［社會實驗］價格管制導致乜後果？其實教科書一早講咗啦。

TLDR：柏林左翼政府要凍租5年，仲要強制房東減租。結果？咪租盤大跌四成，房東自己捽老泥都唔租畀你。仲有，簽陰陽合同，第時如果裁定租管違憲，唔該你交返晒之前嘅差價。仲有，價格管制當然造就黑市，平租畀你可以，不過唔該幫我用十皮嘢買咗個雪櫃先，靚嘢嚟的。唔係雪櫃賣幾錢都管下話？

1. 本人唔係經濟學家，但呢個故事係非常典型嘅經濟學現象

2. 背景是咁的，話說香港樓貴租貴，近年唔少人都提租務管制。而好多時就會講起德國，特別係柏林。冇人炒樓，甚至冇乜人買樓。因為保護租客，業主好難加租云云。所以柏林就吸到好多人才，成為歐洲Start up之都云云（但我見啲朋友個個都係去英國）

3. 事實如此，柏林年頭甚至要求凍租5年。另外有啲仲要強制減租，最多減40%。嘩。違犯嘅？唔使坐監（好似），罰款啫，五十萬，歐元。

4. 呢啲，就似乎係無產者比較鍾意嘅，負擔比率低，左翼恩物（＊）。至於「原教旨市場L」。當然就反對。但發生咁嘅事相當合理，首先歐洲向來都比英國美國「左」，而德國同亦係比較「左」，而家柏林市政府就更加「左」

5. 咁其實，「左」「右」嘅嘢，好難話對錯，都係睇時勢，況且物極必反，而中間又有好多空間（＊＊）。基本上，你係包租公，咪反對租管。你係租客，咪贊成。而如果講學術，正路地經濟學家應該90%甚至99%都反對租管（＊＊＊），無論佢地係咪租客（呢個就係經濟學家可愛嘅地方，認真的，自己係租客都可以反對租管架！）

6. 埃汾呢？其實唔關事，但利申下。只有一層自住樓嘅，應該就係中性，我唔使交租，但亦冇租金收入。不過嚴格嚟講，「我可以放層樓收租然後自己搬去台東住的，聽講幾好洗」

7. 我地比較關心嘅，係到底租管有乜影響？經濟學家經常畀人話只得理論，咁今次係一個好好嘅社會實驗。結果證明，現實情況係同理論預期一樣嘅。

8. 價格管制，十分簡單，當然就會短缺。最極端嘅，你有薪酬上限，迫我只可以拎一千蚊人工，我咪唔返工。

9. 柏林嘅情況，亦係差不多。你租金管制嘅，係架，租金會低—但你搵到樓租先算啦。柏林嘅租盤，就大跌40%。如果計受租管影響嘅（2014年前起嘅），更加大跌60%。當然唔係跌到零，但就大副減少。同預期差不多啦。極端啲講，原本我自住，但可能租間房出去畀人嘅，收一萬蚊租幫補下。但而家你收得兩千蚊租，我就索性唔租好過啦，唔值得兩千蚊搵個街外人返嚟嘈住自己。我自己霸多間房又好，或者叫返個仔搬返嚟住都得

10. 更有趣嘅係，當然今年有百年一遇嘅肺炎疫情。咁你話，係因為肺炎冇人租屋啫，至少冇晒啲遊客，商務客都近乎冇。但，又係好好嘅社會實驗！其他德國城市嘅租務市場，係比舊年同期更活躍嘅—唯獨柏林唔係。而柏林就有租管。十分好嘅對照實驗

11. 另外，除咗唔租出去，仲有一個玩法：我索性賣走佢，亦得。你迫我收咁低租，我咪賣（當然理論上，租金回報低咗，會拖低樓價）。結果？亦係多咗人買樓。柏林就由一個冇乜人買樓（80%人租樓）嘅城市，慢慢越嚟越多人買樓，aka做樓奴（而全德國，大約係一半一半）

