售業，夾唔到時間上你堂，但我已決定過埋今年就轉工，希望到時可以夾到時間見到龔sir你真人

Thank you sir!

龔成老師︰

1) 你持有的股票都係有質素和增長力，是適合你的，你照持有就以。

2) 大致上都平衡，但留意一點，以你年紀，潛力股大約佔5成就好了。若你投資經驗較少，要再下調多1,2成。盡可能控制在這個範圍，以免組合中風險過高。

而且，你要隨著年紀增加，要慢慢將潛力股比重下調。去到50歲時，大約只宜佔2成。

3) 你要用買入價，作為入市標準。我地去制定入市策略時，應用企業平身估值平值，去做決定。只要在合理區，我地就可以有計畫地，慢慢分注入貨。但升越合理區，開始貴的時候，我地就要等時機。

若你可用注數不多，第一手是在合理區頂，我地另一注，最好等有較明顯回調，才出手。

若你注數較多，第一手是在合理區中間買入。但由於手上持貨不多，就算回升至合理區中上，你都可以再入小注，再增加持貨。

當然實際操作，我們除了可用注數外，都要考慮埋大市情況，此股質素和潛力等，去得出個最終方向。

你可以參考我<<股票勝經>> P.316-317 中的"金字塔式買入法"。我們分配資金模式，大致上就會用這個方法。

4) 這50K，我建議你儲起，因為現時大市只在合理區，不宜將全部可用資金入市。要留有部份，用來等大跌市機會。

5) 小米（1810）和福壽園（1448）都有好有質素的潛力股，增長潛力上，我會比小米高少少分數。

現價計，小米（1810）略貴，要回多1,2成才算合理。而福壽園（1448）算合理區頂至略貴，無貨先入一注都可以。

我的書本，只是給你一些投資知識、技巧和經驗。真正令你改變人生觀的，其實是你自己。

我有時都開星期六班，你可以留意。雖然你暫時夾唔到時間上堂，但唔好因為咁，就停左學習。要多睇財經新聞、年報、相關書籍，去提升自己技巧，長線投資才做得好，加油!

------------------------------------------------

Q21936：

龔成老師,你好: 上年才認識你, 開始爬文.

本人己是中年,現在份工已做了13年(有中年危機), 但一點都唔開心, 只是求生活, 月入3萬, 物業Mortage尚有300萬, 只有40-50萬現金,上年開始供股$4000 AIA & $4000 銀娛.

想請教:

1) 現在開始步會否太遲?

2) 如果想用儲蓄錢(40-50萬) 加碼在每月供股部份, 應該怎每月供幾多, 買邊隻比較安全?

3) 需要點做才有被動收入3萬達到財務自由?

每月可以儲多$2000現金

龔成老師︰

1) 現時起步雖然唔算係早，但只要你用正確方法和心態去投資增值，都可以做到一定效果出來。

2) 以中年人士而言，都有增值需要，但策略上要保守少少。你可以選擇一些「平穩增值股」，作為投資目標。

以現時大市合理區狀況，你手上50萬，我唔建議盡用。你大約可以20-25萬，分開3年，每個月加大$5500-7000去做月供。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

你可以從中選擇多2隻，更好方法，就是全數加入盈富(2800)，佢係包括55間質素不錯上市公司股票的組合，有助你平衡組合中的風險。到你有一定能力，才買其他我建議的股票。

餘下現金和每月多儲的$2000，就是等大跌市時才出手。如果你能在這段時間學好選股等技巧，到大跌市時就能把握機會，財富增值會更明顯。

3) 如果你希望每月有3萬蚊現金流，以股息率6%計，你需要本金600萬。

你要透過以上方法，去累積這筆資金。到有足夠數量時，就將佢換成收息資產，去創造現金流，支付你退休生活的開支。

我假設投資回報有10%（連股息再投資），你每月投資$10000 + 50萬本金，15年後大約會增值至590萬，故這樣安排相信很大機會達至你的財務自由目標。

------------------------------------------------

Q21937：

龔sir, 現為大學year3, 預計畢業後有20-25萬資產。暫為14萬資產，5萬由屋企人保管投資，2.5萬貴金屬， 4.7萬股票，其餘為現金。

今年內預計會再有5萬現金收入作為增長，暫時收入以補習教學為主，7-8、12為收入高峰。現為21歲，如果想5年內有100萬資產，應如何部署增加收入？

小妹在投資市場上曾入手港股1.06 元入手432及美股以64usd 入手Nio，而432已離開，仍手持nio, 但虧損波幅較大。

我可以承受中等風險的投資，但仍未搵到合適自己的投資組合

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時大學year3，相信是十分年青的年紀，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你應以增值為主。

貴金屬(如金銀、黃金)，主要係用來對沖突發性事件。佢本身唔會創造現金流，不宜持有太多。佔組合3%左右，其實就足夠，最好以實貨持有。

蔚來（nio）有質素的。佢係中國高端電動汽車市場運營，生產電動汽車，同時間佢發展緊自動駕駛，以及人工智慧等下一代技術的創新項目。

例如型號EP9、ES8、ES6、EC6，通過佢自己的銷售網路銷售汽車。長遠發展正面，前景就無問題，現貨可持有。

但你預佢之後的股價上落仍大，投資一定不能太大注。可長線的，注意風險。

盈大地產(0432)過去多年都出現虧損，加上負債不輕，睇唔倒佢有投資價值，不要再投資。

由於你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了。你相再保守點，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有25萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$8000 + 25萬本金，5年後大約會增值至100萬。你可以就著這個預算，去計劃你的理財方案。

當然，這個金額只係一個參考。你還很年青，負擔相對較少，應該盡力儲蓄去做增值，儲蓄比例最少要達至收入一半，才算理想。

------------------------------------------------

Q21938：

龔成老師你好，我今年32歲，月入$45,000，每月可儲$20,000至$30,000。

1. 目前持有股票：盈富基金2800 5000股@24.5、希慎興業0014 500股@29.5、粵海投資0270 2000股@12.08，以上是希望可以長揸收息。

2. 另外還持有：偉易達303 1300股@89.30、易大宗1733 12000股@0.78、中國銀行3988 20000股@3.29、碧桂園2007 10000股@14.57、明源雲909 1000股@60，

雖然部份都有息收，但股價一直上不回家鄉價，要不要考慮止蝕。

3. 現有$300,000現金，考慮再買入以下股票：金沙中國有限公司1928，國藥控股1099，阿里巴巴9988，銀河娛樂0027，京東集團9618，中國平安2318，

請問以上推介那一隻呢？建議買入價是多少？

麻煩晒

龔成老師︰

1) 你個財富增值概念，唔係太正確。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時32歲去計，應先做好增值部份，而唔係去諗點收息。你現時持有股票，其實都有一定增長力，係平穏增長股類，都適合你，你長線持有就可以。

2) 你唔好用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你上述持股有質素，但偉易達(0303)、中國銀行(3988)只係收息股，增長力好一般。碧桂園(2007)負債水平好高，風險唔細。