12. 好啦，仲有更制嘅。經濟學者會話你知，價格管制除咗會令人地索性唔交易，仲會衍生一樣嘢，一樣我短期都會寫嘅嘢：黑市。

13. 大家聽黑市聽得最多，就係匯率（雖然而家你去外國好少可會見到）。你官方將個價格定在不合理嘅水平，啲人咪唔會跟官方價買賣—即係，我收貴租你可以打靶，但唔租出去應該未咁惡到可以打靶掛。而除咗唔交易，另外就係可以黑市，唔跟你個官方價，用其他嘢巧立名目。黑市實在太偉大，因為話畀你知市場力量幾咁大。

14. 而某程度上，以前七折的八折的一樣係「黑市」—你個價定得太高，的士司機咪冇工開，寧願收平啲搶客。 「我覺得大陸啲官貪污都係黑市，因為官方人工太低，大家都知要靠其他嘢」

15. 柏林嘅租務市場啦喎，又唔係完全「黑市」，亦唔係完全「陰陽合同」—我懷疑「陰陽合同」都係一種「黑市」。即係，租約我寫收五千蚊租，但你實交一皮嘢呀下！守法嘅德國人（WireCard同福士在笑）唔會咁大膽。況且，如果租約咁玩，到時個租客堅持交五千蚊租，你告法庭都幾難。

16. 但聰明嘅德國人，梗係搵到第啲方法啦。記住，價格管制一定會導致呢啲古惑嘢。你有最低工資下話，咁我咪要班人變自僱（唔止香港無良僱主係咁，外國咩共享經濟都係，都話UBER司機搵得少過麥當勞，睇少啲林保怡溝周家怡啦）。你有最高人工限制下話？咁我咪畀福利佢，或者平租個單位畀佢做宿舍（變相房屋津貼），一定好多呢啲貓捉老鼠兒，沒完沒了。

17. 柏林房東嘅玩法係點？加個合約條款咯—因為，有房東告上聯邦法院，話柏林政府呢個租管係違反憲法。仲打緊官司。個條款就係，如果最後裁定租管係違憲，唔該交市值租金　—　但有追溯期喎！之前嘅都要追返。

18. 更加簡單嘅，可以點做？好簡單啫，原本一皮嘢租金你要我收五千嘅，得，「你要租屋就要買埋我個書櫃，價值六皮嘢」，「你管租金之嘛，你冇管理我書櫃賣幾錢下話？」，甚至乎我想像到，可以享用房東叫床服務，每日盛惠兩百。「唔係叫床幾錢都要管下話？」。唔要叫床咪唔租畀你

19. 當然，我估租客又會舉報呢啲友，到頭嚟就係浪費社會資源，益咗律師同公務員。更甚者，真係畀人告嘅，我咪唔租間屋出去咯，或者只租畀啲相熟嘅人。

（＊）講明先，呢度嘅「左」，指經濟。照計經濟上左同右好易分，冇乜好混淆，唔識嘅自己Google．但其他方面嘅「左」「右」就好難分，我甚至話根本唔應該講「左」「右」，因為你發現啲人互插一大輪大家都唔係講同樣嘅嘢。例如一個智力題：民進黨係「左」定「右」？維基百科有答案。但在經濟上，去到柏林呢種租金管制就梗係「左」，唔使點討論

（＊＊）但真係要講嘅，過去幾十年當然係「右」係王道，去到甚麼列根戴卓爾克林頓Milton Friedman更加係高峰—然後近十幾年係向返「左」啲啲。

（＊＊＊）但當然又有個問題，有人話經濟學本身，至少係近幾十年，本身就已經係一個「右傾」嘅學問，所以近幾十年近乎唔存在真正「左傾」嘅經濟學家。呢啲就留畀專家講。

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張兩個月已600人訂！仲有兩篇免費試睇：https://bit.ly/31QmYj7

——————————————————————————
［收費短片第十擊］人民幣升值受惠股，美股二線科技股揭秘
課程資訊：https://homebloggerhk.com/course_detail/?code=CC010

內容:
*軟件股IPO狂潮
*買平台股好過
*人民幣強勢買咩好?