而明源雲(0909)不確定性較高，這4隻股票，你都不宜持有太多。

至於易大宗（1733），此股投資價值不高。最大的問題，就是核數師意見，過往多年都出現「保留意見」，反映核數師認為佢盤數「有古怪」，有些問題，這類股，沽出較好。

3) 這6隻股票，都係有質素的增長股，都適合你。阿里巴巴(9988)和京東集團(9618)偏向潛力股類型，風險會較高﹐故要控制注碼。

現時這些股票，都在合理區，現價可以入1注。但由於未算平，故資金不要盡用，最好多等每回調10-15%，才再考慮加注。

------------------------------------------------

Q21939：

成哥你好，想問下你隻1024快手，我330入，依家大概回到去204，見佢業績都麻麻，請問可唔可以長線持有，定升返d轉其他。

另外本身個組合想入返d實業類，蒙牛乳業同農夫山泉，想問下咩價位入比較合理。

謝謝你抽空幫忙。

龔成老師︰

快手（1024）係全球數一數二大的直播平台，絕對是一隻優質股，有獨特性，有客戶群，有潛力，長遠的發展力正面。這股有長線投資價值。

快手與業務夥伴合作提供了一系列產品和服務，於滿足平台上自然產生的多種需求。快手提供的產品和服務包括娛樂、線上營銷服務、電商、網絡遊戲、在線知識共享等。

快手科技已建立了穩定的用戶，在全球已佔據了重要的位置，企業有一定的優勢，以及獨特地位。加上用戶仍在快速增長，以及增長趨勢仍持續，預期有一定的發展。

雖然這刻盈利不多，甚至因加強發展業務而出現虧損，但這類股的分析特點是將來，等之後的收成期。

由於已擁有一定的優勢，以及仍增長中，企業要將用戶化成現金並不困難，只是時間問題，以及多少問題，預期2022年盈利模式已穩定，同時有一定的盈利。

簡單來說，企業有質素，有發展，你現貨可持有，但你預佢短期股仍會十分波動。

蒙牛乳業（2319）有質素。

佢於中國從事乳製品生產及經售業務，乃中國領先的乳製品生產商之一，以蒙牛為主要品牌提供多元化的產品，包括液體奶（乳飲料及酸奶）、冰淇淋及其他乳製品（如奶粉等）。

無論品牌、銷售網絡、發展，都不差，長遠正面。這股有長線投資價值，不過現價就唔算平，回翻10%先慢慢分注入，會較好。

農夫山泉（9633）有質素的。由於有一定的品牌價值，因此企業質素與發展正面，財務數據不差，生意與盈利都有理想增長。

不過上市不久，股價較波動，同時上市前數據可能執靚過，因此要注意風險度。現價合理區頂至略貴。

若想入貨，現價小注投資好了，這股適合長線的。

------------------------------------------------

Q21940：

您好龔成, 訂閱您Fb已多年, 以下有一問, 十分煩惱,未知閣下能否抽空賜教：

情況：媽有一個自住三房私人舊樓單位，樓齡32年, 估計如賣出約560萬。 因該樓舊需要夾錢換𨋢, 大約每戶比20萬, 暫時不知何時要付。

她已60+歲退休弄孫， 她除家用外無收入。我們３個子女現為搬出，但家姐租樓多年，有意和姊夫跟一細女回去同住，他們儲蓄20萬左右未夠錢買樓。

她有幾個選擇， 哪個是最好的財務安排?

１. 賣出，媽出首期比家姐買較新的樓， 家姐供樓 ，然後：

１Ａ： 4人（媽，姊，姊夫, 一細女即孫 ）同住, 可能繼續住元朗/轉去東涌/青衣。媽每月比少少租家姐當幫手供。或

１Ｂ： 自己另外買細單位自住，其餘投資／買股票做每月收入 （唧種可推薦給她這些退休人士而是比較高收入，低風險?）

3. 繼續自住, 家姐搬回, 每月給媽家用

或有其他選擇, 但現時未想到。

十分感謝！

龔成老師︰

其實係財務層面，這3個選項都係可以。反而我覺得，選擇邊個方法的重點，應該是你媽媽自己的想法。

因為香港一買一賣的成本較高，因此，未有明確目標前，（3）是較好。

當然，另外兩個方案其實都可考慮，最重要是你地成家人的意願，因為現時影響多人。進行（1）的方案時，要大家傾好各自的權益，清清楚楚是最重要，大家要「先小人，後君子」。

如果你媽媽，係想和你姐一家同住。若現有自住樓係配合到佢地長線生活所需，咁就可以。

除非有好大生活上問題，否則不建議換樓，因為香港買賣樓宇成本唔細，一來一回，會唔見好多錢。

若你媽媽不想同住，佢可以沽出現時物業，換一間較細自住屋。再將餘下資金，投資一些收息股，去為自己創造現金流，支援自己退休生活上的開支。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

現時大市只係合理水平，資金不宜盡用，你可以先將部份，以分注形式買入上述股票。餘下資金，就等大跌市出現，才加大力度掃貨。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21661-Q21680）

Q21661：

老師您好，本人已經第二次請問老師，十分感謝老師既無私指導；本人有閱讀唔同股票書本及購買老師既書，真係獲益良多，若老師繼續出新書，本人一定購買！

現本人再持續更新自己的投資計畫及就老師早期的建議及書本上的知識，望老師賜教!

背景：

本人28歲，月入大約3萬，能每月約儲1萬5。

現時有現金5萬和儲蓄保險(供5年，已供4年，每年5萬，即已供20萬，回報率由5.5%下跌至4.5%) ，現股票投資左約55萬，按老師的水桶模式投資法的方式，

手持股份共14種，詳細如下：

快速增值（潛力股）（成本：25萬）
1. 比亞廸（500股，39.3買入）
2. 小米（600股，11.8買入）
3. 比亞廸電子（1500股，38.79買入）
4. 贛鋒鋰業 （1000股，88.07買入）
5. 平安好醫生 （1000股，88.02買入）

平穩發展（增長股）（成本：18.8萬）
1. 恒基地產（3000股，29.87買入）
2. 盈富（1500股，24.87買入）
3. 金沙中國（800股，34.6買入）
4. 長江基建（1000股，36.64買入）
5. 安碩恒生科技（500股，16.81買入）

收息資產（收息股）（成本：11萬）
1. 中華煤氣（2050股，12.71買入）
2. 置富產業信託（6000股，8.61買入）
3. 中國飛機租賃（5000股，7.33買入）
4. 港燈（500股，7.95買入）

幸好，經細閱及留意老師的Facebook的建議，本人成功以低價買入比亞廸及小米，其他股票亦參考老師的書籍，

潛力股獲超過40%及增長股有25%增長（約等於20萬獲利），令本人的第一個一百萬的目標非常接近，十分開心。

提問：

1. 本人知道年紀算年輕，應大量投放於潛力股，請問比例可以為潛力股：增長股：收息股 = 7：2：1？這樣是否風險能夠分散嗎？

2. 持有14種股票是否過多嗎？如是，我應該賣出那些股票？

3. 比亞廸及小米分別於39.3及11.8超低價買入，相信現在無可能會再跌至我買入價，如我現再增持比亞廸及小米，咁我係咪等同放棄手上既利潤嗎？

定我應該發掘/ 增持其他潛力股如中國生物製藥（1177）/ 贛鋒鋰業（1772）/ 比亞廸電子（285）？

4. 如果我成功儲到一百萬，以我現在的收入，我是否應該沽出所有股票提現，做500萬按揭買樓嗎？本人計劃購買馬鞍山的二手樓宇的，可實現與男朋友同居的目標或將屋租出去？

龔成老師︰

1) 你現時比例，大致係可以。但留意中華煤氣(0003)和中國飛機租賃（1848）算是平穏增長股，而非收息股。

而收息股增長力較弱，唔建議你再加注。你主要投資在平穏增長股和潛力股，長線比例維持大約各5成就可以。

中國飛機租賃（1848）本身質素不算差，但又未到好好，主要原因是負債太高。佢利用高槓杆的模式，進行飛機租賃等業務。

其實佢業務有獨特性，在行內有規模，有長線投資價值。但投資注碼不能多。只能小注。

現時大市只係合理水平，現金佔比重大約3-5成。故新資金唔好盡用，要留有部份，等大跌市出現，才加大力度掃貨。

至於儲蓄保險，由於就快供完，你可以照供埋佢。但未來時間，你將資金集中係優質股，個效益相信會更好。

2) 以你組合金額計，有少少多，但這些股票都有質素，不用沽出。長線，你集中翻係10隻左右，咁就可以。

3) 表面上看來，你再入貨，會拉高左比亞廸(1211)及小米(1810)的平均價。但這2隻股票，都係好有質素，長線相信會繼續上升。

你本身的概念有錯，你停留在過往的買入價，而我地應該著重將來的增值。例如投入該資金後，怎樣為你組合帶來長遠的增長效果。

如果你手上持貨過少，反而會影響成個長線增值效果。因此，我地應以平均配置角度去考慮，只要現時價格合理，而你預定投入這些股票的資金，又未用盡，你係可以考慮加注。

但現時比亞廸(1211)及小米(1810)都係偏貴，前者要回到$135才算較合理，而後者最好等回多1,2成才考慮加小注。

當然，你講的另外3隻股票，都有投資價值。但只有中生(1177)勉強算係合理區頂，其餘都偏貴，相入貨要等等。

4) 如果你有實際自住需要，係可以考慮。但大前題，最好在置業同時，都留有一定優質股作增值，這樣才可以維持成個財富組合的平均性。

若你係為投資，以現時租金回報率計，值博率回投資股市咁高。因此，我唔建議你唔洗太急去置業。

除非你發現旬盤，租金回報率高，又有唔錯增長潛力，你才考慮出手。

------------------------------------------------

Q21662：

龔sir,你好！本人今年36歲，與媽媽及11歲兒子住綠表公屋，為家中經濟之柱。每月收入$22000，剛好夠生活上各項開支，沒有多餘錢儲蓄。

本人家庭有兩個物業，一個是自住綠表公屋，每月供$13000，還欠按揭$190萬，還餘14年，市值$300萬。

另一市區唐樓劏房單位，於數年前花$50萬裝修，每月供$9000，還欠按揭$120萬，還餘13年，市值$700萬。劏房單位共約收租$21000，差不多夠供兩物業的按揭。