本星期內特惠售價: $80
課程編號：CC010
觀看期限：首次播放後一星期及限每影片４次
客服whatsapp: 63832145

［LVMH彈弓手唔買Tiffany］Tiffany當然告上法庭，但LVMH話法國政府唔畀，因為美國要收關稅。

TLDR：LVMH連法國政府都出埋，彈弓手唔買Tiffany，照計都係想壓價。Meanwhile Pandora即升，照計純係巧合，但Pandora呢檔嘢真係成功到一個點—仲賺錢過Tiffany。三十幾年歷史嘅公司，朱義盛穿珠仔，泰國廠，可以扮歐洲名牌，行銷一絶。

LVMH scraps $16.2 billion deal with Tiffany（https://bityl.co/3QRM）

1. Er….有點複雜，但簡單嚟講，就係LVMH（冇錯係LV母公司）彈弓手，之前話咗買Tiffany（冇錯係嗰間Tiffany），而家改變主意，唔買咯。Tiffany 當然把幾火，畀你睇晒全相（當然要做Due Diligence）而家話唔買就唔買？玩泥沙嗎？傾好晒架喎。所以就要告LVMH了。

2. 誰是誰非？唔知，我相信你都唔知。法律嘅嘢，上法庭咪知，就唔好大家喱文拗話「唔係講下喎，簽咗都可以唔算數？」「有不可抗力條款」。上法庭慢慢玩飽佢，反正大公司錢多，特別係LVMH

3. 可以參考下，之前私募基金買Victoria Secret，都係在肺炎後撻咗Q（https://bityl.co/3QR4）。當時唔少專家（真專家）都幾意外，居然可以咁walk away

4. 肯定嘅係，導火線一定係肺炎。呢單刁係大半年前，舊年10月尾的，已經兩個世界啦。但未必係好似你咁諗。我嘅陰謀論，就梗係LVMH想壓價，分分鐘最後仲會傾得成。法庭咪法庭咯，和解都成日見啦。正如Tiffany亦只係為股東R最大利益． Nothing Personal, it’s all about business．呢個係我上星期廿幾三十年後重睇《教父》，其中一個領悟。Don Corleone 個仔畀人射到變蜜蜂竇都係咁照同仇家坐低傾，Michael Corleone嗰頭話完「傻啦姐夫唔通我忍心家姐變寡婦咩，冇事嘅，坦白照講啦，但唔好當我白痴」—講完轉頭就搵人勒死佢啦！it’s all about business

5. 你話疫情下經濟不景奢侈品銷受大受打擊？Yes and No．打擊梗有，但睇邊個檔次嘅奢侈品。由愛馬士到LV到Tiffany到Pandora到Swarovski已經十幾廿層。正如Gigi Hadid（唔好意思，仲係停留嗰個年代）又model，求撚其在喜愛夜蒲台北篇出現咗幾秒嘅妹妹仔又model，身價都爭好遠。

6. In general，打擊當然係有，但亦唔止係因為啲友冇錢，好大程度係因為冇得出遊，特別係大陸人冇得去歐洲。但你睇股價呢？唔覺好大打擊。你睇愛馬士LVMH之類嘅股價，離新高其實都唔遠。

7. 所以，我都係覺得LVMH係壓價。呢啲係為股東負責嘅表現：九蚊買到嘅嘢，唔使用十蚊買。

8. Tiffany嘅股價，一早有LVMH個出價頂住，所以並不反映「基本因素」。但你見LV一話唔買股價就插10%（收市都仲跌6%），有理由相信，LVMH係可以壓低啲個價。直接啲講就LVMH唔急，你急之嘛。Tiffany檔次低，仲要比較多係嚟自美國，呢個時勢似乎麻麻地—當然呢兩個特點正係最初LVMH買佢嘅原因，但此一時佊一時。當中種種，舊文有寫過（https://bityl.co/3QRb）