本人多年來積極理財創富，為退休作準備。但現在流動資金不足，生活上有點壓力，加上又有負債要清還。

持股 939@20000股，3@4000股，700@100，3690@200。股票加現金約$30萬。另有40萬負債要清還。

兩物業都不能加按，每月只夠開支，請問我可以如何處理目前的財務問題(不想賣樓，因供完後，收租足夠退休生活。)懇請賜教！

龔成老師︰

你現時物業不用沽出，因為一間係自住樓，另一間租金回報率都理想，可長線持有。

但你現時財富組合，已經好偏重係物業。所以係累積財富時候，我地會優先投入係其他資產類，例如優質股，以免太集中單一資產，而造成風險。

你現時持股票，都係優質股。但建行(0939)增長力較弱，主要係收下息。以你年紀，應以增值為主，先去累積一筆財富。

你可以將部份建行(0939)沽出，換碼至以下有增長力之股票，並長線持有。

另外，你現時生活只處於收支平衡，唔係咁理想。你要審視翻自己開支，有無一些不必要部份，盡力去刪減。同時間，你睇下有無一些兼職、網上小生意等，去提升收入。

最終目標，每月能空出一定資金，去月供上述有增長力的股票。

而負債，你要睇翻佢利率高唔高，如果較高，就應先清還，才開始投資計劃，會較理想。

------------------------------------------------

Q21663：

龔sir, 你好。本人現在正上緊你的股票班，想好好學習股票投資，但是我有一個買樓上的問題想請教你。

我犯了一個錯誤，我在2019年高位時買入筲箕灣新樓，現在市價已經下跌了多過10%。

我現在供樓上沒有問題，樓是自住的，但是看到筲箕灣升值潛力不大，租值亦不算高，想請教未來應該如何部署？

是否應該等平手才考慮賣出而再投資其他升值潛力較好物業？買樓有需要止蝕嗎？謝謝！

龔成老師︰

香港島的物業，始終都有一定投資價值，因為長線供應相對較少。

筲箕灣其實不差的，但新樓一般有溢價，因此較易出現樓價下跌的情況。

你現時的物業，持有就得，問題唔算大的。

同埋，這個物業是你自住樓，所以你只要供得起，咁就可以。

由於你成個財富組合，已經有物業類，相信佢佔你成個組合，都會係一個較大比重。

所以，你再有新資金，應先考慮其他優質資產，好似優質股類，避免太集中單一資產，而造成過度集中風險。

------------------------------------------------

Q21664：

Hello 龔先生，本人見最近一直跌市，買了以下股票，請問是否應該放左先，先止蝕。。還是一直keep 住，因有啲股票已跌穿很多。謝謝你

股票號加買入價：

2638 $7.61 （500股）
2800 $28.44 (2500股）
700 $618.4 (500股）
1972 $23.1 (400股）
1398 $5.33 (4000股）

388 $435 （應在什麼價格再入市較適合呢）
1810 $24.75 (400股）
3067 $17.12 (300股）
3088 $10.34 (200股）
9988 $222.7 (200股）

3690 $290.17 (200股）
1211 $157 (500股）

見中國股一直下滑，在以上的股票，我有需要先離場嘛，很多都跌很多了，求指教

龔成老師︰

唔好受大市氣氛影響，同埋唔好將個焦點，放左係買入價，或者帳面賺虧身上。

你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

你現時持有股票，都係有質素，不用理會這些中短期波動，可長線持有就可以。

但有個較大問題，就係你現時股票，潛力股佔左大多數(0700, 0388, 1810, 3067, 3088, 9988, 3690, 1211)。

這類股票，增長潛力高，但同時間波動性都較大。若你係年青人至中年，可以佔最多5成。但若你偏年長少少、投資經驗較弱，比重要再向下調。

未來時間，你要慢慢調節翻個組合比重，令潛力股比重重回正常水。你可以唔一定要沽持股，用新資金去令成個組合平衡翻就可以。

港交所(0388)現價都仲係有D貴，最少回多1,2成，先考慮加注。

------------------------------------------------

Q21665：

龔sir, 你好

1) 我今年25歲，由中學畢業已開始做freelance、投資及工作存錢，現存股票及現金大約存到400K

打算在30-33歲置業，距離現時有5-8年投資時期，想問如在現價，將大部分股票及現金投資3067或吉利可行嗎?

2) 另外個人工作問題想請教一下，現時人生有兩份工作選擇 工作A為現時工作，月薪約4-5萬，比較難有大的升幅。

工作B為新的工作機會，月薪始約3萬，穩定的政府工。 工作B到35歲先會回到月薪4萬，40歲大約5萬元，45歲6萬元，大約最多可到退休前升至9-10萬。

B的強積金亦較A多，但發展機會不大，個人覺得十分難選擇，希望能分享小小建議，謝謝 感激不盡!!!

龔成老師︰

1) 這2隻股票，都有質素。吉利(0175)現價算合理區中上，而安碩恒生科技(3067)則在合理區上部，現價都可以先首注。

但我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你25歲，建議你用「平穏增長股」 + 「潛力股」作組合。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

現時大市只在合理區，現金和股票應各佔一半。餘下一半現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

2) 單從薪金長線升幅去計，工作B會係較好選擇。但每個人人生目標，都不一樣。有人希望安穏收人工，有人希望工作有突破。

雖然工作A人工較少，但長線能在工作A中，學到一些有用技能或經驗，令你能增升到另一個層，其實你可以選工作A。

當然，這個世界並不只有工作A和工作B。你要認清自己去向，放自己在一條合適的跑道。就算而一刻可能人工較少，但可以累積經驗，令你將來工作或者事業有更大發展，我地都應該要考慮。

總之，你要先了解自己長線目標，未來5年、10年、20年係想過點樣的日子，才計劃今天的路，該如何走。

------------------------------------------------

Q21666：

龔Sir你好！先交代下背景，我26歲，最近一年收入減至約$15000-20000，暫時無經濟負擔，每月可草$10000，希望滾大資金今年年底開始做生意及將來置業。

2019年中，我由約15萬本金開始投資，之前從股市中賺了約20萬，加上每月儲蓄，2021年年頭時資產約50萬，但最近3個月帳面蝕了接近10萬，我有d唔知點算好。

我留意了你專頁一段時間，見你話要控制現金比例，慢慢分注入市，但我今年2、3月時入市太心急了，在比較貴的時候入了很多貨，去得太盡，

留的現金不多，希望老師比下意見我，現時應該止蝕減持還是可以繼續長線持有？

現時持有：

9988阿里巴巴 $250 x 200股
1810小米 $26.8 x 800股
3067安碩 $17.85 x 3200股
6862 海底撈 $59 x 1000股

1579 頤海 $90.6 x 2000股
520呷哺呷哺 $15 x 3500股
1858 春立醫療 $53 x 500股

持有現金：約5-8萬

另外，最近我亦心郁郁想入285/3690作長線持有，我應該點分配同安排呢？

謝謝！

龔成老師︰

首先，你年底要開始新生意，由於時間太短，不宜投資。這部份所需資金，要先扣起，才開始投資計劃。

現時大市只在合理，最理想係現金和股票比例，大約各一半。

雖然你現時股票比例較多，而且有部份出現帳面虧損，但唔代表一定要沽貨。

我地持有一隻股票與否，應用其質素作考慮。如果質素係無變，依然優質，就算中短期出現股價波動，我地都唔洗太在意，長線持有就可以。

你現時有股票，都有長線投資價值，照持有就可以。春立醫療(1858)這股不確定較高，不宜有太多，暫時不要再加注。

比亞迪電子（0285）質素不差的，有潛力。睇佢過往發展都正面，有技術，而前景都唔錯。

考慮到近期的增長，現價算係合理區頂部，可小注。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，之前明顯貴，之後回翻好少少，大約合理區頂。若投資，一定不能大注。小小注，是較好的做法。

但你成個組合，有一個較大問題，就係你全部都係潛力股。佢雖然有增長潛力，同時風險都較高，不宜持有過多。

你算年青，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你要加大翻平穏增長股部份，令組合更平衡。

------------------------------------------------

Q21667：

你好啊,阿sir，我曾經上過你堂，亦都關注你既fb好耐。但最近實在係忍唔住，有個問題好困擾我。

我今年32歲，穩定工作都係得兩萬一個月。大約得廿幾萬股票，有十幾萬現金

我家人話人地個仔買到樓有出色，有大志，有骨氣。為左各式各樣事情，為左佢既面子問題，日嘈夜嘈，唔知係米我心裡質素既問題，我真係覺得好難受。

我依家諗緊好唔好賣走哂d股票再同我家姐買樓？但我本身積蓄又唔多，人工又唔高，依家股市又跌緊，我真係好迷茫。

龔成老師︰

首先，每個人的人生規劃和價值觀都不同，所以唔需要同人地去比較，最重要係盡最大努力，做好自己。

你是一個成年人，成件事要用獨立思考，去理性分析，唔好過份受別人影響，因為只有你自己，才最清楚自己目標和個人能力。

講翻你現況，如果你無客觀置業需要(例如要結婚，需要一個屬於自己家庭的生活空間。)，我地就用投資角度，去分析而件事。

首先，你現有資金不多，現時香港整體樓價唔平，租金回報率唔算吸引。所以，投資在優質股，相對值博率會較高。

如果你有自住需要，長遠可考慮買樓，先買細價樓先，但你如果與家人合資買樓，要好小心，因為日後總會出現麻煩事。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時30歲去計，可用「平穏增長股」和「潛力股」，去創造一個增值平台。建議你用每月5成儲蓄，其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有十幾萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定金額、有生活需要，或者樓市值博率開始吸引，你才再考慮樓市部份，咁會較為穏當。

------------------------------------------------

Q21668：

龔sir，必瘦站甘高利潤行業，而業務簡單，我覺得之後會好大競爭。

但我諗唔到必瘦站護城河在那裏，怎樣去在內地競爭，按理護城河應該系品牌，但佢品牌又唔覺有咩好口碑。

龔sir認為佢既護城河在那？

我之前4蚊入左10萬股，覺得roe好高，業務又簡單。

龔成老師：

其實佢旗下有好多過品牌，同埋都算儲多一定的客戶群，當客戶用開佢的產品，而又覺得不差，就會一直用，這是好多美容都有的模式。

佢已經建立左一個唔差的營運模式及網絡，要打進都不是絕對容易。

另外，佢有不少較新的美容儀器，這是較細公司未必有資源做到的。即是在某些產品上，其實有優勢的，這是中小型公司無的。你長線持有就得。

------------------------------------------------

Q21669：

老師你好，我係你學生，聽完你堂絕對認同你嘅理念，本人現50歲對投資完全不懂，現只有一層已供完樓，每月可動用4萬作投資以部署60歳退休，

想以月供股票形式供股，但手續費都吾平，請問有什麼方法可以再減低成本？1928、2388、0012、0066、0388以上股票如供.股的話，如何分配比例？？

多謝老師

龔成老師︰

你現時已有一個物業，係財富增值角度，未來資金，我地應集中翻係股票身上，去令成個財富組合更平衡。

以你50歲年齡，其實已開始為退休做準備，但同時，財富仍有增長力（但不是進取）。

由於你對投資完全不懂，對價值點定平貴，未必太了解。我建議你先利用月供模式，去建立一個股票組合。雖然成本較高，但可以減低買貴貨風險。

當然，你一手手買都可以做到月供效果，只要你現金平均地慢慢入市(如保持住每月定額買一手)就可以。2個方法都可以，一手手買更節省了銀行月供收費，但你必需確保自已可以有自律性地進行。

假設你用月供，你每月可以先用一半資金，即係$20000。其餘就先儲起，去等大跌市機會。

比例上，可以每隻佔20%。但就隨著年齡增加，你要慢慢加入一些收息股，去令組合更平穏。到退休時，收息股應佔全組合的100%。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21670：

龔sir, 你好我係股票新手，看了你的教學片一段時間，未睇你的教學前買入的股票都係跌得好多，一路唔敢放，但一直冇升返，甚至繼續跌，

剛睇完你最新的片提到劣質股票應該賣出，不知可否給我一點意見？

以下這些是劣質股嗎？請問我應繼續持有，等回升再放出，還是止蝕較合理？謝謝你寶貴的意見

以下是我持有的股票：持股量不多

00410 ， 買入價$3.81
01382，買入價6.12
02007，買入價17.6
00005，買入價63.7

龔成老師︰

ＳＯＨＯ中國（0410）集團主要從事投資房地產開發、物業租賃和物業經營。

這企業過往生意增長力不強，同時無乜錢賺，如果扣除了投資物業重估因素，見佢有時出現虧損。投資價值不高，可考慮沽出。

互太紡織（1382）這股不差的。佢主要從事紡織產品之製造及貿易。

佢與主要品牌擁有人如Ｃａｌｖｉｎ　Ｋｌｅｉｎ、Ｌｉｚ　Ｃｌａｉｂｏｒｎｅ、Ｍａｉｄｅｎｆｏｒｍ、

馬莎、黛安芬、ＵＮＩＱＬＯ、ＶＦ　Ｉｎｔｉｍａｔｅｓ及Ｖｉｃｔｏｒｉａ’ｓ　Ｓｅｃｒｅｔ。

以及中國著名品牌如安踏體育與愛慕已建立了緊密而長期的關係，令集團能夠獲得穩定之購買訂單。

佢成品包括超過５０００款設計及規格，並暢銷世界各地，出品布料廣泛應用於各類紡織品，而成衣包括男裝、女裝、童裝、運動服、泳衣及內衣。

業務穩定，但增長力不高。這股可以作為收息股，但就唔好對股價有太大期望。

碧桂園(2007)，業務都算不差，但負債高，風險略高。由於你現時只係小注，持有係可以，但唔好再加注。

匯控(0005)質素比過往減少左，但不是無質素，但你預佢只係收息，唔會有太高增長力。

------------------------------------------------

Q21671：

Dear 龔成老師！本人今年约50歲，巳有一物業约6百萬已冇按揭，收緊租金，及约有股票200萬左右，現金不多。

我仍和家人居住，但想找多点空間。現仍在職，每月收入约萬零蚊。如想退休，現在是否可行？

or 待多少年才可達到財務自由呢？ many thanks

龔成老師︰

其實要睇你本身，對退休生活的要求。

由於你已有住居所，自住部份已經無問題。另外，你有一層收租樓，為你提供穏定現金流，可以支援退休生活上開支。

若你現時即時退休，你可以這200萬換成收息股，以6%股息率計，你每月就可以從這200萬收息股中，獲得1萬現金流。

如果這1萬，再加上你租金收入，係足夠支持你生活，基本上你已算是財務自由。

若你覺得未足夠，我地可以用這些股票，去繼續增值。我假設投資回報有10%（連股息再投資），10年後大約會增值至500萬。

同樣，我地將這500萬換成收息股，以6%股息率計，你每月就可以從這500萬收息股中，現在可以獲得2.5萬現金流。

如果你希望搬出自住，可能你需要收回放租單位，那你就要扣除收租部份收入，去計算你財務自由時間表。

你可以用以上方法，審視一下你退休方向，從而對投資計劃作出調整。

------------------------------------------------

Q21672：

龔Sir，你好！ 我是你去年九月投資班的學生。 想請教，騰訊已在$600以下， 我已留意這隻股票一段時間，

我用你提供的價值網去分析， 安全邊際以去到合理， 股價的中位數是大約$580，低位是$540。問題是中央政府的政策長遠會否令到騰訊難以發展。

現在是否合適時候購入？ 還是分段購入或者其他策略？ 謝謝回覆！

龔成老師︰

近期不少中央政策，都反映大型企業，可能面對內地監管進一步收緊，因此風險度增加左。

不過，我相信長線對騰訊(0700)影響唔會太大。內地政府不是不想佢賺錢，只是想規管佢。

佢已建立好完整的賺錢模式，加上大數據資料支持，長線發展係正面。但由於現時監管多左，你預都可能影響少少賺錢能力。

現價算係合理區頂部，無貨可先小注，其長線持有。或者你想穏陣D，用月供去儲貨，都係可以。

------------------------------------------------

Q21673：

龔Sir 你好,我是股票班學生, 剛上完第二課, 獲益良多, 聽完你對銀娛比對澳博既地段的長遠發展後, 我有以下想請教:

我看過你三本80後投資, 當中談及買樓最重要是地段, 地段, 再地段, 而香港買樓, 地段大家都知道是港島, 九龍市區, 啟徳發展區之類, 價格亦非常高,

但我套用到銀娛的理論, 現時東涌樓會不會是有濳力升值的地段? 東涌或屯門值得投資樓市？還是都是以高尺價買回一般人所共知的市區樓? 例如以大概500-600萬的預算。謝謝老師

龔成老師：

東涌的確有很多地發展，但你都要明白，最核心的區域，很難有太大改變，中環是核心商業區，九龍是第二個核心商業區，當中的發展及配套十分成熟，要取代根本很難。

最多只是，日後明日大嶼的發展，政府表平將會是香港第三個核心商業區，如果這計劃落實，東涌及屯門，的確會受惠，但你都要明白，當發展商業地的概念，配套成熟可分重要，這比起旅遊因素更加重要，加上澳門本身好細（澳門整個地方，也不及香港島的大小），地域因素始終較少。

而香港，當從事商業活動，就要考慮更多因素，商業活動往來，以及考慮人們近工因素，客戶等因素。

另外，東涌的供應始終較多，因此在整體的投資價值上，只是中等。

------------------------------------------------

Q21674：

龔sir,你好~有些關於事業上的事想問下你的意見
是這樣的~

現職工作自從上級離職後，工作量變得十分繁忙，亦十分吃力。

工作上又要兼做上司的工作，又要做本身的工作。身體亦出現了壓力大的徵狀例如:心口痛，個人比較想休息，調理身體

你覺得係呢個經濟環境，祼辭會不會很不智?另，如果裸辭後在家，家人很難相處，與家人相處不來，會否覺得兩頭唔到岸?如果你係我，你會點選擇呢?