9. LVMH最聰明嘅係，擺政治上枱！點解唔買？LVMH嘅官方理由，唔係想壓價（冇人會咁講），唔係因為營商環境唔同咗，係最衰當撈侵！加關稅！要收法國貨品關稅。咁就唔傾啦，當Material adverse change（https://bityl.co/3QR3）

10. 唔止，連法國政府都擺埋上枱！。成件事都幾神秘下，LVMH大股東兼歐洲首富Bernard Arnault話法國政府寫信畀佢要佢Hold住，1月之前都唔好close（埃汾按：仲唔係針住美國總統？）。咁LVMH冇得揀，就唯有聽話。

11. 背後玩乜？問佢地先知，但Bernard Arnault在法國權力當然極大。係佢擺法國政府上枱，定係法國政府同佢白面黑面，等Tiffany去嘈（埃汾按：有咁大影力？）迫美國唔加關稅，就問佢地先知了。當然美國又會話係法國要收美國公司數碼稅在先，不如由美國獨立開始計起啦，由路易士安那新奧爾良雞翼開始講，慢慢拗

12. 至於嗰封法文信（法國政府寫畀Bernard Arnault唔通寫英文？），係冇公開過嘅！Tiffany都冇見過正本，但當然話法國政府冇可能咁使橫手。就告LVMH，要佢11月（原定死線）前科水，唔好扮嘢

13. 都係嗰句，背後玩乜真係問法國佬先知。到底LVMH真係想買而買唔到，定係想買，定係只係壓價，都冇人知，當然我估係想壓價。因為LVMH之前已經有前科想拉Tiffany埋枱傾過個低啲嘅價，但Tiffany冇睬佢。

14. 結論？唔知。法律嘅嘢。表面睇嚟，個Deal terms似乎唔多容許LVMH就咁行走。之前報導過，Tiffany可以畀6億美金然後反口唔賣，但買家冇呢個option．「唔公平！」。係喎，有人拎支槍迫LVMH簽？我地唔係講緊柬埔寨雛妓下話？

15. 不過啦喎，拉到法國政府落水，又唔同玩法。亦可能因為見到個Deal terms冇乜空間，所以出呢招。當然也不排除係法國政府見到呢個機會去搞搞佢，甚至政府同LVMH齊齊坐低諗都仲得。

16. 股價反應先最重要，Tiffany當然即刻跌，一度跌10%，收市跌6%去到114蚊—留意LVMH出價係135蚊，似乎市場都覺得撻Q機會幾大。但打從肺炎爆發，Tiffany股價都大跌過幾次，因為一路都覺得LVMH有機會反口。

17. 不過最頂癮，應該都係Pandora！股價同時大升！唔知關乜事？可能只係巧合。不過舊年其實有人寫過，萬一LVMH真係買唔到Tiffany，咪買Pandora咯。三份一價錢之嘛。邊個寫？之唔係我（https://bityl.co/3QRd）。

18. 當然你會話檔次不同，唔係同一回事。但，根本最初LVMH就係奢侈品美心味將軍，多品牌，就係想要平價線先要Tiffany（當然另一重點係Tiffany主力美國，而LVMH在美國較弱）。

19. 冇錯Pandora係朱義盛穿珠仔，但有乜所謂，搵到錢就得。麥當勞KFC夠賣垃圾食物，但你邊間米芝蓮餐廳市值大過佢？之前寫丹麥股（https://fbook.cc/3FHF）市都寫過，Pandora今年股價不知幾強勁。

20. 丹麥股市都寫，堅唔堅？記得支持下埃汾Patreon．一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：（https://bit.ly/31QmYj7）．廣告完。

21. 拿，當時寫文咪話買Pandora係Tiffany三份一價錢？當然係講市值。但此消佊長，而家Pandora市值追到有Tiffany一半了。你計純利，計賺幾多億，其實Pandora仲高過Tiffany！只係Tiffany個PE高啲咁解。

22. 舊文有寫，Pandora嘅純利率極高，食水好深，諗真啲應該不意外，都話朱義盛穿珠仔當名牌，marketing極成功。佢純利率講緊22%—LV，Tiffany，Kering（姑池母公司）都只係15%樓下。就只有愛瑪士做到25%，但另一樣嘢

23. 當然我估最後LVMH最後都買得成Tiffany，買唔成都唔會走去買Pandora，但的確Pandora升極都有，年頭三舊水（丹麥克郎，丹麥冇用歐元呀下），而家五舊。如果3月低位計，直頭就兩舊升到五舊。實情當年LVMH話買Tiffany，本人都係近乎華文媒體第一個寫，因為星期日記者放假，但埃汾唔放假。

24. 當然「買唔到Tiffany，不如買Pandora」呢啲咁無聊嘅angle更加係我先會寫。不過Pandora真係好東西，食水夠深。丹麥（？！）品牌，間公司仲後生過我（是真的，1982年先出世！），泰國廠，但可以扮歐洲名牌，真好嘢。再講一次，marketing一絶

———————————————————
Ivan Patreon 狼耳街華人，一星期至少三篇港美市場評點，一個月一舊水唔使，開張一個月已500人訂！仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn

［微軟特權］FAAMG，微軟在歷史上，政治上，都係有啲唔同的。買抖音喎！你仲唔買？！

話時話，呢排記得keep 住like and share，主動入嚟睇，同埋設定做see first．真係搵食艱難。但感激大家，Keep住做，呢排啲Reach係好返好多的，但唔好鬆懈。一個都不能少呀

TLDR：明月裝飾了你的窗子， 你裝飾了别人的夢。微軟買抖音，你買微軟。你站在橋上看風景，看風景的人在樓上看你。今日你笑我窮，他日我同你一齊笑其他人窮。

1. 每個人有佢嘅「時代教主」。唔止一次提過蘋果教主Steve Jobs，我年代嘅必定係佢，愛佢恨佢都好，戲都拍埋。但畢竟教主香咗十年，新一代唔識唔奇。而家繼任人，到底邊個？可能唔係Facebook嘅小朱（都有套戲），而係Tesla 嘅 Elon Musk。

2. 但Steve Jobs之前，仲數漏咗個人。

3. 我人生第一個教主，真正嘅科技奇才，當然係—標基。可惜嗰個年代未有Facebook（！），資訊又冇咁流通。但，不礙佢成為最早嘅一個nerd，最早一個睇樣就知毒撚（教主中後期執返正好多架），但又好勁好有錢嘅，標基。有佢咁毒冇佢咁富貴，有佢咁富貴又冇佢咁毒。

4. 標基有幾有錢？冇乜特別，世界第二有錢之嘛。佢要嘅，佢真係可以做首富。微軟市值同亞馬遜叮噹馬頭，但標基早就無心搵錢做慈善，自己亦渣得唔多，亦都肯派畀佢嘅手足（陣間講）。

5. 我細個（小學嗰陣，1984-90年間）嗰時當然未有咩Windows，隔離屋個同學有部IBM（好似係），本人有部蘋果！好似係Apple IIe，證明屋企對我幾好，當然當年拎舊錢買股票更好（不投資向下流！）。但不重要。總之嗰時只係知IBM同蘋果。標基微軟等等，唔知乜水。當時識買股票，應該都係買IBM。