龔成老師：

最好當然是找到另一份工作，先決定辭職，這是較穩健的方法。

另外，你亦可以在這刻，同步發展副業，利用放工等時間，當見到副業有發展時，就辭職。

當然，如果你本身已儲左一定的資金，而你身體開始支持不到現時的工作，就可以考慮辭工，休息一段時間，尋找自己發展方向，再出發。

------------------------------------------------

Q21675：

Hello 老師你好，我一路有留意你既專頁 不過投資上仲係新手，想請教老師我黎緊既儲蓄同投資方向

我宜家30歲, 月入大約$23,000, 家用$5,500,
出年有機會買樓同結婚 未知會唔會生小朋友 不過買樓會由男友支付 結婚亦無須洗費 但想保留部分資金作日常及將來生活洗費

以下係現有股票既平均買入價, 另外有現金100萬, 希望將來可以有機會自己有能力買樓收租,

請問老師以下股票係咪可以繼續持有，同埋點樣既投資/儲蓄既策略，可以令我既資產有所增值（月供股票較好？），謝謝

已有股票：
0002 $74.1@500
00012 $33.6@1000
00388 $539@200
02388 $21.3@500
02800 $26.95@1500
03067 $19.82@100
09988 $259.56@200

龔成老師：

如果買樓等支出，都會由男友處理，你現時的資金，就可以集中在財富增值，雖然你打算日後買樓收租，但這動作不用急，第一，你資金不算多，第二，你男友方面會買樓，如果以你地作為一個整體去考慮，你地不用太急同時買兩層樓，可以買完第一層樓後，隔多5-8年才買第二層，會比較好。

因為能有效平衡經濟週期、樓市週期等風險。

因此，你這刻可以好好利用這段時間，去進行財富增值，現金$100萬都可以部分投資股票，提升財富增長率。

現時的股票，有質素的，你可以長期持有。

至於現在的$100萬，你暫時可動用$30萬，分注投資股票，餘下資金再等機會（如果不懂分注買入，或無信心，就月供）。同時，你可以將每月儲到的現金，例如$10000，月供股票。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21676：

龔sir，感謝你的回覆。我屬於可以承受較高風險嘅類型，想計劃將每月儲蓄的$8000作以下 月供：

0066 （$3000）
2800 （$2000）

餘下$3000月供1830 或3067 又是否合適？

比亞迪近期回調咗好多，心思思想再入貨，而家$145係咪好時機？

等我8月出約滿酬金後，就會報讀你嘅基礎班課程呀，到時會唔會繼續有優惠價呢？

龔成老師︰

以你50歲計，用$3000去供安碩恒生科技（3067），都勉強可以。但你要明白，這類潛力股風險較高，當你越近退休之年，比重就要慢慢下調，去做平衡。

而必瘦站（1830）長遠有發展，本身有一定的質素。但本質上較波動，無貨可以接近$4時，開始小注，但月供就唔係咁建議。

比亞迪(1211)近期回左唔少，現價可以月供，但直接買的話，最好等到$120才開始。

另外，由於佢同3067一樣，都係潛力股。以你年紀，潛力股最多佔組合2成左右，就好了。

現時大市只在合理區，資金唔好盡用。最好留有部份，等大跌市出現時，可以用來掃貨。

至於股價班（基礎班），現時造緊優惠價$8800，相信今年都會有這優惠的，放心。

------------------------------------------------

Q21677：

你好龔成老師，本人30歲，每月收入大概$16000，現金流有20餘萬，每月儲$5000，手持30餘萬股票如下：

941中國移動：1500股@49.7
1211比亞迪：1000股@157.1
1343偉源：[email protected]
2318中國平安：1000股@85.5
6622兆科眼科：2000股14.7

我想問一下價格是否都不合理？

我想入手27銀娛，這樣組合是否適合我年齡？

持有以上或加持，想35歲能夠達成100萬的目標是否做到？感謝

龔成老師︰

你現時持股，大部份都係有質素，買入價太致都可以，你可長線持有，但要留意以下3隻。

中國移動(0941)有質素，但只係收息股，增長力唔會好高。而你係偏年青，應先做好增值部份，因此此股不要持有太多。

兆科眼科（6622）係一間眼科製藥公司，致力於療法的研究、開發及商業化。

由於未有盈利，風險度會較高，加上企業規模不大，因此投資值博率未算高。

當然，由於規模不算好大，若果企業之後成功，可以好勁，但失敗對股價都有很大影響，因此是有潛力，有風險類。

只可以話，這類股，唔建議大注。你現時小注投資下好了，不要加注，同時要明白當中的風險。

特別要留意的，就是偉源控股（1343）。這類股票要十分小心！過往股價曾經極高！

過往5年，生意都無特別增長，中期業績更生意下跌，並出現虧損。

這股在過往，一年盈利只有幾百萬坡元，一年盈利平均只有波幣$3000萬，佢增長力一般，從事建築工程等業務，這類股一向估值都不太高，市盈率可能只有8-10倍。

過往曾被推高至近市值$40億！超誇張的價！

加上這股上市年期不久，上市時市值細，這是無原因之下上升，與之前的問題類股玩法一樣，小心！

現時市值$1億、$2億，表面唔貴，但這類股，根本對小股東不利！投資價值當然不高！

銀娛(0027)是平穏增長股，適合你年紀，現價合理，可分注或月供儲貨。

我假設投資回報有10%（連股息再投資），你每月投資$5000 + 現有資產50萬(現金和持股)，5年後大約會增值至110萬，故這樣安排相信很大機會達至你的財務目標。

但大前題係，你要做好月供，和好好整理好股票組合。質素差的，要換走。再加入一些合適又有增長力的優質股(以下股票，都適合你，可以參考下。)，才會較大機會做到。

另外現時大市只在合理區，20萬現金唔洗急住入市，可以等大市有明顯回調，才出手，並長線持有。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

------------------------------------------------

Q21678：

成哥，今次有一個腦袋急轉問題，我而家巴士司機工作十年了，如一日，好想離職，而家進修 英文程度小三，

以前唔讀書今年35歲了，股票投資美股，$60 萬。$20 萬現金。$10 萬比特幣，前路忘忘，求指點

龔成老師︰

當你覺得對現時生活不滿，落實行動去改變，係一件好事。

除了進修外，你可以再想清楚，你希望未來5年、10年、20年係過怎麼樣的生活。如果你想過這種生活，具體你要點做，才去有效率地重點做好準備。

其實你可以嘗試做小生意，一開始不要投入太多資金，慢慢成功先加大投入。

投資方面，以你35歲，投資應以增值為主。美股都有不少優質股票，你可以睇翻佢地質素，同增值潛力，去決定是否持有。

而20萬現金，你可以先儲起，等大跌市時，才出手入平貨。

至於虛擬貨幣，我不是這方面的專家，所以我太大意見。

以本質來說，這是人為創造出來的，絕對不是「資產」，有沒有真正的價值，如何定義真正的價值，未知。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