6. 轉眼去到中學，我繼續係電腦盲。未到上網年代，就忽然去咗微軟標基嘅年代。就係佢賣Windows賺咗好多錢。

7. 標基，就係我認知中，第一個科技奇才變富豪。再講一次，亦都係極nerd 極geek極毒撚極有錢嘅始祖。幾多毒撚以佢為偶像。

8. 標基勁到一個點，連中午貼《新戀愛世紀》（https://fbook.cc/3DMn）（＊），黎明個角色都叫Bill姬。勁到一個點，我成日貼嘅德國股神科斯托蘭尼本書入面話，窮人發達呢，三個方法：第一，同有錢人結婚。第三，投機（佢書嘅主題）。第二，係「商業點子致富」，但佢話，除咗標基外，佢都諗唔到第二個（科氏99年死咗，冇見到後來光頭佬）
9. 講咁多，想講，所謂嘅FAAMG，微軟，我認為微軟係特別唔同嘅。唔係講業務上（業務上蘋果幾唔同，賣硬件為主），係講歷史上。微軟係最老嘅—雖然你講公司本身，微軟唔係老過蘋果好多。但都話，當年《新戀愛世紀》已經有Bill姬，當年佢已經係超級富豪。SJ時代教主，係十年八年後嘅事，況且SJ根本唔富有（同標基比）。

10. 對，雖然標基其實仲後生過SJ（估唔到呢！），但佢就好似再上一代嘅人咁。佢發達最早，交棒亦都最早。冒犯講句，教主如果唔係身體唔好，可能今日都仲出嚟玩緊。但你諗下，標基早早已經退下，教主未死標基已經全退。其他嗰幾間？仲係創辧人玩緊。

11. 所以在傳承角度，微軟係唔同的。Windows好賣，Office好賣，但係咪就印銀紙？我寫過幾次，可以再重覆。微軟咁多年就3個CEO，標基不用多講，但2000年佢已經退下，繼任嘅係Steve Ballmer，標基嘅大學同學（讀名校幾緊要！），微軟第一個非技術人員。

12. Steve Ballmer有嘅幾個巴仙微軟股票，令佢有錢過畢菲特（震驚未？），做埋NBA快艇班主。但此人任內表現認真麻麻，亦可以話標基信錯人—其實好合理，邊個話大學同學就會掂啲？此人由2000做CEO到2014，佢走人時股價狂升，擺明市場向佢竪中指。

13. 話佢唔掂，點唔掂？我地講上市公司CEO，唔係諾貝爾獎。我地只講一樣嘢，股價。冇錯佢接手時係科網爆煲前，但即使唔計個頂位，佢任內微軟股價，十幾年都只係原地踏步（https://bit.ly/31g0O9s）。死未。公平地講，其實佢任內收入同純利都升幾倍嘅，但股價就係唔生性。

14. 所以，並唔係話標基打落個江山後人就享福咁。科企再勁，一樣每日面對競爭（標基正係同SJ鬥到火紅火綠）

15. 更大對比嘅係，2014 Steve Ballmer起身後，而家嘅CEO Satya Nadella接手。微軟股價當時40蚊，而家200。Steve Ballmer就14年原地踏步，Satya Nadella就6年股價升5倍，你話邊個做得好？固然同大環境都有關（但，14年夠晒長啦），但你計相對指數，結論都係一樣，亦唔係好多隻股票過去6年升5倍。所以抵Satya Nadella拎咁高人工（但遠不及Steve Ballmer富貴），你估真係你啲網友咁，以為「CEO冇嘢做開下會吹下水我去做都得」咩．你睇麥當勞亦都係咁，咪又係賣包，但上任CEO（搞同事起身嗰位）任內就係叻過再上手好多。

16. 講到呢度，就要講Satya Nadella最新嘅搞作　—Tik Tok美國！抖音海外版
17. 背後政治云云不多講，唔係就咁禁晒唔出奇，要賣畀美國公司都唔係好奇怪（即係委內瑞拉啲外資油廠收歸國有咁）。但，點解係益微軟？

18. 唔想太過陰謀論，但我覺得呢，微軟係同政府關係特好嘅（＊＊）。至少同侵侵政府係。

19. 證據一：上星期美國科技巨頭在聽證會（好彩只係視像）被議員搞足幾粒鐘。但嚟嚟去去只見四大天王（https://fbook.cc/3DMp），FAAG，就係爭咗M。固然你可以話微軟N咁多年前已經畀人搞過—又畀你見到微軟歷史真係唔同！你地未發蹟，微軟已經被人針對拆骨。

20. 證據二：眾所周知，其實咁多科企，同侵侵最大仇口只得一間。就係亞馬遜。光頭佬旗下嘅華盛頓郵報，日日鬧侵侵，好似東方功夫茶咁，鬧足咁多年。而又咁啱，美國國防部嘅合約，就唔畀亞馬遜，畀咗微軟。

21. 證據三：當然係今次Tik Tok。固然，如果個玩法係被美國公司沒收，似乎益微軟幾合理。畀Facebook買埋仲得了？聽證會先話佢反競爭，買埋instagram 仲買Tik Tok？然後，更加唔會益光頭佬。微軟似乎係比較正路嘅。

22. 本人唔玩抖音，但偶然睇下朋友傳嚟嘅嘢，有啲都幾好睇（唔止睇女）。用家說明一切，你香港人點鬧低智無聊都好，大把人玩—而唔係講大陸人。係講日本妹，鬼妹，印度人，美國人。呢個東西成功到不得了

23. 而家微軟咩都唔使做，就可以賤價（斷估Tik Tok冇乜異價能力）買返嚟。雖然可能只買美國業務，但，實在係十分之筍。

24. 況且，四眼定六眼聯盟嘛。今日美國封得，聽日英國點解唔封得？到時就都係益晒盟主架啦，唔通英國又畀你搵間公司買？

25. 所以，買微軟啦。「如果買唔成Tik Tok呢？」。咪買唔成咯，意外之財嚟之嘛，唔通你估會跌兩成？

（＊）《新戀愛世紀》（https://ggle.io/3I1l），呢套片真係爛到不能。黎明，雷頌德，王晶。你完全估到係乜，回歸前後嘅香港文化，就係咁。當然食住日劇條水，英文名就咁叫Love Generation Hong Kong，仲有水晶蘋果，死未。劇本其實就《甜蜜蜜》，外景居然係同王晶套《龍在江湖》一樣，明顯佢兩套戲一齊拍。唯一可取嘅，呢套應該係最後一套在啟德拍嘅戲。仲有，Lee Ann（唔係Ang Lee）．

（＊＊）呢度講多少少。冇錯，矽谷科企，至少在僱員層面，絶大多數都偏左。美國嘅左。講BLM，平權，女權之類。留意嗰堆未必係白左，但唔少係移民背景。不過首先，都講過，微軟歷史長好多。另外，其實睇嘢唔好咁表面，有良心又好，法治制衡又好，表面扮唔妥實則背後一齊打邊爐都好，你見侵侵上任咁多年，到底有冇咩嘢真係打擊過科企？近乎冇。隻隻升到七彩。你睇日日鬧佢嘅亞馬遜升幾倍，正面睇嘅咪民主自由真好，唔會因為總統偏好打壓。仙力啲嘅，咪話畀你知，大家做場戲之嘛。咪又係班精英統治你。你估真係抄科企家咩。

————————————————————————————————
最新收費影片：第一次推介跑贏大市，同你回顧檢討下。仲有新推介。40分鐘，都係賣返$80

簡介及以前嘅片（未睇可訂）：https://bit.ly/3iYMD0F
報名嘅，課程編號CC006：https://bit.ly/3eXVX1K
報完名交咗錢，呢度log in：https://bit.ly/3gYXu9e
之後按最頂「按此觀看」就得
仲搞唔掂嘅，睇埋下面，或者搵客服，或者PM我。
-------------------------------------------------------------------------------
【最新李聲揚收費影片】題目:　回顧第一段專欄片有幾勁！今段落多幾個Number賺死你！40分鐘，都係賣返$80

影片/課程編號：CC006
播放平台：https://homebloggerhk.com/web-class-player/
付款及收看步驟：
1/點擊報名收看 [影片/課程編號：CC006]
2/利用信用卡網上付款
3/及後有登入資料可以立即收看
查詢：whatsapp 63832145