------------------------------------------------

Q21679：

老師，我係學生黎，因為最近我做緊一份功課，係關於小米股票，我唔係咁明點計算佢地流動比率，速動比率. 感謝老師

龔成老師︰

流動比率 = 流動資產 / 流動負債

流動比率︰主要用於分析短期償債能力的高低

速動比率 = 流動資產(但要扣除埋"存貨"部份) / 流動負債，

速動比率︰是比流動比率更嚴謹的要求，主要用於分析企業持有可用作償債的高流動性資產。

這些數字，你可以在年報中找到。你唔肯定自己計算指標是否正確，可以到一些財經網站(例如中銀網)，可以找到這些指標，來比對自己計算結果。

------------------------------------------------

Q21680：

老師，我每月七除八扣只可儲到$3000,目前成副身家得廿幾萬，持股狀況如下：

003。 32%
066。 21%
1810。 8%
3067。 5%

可用現金60000。 34%

應該如何好好分配同調整以上資金比例呢？

龔成老師︰

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

（而這個%，是建基於股票組合上，並不是整個財富組合上，例如持有股票值$100萬，單一股票最多$15萬）。

你現時持股都有質素，適合年青至中年人士。但你個別股票，好似煤氣(0003)、港鐵(0066)都佔比過重，令風險過高。

你可以沽出部份，換至其他優質股。或者透過新資金，去慢慢平衡翻個比重，都可以。

現時大市只在合理區，餘下現金我地就等機會，有大跌市，才出手入貨。

另外，你要努力審視翻個開支，有無地方可以改善。盡力空出更多資金，去提升財富增長力。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20961-Q20980）

Q20961：

老師你好我買咗你 50優質潛力股 同 80後3本 給我很多啟發 要為將來打算不可以盲目追求短線利益

我本身有兩個小朋友單親家庭
幸運的是不用交租 但每月儲蓄不多
現在段疫情再爆發 2個小朋友還小 所以我暫時未能報股票班 要等疫情過後才可以報。有幾個問題希望老師幫忙解答

我只有中五學歷會考零蛋 英文數學極差 報股票班教的股票估值睇股票質素潛力等 可以應付到嗎？

會唔會有公式容易明白計算？
另外想問財務報表等是中文還是英文？

老師可唔可以分享一下你現在持有的股票比我參考

我現在只有4000股 2388 平均價$23.5入
現金約20萬
我想月供
2388 15%
3110 15%
0066 20%

另外50%想買多2隻你書內潛力股
麻煩老師比比意見平日要上班同湊小朋友沒有太多時間 想報班前訂好月供計畫
麻煩老師

龔成老師：

放心【投資倍升股課程】適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資時機、配置、評估平貴，在投資上已掌握了一定的知識。

另外，你上課之前，多睇理財、股票類的書，留意一下財經新聞，到時就較易跟到。

整本上，課程唔會太深，內容都是中文的，沒有太多好深的名詞或數學，公式都盡量用簡單的。

我現時持股，講幾隻啦，比亞迪（1211）、小米（1810）、中生（1177）、金沙（1928）。但除了金沙外，其他都升晒，已經略貴。

現時你中銀（2388）可長線。

至於月供，都無問題，長線進行就得。另外50%，建議你加盈富（2800）及恆生科指ETF（3067）去長期月供，如果你想進取D，就加入GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

至於現金，就小心運用唔好太急，最好等上完堂先正式進行配置。

------------------------------------------------

Q20962：

老師，你點睇佢同阿里健康/京東健康

我覺得平安好醫生好似係更加革命性，因為佢係嘗試建立一個線上醫療服務，真正咁網上睇醫生，而其它兩個係比較着重線上醫療/健康產品銷售咁。似乎係潛力更加大

唔知我嘅睇法啱唔啱

龔成老師：

阿里健康（0241）、京東健康（6618）潛力都大的，因為佢地本身有一個好強的銷售網絡，這已經做到好完善，當網上買藥不斷有更多人接受時，佢地長遠的發展會正面。

睇翻，中國政府正在鼓勵行業的發展，長遠正面。因此，3間公司長遠都正面，不過營運模式就有少少不同。

例如阿里健康，佢營運醫藥電商、互聯網醫療等業務。

「醫藥電商業務」，這業務主要有兩種業務模式，由自營電商和天貓代運營，涉及非處方藥品、醫療器械、計生用品等。

另外，就是「互聯網醫療業務」，阿里健康與國內多家二三級醫院建立合作關係，患者可以通過阿裡健康、支付寶等平台，做到線上掛號、問診、諮詢用藥等等的服務。

阿里健康利用醫療AI系統「DoctorYou」去進行營運，該系統包括臨床醫學科研診斷平臺、醫療輔助檢測引擎、醫師能力培訓系統等，輔助醫生睇病。

業務上，有好大的潛力，不過，本質波動，股價上落大，消息多，市場炒作多，這類股風險都不少。最大問題是無人能正確估值，市場現時只是估估下，推將唔到佢將來的價值。

------------------------------------------------

Q20963：

Hello 成哥 之前問過你股票同買樓既問題
最後見到樓市呢期冇咩點跌 忍唔住係未達到原有目標（即係未儲夠1m） 就賣哂d 股票入市買左樓

宜家絕大部分資產都係層樓

不過都唔知係好彩定唔好彩，岩岩好避開左呢段股市波動既時期

雖然呢個時候買樓唔知係唔係合適時機，但係都想多謝你一直教既財經同理財知識！呢幾年睇左好多你既文章
同書，慢慢學識左點樣選股 同埋資產配置既概念
希望成哥越做越成功！

龔成老師：

我地進行財富配置，最重要是長期的，不用太著重中短期的情況。

如果你長遠有買樓需要，現時你行這一步是無問題的。

其實置業的時機，並不是分析樓價（因為好難準確分析），因此，最核心是「自己的資金、負擔能力。

你之後要股樓並行，開始翻股票方面的財富累積。

------------------------------------------------

Q20964：

Sir，我覺得你好勁,當初唔明點解要平衡組合,但當股市大跌時就明白!

但我都忍唔住手痕，未跌完就入咗2845($138)/1833($118)而之前本身無貨，已知道你講過的合理價，但太心急，但有時有d股想等合理價而末到價又升左(好後悔)，好難捉摸呵