本集主題：「為什麼他賣得比我好？：金牌銷售教練，教你如何業績翻倍賺！」新書介紹
　　　　
專訪作者： 陳家妤
　　　　
內容簡介：
★擔心業績？應該這樣做：
•六步驟業績翻倍：傾聽、記錄、延續、產品、生活、金錢
•追蹤客戶四時機：第一次買、買新商品、購買週期、大膽成交
•用揪團購的氣場做銷售
　　　　
★想換跑道？薪水這樣談：
•現在的你，市價多少？——如何寫出漂亮履歷
•面試是場心理遊戲——面試技巧、預演考古題
•談薪水，其實談的是選擇：能者多勞V.S平凡度日
　　　　
★剛出社會？方向這樣找：
•我的興趣是什麼？
•未來人才，需要什麼條件？
•什麼都不會，要提升什麼專業？
　　
為什麼他總是能成交？
服務業金牌教練——Lulu 陳家妤老師說，答案就在「服務力」！
「按照老師教導的步驟跟進客戶，這個月業績變兩倍！」
「Lulu老師讓我重新調整心態，老客戶又回來了！」
　　
　　身為深受企業喜愛的服務教練，Lulu老師投入服務業，從第一線門市人員到教育訓練核心主管，至今超過20年，擅長洞察需求、體貼需要，透過「服務＋業務」加乘，讓每個學員晉身成為Top Sales！
　　
　　曾擔任麥當勞、寶僑家品SK-II、法國迪奧、雅詩蘭黛、倩碧等多家精品服務業服務顧問，Lulu老師擅長引導學員看見「顧客沒說的需求」，以利他的服務心，搭配體貼的銷售技巧，讓每個人都是頂尖的服務銷售！
　　
★TOP銷售金牌教練教戰守則：
•人永遠需要有溫度的互動
•做啥都行，重點是「開心」
•EQ比什麼都重要
•累，不必成為離開的理由
•吸取新知，成為無可取代
　　　　
作者簡介：陳家妤LULU CHEN
　　Lulu 老師，一位在零售服務及精品業中，實務經驗豐富的專業講師，大場次的培訓經驗，充滿渲染、感動的氛圍。
　　
經歷：
-仙黛爾法國精品內衣業務及教育訓練總監
-雅詩蘭黛英國劍橋大學管理學分
-雅詩蘭黛、倩碧資深業務教育訓練經理
-法國迪奧化妝品訓育總監
-法國香奈兒化妝品公關暨廣告經理
-寶僑家品SK-II 大中華區首席化妝品顧問
-屈臣氏人事暨訓練經理
-中國生產力中心顧問
-美國麥當勞漢堡大學管理學分
-麥當勞門市經理
　　
　　多年的零售服務及精品業經驗，Lulu老師專精於銷售技巧、溝通技巧、團隊建立、客訴處理、教練指導、顧客服務、門市專櫃營運等課程，傾囊相授金牌銷售的服務奧義。
　　
授課經驗：
　　安娜蘇、伊莉莎伯．雅頓、芭比波朗、香奈兒、卡文克萊、Y.S.L、雅詩蘭黛、倩碧、迪奧、MAC、海洋拉娜、 SK-II 、植村秀、Benefit、Darphin、1010 APOTHECARY、尼爾森行銷顧問公司、寶格麗公司、諾基亞、奧美公關、生活工場、泛亞診所、黑貓宅急便、Chaumet珠寶、美商安麗、101觀景台、無印良品、阮綜合醫院、New Balance、美貝爾醫美集團（大陸）、美萊醫美集團（大陸）、歐菲醫美集團（大陸）、Wedgwood、皇家哥本哈根、BNP 法國巴黎銀行、黑暗對話股份有限公司……
　　
超過20年的國際品牌
美妝培訓暨業務經驗