但我知1833有質數而會是長線的。

而我之前因見2388,1972好悶無咩升放咗，你說這方法不正確，現在見到2388升咗，明白當中道理，我會記住，我學到嘢!多謝一支指導

龔成老師：

如果本身無貨，入翻少少平安好醫生（1833）同ＧＸ中國電車（2845）都可以，最重要你買入時，以分注慢慢買入作策略，就能減少風險。

兩隻你都可長線，只要之前唔係太大手買入就得。有質素的。

保持進步啦。我地最重要睇企業長遠，以及配置，不是短期股價。

------------------------------------------------

Q20965：

哈囉～龔成sir! 我最近面對緊一啲抉擇，希望你可以比啲專業意見我參考

我今年25歲，月入$17000，無住家無物業，現時暫住喺男友屋企，手持10萬現金，年繳2萬3千保費。

雖然住佢屋企唔洗交租，但我每月都要成$6000支出（計哂車費、飯錢、電話費等等）我好想自己搬出嚟住（因呢個男友太無上進心）

都係睇緊啲五六千蚊租金嘅地方，但我諗搬咗出嚟之後起碼就要支出多一萬蚊（租金、水電煤 & 雜費）到時就儲少好多錢⋯⋯

最近我都準備開始嘗試月供股票，就糾結緊

1️）住住先啦～忍無可忍先搬，儲多個錢先
2️）諗長遠啲，呢段時間咪咬緊牙關，再節省啲不必要開支，搬出去又一條好漢

1️or2️？

定還是有其他方案可作參考？謝謝你

龔成老師：

如果從長遠的累積財富角度，當然（1），因為你的支出最少，如果你現時的狀態每月支出都要$8000，你搬出去，支出一定會好大。

反而，你應該進一步控制這刻的支出，同時開始投資，利用現金的$10萬去增值。

另外，你應該用男友共同設計長遠的財富目標，以及一些共同的計劃，去鼓勵去儲蓄或作出突破。

但你話「我好想自己搬出嚟住（因呢個男友太無上進心）」，如果你想同佢長遠發展，就要一同面對問題，而不是自己搬出去，又或者你不想與這個人發展？你要思考一些長遠問題。

------------------------------------------------

Q20966：

請問月供股票，在什麼情況需要減持同增持？現月供持有＃0003/2388/2800/1928

但因上年人工被減，只可月供＃2800/＃1928各供$1000

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

你上述月供的，都是有質素的，但增長力就唔算強。

如果你資金不足，可以暫時集中供盈富（2800）$2000。

或者你想月供盈富同金沙（1928）都得。

其實，所有都是一個配置過程。

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

同時，我地會運用「先增值，後現金流」，即是年輕時增值較多，年長時就集中收息。

------------------------------------------------

Q20967：

老師，9911和2131現在可加仓溝貨嗎？還有1810可以加吗？謝謝您

龔成老師︰

赤子城科技（9911）主要從事開發一系列移動應用程式、健身應用程式、遊戲應用程式等。

業務上，係有吸引力的，不過，我一向都新股半新股都無興趣，因為真實面要慢慢先見到。

由於上市時間唔長，故較難準確估值，只建議小注，同時你要明白當中的風險。

云想科技（2131）主營線上合約廣告服務，佢業務上都有可投資地方。

但由於佢上市不久，現時數字只能參考，因為好多新股都要過一段時間才見真章，故投資時要保守些。

佢2019年盈利只有7000萬，市值郤近80億，明顯唔平，現時投資有一定風險。若持貨不多，可以守。

而小米（1810）現價算係合理區頂部，至略貴水平。如果無貨，現價可小注。再回多1成左右，值博率會更高。

------------------------------------------------

Q20968：

龔sir 廣交所同微盟值得長線投資嗎？
謝謝你

龔成老師︰

港交所（0388）絕對有長線投資的價值，只是平貴那個價買入的問題。

佢係香港唯一獲認可的證券市場及期貨市場，提供現貨、期貨、衍生工具的平台買賣，以及股票上市業務。

由於是壟斷業務，已經是盈利的保證，問題是賺多與賺少，以及將來的前景如何。而港交所處於金融證券行業，金融業作為香港的命脈，長遠發展仍不會差，加上壟斷事業，已能推斷到港交所是一隻優質股。

但現價偏貴，回多1成左右，才算較合理水平，才可分注。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這次中期虧損大部份來自"可換股債券的公平值變動"，簡單咁講，唔係佢業務上出左大問題。

長遠業務上係有一定潛力，但盈利和股價上佢都幾波動。此股可投資，但只宜小注。

------------------------------------------------

Q20969：

想請教龔sir
依加經濟準備復蘇

到時d 股票升哂 咁咪月供黎都冇意思？？
個又應該放哂佢 定還是減少金額月供

3、700、788、823、2800、2822、3088、3188、9988

我有依d 股票
只係騰訊，爸爸，3088同3188
唔係月供緊

另外騰訊 北水 走緊 係咪應該放左佢
再等低位買入

龔成老師：

我地最重要是睇翻質素及平貴，如果到時佢地仍有質素，只要唔過份地貴，你都可以照常月供。

當經濟好轉股價上升，只要企業的價值有實質增長，就未必是貴，可以仍然是合理的。而月備是一個長遠投資，除非好明顯地貴，否則，一般都可以持續進行。

你上述股，都有質素的，你保持長期進行就得，同時亦是一個平衡的組金。

至於北水，只會對股價有中短期影響，我地是重要是睇「企業」。

------------------------------------------------

Q20970：

老師，我個倉市值$120萬，有18隻股票，我見你話10-15隻股票較好，我係咪要賣左d佢？都係有質素的股

龔成老師：

以一個$120萬的組合來說，10-15隻較好，你可以控制翻，去到15隻。

如果你持股都是有質素的股票，你就唔需要急於進行賣出的動作，慢慢進行，見到有機會先進行就得。

其實超過15隻不是不可。我建議一個$100萬以上的倉，最好在10-15隻的原因，係唔想大家管理得太亂。我地買股票，應該了解每一隻自己的持股，買入前要小心分析，買入後要持續檢討，每次企業出業績或有重大消息，都要跟進的。

如果你持股隻數太多，根本好難完全了解每一隻股，因此，你要考慮這個因素，然後取平衡。

------------------------------------------------

Q20971：

想請教一些在香港二次上市的跨國企業，例如阿里爸爸 京東 百度，這些公司發行新股票集資，為甚麼不會導致本來在美國的現有股價下跌？

一個企業的市值應該是固定的，不會因為發行了新股票而令整個企業的價值提高了，對嗎？

如果企業市值是固定的，增發股票，就會降低每股的價值，現有股價應該會下跌。但為甚麼這些企業的美股股價沒有暴跌情況？

我的想法在哪裡出錯呢？

龔成老師：

其實這是複雜的估值概念。

用最簡單的講法，就是一間企業如果佢是發行新的股票，每股股數會增加，每一股的價值會減少。不過，佢發行股票的同時，企業得到現金。

因此，企業價值會向上，當企業有效利用這些現金進行投資發展，企業往後的價值會提高，市場就會考慮佢再投資為企業增長多少，從而抵消了每股股數增加令每股價值減少的因素。

------------------------------------------------

Q20972：

老師，如果投資保險既投資保，會唔會俾投資股票好？
因為有朋友有個計劃：（USD為單位）

開戶$3000，每月放$249.9落去，直至第五年就供完張單，其後就話每年9%年利率回報。去到第10年就會有$24,964（本金依然係$15,000）

龔sir, 你點睇？還是你仍然覺得我月供股票，回報會比供保單好？

龔成老師：

其實在理財角度，我地好難話邊個「絕對好」，因為理財，最重要是「適合」。

股票的回報一般會較高，當然，風險都會高少少。至於上述的投資保，回報可能不及股票，但風險可能低少少。

而我見上述話有9%回報，這方面要問清楚，因為坊間這類工具的回報，如果要去到9%，部分要在某些假設的投資環境與回報下，先會發生，同時，有機會背後都有一定的風險。最重要是問清楚。

如果9%回報的確定性甚高的話，其實是不錯的投資工具。可考慮。

------------------------------------------------

Q20973：

龔Sir我見你好小提及債券，其實我們的資產分配上要加入一些嗎？

現時我的資產持有物業，實金，股票，現金，保險，正在想如何可以做到更好平衡及風險對沖

龔成老師：

債券，因為這是一個「產品」，並不是真財富，所以，我地在財富組合不會持有太多，或不用持有，而我地在財富配置，應該持有「真財富」，例如物業、車位、優質股（佢地的長遠價值及現金流會向上），但債券，隨著現金不斷貶值，佢長遠都在貶值。

因此，你持有物業、股票，應該要成為財富核心，至於實金、保險、現金、債券，在我地理財中都可以，但就不是核心。

------------------------------------------------

Q20974：

你好，龔sir, 上年接觸認識你fb page，真心獲益良多，之前買股票，股價稍為升小小或者跌小小，都已經影響好影響心理，直至認識你fb page,就了解如果自己揸住優質股，短期股價波動根本完全不用理會。真心多謝你。

最近考慮緊應唔應該入市買樓，希望你可以俾d意見，我同先生月入合共60K，已家租地方住，大約9k, 有現金價值大約100萬左右，每月儲25k。

一直心大心細想入市，希望可捕捉跌市，但眼見疫情樓價依然企穩，最近樓市直程小陽春。400萬-500萬樓價已經買小見小。

其實我地一直都係target買5百萬左右既樓，已家可能要調高budget去到五百五十 - 六百。請問我應該係咪唔應該繼續等，應該認真開始睇樓，考慮入市。

但係我一諗到如果我入市，我就好似要all in我既積蓄再每月供起碼17000-19000，就擔心壓力有點大，所以正正係咁真係令到我1516。

其實我仲有諗，定係我已家繼續租地方住，另外一路儲多d錢，將個雪球滾大佢去買股票/reit個d增值，買樓既事，等3-4年之後再進行。

希望可俾d意見，謝謝。

龔成老師：

我地最重要，是考慮長遠的情況，如果你長遠，點都要買樓的話，即是這是大方向，只只時機的問題。如果你買樓後，會用盡儲蓄，最好的策略，當然是買樓後仍有資金剩，同時在供款上負擔得到，我見你話壓力大，不如儲多少少錢先。

好多人會預期樓市的升跌，從而影響買樓策略，其實，我地唔應該這樣分析，因為樓價走勢，其實好難有準確預測。

我地最重要的，反而是考自己的需要及財富情況，只要有需要，而財富足夠，就可以買。

因此，你只要睇翻，自己幾時買樓，首期，負擔情況較合適，就可以進行。

如果這刻較擔心，就儲多少少首期先，但如果資金足夠，就唔好再分析樓市走勢，已經可以入市。

建議你睇《5年買樓4部曲》。

------------------------------------------------

Q20975：

老師 請問一間公司如果買左一幢大廈 係咪係損益表開支都扣反？之後資產負債表既非流動資產一欄就會加反幢大廈既價值入反帳？ 股東權益亦都會加反？

仲想問下如果公司投放錢去研發 會係損益表當開支扣除？

龔成老師：

損益表不會顯示的，因為這物業會成為該公司的「資產」。而資產負債表就會有這個資產，會放在「非流動資產」。

至於股東權益，不會增加，因為公司用了現金去投資物業，現金減少，物業增加，其實在報表是無變過，所以股東權益不會因為買物業而增加。

公司研發支出，會在損益表視為開支。而這個「研發」的定義，一般都是公司為開發某些產品或技術，而未能完全確定這筆投入資金能為公司帶來確實的經濟效益。

------------------------------------------------

Q20976：

老師，我之前借了不少咭數買股，現時已還清借來買股票的咭數(接近30萬)。

現在現金只夠四個月洗用(包括供樓～每個月供35000)。

請問我現在情況，應怎樣做？

股票仍有

27銀聯 股數1000
66地鐵558
388港交所300
2800盈富3000
1177中國生物2000
3088華夏恒生2800

700騰訊300
9988阿里巴巴600
1121比亞迪500
1810小米1400
2382舜宇科學300
3690美團300
6993藍月亮500

另外，我已報作左你的班。

龔成老師：

太好了！卡數始終是高息負債，早還有著數的。

之後，你慢慢可以加速投資，累積財富。不過，如果你現時現金不多，不如儲多少少現金先。

至於股票方面，持股都是有質素的，我見都無問題，基本平衡，其實長線投資就得，但組合有少少偏向新經濟或近期熱炒類，如果加多少少舊經濟或其他類別，組合會更加平衡。

這些持股都不差，可長線，但你之後的具體配置，我建議你上完堂先進行，這刻，你可以儲多少少現金先。

------------------------------------------------

Q20977：

龔成老師你好！我剛賣了自住樓，拿了600多萬，是用來一年後上會樓花的首期， 想問下只有一年時間，這筆資金應該怎樣運用呢？還是只放定期，因為一年後便要用。

龔成老師：

如果你$600萬，全部都要作一年後買樓的資金，就唔建議動用，最多只能動用小部分。

因為我地投資，一定要長線先有回報，買股賈等如買入企業，即是將資金投入企業後，耐心等企業成長，這當然要時間。

而中短期股市，往往只因市場情緒、資金等因素影響，不確定性大，無人知道你要用資金的一刻，股市情況如何，因此，建議你大部分持有現金，小部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

除非，大市出現明顯大跌，出現了好大的機會，你就可以動用小部分資金，投資這些大跌，而質素不差的股票（但到時都要睇情況行事）。

------------------------------------------------

Q20978：

龔sir 我有一個買樓嘅問題想請教一下。(眼見身邊朋友都上哂車，有啲壓力）

最近我見有好多市區綠置居。 例如：鑽石山，北角，啟德，價錢十分吸引，亦好有投資價值。

我另一半同佢媽媽喺市區有一公屋單位，我自己就無，而我地入息已超任何政府津貼房屋。

我現金加股票有大約百二萬，收入穩定。

我有2個置業方案

方案1. 用另一半公屋轉綠置居，俾另一半嘅媽媽住到唔住為止，我地自己繼續租樓（咁樣只需大約40 萬首期，每月供萬五左右，租金萬五，淨返嘅本金繼續投資股票），不過每月支出壓力較大，但我地就盡早上咗車。

方案2. 佢媽媽繼續住公屋，享受平價租金，自己買一層私樓住住先，咁樣每月負擔少D（唔駛交租加供樓同時進行）但係我成副身家攞哂去做首期，短期內做唔到其他投資。

我想問邊個方向較好，或者龔sir 你有無其他suggestion ？

龔成老師：

唔好因為其他人的情況，影響你的決定，最重要是你自己。買樓與否，最重要睇你的首期資金及負擔能力，如果本身有需要，而供樓等無問題，不會太大壓力，就可以考慮。

（2）會較好。

其實（1）最大的問題，係你唔清楚佢媽會住多久，假設年期好長的話，對你地會有一段好長時間，你要一邊供樓，一邊租樓，你的負擔會十分高。

至於（2）的方法，會較有效解決到你地自身的居住問題，而對佢媽又無影響，如果日後再有資金多，或有家庭情況改變，到時先將公屋轉綠置居。

------------------------------------------------

Q20979：

老師我想問下，我在新年的時候分別入了一點6988樂享互動（3.95入），451協鑫新能源（0.47入）。。

那時岩岩新手在高位時買了依2隻想問下我應該幾時要走呢？

因為我想拎番依2隻股既$去買老師你推薦的一些優質股去長期持有。謝謝老師

老師，我想參加您的課程，但係我是澳門那邊的，您有沒有一些是線上的課程呢

龔成老師：

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。如果你持貨不過多，可守。

至於協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。這股宜減持。

長遠來說，你要投資更優質的股票，建立一個優質組合。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q20980：

你好老師
1579,1833,853,6969
我重傷。請問呢幾隻係咪止蝕會好d

龔成老師：

你持有的股票，不是劣質的。不過，你集中持有近期較熱炒的，已出現了風險。往後在長遠，要建立翻一個平衡的組合。

這些股不是無得守的，長遠有增長力，但你集中持有，以及你之前在貴的價位買入，是最大的風險。你要睇翻有無邊一隻，是過份持股的，如果有，就宜減持。

而微創醫療（0853）股價上落都大，同樣唔建議持有太多。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【肺腑之言】
同學?：「阿Sir，講到第幾頁？」
阿Sir?：「自己諗。」
同學?：「……」

上堂一定悶？未必！老師啲爆肚金句真係可以媲美棟篤笑?，
以下精選左網友提供嘅40句?，珍惜仲有金句聽嘅時候啦?
#笑下啦 #Tag下啲實習老師叫佢地學兩句傍下身
#好想過返中學生活 #那些年 #DSE同學仔加油啦

「你同我企出去入面
咪埋眼望住我
豚部隻眼對住我
點解垃圾桶有垃圾
你明知會塞車就唔好坐嗰架車啦
因為今日係星期三 所以聽日係星期四
我係樓梯口都聽到你哋把聲啦
識唔識合埋把口講野?
Lock yourself in the locker
good luck will not fall down from the heaven
合埋你個櫻桃小嘴
我食鹽多過你食米呀！?
你冇帶書我要你罰抄
「上堂唔準抄，落堂之前交！」
討論錦嘈㗎咩？
無帶/訂飯嘅同學要食野 唔準落去買野食
打喊路合埋個口
冇帶手冊的同學請喺手冊上寫冇帶手冊.
光頭嘅老師:開咩風扇丫？吹亂哂我個頭！
What DOES you mean??
校際籃球開波圍埋嗌校名果下：贏輸唔緊要⋯⋯（諗左兩秒）最緊要贏！
有冇人聽唔明廣東話?
當年form 1 班主任名句…
我知你無講/做，但係你個心想講/做…
見到老師要點頭但頭唔好向下
"Yes, you are 啱！"
認真係經典中嘅經典
我等你地安靜哂我先繼續 講唔哂冇得落堂
Delay no more
Take out your notes and put away all your things
我要加番蝦餃：「put your upper lip and lower lip together 」
according to my cock?
喂 係咪咁對阿sir先？
好 無人做阿sir自己做
點解我聽到人講野？
點解落雨會咁大驚小怪？你地住沙漠架？
For me, it's ... 'Come on! Common sense!' Lol
When your classmates have problems,don't think they're not your business.Maybe you are in danger but you don't know!
according to my錶...
onetoofee hahaha
用行動答我
舉手前要飲水
同學開窗開冷氣
同我坐係到罰企
打鐘唔等於落堂
可唔可以靜少陣
你對腳放返入櫃桐入面
長期記憶係儲存喺海綿體的。
"宜家係走火警，唔係睇風景"
一個跟一個 唔準爬頭唔準墜後
我叫你面向窗企 唔係望風景呀
你地唔好嘈啦我睇唔到同學寫咩
當年我地個體育呀sir講左句咁既野
「兩個兩個單行排 原地坐底向前行」
學校唔係你屋企，學校係你第二個家
我得一把口 你地四十把口 點夠你地講
大家分組，每組最少六個，最多五個。
坐係後面嘅同學聽唔聽到？ 聽唔到嘅請舉手~
班長,麻煩你同我落去上面既校服處攞一攞點名薄
你估我俾你地功課我唔辛苦架？你地做一份我要改36份架！
嗰次我遲到排隊俾佢鬧 我前面個人話鬧鐘冇電 佢話：你明知個鬧鐘訓到一半會冇電就早啲起身換電啦
英文老師走廊大嗌: Please keep quietLY!!!!!!!!
Thank you Lord for giving us a sunny day, although today is a rainy day. In god's name we pray, THANK YOU!
Today we don't have quiz, but we have a SUDDEN quiz
I don't understand why you don't understand
Please put your desk under your chair
During exam:"hands up, pens down"
Why can I still hear people talking?」